Testamenta Taloha: Boky torolalana ho an’ny mpampianatra seminera

Votoatiny
Pejin-dohateny
Teny fanolorana ny Boky torolalana ho an’ny mpampianatra
Lesona momba ny Testamenta Taloha
- Tonga soa ato amin’ny Testamenta Taloha
- Mosesy 1; Abrahama 3
- Genesisy 1–2; Mosesy 2–3; Abrahama 4–5
- Genesisy 3–4; Mosesy 4–5
- Genesisy 5; Mosesy 6
- Mosesy 7
- Genesisy 6–11; Mosesy 8
- Genesisy 12–17; Abrahama 1–2
- Genesisy 18–23
- Genesisy 24–33
- Genesisy 37–41
- Genesisy 42–50
- Eksodosy 1–6
- Paska
- Eksodosy 7–13
- Eksodosy 14–18
- Eksodosy 19–20; 24; 31–34
- Eksodosy 35–40; Levitikosy 1; 4; 16; 19
- Nomery 11–14; 20–24; 27
- Deoteronomia 6–8; 15; 18; 29–30; 34
- Josoa 1–8; 23–24
- Mpitsara 2–4; 6–8; 13–16
- Rota; 1 Samoela 1–7
- 1 Samoela 8–10; 13; 15–16
- 1 Samoela 17–18; 24–26; 2 Samoela 5–7
- 2 Samoela 11–12; 1 Mpanjaka 3; 6–9; 11
- 1 Mpanjaka 12–13; 17–22
- 2 Mpanjaka 2–7
- 2 Mpanjaka 16–25
- 2 Tantara 14–20, 26, 30
- Ezra 1; 3–7; Nehemia 2, 4–6, 8
- Estera
- Joba 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Ohabolana 1–4; 15–16; 22; 31; Mpitoriteny 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Jeremia 1–3; 7; 16–18; 20
- Jeremia 31–33; 36–38; Fitomaniana 1; 3
- Ezekiela 1–3; 33–34; 36–37; 47
- Daniela 1–7
- Hosea; Joela
- Amosa; Obadia; Jona
- Mika; Nahoma; Habakoka; Zefania
- Hagay 1–2; Zakaria 1–4; 10–14
- Malakia
Lesona Fiomanana hiatrika ny fiainana
- Fifehezana fotopampianarana: Mitady ny valin’ireo fanontaniako
- Fahaiza-manao momba ny fandalinana soratra masina
- Ho zatovo mahery!: Fanaovana safidy
- Manorina fizakan-tena
- Fahasalamana ara-batana sy ara-pihetseham-po
- Fiomanana amin’ny fianarana sy asa hatao any aoriana
- Mahomby any an-tsekoly
- Fiomanana ho misiônera
- Fiomanana ho any amin’ny tempoly
- Fampianaran’ireo mpitarika ao amin’ny Fiangonana
Tovana

Malakia 3: Manokatra ny varavaran’ny lanitra ny fandoavana fahafolonkarena

“Malakia 3: Manokatra ny varavaran’ny lanitra ny fandoavana fahafolonkarena”, Testamenta Taloha: Boky torolalana ho an’ny mpampianatra seminera (2026)

“Malakia 3: Manokatra ny varavaran’ny lanitra ny fandoavana fahafolonkarena”, Testamenta Taloha: Boky torolalana ho an’ny mpampianatra seminera

Malakia: Lesona 158

Malakia 3

Manokatra ny varavaran’ny lanitra ny fandoavana fahafolonkarena

Hatramin’ny andro fahiny ny Ray any An-danitra no nitahy ireo zanany noho ny fahavononan’izy ireo hankatò ny lalàn’ny fahafolonkarenany. Ny tenin’ny Tompo tamin’ny alalan’ny mpaminany Malakia dia manampy antsika hianatra ny fomba hitahiany antsika noho ny fankatoavantsika ny lalàny. Ity lesona ity dia afaka manampy ny mpianatra hahatsapa faniriana mba hankatò ny lalàn’ny Tompo momba ny fahafolonkarena.

Fanomanana ny mpianatra: Asao ny mpianatra hiomana hizara tantara iray izay nitahiana ny olona iray tamin’ny alalan’ny fankatoavana ny didin’ny Tompo mba handoa fahafolonkarena. Raha manampy dia azon’ny mpianatra atao ny manontany ny ray aman-dreniny na ireo mpitarika ao amin’ny Fiangonana na mitady tantara ao amin’ny Bibliothèque de l’Évangile.

Sahanasa fianarana azo atao

Fandoavana fahafolonkarena

Mba hanombohana ny lesona dia azonao atao ny mizara ampahany amin’ny tantara iray izay maneho toe-javatra izay mety hahasarotra ny mandoa fahafolonkarena. Azonao atao ny mizara ny zavatra niainan’ny Loholona Cordón na ny iray amin’ireo zavatra niainanao manokana.

Raha ilaina dia hazavao fa ny fahafolonkarena dia fanomezana “ny iray ampahafolon’ny vola miditra amintsika ho an’ny Fiangonana” (Torio ny Filazantsarako: Torolalana ho an’ny fizarana ny filazantsaran’i Jesoa Kristy [2023], 85; jereo koa ny Fotopampianarana sy Fanekempihavanana 119:3–4).

Vakio ity traikefa manaraka avy amin’ny Loholona Valeri V. Cordón ao amin’ny Fitopololahy ity, ka tadiavo ny antony mety nahasarotra ny fankatoavan’ny ray aman-dreniny ny lalàn’ny Tompo momba ny fahafolonkarena.

12:28

Taorian’ny trangan-javatra vitsivitsy nifandray tamin’ny ady an-trano iray tao Amerika Afovoany dia bankirompitra ny orinasan’ny raiko. Niainga tamin’ny fananana mpiasa 200 niasa tamin’ny fotoana feno izy ary niafara tamin’ny mpanjaitra latsaky ny dimy izay niasa tao amin’ny efitra fiantsonan’ny fiara tao an-tranonay rehefa nilaina. Indray andro, tao anatin’izany fotoan-tsarotra izany, dia reko niresaka ireo ray aman-dreniko raha toa izy ireo ka tokony handoa fahafolonkarena na hividy sakafo ho an’ny zanany. (“Ny fitenin’ny filazantsara”, Liahona, mey 2017, 56)

Inona avy ireo toe-javatra hafa mety hatrehantsika ka mety hampanahirana ny fandoavana fahafolonkarena?

Ity sary manaraka ity dia afaka manampy ny mpianatra handamina ny eritreriny mandritra ity lesona ity. Asao ny mpianatra hanao sary na zavatra mitovitovy amin’izany, eo amin’ny pejy banga ao amin’ny diary fandalinan’izy ireo. Azonao atao koa ny manao sary mitovitovy amin’izany eny amin’ny solaitrabe.

Tondroy ilay faribolana hoe “Ireo zavatra tsapako”. Ampahafantaro ny mpianatra fa any amin’ny faran’ny lesona dia hanana fahafahana hanoratra ny zavatra tsapany momba ny fahafolonkarena izy ireo. Azon’izy ireo atao ny misaintsaina amin’izao fotoana izao momba ireo olana na fanamby atrehan’izy ireo amin’ny fandoavana fahafolonkarena. Azon’izy ireo atao ihany koa ny misaintsaina ny fomba ahafahan’izy ireo mahazo tombontsoa avy amin’ny famantarana ireo fitahiana nampanantenain’ny Tompo an’ireo olona izay mandoa fahafolonkarena.

Rehefa mandalina ny lalàn’ny Tompo momba ny fahafolonkarena ianao dia afaka manampy anao hahatakatra ireo fitahiana izay afaka ny ho azonao sy hanamafy orina ny fanirianao hanaraka io lalàna io ny Fanahy Masina.

Mandrotsaka fitahiana

Mba hanampiana ny mpianatra hahatakatra ny sahan-kevitry ny Malakia 3, dia zarao amin’ny teninao manokana ity famintinana ny Malakia 1–2 ity.

Na dia nanohy nanolotra sorona ho an’ny Tompo aza ny olona tamin’ny andron’i Malakia dia tsy nanaja Azy izy ireo tamin’ny alalan’ny fanolorana “hanina voaloto” sy biby jamba, mandringa ary marary (jereo ny Malakia 1:7–8, 13) ho sorona izay noheverina ho tandindon’i Jesoa Kristy. Ny Tompo dia nandevilevy ireo mpisorona izay “nivily [tamin’ny làlan[’ny Tompo]” sy “nampahatafintohina olona maro” (andininy 2:8) noho ny ohatra ratsin’izy ireo. Ao amin’ny Malakia 3 ny Tompo dia nampianatra fomba iray ahafahantsika manao sorona amin’ny nahim-po ho Azy.

Malakia 3:8–10 dia andinin-tsoratra masina fifehezana fotopampianarana. Hevero ny hanasa ny mpianatra hanisy marika amin’ny fomba miavaka ireo andinin-tsoratra masina fifehezana fotopampianarana mba ho mora aminy ny mahita ny toerana misy azy.

Vakio ny Malakia 3:7–12, ka tadiavo ireo fitahiana nampanantenain’ny Tompo ho an’ireo olona izay manolotra Azy ny fahafolonkarenany. Soraty manodidina an’ilay hoe “Ireo fitahian’ny Tompo” eo amin’ny sary nataonao ireo fitahiana hitanao.

Mety hanampy ny mpianatra ny fahafantarana fa ilay andian-teny hoe “izahao toetra amin’izany Aho” dia mety hidika fa ny Tompo dia miteny hoe: “Sedrao amin’izany Aho.”

Inona avy ireo fahamarinana ianaranao momba ny fahafolonkarena avy amin’ny tenin’ny Tompo ao amin’ny Malakia 3:7–12?

Avelao ny mpianatra hizara ireo fahamarinana hitany. Asao ny mpianatra hanoratra fahamarinana toy ny hoe Rehefa mankatò ny lalàn’ny Tompo momba ny fahafolonkarena isika dia hitahy antsika amim-pahalalahan-tanana Izy ho toy ny fanamarihana ao amin’ny soratra masin’izy ireo eo akaikin’ireo andininy ireo.

Mba hanampiana ny mpianatra hahatakatra io fahamarinana io dia hevero ny hitondra lapoaly sy kaopy ary zinga lava taho misy rano ao an-dakilasy. Apetraho ao anaty lapoaly ilay kaopy. Hazavao fa ny rano dia maneho ireo fitahiana homen’ny Tompo antsika rehefa mandoa fahafolonkarena isika. Asao ny mpianatra iray handrotsaka ilay rano avy ao amin’ilay zinga hankao anatin’ilay kaopy mandra-paha-feno hipoka izany ka hahatonga ny rano hihoatra hankao anatin’ilay lapoaly. Ampifandraiso amin’ny zavatra nampanantenain’ny Tompo ao amin’ny Malakia 3:10 izany.

Ny lalàn’ny Tompo momba ny fahafolonkarena

Inona no azontsika ianarana momba ny Ray any An-danitra rehefa mitahy antsika noho ny fandoavana fahafolonkarena Izy?

Aorian’ny fifanakalozan-kevitra momba ireo fitahiana avy amin’ny fandoavana fahafolonkarena, dia azonao atao ny manamarika fa ny olona sasany izay mandoa fahafolonkarena dia mety tsy hahazo ireo fitahiana antenain’izy ireo ary mety mbola ho sahirana ara-bola ihany. Mety hanontany tena izy ireo hoe nahoana izy ireo no tokony hanohy handoa ny fahafolonkarenany. Azonareo vakina ny Malakia 3:14, 16–17 mba hitadiavana ny zavatra nampanantenain’ny Tompo ny olona izay manohy mankatò Azy amim-pahatokiana.

Mankatò ny lalàn’ny Tompo momba ny fahafolonkarena

Soraty eo akaikin’ny “Ireo zavatra tsapako” eo amin’ny sary nataonao:

Ny zavatra tsapanao momba ny fankatoavana ny lalàn’ny Tompo momba ny fahafolonkarena.
Izay zavatra nohalalininao na tsapanao androany izay hampitombo ny fanirianao handoa fahafolonkarena. Mety ho tafiditra ao anatin’izany ireo fitahiana nampanantenaina avy amin’ny Tompo izay tianao horaisina.

Manasà mpianatra vitsivitsy izay vonona hizara ny fahatsapan’izy ireo momba ny Tompo sy ny lalàny momba ny fahafolonkarena. Azonao atao ihany koa ny mizara ireo fitahiana azonao tamin’ny alalan’ny fankatoavana io lalàna io.

Fanaovana tsianjery

Mety ho tianao ny hanampy ny mpianatra hanao tsianjery ilay andinin-tsoratra masina fifehezana fotopampianarana sy ilay andian-teny manan-danja ao amin’ny soratra masina nianarana tao anatin’ity lesona ity ary hamerina hijery izany ao anatin’ireo lesona any aoriana. Ny andian-teny manan-danja ao amin’ny soratra masina ho an’ny Malakia 3:8–10 dia ny hoe “Ireo fitahiana avy amin’ny fandoavana fahafolonkarena”. Hita ao amin’ny votoatin’ny tovana ao amin’ny “Sahanasa famerenana ny fifehezana fotopampianarana” ireo hevitra hanaovana ny sahanasa fianarana tsianjery.

Loharanom-pitaovana fanampiny

Nahoana aho no tokony hanao laharam-pahamehana ny fandoavana ny fahafolonkarenako alohan’ny fandaniana hafa?

Ny Filoha Dallin H. Oaks ao amin’ny Fiadidiana Voalohany dia nizara izao:

17:24

Nandritra ny Ady Lehibe II, dia nitaiza zaza telo tamin’ny karaman’ny mpampianatra izay tena kely tokoa ilay reniko mananotena. Rehefa tonga saina aho fa tsy mividy loatra ireo zavatra tsara sasantsasany izahay satria tsy dia nanam-bola, dia nanontaniako ny reniko ny antony andoavany volabe avy amin’ny karamany mba hatao fahafolonkarena. Tsy hadinoko mihitsy ny fanazavany: “Dallin a! Mety misy olona afaka mivelona tsara amin’ny tsy fandoavana fahafolonkarena, fa isika kosa tsy afaka. Ny Tompo dia nisafidy ny haka ny rainareo ary namela ahy hitaiza anareo ankizy. Tsy afaka manatanteraka izany aho raha tsy misy ny fitahian’ny Tompo, ary amin’ny alalan’ny fandoavana amim-pahamarinana ny fahafolonkarena no hahazoako ireo fitahiana ireo. Rehefa mandoa ny fahafolonkarenako aho dia mahazo ny fampanantenan’ny Tompo fa hitahy antsika Izy, ary tsy maintsy mahazo ireo fitahiana ireo isika raha te ho tafavoaka velona.” (“La dîme,” Ensign, mai 1994, 33)

Ny Loholona Lynn G. Robbins ao amin’ny Fitopololahy dia nampianatra fa:

9:30

Rehefa mandroso sakafo, dia mora kokoa ny mametraka lovia iray fanampiny eny am-piandohan’ny sakafo noho ny fitadiavana sakafo ho an’ny olona izay tara rehefa lany ny sakafo sy rehefa efa naroso izany. Toy izany koa, moa ve tsy mora kokoa ny manome ny voalohan-teraka na ny voaloham-bokatra toy izay manantena fa hisy “ambim-bava” ampy ho Azy? Amin’ny maha tompon’ny fety Azy, tsy tokony ho Izy ve no ho vahiny manan-kaja indrindra ka tokony hotolorana voalohany? (“La dîme, un commandement même pour les démunis”, Liahona, May 2005, 36)

Inona no ampiasana ny volan’ny fahafolonkarena ato amin’Ny Fiangonan’i Jesoa Kristy ho an’ny Olomasin’ny Andro Farany?

Nizara izao ny Loholona David A. Bednar ao amin’ny Kôlejin’ny Apôstôly Roambinifolo:

16:57

Io kitapom-bola masina io dia ampiasaina ao anatin’ilay fiangonana miroborobo haingana mba hitahiana ara-panahy ny olona tsirairay sy ny fianakaviana amin’ny alalan’ny fanorenana sy fikojakojana tempoly sy trano fivavahana ary amin’ny alalan’ny fanohanana ny asa fitoriana, ny fandikana sy famoahana soratra masina, ny fanatontosana ny fikarohana momba ny tantaram-pianakaviana, ny famatsiana vola ny sekoly sy fianarana momba ny finoana ary amin’ny alalan’ny fanatanterahana ireo tanjona hafa an’ny Fiangonana izay tarihin’ireo mpanompo notendren’ny Tompo. (“Ny varavaran’ny lanitra”, Liahona, nôv. 2013, 19)

Jereo koa ny “How the Church of Jesus Christ Uses Tithes and Donations” (newsroom.ChurchofJesusChrist.org) sy ny “Mankaiza ny vola avy amin’ny fahafolonkarena” (Ensign, ôkt. 2018, 10–11).

Sahanasa fianarana fanampiny

Mandoa fahafolonkarena

Ny mpianatra sasany dia mety hanana fanontaniana mikasika ny fomba ikajiana ny fahafolonkarena, ny fomba fanomezana ny fahafolonkarenany, ny olona anolorona ny fahafolonkarenany, na ireo antsipirian-javatra hafa momba ny fandoavana fahafolonkarena. Mba hanolorana fanampiana dia azonao vakina ilay lahatsoratra hoe “Où vont la dîme et les offrandes de jeûne?” (Jeunes, soyez forts, déc. 2023, 18–19). Afaka mizara ny zavatra izay nianarany ireo mpianatra rehefa avy eo.

Zavatra niainana momba ny lalàn’ny Tompo momba ny fahafolonkarena

Rehefa mifanakalo hevitra momba ny lalàn’ny Tompo momba ny fahafolonkarena ianareo dia mety hahazo tombontsoa avy amin’ny fihainoana tantara avy amin’ny olona hafa mikasika ny fomba nitahian’ny fandoavana fahafolonkarena azy ireo ny mpianatra. Rehefa mifanakalo hevitra momba ireo zavatra niainan’izy ireo mikasika ny fankatoavana ny lalàn’ny Tompo momba ny fahafolonkarena ny mpianatra dia azonao atao ny mizara ny iray amin’ireto tantara manaraka ireto:

Ny Loholona Yoon Hwan Choi ao amin’ny Fitopololahy dia nizara ny fomba nampahatanjahana ny misiônera iray vao avy nahavita asa fitoriana tamin’ny alalan’ny fandoavana fahafolonkarena. Jereo ny “Te hosambatra ve ianareo?” manomboka eo amin’ny mari-potoana 1:52 ka hatramin’ny 3:12.

10:21

Ny Loholona David A. Bednar ao amin’ny Kôlejin’ny Apôstôly Roambinifolo dia nizara ny zavatra nianaran-dRahavavy Bednar momba ny fandoavana fahafolonkarena avy amin’ny reniny. Jereo ny “Varavaran’ny lanitra” manomboka eo amin’ny mari-potoana 0:39 ka hatramin’ny 2:21.

16:57

Niaina fitahiana avy amin’ny fandoavana fahafolonkarena i Toshiko sy Tokichi Yanagida. Jereo ny Les saints: L’histoire de l’Église de Jésus-Christ dans les derniers jours, Tome 3, Hardiment, noblement et en toute indépendance, 1893–1955 (2022), 543–45.

Mijanona ho marina

Ny mpianatra sasany dia mety nahita namana na olona ao amin’ny fianakaviana tsy nankatò ireo didy sy fenitry ny Tompo kanefa toa faly sy miroborobo. Azon’ny mpianatra atao ny mamaky ny Malakia 3:13–15, ka hitady ny zavatra tsapan’ny olona sasany tamin’ny andron’i Malakia. Azonao ampitahaina amin’ny andininy 13–15 ny Malakia 3:16–18, ka hitady ny zavatra nampanantenain’ny Tompo an’ireo olona izay mijanona ho olo-marina.

Mba hanampiana ny mpianatra handalina ireo andininy ireo amin’ny fomba fijery mibanjina ny mandrakizay dia hevero ny hanoratra ireto fanontaniana manaraka ireto eny amin’ny solaitrabe:

Inona no fihevitra tsy marina hitanao ao amin’ny Malakia 3:13–15?
Inona no hitanao fa afaka manampy ny olona izay mety tsy mahita ireo fitahiana eo no ho eo avy amin’ny fijanonana ho mahatoky?

Azonao atao ny mandamina ny mpianatra ho vondrona roa mba hifanakalo hevitra momba ireo fanontaniana.