Testamenta Taloha: Boky torolalana ho an’ny mpampianatra seminera

Votoatiny
Pejin-dohateny
Teny fanolorana ny Boky torolalana ho an’ny mpampianatra
Lesona momba ny Testamenta Taloha
- Tonga soa ato amin’ny Testamenta Taloha
- Mosesy 1; Abrahama 3
- Genesisy 1–2; Mosesy 2–3; Abrahama 4–5
- Genesisy 3–4; Mosesy 4–5
- Genesisy 5; Mosesy 6
- Mosesy 7
- Genesisy 6–11; Mosesy 8
- Genesisy 12–17; Abrahama 1–2
- Genesisy 18–23
- Genesisy 24–33
- Genesisy 37–41
- Genesisy 42–50
- Eksodosy 1–6
- Paska
- Eksodosy 7–13
- Eksodosy 14–18
- Eksodosy 19–20; 24; 31–34
- Eksodosy 35–40; Levitikosy 1; 4; 16; 19
- Nomery 11–14; 20–24; 27
- Deoteronomia 6–8; 15; 18; 29–30; 34
- Josoa 1–8; 23–24
- Mpitsara 2–4; 6–8; 13–16
- Rota; 1 Samoela 1–7
- 1 Samoela 8–10; 13; 15–16
- 1 Samoela 17–18; 24–26; 2 Samoela 5–7
- 2 Samoela 11–12; 1 Mpanjaka 3; 6–9; 11
- 1 Mpanjaka 12–13; 17–22
- 2 Mpanjaka 2–7
- 2 Mpanjaka 16–25
- 2 Tantara 14–20, 26, 30
- Ezra 1; 3–7; Nehemia 2, 4–6, 8
- Estera
- Joba 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Ohabolana 1–4; 15–16; 22; 31; Mpitoriteny 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Jeremia 1–3; 7; 16–18; 20
- Jeremia 31–33; 36–38; Fitomaniana 1; 3
- Ezekiela 1–3; 33–34; 36–37; 47
- Daniela 1–7
- Hosea; Joela
- Amosa; Obadia; Jona
- Mika; Nahoma; Habakoka; Zefania
- Hagay 1–2; Zakaria 1–4; 10–14
- Malakia
Lesona Fiomanana hiatrika ny fiainana
- Fifehezana fotopampianarana: Mitady ny valin’ireo fanontaniako
- Fahaiza-manao momba ny fandalinana soratra masina
- Ho zatovo mahery!: Fanaovana safidy
- Manorina fizakan-tena
- Fahasalamana ara-batana sy ara-pihetseham-po
- Fiomanana amin’ny fianarana sy asa hatao any aoriana
- Mahomby any an-tsekoly
- Fiomanana ho misiônera
- Fiomanana ho any amin’ny tempoly
- Fampianaran’ireo mpitarika ao amin’ny Fiangonana
Tovana

Amosa 8: Mandresy ny hanoanana ara-panahy

“Amosa 8: Mandresy ny hanoanana ara-panahy,” Testamenta Taloha: Boky torolalana ho an’ny mpampianatra seminera (2026)

“Amosa 8: Mandresy ny hanoanana ara-panahy,” Testamenta Taloha: Boky torolalana ho an’ny mpampianatra seminera

Amosa; Obadia; Jona: Lesona 150

Amosa 8

Mandresy ny hanoanana ara-panahy

191st Semiannual General Conference: Russell M. Nelson

Samy efa nahatsapa ho noana avokoa isika rehetra. Alaivo sary an-tsaina hoe mety ho toy ny ahoana izany hoe mijaly noho ny hanoanana ara-panahy izany. Nampianatra ny Isiraelita tamin’ny alalan’i Amosa ny Tompo raha nampiasa izany fanoharana izany. Naminany i Amosa fa tsy homena ny tenin’ny Tompo intsony ny vahoakany satria nolavin’izy ireo izany. Hitarika amin’ny mosary ara-panahy ny tsy fandraisana ny tenin’ny Tompo. Ity lesona ity dia afaka manampy ny mpianatra hampitombo ny fananan’izy ireo toky fa ny Ray any An-danitra sy i Jesoa Kristy dia afaka manome fahafaham-po ny hanoanana ara-panahin’izy ireo amin’ny alalan’ny Famerenana amin’ny laoniny ny filazantsara.

Fanomanana ny mpianatra: Asao ny mpianatra hisaintsaina hoe mety hanao ahoana ny fiainan’izy ireo raha toa ka tsy nanana ny soratra masina na ny tenin’ireo mpaminany izy ireo. Afaka tonga ao an-dakilasy vonona hizara ny zavatra noeritreretiny ny mpianatra.

Ireo sahanasa fianarana azo atao

Hanoanana ara-panahy

Hevero ny hanomboka ny fotoam-pianarana amin’ny alalan’ny fampisehoana sarina sakafo na ny fitondrana sakafo tsotsotra ary ny fametrahana ireto fanontaniana manaraka ireto.

Oviana no fotoana iray nahatsapanao ho tena noana?
Inona no mety ho ataontsika rehefa noana isika?

Anisan’ireo valin-teny mety ho voalaza ny fahatsapana fahasorenana, malemy, na mila sakafo mafy na inona na inona karazany.

Soraty eny amin’ny solaitrabe ilay andian-teny hoe Hanoanana ara-panahy.
Inona no zavatra ara-panahy mety ho katsahin’ny olona ary sarotra tadiavina aminy?

Hevero ny hanoratra eny amin’ny solaitrabe ny valin-tenin’ny mpianatra. Mety hilaza toy ny hoe fitiavan’ Andriamanitra, tanjona eo amin’ny fiainany, fahafantarana fahamarinana, fitarihana amin’ny fanapahan-kevitra sarotra, sns, ny mpianatra.

Makà fotoana hanoratana ao anatin’ny diary fandalinanao ireo fomba izay mety hahatsapanao na ny olona fantatrao hanoanana ara-panahy amin’izao fotoana izao.

Amporisiho ny mpianatra hikatsaka ny Fanahy Masina androany rehefa mandinika ny zavatra azon’izy ireo atao mba handraisana ny sakafo ara-panahy atolotr’i Jesoa Kristy izy ireo.

Mosary amin’ny fandrenesana ny tenin’ny Tompo

Naminany momba ny hanoanana ara-panahy ny mpaminany Amosa. Nanambara ny tenin’ny Tompo tamin’ny vahoakan’i Isiraely izy, saingy tsy nihaino azy izy ireo (jereo ny Amosa 2:12; 7:11–16).

Raha tsapanao fa hanampy izany, dia asao ny mpianatra hamaky ny Amosa 7:12–13 mba hahatakarana ny fomba namalian’ny Isiraelita ny tenin’ny Tompo tamin’ny alalan’i Amosa.

Vakio ny Amosa 8:11–12 hitadiavana ny vokatry ny fandavan’ny olona ny tenin’ny Tompo.

Raha ilaina dia hazavao fa ny mosary dia tsy fahampian-tsakafo diso tafahoatra.

Inona no fiantraikany hitanao?

Raha tsy manamarika izany ny mpianatra dia mizarà fahamarinana tahaka izao manaraka izao: Rehefa mandà ny mpaminanin’ny Tompo ny olona dia tsy mahazo ireo fitahian’ny tenin’ny Tompo izy ireo. Raha tsy misy ny tenin’ Andriamanitra, dia noana ara-panahy isika.
Nahoana araka ny eritreritrao no fampitahana tsara amin’ny fiainana tsy misy ny tenin’ny Tompo ny mosary?
Inona avy ireo fomba nahatanterahan’ny faminanian’i Amosa?

Raha ilaina dia zarao amin’ny mpianatra fa ireo andininy ireo dia milaza vanim-potoana iray fantatra amin’ny hoe apôstazia. Ny apôstazia dia rehefa mandà ireo fitsipiky ny filazantsara ny olona na vondron’olona ary tsy mandefa mpaminany ho azy ireo intsony ny Tompo. Ny fahatanterahana iray ny amin’ny faminanian’i Amosa dia nitranga taorian’ny nahafatesan’ireo apôstôlin’i Kristy ary fantatra amin’ny hoe ny Apôstazia Lehibe. Naharitra mandra-pamerenan’ny Tompo tamin’ny laoniny ny filazantsarany tamin’ny alalan’ny mpaminany Joseph Smith ny Apôstazia Lehibe.

Fanomezana fahafaham-po ny hanoanana ara-panahy

Tao anatin’ny famindrampon’ny Tompo dia nataony mazava tamin’ny vahoakany tamin’ny alalan’ireo mpaminaniny fa hamonjy ny olony amin’ny vokatry ny apôstazia sy hitahy ny vahoakany Izy. Naminany tamin’ny alalan’i Amosa ny Tompo fa hanangona ny olony indray Izy amin’ny andro hoavy ary hitahy azy ireo amin’ny fomba maro (jereo ny Amosa 9:14–15).

Vakio ireto andininy manaraka ireto mba hitadiavana ny zavatra hafa nambaran’ny Tompo tamin’ny alalan’ireo mpaminaniny fa hataony amin’ny fotoampitantanana farany mialoha ny Fiaviany Fanindroany:

Daniela 2:44–45

Asan’ny Apostoly 3:19–21

Efesiana 1:3, 10

Fotopampianarana sy Fanekempihavanana 27:13; 112:30; 128:18

Asao ny mpianatra hizara ny zavatra nianarany sy hametraka izay fanontaniana ananany momba ireo andininy ireo. Mba hahazoana fanampiana fanampiny dia azonao atao ny mitarika azy ireo amin’ny “Famerenana amin’ny laoniny ny filazantsara,” ao amin’ny Lohahevitra sy fanontaniana.

Inona avy ireo fitahiana nomen’ny Ray any An-danitra sy i Jesoa Kristy ho an’ny tontolo noana ara-panahy tamin’ny alalan’ny Famerenana amin’ny laoniny?

Azon’ny mpianatra atao ny mitanisa ny fanalahidy sy fahefan’ny fisoronana, mpaminany, fanambarana, soratra masina, rafitry ny Fiangonana, ôrdônansy, ary fanomezana ny Fanahy Masina.

Eritrereto ny fomba ahafahanao manampy ny mpianatra hahita ny fomba ahafahan’ireo fitahiana ireo manome ny zavatra ilain’izy ireo sy ny an’ireo olona izay karakarainy. Fomba iray ahafahanao manao izany ity manaraka ity.

Asao ny mpianatra hamorona rafi-tantaran’olona iray izay noana amin’ny iray amin’ireo lohahevitra voatanisa eny amin’ny solaitrabe eo ambanin’ny hoe Hanoanana ara-panahy. Asao ny mpianatra hanampy antsipiriany mba hahatonga ilay rafi-tantara ho miaina kokoa. Azonao atao ny mizara izao manaraka izao momba an’i Mirana mba ho ohatra. Avy eo dia azon’ny mpianatra atao ny miara-miasa, na samirery na miaraka amin’ny vondrona kely mba hamaliana ny mombamomba ilay rafi-tantara.

Rafi-tantara: 15 taona i Mirana ary tsy maniry na inona na inona mihoatra noho ny mitady tanjona ho an’ny fiainany izy. Sarotra aminy ny matoky tena, ary tsy azony antoka hoe aiza no lalana tokony halehany.

Inona no azonao zaraina fa nataon’ny Ray any An-danitra sy i Jesoa Kristy tao anatin’ny Famerenana amin’ny laoniny ny filazantsara ka afaka manampy amin’ny famahanana ny hanoanana ara-panahin’i Mirana?

Ataovy izay hampidirana soratra masina ao anatin’ny valin-teninao; teny nambaran’ireo mpitarika ao amin’ny Fiangonana; ary raha azo atao, zavatra niainanao manokana.

Raha sahirana ny mpianatra mamaly, dia azonao atao ny manasa azy ireo hijery ao amin’ny boky torolalana Ho zatovo mahery! na ny sasany amin’ireo andalan-tsoratra masina fifehezana fotopampianarana.

Raha mamaly ilay rafi-tantara misy an’i Mirana ny mpianatra dia azonao atao ny mampitodika azy ireo amin’ny lohatenim-pizarana hoe “Manaova safidy nentanim-panahy” ao amin’ny boky torolalana Ho zatovo mahery! na ny Mosesy 1:39: “Izao no asako sy voninahitro—ny manatanteraka ny tsy fahafatesana sy ny fiainana mandrakizain’ny olona.” Mety hisaintsaina ny mpianatra fa ny fahafantarana fa ny Tompo dia miahy azy ireo ary miasa fatratra amin’ny famerenana azy ireo ho eo anatrehany dia afaka mamoky ny hanoanany ara-panahy izay tsy hahafahany mahatsapa ny fitiavan’ Andriamanitra na tanjon’ny fiainany.

Rehefa avy nomena fotoana ampy tsara ireo mpianatra, dia asao izy ireo hizara ny zavatra nomaniny. Afaka mizara ny zavatra nianarany avy tamin’ilay zavatra niainana ihany koa izy ireo.

Fandinihana ataon’ny tena manokana

Ho famaranana ny lesona dia asao ny mpianatra hamaly ireto fanontaniana manaraka ireto ao amin’ny diarin’izy ireo.

Inona no nianaranao androany ka mampitombo ny fanananao toky fa afaka manome fahafaham-po ny hanoanana ara-panahy ananantsika ny Ray any An-danitra sy i Jesoa Kristy?
Inona no fomba iray tianao hampiharana ny zavatra nianaranao na tsapanao?

Loharanom-pitaovana fanampiny

Nahoana no tena manan-danja ny fandalinana tsy tapaka ny soratra masina?

Nampianatra izao ny Loholona Michael John U. Teh ao amin’ny Fitopololahy:

Mino aho fa ny tsy firaharahiana ny fandalinana ny soratra masina tsy tapaka dia fomba iray hanamafisana ny fontsika. Matahotra aho fa raha mikiry amin’izany lalana izany isika dia homena ampahany kely kokoa amin’ny teny ary amin’ny farany dia tsy mahafantatra na inona na inona momba ireo misterin’ Andriamanitra. Ny figohana ny soratra masina isan’andro, etsy ankilany kosa, dia hanampy antsika hanorina tanjaka sy fahalalana ara-panahy, hanala ny sarona feno fitaky ny devoly, ary hahita ny fandrika napetrany hahavoa antsika. (“The Power of the Word of God,” Liahona, Mar. 2013, 23)

Inona no tena hanome fahafaham-po ny hanoanantsika ara-panahy?

Nampianatra toy izao ny Filoha Jeffrey R. Holland:

Mivavaka aho izao maraina izao mba ho ren’izay rehetra noana sy mangetaheta ary indraindray manirery, ity fanasana avy Aminy ity, dia ilay Mofon’aina, ilay Loharanon’ny rano velona, ilay Mpiandry ondry tsara antsika rehetra, ilay Zanak’ Andriamanitra manao hoe: “Mankanesa aty Amiko, ianareo rehetra izay miasa fatratra sy mavesatra entana, … dia hahita fitsaharana ho an’ny fanahinareo hianareo” [Matio 11:28–29]. Tena “novokisany soa tokoa ny noana” [Lioka 1:53], araka ny fijoroana ho vavolombelona nataon’i Maria reniny. (“He Hath Filled the Hungry with Good Things,” Ensign, Nov. 1997, 66)

Ahoana raha toa ka tsy mahatsapa ho manana fotoana handalinana ny soratra masina aho?

Ny Loholona Richard G. Scott (1928–2015) tao amin’ny Kôlejin’ny Apôstôly Roambinifolo dia nanome izao torohevitra izao:

Aza milefitra amin’ny laingan’i Satana hoe tsy manana fotoana handalinana ny soratra masina ianareo. Misafidiana haka fotoana handalinana azy ireny. Manan-danja kokoa noho ny torimaso, ny sekoly, ny asa, ny fandaharana amin’ny fahitalavitra, ny jeux vidéo, na ny tambajotran-tserasera ny fivokisana isan’andro amin’ny tenin’ Andriamanitra. Mety mila mamerina mandamina indray ireo laharam-pahamehanareo ianareo mba hanokanana fotoana ho an’ny fandalinana ny tenin’ Andriamanitra. Raha ilaina izany dia ataovy! (“Ataovy voalohany amin’ny laharam-pahamehanareo ny fampiasana finoana,” Liahona, nôv. 2014, 93)

Ahoana no fiafaran’ilay mosary ara-panahy tamin’ny apôstazia lehibe?

Nizara izao ny Filoha Spencer W. Kimball:

Taorian’ny taonjato maro nisian’ny fahamaizinana ara-panahy, … ambaranay amim-boninahitra amin’izao tontolo izao fa mifarana ny mosary ara-panahy, lany ny hain-tany ara-panahy, sitrahan’ny olon-drehetra ny tenin’ny Tompo ao anatin’ny fahadiovany sy ny fahafenoany. Tsy mila mivembena hatrany amin’ny ranomasina rehetra eny ary hatrany amin’ny avaratra ka hatrany amin’ny atsinanana ny olona, mikatsaka ny filazantsara marina araka ny nambaran’i Amosa, satria efa eto ilay fahamarinana maharitra mandrakizay.” (nandritra ny Conference Report, Apr. 1964, 93–94; jereo koa ny Old Testament Student Manual, 3rd ed. [2003], 94)

Sahanasa fianarana fanampiny

Fanomezana fahafaham-po ny hanoanana ara-panahy

Raha tianao, mba hanampiana ny mpianatra hahatakatra kokoa ny hoe nahoana ny tenin’ Andriamanitra no manome fahafaham-po ny hanoanana ara-panahy, dia azonao atao ny mampiseho ilay horonan-tsary hoe “Daily Bread: Pattern” ary asao ny mpianatra hitady fahamarinana fanampiny momba ny fanomezanavalinyny hanoanana ara-panahy.

2:52

Apôstazia ao amin’ny Testamenta Taloha

Fahamarinana iray hafa azo ianarana avy amin’ny Amosa 8:11–12 ny hoe vokatry ny fandavana ny tenin’ny Tompo ny apôstazia. Azonao atao ny mangataka ny mpianatra hifanakalo hevitra momba ny heviny ny amin’ireo fahasamihafana sy fitoviana eo amin’ireto manaraka ireto:

Apôstazian’ny isam-batan’olona

Apôstazian’ny vondrona iray

Apôstazia maneran-tany

Asao ny mpianatra hieritreritra ny fomba ahafahan’ny Famerenana amin’ny laoniny ny filazantsaran’i Jesoa Kristy manampy amin’ny fanarenana ny toe-javatra naterak’ireo karazana apôstazia tsirairay avy.

Ilay horonan-tsary hoe “The Great Apostasy” dia mampiseho ny fomba nanampian’ny fikarohan’i Wilford Woodruff ny fiangonana marina azy hahatakatra ny Apôstazia sy ny filana ny Famerenana amin’ny laoniny ny fiangonan’i Jesoa Kristy.

16:36

Manondro an’i Kristy ireo mpaminany

Mba hanampiana ny mpianatra hahatakatra kokoa ny maha-zava-dehibe ny tenin’ireo mpaminany dia vakio ny Amosa 7:11–16 sy ny Amosa 8:11–12, ka tadiavo ny fomba nitohizan’ny iray ho amin’ilay iray hafa. Asao ny mpianatra hisaintsaina hoe mety hanao ahoana ny fiainan’izy ireo raha toa ka tsy nandre ny tenin’ny Tompo tamin’ny alalan’ireo mpaminany izy ireo. Azonao atao ny mampiseho ny horonan-tsary “Why Do We Have Prophets?” mba hanehoana fa ny tenin’ny Tompo izay omeny antsika amin’ny alalan’ireo mpaminany dia mampianatra antsika mba hanatona Azy. Azonao atao ny manasa ny mpianatra hitady ny anjara asan’ireo mpaminany eo am-pijerena izany.

1:37

Inona no anjara asa lehibe sahanin’ny mpaminany?

Azonao zaraina ihany koa ity teny nambaran’ny Loholona Neil L. Andersen ao amin’ny Kôlejin’ny Apôstôly Roambinifolo manaraka ity:

Ny anjara asa manan-danja indrindra sahanin’ny mpaminanin’ny Tompo dia ny mampianatra antsika momba ny Mpamonjy sy ny mitarika antsika hankany Aminy. …

Tsy mijoro manelanelana anao sy ny Mpamonjy ny mpaminany. Fa mijoro eo anilanao kosa izy ary manondro ny lalana mankany amin’ny Mpamonjy. (“Ilay mpaminanin’ Andriamanitra,” Liahona, mey 2018, 25, 27)

Ahoana no ahafahan’ny fanarahana ireo mpaminany manampy amin’ny fanomezana fahafaham-po ny hanoanana ara-panahy?

Ny fitahiana avy amin’ny soratra masina

Tsy tahaka ny tamin’ny mosarin’ny tenin’ Andriamanitra (jereo ny Amosa 8:11–12), amin’izao vaninandrontsika izao isika dia manana sesehena amin’ny tenin’ Andriamanitra ao amin’ny soratra masina. Raha toa ka ilaina ny hahatakaran’ny mpianatra bebe kokoa ny fitahiana avy amin’ny fananana soratra masina dia azonao atao ny mampiseho ilay horonan-tsary hoe “The Blessing of Scripture” dia asao ny mpianatra hitady ireo antony samihafa mety tsy hananan’ny olona ny tenin’ Andriamanitra eo amin’ny fiainany.

3:4

Azo hanontaniana ny mpianatra ny zavatra nianarany avy amin’ilay horonan-tsary momba ny vokatry ny tsy fananana ny tenin’ Andriamanitra eo amin’ny fiainan’izy ireo na ireo antony anomezan’ny olona sasany lanja ny soratra masina mihoatra noho ny olona hafa.