Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Taniela 1: “ʻE ʻIkai … Fakaʻuliʻi ʻe [Taniela] Ia”

“Taniela 1: ‘ʻE ʻIkai … Fakaʻuliʻi ʻe [Taniela] Ia,’” Fuakava Motuʻá – Tohi Lēsoni ʻa e Faiako Seminelí (2026)

“Taniela 1: ‘ʻE ʻIkai … Fakaʻuliʻi ʻe [Taniela] Ia,’” Fuakava Motuʻá – Tohi Lēsoni ʻa e Faiako Seminelí

Taniela 1–7: Lēsoni 142

Taniela 1

“ʻE ʻIkai … Fakaʻuliʻi ʻe [Taniela] Ia”

Daniel Refusing the King’s Meat and Wine, by Del Parson

ʻI he taimi ʻoku tau fehangahangai ai mo ha ngaahi tūkunga ʻokú ne siviʻi ʻetau tukupā ke talangofua ki he ngaahi fekau ʻa e ʻEikí, ʻoku tau fakavaivai nai pe tuʻu taʻe-ueʻia? ʻI he hoko ʻa Taniela mo hono ngaahi kaungāmeʻá ko ha kau tamaioʻeiki ʻi he fakamaauʻanga ʻo e Tuʻi ko Nepukanesá, naʻe fekauʻi kinautolu ke nau maumauʻi e ngaahi fono ʻa e ʻEikí kuo fakahā mai ki he moʻui leleí, ka naʻa nau tuʻu taʻe-ueʻia. ʻE lava ke tokoni ʻa e lēsoni ko ʻení ke fakamālohia ʻe he kau akó ʻenau tukupā ke talangofua ki he Lea ʻo e Poto ʻa e ʻEikí.

Teuteu ʻa e tokotaha akó: Fakaafeʻi e kau akó ke nau ako ʻa e vakai fakalūkufua ki he “Lea ʻo e Potó” ʻi he Ngaahi Tefitó mo e Ngaahi Fehuʻí ʻi he Gospel Library. Poupouʻi ke nau aleaʻi ʻa e founga kuo tāpuekina ai kinautolu pe ko ha niʻihi kehe ʻi hono tauhi e Lea ʻo e Poto ʻa e ʻEikí.

Ngaahi ʻEkitivitī Ako ʻOku Ala Fakahokó

Ko e hā ʻa e meʻa te ke faí?

Fakakaukau ke kamata e kalasí ʻaki hano fakamatalaʻi ha taha kei talavou ʻoku manako ke tali e ngaahi pole ke ʻahiʻahiʻi ha ngaahi meʻa foʻou, hangē ko e sīpinga ko ʻení. Te ke lava ʻo liliu ʻa e hingoá mo e ngaahi ʻekitivitií ke kaungamālie ange ki hoʻo kau akó.

Ko Mateó ko ha mēmipa mālohi ia ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku ʻiloa ia ʻi heʻene ʻahiʻahiʻi ha ngaahi meʻa foʻoú, ko ia ʻoku faʻa ʻoange ʻe hono ngaahi kaungāmeʻá ha ngaahi pole hangē ko ʻení:

Naʻe poleʻi ia ʻe hano kaungāmeʻa ke lele ʻi ha malafoni. Naʻe tali ʻe Mateo ʻa e polé.
Naʻe poleʻi ia ʻe hano kaungāmeʻa ke uku ʻi ha anovai poloka. Naʻe tali ʻe Mateo ʻa e polé.
Naʻe poleʻi ia ʻe hano kaungāmeʻa ke ne fakafeʻiloaki pē ia ki ha taʻahine foʻou ʻi he akó. Naʻe tali ʻe Mateo ʻa e polé.

Hili hono lau e pole hokó, kiʻi taʻofi siʻi ʻo fai e fehuʻi ʻi laló.
ʻI ha ʻaho ʻe taha naʻe poleʻi ai ʻa Mateo ʻe hano kaungāmeʻa ke ne inu kava mālohi ʻi ha paati.
ʻOkú ke pehē ko e hā e tali ʻa Mateó? Ko e hā hono ʻuhingá?

Te ke lava ʻo fehuʻi ki he kau akó pe ʻoku angamaheni ʻi homou feituʻú ʻa e teke ke maumauʻi ʻa e Lea ʻo e Potó. Te nau lava foki ʻo fakamatalaʻi ha ngaahi tūkunga te nau ala ongoʻi ai ha teke mālohi ke maumauʻi ia. Fakakaukau ke poupouʻi e kau ako kuo nau ala maumauʻi e fekau ko ʻení ke manatuʻi ʻe tokoniʻi kinautolu ʻe he ʻEikí ʻi heʻenau tafoki kiate Ia ʻo fakatomalá. Fakapapauʻi ki he kau akó ʻoku ʻofa ʻa e ʻEikí ʻiate kinautolu pea mo fakaafeʻi kinautolu ke toutou feinga pē.

Ke fakafuofuaʻi ʻenau tukupā ke talangofua ki he Lea ʻo e Potó, ʻe lava ke tali ʻe he kau akó ʻa e ngaahi meʻá ni ʻi heʻenau tohinoa akó.
ʻOkú ke pehē ʻe fēfē haʻo tali ʻi he tūkunga tatau? Ko e hā hono ʻuhingá?
ʻOkú ke pehē ʻe fēfē haʻo tali kapau ʻe ʻoatu ha meʻa angamaheni hangē ko e kofí pe tií?

ʻI hoʻo ako ʻa e Taniela 1 he ʻaho ní, fakafanongo ki ha ngaahi fakakaukau mo ha ngaahi ongo ʻe ala ʻoatu ʻe he Tamai Hēvaní ʻo fakafou ʻi he Laumālie Māʻoniʻoní. Kumi ha ngaahi founga ke fakamālohia ai hoʻo tukupā ke talangofua ki he Lea ʻo e Poto ʻa e ʻEikí.

Naʻe talangofua ʻa Taniela ki he ʻEikí

Fakafuofua ki he 606 BC, naʻe ʻohofi ʻe Nepukanesa, ko e tuʻi ʻo Pāpiloné, ʻa Selusalema pea ʻave pōpula ha niʻihi pau ʻo e kau ʻIsilelí ki Pāpilone. Naʻe tuʻutuʻuni ʻe he tuʻí ke akoʻi ha niʻihi ʻo e toʻu tupu ʻIsilelí ke ngāue ʻi hono falé. Naʻe kau ʻi he toʻu tupu ko ʻení ha kau talavou ʻe toko fā ko Taniela, Hanania, Misaeli, mo ʻAsalia. Naʻe liliu honau hingoá ʻi Pāpilone ki he Peletisasa, Seteleki, Mēsake, mo ʻApetinikō (vakai, Taniela 1:1–7).

Lau ʻa e Taniela 1:5, 8–14, ʻo kumi e meʻa naʻe fakahinohino ʻe he tuʻí kia Taniela mo hono ngaahi kaungāmeʻá ke nau faí.

Ko e hā nai e ʻuhinga naʻe faingataʻa ai kia Taniela mo hono ngaahi kaungāmeʻá ʻa e kole ko ʻení?
ʻOkú ke pehē ko e hā ka hoko ai hono ʻikai ke kai mo inu ha ngaahi meʻa paú ko ha feilaulau ʻoku taau neongo ʻe fakatupu houhau ki he tuʻí?

Te ke lava ʻo fakamanatu ki he kau akó naʻe muimui ʻa e kau ʻIsilelí ʻi he kuonga ʻo Tanielá ki he fono ʻa Mōsesé, ʻa ia naʻe kau ai ha ngaahi fakangatangata pau ki he meʻatokoní (vakai, Teutalōnome 14).

Ngaahi tāpuaki ʻo e talangofua ki he ʻEikí

Ke tokoni ke ʻiloʻi ʻe he kau akó ʻa e founga naʻe tāpuekina ai ʻe he ʻEikí ʻa Taniela mo hono ngaahi kaungāmeʻá, te ke lava ʻo fokotuʻutuʻu ʻa e kau akó ki ha ngaahi hoa. ʻI heʻenau lau e ngaahi veesi ko ʻení, fakaafeʻi ha hoa ʻe taha ke kumi e founga naʻe tāpuakiʻi fakatuʻasino ai ʻe he ʻEikí ʻa Taniela mo hono ngaahi kaungāmeʻá, pea fakaafeʻi e hoa ʻe tahá ke kumi e founga naʻe tāpuekina fakalaumālie ai kinautolu ʻe he ʻEikí. Hili iá pea fakaafeʻi e ngaahi hoá ke fevahevaheʻaki e meʻa ne na maʻú. ʻAi ke nau fakaʻilongaʻi e ngaahi tāpuaki fakatuʻasinó mo fakalaumālié ʻi ha founga kehekehe ʻe ua (hangē ko hono fakaʻilongaʻi ʻaki ha ngaahi lanu kehekehe pe laineʻi ʻa e taha kae fakaʻilongaʻi mataʻāʻā ʻa e taha).

Lau ʻa e Taniela 1:15–20, ʻo kumi e founga naʻe tāpuakiʻi ai ʻe he ʻEikí ʻa Taniela mo hono ngaahi kaungāmeʻá ʻi heʻenau talangofuá.

Toe lau ʻa e veesi 15–20, ka ʻi he taimi ko ʻení fakalaulauloto ki he meʻa ʻokú ke ako fekauʻaki mo e Tamai Hēvaní mo Sīsū Kalaisí.

Ko e hā e meʻa ʻoku akoʻi atu ʻe he ngaahi veesi ko ʻení fekauʻaki mo e ʻOtuá?
ʻE fakamālohia fēfē ʻe he mahino ko ʻení hoʻo holi ke falala mo talangofua kiate Iá?

Te ke lava ʻo fakamatalaʻi ange kuo fakahā ʻe he ʻEikí ha fono ki he moʻui leleí maʻa ʻEne fānaú he ʻahó ni, ʻo hangē ko ia ʻi he kuonga ʻo Tanielá. ʻOku ʻiloa ia ko e Lea ʻo e Potó (vakai, Tokāteline mo e Ngaahi Fuakava 89).

ʻE lava ke tokoni ʻa e ʻekitivitī ko ʻení ki he kau akó ke nau ako ʻa e Lea ʻo e Potó. Fakakaukau ke ʻoange ha pepa mo ha ʻū naunau fakaʻaati kae pehē ki ha ngaahi tatau ʻo e Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí maʻá e kau ako ʻoku ʻikai lava ʻo hū ki he Gospel Library. Mahalo te ke fakangatangata e taimi ʻi he ʻekitivitī ko ʻení kae fakaʻatā ha taimi feʻunga ki he aʻusia ʻi he fakaʻosinga ʻo e lēsoní.

Fakakaukauloto kuo kole atu ke ke faʻu ha pousitā ʻokú ne fakamatalaʻi ha meʻa makehe fekauʻaki mo hoʻo tui fakalotú. ʻOkú ke fili ke faʻu hoʻo pousitaá fekauʻaki mo e Lea ʻo e Potó. Fakaʻaongaʻi ha niʻihi pe kotoa ʻo e ngaahi maʻuʻanga tokoni ko ʻení ke fakapapauʻi ʻa e meʻa ke fakakau aí:

Tokāteline mo e Ngaahi Fuakava 89:18–21
Taniela 1:15–20
“Lea ʻo e Potó” ʻi he Fakahinohino ki he Ngaahi Folofolá pe Ngaahi Tefitó mo e Ngaahi Fehuʻí (Gospel Library) pe ʻi he konga “Fēfē nai ʻa e … ?” ʻo e Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí (2022)
“Ko e Lea ʻo e Potó: Ko e Hā Ia, ʻOku ʻIkai Ko e Hā Ia,” Liahona, ʻAokosi 2019, 26–28

Fakapapauʻi ke fakakau ha fakamatala ʻo e moʻoni fekauʻaki mo e Lea ʻo e Potó ʻi hoʻo pousitaá. ʻE lava ke maʻu ʻa e moʻoni ko ʻení mei he aʻusia ʻa Tanielá pe mei ha ngaahi maʻuʻanga tokoni kehe.

Fakaafeʻi e kau akó ke vahevahe ʻenau ngaahi pousitaá mo e fakamatala ʻo e moʻoní mo e kalasí. ʻI he kotoa e ngaahi moʻoni te nau ala vahevahé, fakamamafaʻi e ngaahi meʻá ni: ʻI heʻetau tauhi e fekau ʻa e ʻEikí ke talangofua ki he Lea ʻo e Potó, te Ne tāpuakiʻi fakatuʻasino mo fakalaumālie kitautolu.

(Fakatokangaʻi ange: ʻI he Lēsoni 160: “Siviʻi Hono 10 Hoʻo Akó,” ʻe toe vakaiʻi ʻe he kau akó ʻa e pousitā ne nau faʻú. ʻE ala tokoni ke tānaki e ngaahi pousitaá pe fakaʻaliʻali kinautolu kae ʻoua kuó ke akoʻi e lēsoni ko iá ke lava e kau akó ʻo sio ki ai.)

ʻE ala fakakaukau e kakai ʻoku ʻikai mahino kiate kinautolu e taumuʻa ʻo e Lea ʻo e Potó ko ha ngaahi fakangatangata launoa ia ʻoku fakahoko ʻe he Siasí. Tuku ha kiʻi taimi ke ke fakalaulauloto ai ki he ngaahi tāpuaki ʻoku maʻu mei hono tauhi e Lea ʻo e Potó pea mo e ngaahi nunuʻa ʻo hono maumauʻi iá ki he fakafoʻituituí, ngaahi fāmilí, mo e sōsaietí.

ʻOkú ke pehē ʻoku fakahaaʻi fēfē ʻe he Lea ʻo e Potó ʻa e ʻofa ʻa e ʻOtuá ki Heʻene fānaú?

Tukupā he taimí ni ke talangofua ki he ʻEikí

Ke tokoni ke fakamālohia ʻe he kau akó ʻenau tukupā ke talangofua ki he Lea ʻo e Poto ʻa e ʻEikí, te ke lava ʻo fakaafeʻi kinautolu ke fakakakato e ongo sētesi ko ʻení ʻi heʻenau tohinoa akó. ʻI heʻenau teuteu ke tohí, kole ange ke nau fakakaukau ki he founga ʻe lava ai ʻe heʻenau tukupā ke talangofua ki he Lea ʻo e Potó ʻo fakamālohia honau vā fetuʻutaki mo e Tamai Hēvaní mo Sīsū Kalaisí.

ʻOku ou fie talangofua ki he Lea ʻo e Potó koeʻuhí …

Ko e meʻa ʻe taha te u lava ʻo fai ke tokoniʻi au ke u talangofua ki he Lea ʻo e Potó ko e …

Te ke lava ʻo fakaʻosi ʻaki hano vahevahe hoʻo fakamoʻoni kia Sīsū Kalaisí mo e ngaahi tāpuaki kuó ke mamata ai ʻi he talangofua ki Heʻene Lea ʻo e Potó.

Ngaahi Maʻuʻanga Tokoni Kehé

Ko e hā e ʻuhinga ʻoku mahuʻinga ai ke tokangaʻi hoku sino fakamatelié?

Naʻe vahevahe ʻe Palesiteni Lāsolo M. Nalesoni ʻo pehē:

ʻI he tuʻunga fakaofo ko ia ho sinó, ʻoku toe mahuʻinga ange hono fatongia taupotu tahá—ke hoko ko ha nofoʻanga ho laumālié.

Naʻe fiemaʻu ho laumālié ʻa ho sinó pea hoko ko ha laumālie moʻui, ke ne aʻusia ʻa e moʻui fakamatelié pea mo hono ngaahi faingataʻá mo e ʻahiʻahí. Ko ha konga ia ʻo e ʻahiʻahi kotoa pē ke vakaiʻi pe ʻe lava ke puleʻi ho sinó ʻe he laumālie ʻoku nofoʻia aí.

ʻI he mahino kiate kitautolu hotau natulá mo ʻetau taumuʻa ʻi he māmaní pea ko hotau sinó ko ha ngaahi temipale fakatuʻasino ia ʻo e ʻOtuá, te tau ʻiloʻi ai ʻoku taʻefakaʻapaʻapa ke tuku ha meʻa ke hū ki ai te ne ala ʻuliʻi e sinó. (“Ko Ho Sinó: Ko Ha Meʻaʻofa Fakaofo ia ke Mataʻikoloa ʻAki,” Liahona, ʻAokosi 2019, 5–6)

ʻE lava fēfē ʻe he tukupā ke talangofua ki he Lea ʻo e Potó ʻo tāpuekina aú?

Naʻe vahevahe ʻe ʻEletā Lainolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá:

14:39

ʻI ha efiafi ʻe taha ʻi heʻeku kei talavoú, ne u tangutu mo ʻeku faʻeé ʻi mui ʻi hono funga mohengá pea talanoa fakamātoato ki he mahuʻinga hono moʻui ʻaki e Lea ʻo e Potó. Naʻá ne pehē, “ʻOku ou ʻilo mei he ngaahi aʻusia ʻa e niʻihi kehe mei he ngaahi taʻu kuohilí, ʻa e mole e tuʻunga fakalaumālié mo e ongoʻi ngofua ʻo e Laumālié ʻi he ʻikai muimui ki he Lea ʻo e Potó.” Naʻá ne sio hangatonu mai kiate au peá u ongoʻi ʻa e tō mamafa ʻo ʻene ngaahi leá ki hoku lotó: “Palōmesi mai kiate au he ʻahó ni Loni [naʻá ne ui au ko Loni], te ke moʻui ʻaki maʻu pē ʻa e Lea ʻo e Potó.” Naʻá ku fakahoko molumalu e palōmesi ko iá kiate ia, pea kuó u tauhi pau ia ʻi he ngaahi taʻu kotoa ko ʻení.

Naʻe tokoni e tukupā ko iá ʻi heʻeku feohi mo e ngaahi kaungāmeʻa ʻi heʻeku kei talavoú pea ʻi ha ngaahi taʻu kimui ange ʻi heʻeku ʻi ha ngaahi tūkunga he ngāué ne inu kavamālohi ai e kakai kehé. Naʻá ku tomuʻa fai ha fili mahuʻinga ke muimui ki he ngaahi fono ʻa e ʻOtuá, pea kuo teʻeki fiemaʻu ke u toe fakahoko ia. Kuo folofola ʻa e ʻEikí ʻo pehē, “Ko au, ko e ʻEikí, ʻoku ou haʻisia, ʻo ka mou ka fai ʻa e meʻa ʻoku ou lea ʻakí; ka ʻo ka ʻikai te mou fai ʻa ia ʻoku ou lea ʻakí, ʻoku ʻikai hamou talaʻofa” [Tokāteline mo e Ngaahi Fuakava 82:10]. Ko e hā ʻokú Ne folofola ʻaki kiate kinautolu ʻoku tauhi e Lea ʻo e Potó? Te tau maʻu e talaʻofa ʻo e moʻui lelei, mālohi, poto, ʻilo, pea mo e kau ʻāngelo ke maluʻi kitautolu. (“Ko e Tauhi Pau ki Heʻetau Ngaahi Palōmesí mo e Ngaahi Fuakavá,” Liahona, Nōvema 2019, 54–55)

Ko e fē ha meʻa te u lava ʻo ako lahi ange ai fekauʻaki mo e Lea ʻo e Potó?

Ke ako lahi ange fekauʻaki mo e Lea ʻo e Potó, vakai ki he pulusinga ʻo ʻAokosi 2019 ʻo e Liahoná.

Ngaahi ʻEkitivitī Fakalahi ki he Akó

Taniela 1:8. “Naʻe fakapapau ʻa Taniela ʻi hono lotó”

ʻI hono ako ʻe he kau akó e talanoa ʻo Tanielá, ʻe ala tokoni ke nau fakakaukau ki heʻene tukupā ke talangofua ki he ʻEikí. Fakakaukau ke fakaafeʻi e kau akó ke fakaʻilongaʻi ʻa e kupuʻi lea “Naʻe fakapapau ʻa Taniela ʻi hono lotó” ʻi he Taniela 1:8. Hili iá pea ʻeke ange ʻa e ongo fehuʻi ko ʻení:

ʻOkú ke pehē ko e fē taimi naʻe fili ai ʻe Taniela ke talangofua ki he ʻEikí?
Naʻe mei tākiekina fēfē nai ʻe he fili ko iá ʻa e tali ʻa Tanielá ʻi ha tūkunga faingataʻa?

Aleaʻi e sīpinga ʻa Taniela ʻo e tomuʻa fili ke talangofua ki he ʻEikí pea mo e founga ʻe lava ke tokoniʻi ai kitautolu ʻe he muimui ki he sīpinga ko iá ke tau talangofua ki he Lea ʻo e Potó ʻi he ngaahi tūkunga faingataʻá.

Ngaahi tāpuaki fakatuʻasino mo fakalaumālié

Ke tokoni ke ʻiloʻi ʻe he kau akó e founga ʻe lava pea ʻe tāpuekina fakatuʻasino mo fakalaumālie fakatouʻosi ai kitautolu ʻe he ʻEikí, te ke lava ʻo huluʻi ʻa e “A Brand New Year: Physical Health” mei he taimi 0:53 ki he 4:19.

7:29

Hili iá, te ke lava ʻo vahevahe e ngaahi akonaki ko ʻeni meia Palesiteni Poiti K. Peeka (1924–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá:

Kuó u toki ʻiloʻi … ko ha taumuʻa mahuʻinga ʻo e Lea ʻo e Potó ʻoku fekauʻaki ia mo e fakahaá. …

Kapau ʻoku ʻikai lava ha taha ʻoku “konā” ʻo fakafanongo ki he lea mahinongofuá, ʻe lava fēfē ke nau tali ki he ngaahi ueʻi fakalaumālie ʻoku ongo taha ki honau lotó?

Neongo hono mahuʻinga ʻo e Lea ʻo e Potó ʻi heʻene hoko ko ha fono ʻo e moʻui leleí, mahalo ʻe lahi ange hono mahuʻinga fakalaumālié kiate koe ʻi he fakatuʻasinó. (“Prayers and Answers,” Ensign, Nov. 1979, 20)

ʻOku ʻikai talaʻofa mai ʻe he Lea ʻo e Potó te mou maʻu ha moʻui lelei haohaoa, ka ʻokú ne akoʻi ʻa e founga ke tauhi ʻaki ʻa e sino kuo fanauʻi mai ai ʻa kimoutolú ke ʻi he tuʻunga māʻolunga tahá pea ongoʻingofua ʻe homou ʻatamaí ʻa e ngaahi ueʻi fakalaumālie ʻoku pelepelengesí. (“The Word of Wisdom: The Principle and the Promises,” Ensign, May 1996, 18)

Ko e hā ha ngaahi tāpuaki fakatuʻasino pe fakalaumālie kuó ke maʻu pe ko ha taha ʻokú ke ʻiloʻi ʻi he talangofua ki he Lea ʻo e Potó?

Te ke lava ʻo fakamanatu ki he kau akó ʻoku maʻu e ngaahi tāpuaki ʻa e ʻEikí ʻo fakatatau ki Hono finangaló mo ʻEne taimí.