Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Taniela 2: “[Ko] Ha Puleʻanga ʻA Ia ʻE ʻIkai ʻAuha ʻo Lauikuonga”

“Taniela 2: ‘[Ko] Ha Puleʻanga ʻA Ia ʻE ʻIkai ʻAuha ʻo Lauikuonga,’” Fuakava Motuʻá – Tohi Lēsoni ʻa e Faiako Seminelí (2026)

“Taniela 2: ‘[Ko] Ha Puleʻanga, ʻA Ia ʻE ʻIkai ʻAuha ʻo Lauikuonga,’” Fuakava Motuʻá – Tohi Lēsoni ʻa e Faiako Seminelí

Taniela 1–7: Lēsoni 143

Taniela 2

“[Ko] Ha Puleʻanga, ʻA Ia ʻE ʻIkai ʻAuha ʻo Lauikuonga”

The Old Testament King Nebuchadnezzar is depicted sitting on his throne in front of the prophet Daniel. Daniel stands as he interprets the king's dream. In the background, depictions from the king's dream can be seen such as the great image and a stone cut from the mountain without hands getting ready to destroy the image. (The stone represents the latter-day kingdom of God.)

Naʻe fakahā ʻe he ʻEikí kia Taniela ha meʻa-hā-mai ʻo e ngaahi ʻaho kimui ní, ʻa ia ʻe fokotuʻu ai ʻe he ʻEikí Hono puleʻangá ʻi he māmaní. ʻE fakafonu ʻe he puleʻanga ʻo e ʻEikí, ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻa e māmaní pea ʻe tuʻu ia ʻo taʻengata. ʻE lava ke tokoni ʻa e lēsoni ko ʻení ke fakamālohia e fakamoʻoni ʻa e kau akó ki hono fakalangi ʻo e Fakafoki Mai ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Teuteu ʻa e tokotaha akó: Fakaafeʻi ʻa e kau akó ke fili ha taha ʻo e ngaahi fakakaukaú ni ke teuteu ki he lēsoni ko ʻení:

Ngaahi ʻEkitivitī Ako ʻOku Ala Fakahokó

Fakamoʻoni ki hono Fakafoki Mai ʻo e Ongoongoleleí

Fakakaukau ke fakaafeʻi e kau akó ke vahevahe ha faʻahinga fehuʻi pē ʻoku nau manatuʻi ʻoku fai lolotonga ha ʻinitaviu lekomeni temipale. Kapau ʻe tokoni, ʻe lava ke mou vakai ki he ngaahi fehuʻi lekomeni temipalé ʻi he fakamatala fakalahi ʻo e Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí. Hili hono vahevahe ʻe he kau akó ha ngaahi fehuʻi ʻe niʻihi ʻoku nau manatuʻi, te ke lava ʻo hiki ʻa e fehuʻi ko ʻení ʻi he palakipoé.

Fakakaukau ki he founga te ke tali ai e fehuʻi lekomeni temipale ko ʻení:

ʻOku ʻi ai haʻo fakamoʻoni ki hono Fakafoki Mai ʻo e ongoongolelei ʻo Sīsū Kalaisí?

ʻO ka fiemaʻu, fakamatalaʻi ange ko hono Fakafoki Mai ʻo e Ongoongoleleí “ko hono toe fokotuʻu [ia] ʻe he ʻOtuá ʻa e ngaahi moʻoni mo e ngaahi ouau ʻo ʻEne ongoongoleleí ʻi he kakaí ʻi he māmaní” (Fakahinohino ki he Ngaahi Folofolá, “Fakafoki Mai ʻo e Ongoongoleleí,” Gospel Library).

Fakakaukau ke hiki ʻa e Ko e hā hono ʻuhingá hili ʻa e fehuʻi ʻi he palakipoé. Fakaafeʻi e kau akó ke fakalaulauloto ki heʻenau ngaahi tali ki he ongo fehuʻí fakatouʻosi.

ʻI hoʻo ako ʻa e Taniela 2 ʻi he ʻaho ní, fakaafeʻi e Laumālie Māʻoniʻoní ke tokoni atu ke ke ʻiloʻi e ngaahi moʻoni te ne lava ʻo fakamālohia hoʻo fakamoʻoni naʻe fakafoki mai ʻe he Tamai Hēvaní mo Sīsū Kalaisi ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ki he māmaní.

Ko e misi ʻa e Tuʻi ko Nepukanesá

Naʻe ʻi ai ha misi ʻa e Tuʻi ko Nepukanesa ʻo Pāpiloné naʻe hohaʻa ai ʻene fakakaukaú. Naʻe ʻikai lava ʻe ha taha ʻo ʻene kau tangata potó ʻo talaange ko e hā ʻa e misí pe ko e founga ke fakaʻuhingaʻi aí. Ko hono olá, naʻe fekau ʻe he tuʻí ke tāmateʻi ʻene kau tangata poto kotoa pē, kau ai ʻa Taniela. Kimuʻa pea lava ke hoko iá, naʻe fakahā ʻe he ʻOtuá ʻa e misí mo hono fakaʻuhingá kia Taniela (vakai, Taniela 2:1–26).

Kimuʻa pea vahevahe ʻe Taniela ʻa e meʻa naʻe fakahā ʻe he ʻOtuá fekauʻaki mo e misí, naʻá ne akoʻi ki he tuʻí ko e ʻOtuá ʻa e tupuʻanga ʻo e fakaʻuhingá. Naʻe fakahā foki ʻe Taniela naʻe fekauʻaki e misí mo “ia ʻe hoko ʻi he ngaahi ʻaho ʻamuí” (Taniela 2:28).

Lau ʻa e Taniela 2:31–43 pea fakahingoa ʻa e ngaahi ʻelemēniti ʻo e misi ʻa e Tuʻi ko Nepukanesá ʻi he laʻipepa tufá mo e ngaahi fakaʻuhinga ʻokú ke maʻú. Fakakau ai e ngaahi veesi naʻá ke maʻu ai e ngaahi fakaʻuhingá.

Tokoni ke ʻiloʻi ʻe he kau akó ko e puleʻanga Pāpilone ʻo e Tuʻi ko Nepukanesá ko e ʻulu koulá ia (veesi 38). ʻOku fakafofongaʻi ʻe he ngaahi konga kehe ʻo e ʻīmisí (pe tamapuá) ʻa e ngaahi puleʻanga kehe ʻe hoko mai hili ʻa Pāpiloné.

Ko e Taniela 2:44–45 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻungofua kinautolu.

Lau ʻa e Taniela 2:44–45, ʻo kumi e ngaahi foʻi lea mo e ngaahi kupuʻi lea ʻoku nau fakamatalaʻi ʻa e foʻi maká. Hiki takai e ngaahi foʻi lea ko ʻení ʻi he foʻi maka ʻi hoʻo laʻipepa tufá.

ʻI hono lau ʻe he kau akó ʻa e fakamatala ko ʻení, fakaafeʻi kinautolu ke hiki ʻa e meʻa ʻoku fakafofongaʻi ʻe he maká ʻi loto ʻi he foʻi maka ʻi heʻenau laʻipepa tufá.

Naʻe fakamatalaʻi ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻa ʻoku fakafofongaʻi ʻe he foʻi maká:

Ko e Siasi [ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní] ʻa e puleʻanga ko ia ʻi he ʻaho fakaʻosí naʻe kikiteʻí, pea naʻe ʻikai fokotuʻu ʻe he tangatá, ka ko e ʻOtua ʻo e langí pea ʻoku teka atu ia ko e maka “naʻe tā mei he moʻungá taʻe-kau ai ha nima” ke ne ʻufiʻufi ʻa e māmaní [Taniela 2:45; vakai foki ki he veesi 35]. (“ʻUhinga ʻo e Siasí,” Liahona, Nōvema 2015, 111)

Ko e hā e meʻa te tau lava ʻo ako fekauʻaki mo e Siasi ʻo e ʻOtuá kuo fakafoki maí mei he fakamatala ko ʻení pea mo e fakahā ʻa e ʻEikí kia Tanielá?

ʻI hono fakaʻaongaʻi e ngaahi lea ʻa e kau akó, tokoni ke nau ʻiloʻi naʻe fokotuʻu ʻe he ʻOtuá ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻa ia te ne fakafonu ʻa e māmaní kotoa pea tuʻu ʻo taʻengata.

Fakakaukau ke vahevahe naʻe fakahā tonu ʻe he ʻEikí ʻe fakafonu ʻe Heʻene ongoongoleleí ʻa e māmaní kotoa (vakai, Tokāteline mo e Ngaahi Fuakava 65:2). ʻE lava ke fakafekauʻaki pe fakafehokotaki ʻe he kau akó ʻa e Tokāteline mo e Ngaahi Fuakava 65:2 ki he Taniela 2:35. Te ke lava ʻo fakamatalaʻi ʻoku ʻikai ʻuhinga ʻa e “fakafonu ʻa māmani kotoa peé” (Taniela 2:35) ʻe kau ʻa e tokotaha kotoa pē ki he Siasi ʻo e ʻEikí, ka ʻe mafola ia ʻi he funga ʻo e māmaní (vakai, 1 Nīfai 14:12–14).
ʻOku tokoni fēfē ʻa e ngaahi kupuʻi lea ʻi he Taniela 2:44–45 ke mahino kiate kitautolu e foʻi moʻoni ko ʻení?

ʻOku teka atu ʻa e maká

Hili hono fakaʻuhingaʻi ʻe Taniela e misi ʻa e Tuʻi ko Nepukanesá, naʻá ne vahevahe ʻene fakamoʻoni “ʻoku moʻoni ʻa e misí, pea ko hono ʻuhinga ʻo iá ʻoku maʻu” (Taniela 2:45). ʻI heʻetau fakatupulaki ʻetau fakamoʻoni fakatāutahá, ʻe lava ke pau mo fakapapauʻi mai e ngaahi moʻoni ʻo e Siasi ʻo e Fakamoʻuí kuo fakafoki maí ʻo fakafou ʻi he mālohi ʻo e Laumālie Māʻoniʻoní.

Naʻe vahevahe ʻe Palesiteni Lāsolo M. Nalesoni ʻa e meʻa ʻoku fiemaʻu ke tau fai ke fakatupulaki ai ha fakamoʻoni pau maʻatautolú:

ʻI heʻeku hoko ko e Palesiteni ʻo Hono Siasí, he taimi ní, ʻoku ou kōlenga kiate kimoutolu. … Fakahoko e ngāue fakalaumālié ke ke ʻilo ai [kuo fakafoki mai e Siasi ʻo e Fakamoʻuí], pea kātaki ʻo fai ia ʻi he taimí ni. ʻOku mei ʻosi e taimí. (“Haʻu, ʻo Muimui ʻIate Au,” Liahona, Mē 2019, 91)

Lau ʻa e “Ko e Fakafoki Mai ʻa e Kakato ʻo e Ongoongolelei ʻo Sīsū Kalaisí: Ko ha Fanongonongo ki Māmani ʻo e Taʻu Uangeaú.” Fekumi ki ha ngaahi moʻoni kuo fakahā mai ʻe he Fakamoʻuí pea mo e ngaahi meʻa kuó Ne fakahoko ʻi hono toe fakafoki mai Hono Siasí.
Aleaʻi ʻa e ʻuhinga ʻoku mahuʻinga ai ʻa e ngaahi moʻoni mo e ngaahi meʻa ko ʻeni naʻe hokó ki hono Fakafoki Mai ʻo e Siasi ʻo e Fakamoʻuí.
Aleaʻi ʻa e ngāue fakalaumālie ʻe lava ke fai ʻe ha taha ke fakamālohia ai ʻenau fakamoʻoni naʻe fakafoki mai ʻe Sīsū Kalaisi ʻa Hono Siasí.

Hili ha taimi feʻunga, tuku ke vahevahe ʻe he kulupu takitaha ha moʻoni pe meʻa ʻe taha naʻe makehe kiate kinautolu. Fakaafeʻi kinautolu ke vahevahe ʻa e ʻuhinga ʻoku mahuʻinga ai ke maʻu ha fakamoʻoni ki he moʻoni pe meʻa ko ʻeni naʻe hokó pea mo e ngāue fakalaumālie ʻe lava ke fai ʻe ha taha ke maʻu pe fakamālohia ai ʻenau fakamoʻoni ki aí.

Hili hono maʻu ʻe he kulupu takitaha ha faingamālie ke vahevahé, fakaafeʻi e kau akó ke tali e ngaahi fehuʻi ko ʻení ʻi heʻenau tohinoa akó.

Ko e hā ha moʻoni pe meʻa naʻe hoko ʻi he Siasi ʻo e Fakamoʻuí kuo fakafoki maí te ke loto ke fakamālohia hoʻo fakamoʻoni ki aí?
Ko e hā ha ngāue fakalaumālie te ke lava ʻo fai ke fakamālohia hoʻo fakamoʻoni ki he Fakafoki fakalangi mai ʻe he Fakamoʻuí ʻa Hono Siasí?

Ako Ma‘uloto

Te ke ala tokoni ki he kau akó ke nau ako maʻuloto ʻa e fakamoʻoni fakataukei fakatokāteliné mo e kupuʻi lea fakafolofola mahuʻingá, lolotonga ʻa e lēsoni ko ʻení pea toe vakaiʻi ia ʻi he ngaahi lēsoni ʻi he kahaʻú. Ko e kupuʻi lea fakafolofola mahuʻinga ki he Taniela 2:44–45 ko e “ʻE fokotuʻu ʻe he ʻOtuá ʻha puleʻanga ʻa ia ʻe ʻikai ʻauha ʻo lauikuonga.’” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahí ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”

Ngaahi Maʻuʻanga Tokoni Kehé

Taniela 2:45. ʻOku ʻuhinga ki he hā ʻa e “tā ʻa e maka mei he moʻungá taʻekau ai ha nimá”?

Naʻe akoʻi ʻe ʻEletā Lānolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá:

15:4

ʻI hono fakaʻuhingaʻi ʻe Taniela ha misi ʻa e Tuʻi Pāpilone ko Nepukanesá, naʻá ne kikite ai ʻe tupu ʻa e Siasi ʻo e ʻEikí ʻi he kuonga fakaʻosí ko ha kiʻi foʻi maka naʻe tā “mei he moʻungá taʻe kau ai ha nima” [Taniela 2:45]. ʻOku ʻuhinga ʻa e “taʻe kau ai ha nimá” ki he tokoni fakalangí, ʻe tupulaki ʻa e Siasi ʻo e ʻEikí ʻi he mālohi kae ʻoua kuó ne fakafonu ʻa e māmaní kotoa, “[ʻo] ʻikai ʻauha ʻo lauikuonga … [ka] ʻe tuʻu maʻu ia ʻo taʻengata” [Taniela 2:44]. (“Ko Hono Fakakakato ʻo e Kikité,” Liahona, Mē 2020, 75)

ʻOku ʻuhinga ki he hā ʻe fakafonu ʻe he maká ʻa e māmaní kotoa?

Naʻe vahevahe ʻe he Palōfita ko Siosefa Sāmitá (1805–44):

Kuo ʻosi fokotuʻu ʻa e Fuka ʻo e Moʻoní; pea he ‘ikai lava ‘e ha nima ta‘e mā‘oni‘oni ke ta‘ofi ‘a e ngāué mei he‘ene laka ki mu‘á; ʻe lava ke taulōfuʻu ʻa e ngaahi fakatangá, kau fakataha mo e kakai koví, fakatahataha mo e ngaahi kau taú, lau kovi mo e kakai loí, ka he ‘ikai ufi e laka atu ki mu‘a e mo‘oni ‘a e ‘Otuá, ‘i he anga faka‘ei‘eiki mo tau‘atāina, kae ‘oua kuo hū atu ki he konitinēniti kotoa pē, a‘u ki he potu kotoa pē, ‘u‘ufi ‘a e fonua kotoa pē, mo fakaongo ‘i he telinga kotoa pē, kae ‘oua kuo fakahoko ‘a e ngaahi taumu‘a ‘a e ‘Otuá, pea folofola ‘a Sihova Ma‘ongo‘onga kuo lava ‘a e ngāué. (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 162-63)

Ko e hā e ʻuhinga ʻoku mahuʻinga ai hono Fakafoki Mai ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní?

Naʻe akoʻi ʻe Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻIo, ko ʻetau pōpoakí ko e Fakalelei ʻa Sīsū Kalaisí mo e meʻa kotoa ʻokú ne fakafofongaʻí, ka ʻoku ʻikai ha founga ke tau ʻai ai e meʻafoaki taʻe-mafakamatalaʻi ko iá ke maʻungofua pe huhuʻi pe ola lelei ʻi he moʻui ʻa e kakaí kae ʻoua kuo tau talaki hono Fakafoki Mai ʻi he ngaahi ʻaho kimui ní ʻo e moʻoni faka-ʻOtuámo e lakanga taulaʻeikí fakalangí. Ka toʻo ʻa Siosefa Sāmita mo e ʻUluaki Mata Meʻa-Hā-Maí, ka toʻo ʻa e ngaahi meʻa naʻe hoko kimui aí, ka toʻo ʻa hono fakafoki fakahangatonu mai mei he langí [ʻo e ongoongoleleí], pea ko e hā leva e meʻa ʻoku tau maʻú? ʻOku ʻikai lahi ha meʻa ʻoku tau maʻu—ʻo ʻikai feʻunga ke fakafaikehekeheʻi kitautolu mei ha ngaahi kulupu kehe ʻe lauiafe ʻo ha kakai lelei. (“Testify of the Restoration,” New Era, April 2017, 3–4)

Ko e hā ha ngaahi puleʻanga kehe ʻe lava ke fakafofongaʻi ʻe he fakatātā naʻe mamata ki ai ʻa e Tuʻi ko Nepukanesá?

Kapau ʻoku fie ako lahi ange ʻa e kau akó fekauʻaki mo e ngaahi meʻa ʻe lava ke fakafofongaʻi ʻe he ngaahi puleʻanga kehe ʻoku lau ki ai ʻi he Taniela 2:39–43, te nau lava ʻo lau ʻa e meʻa naʻe akoʻi ʻe Palesiteni Sipenisā W. Kimipolo (1895–1985) ʻi heʻene lea “The Stone Cut Without Hands” (Ensign, April 1976, 8).

Ngaahi ʻEkitivitī Fakalahi ki he Akó

Founga ʻe taha ke kamata ʻaki ʻa e lēsoní

Mahalo ʻe hohaʻa ha toʻu tupu ʻe niʻihi fekauʻaki mo e faiangahalá mo e mafola ʻa e koví ʻi he funga ʻo e māmaní. Ke tokoni ke nau tafoki ki he ʻEikí kae ʻikai ko ʻenau ngaahi hohaʻá, fakakaukau ke kamata e kalasí ʻaki e lea ko ʻeni meia Palesiteni Kōtoni B. Hingikelī (1910–2008):

Kapau ʻe faifai angé pea vaivai hoʻo tuí ʻi hoʻo vakai ki he laka atu ki muʻa ʻa e koví mo e fakamālohí, toe lau e talanoa ʻo Tanielá, ʻa ia naʻá ne fakaʻuhingaʻi e misi ʻa Nepukanesá ʻi heʻene falala ki he “ʻOtua ʻi he langí ʻa ia ʻokú [Ne] fakahā ʻa e ngaahi meʻa fufuú” [Taniela 2:28]. (“Be Not Afraid, Only Believe,” Ensign, Feb. 1996, 4)

Hili iá, te ke lava ʻo fakaafeʻi e kau akó ke nau ako ʻa e Taniela 2 ʻo fakaʻaongaʻi ʻa e fakakaukau taʻengata ko ʻení ʻi heʻenau fekumi ki he ngaahi moʻoni te nau lava ʻo ako mei he talanoá. Fakaafeʻi kinautolu ke fakakaukau ki he founga ʻe lava ke fakamālohia ai ʻe he meʻa ʻoku nau akó ʻa ʻenau tuí neongo ʻa e kovi ʻokú ne ʻākilotoa kinautolú.

Ngaahi folofola ʻi he Fuakava Motuʻá ʻo hono Fakafoki Mai ʻo e Ongoongoleleí

ʻE lava ke tokoni e ngaahi potufolofola ko ʻení ki he kau akó ke nau ʻiloʻi ʻa e ngaahi kikite ʻi he Fuakava Motuʻá fekauʻaki mo hono Fakafoki Mai ʻo e Ongoongoleleí. Te ke lava ʻo fakaʻaongaʻi fakataha ʻeni mo e fanongonongo ki hono Fakafoki Mai ʻo e Ongoongoleleí ʻi he konga ʻo e lēsoní ʻoku ui ko e “ʻOku teka atu ʻa e maká.” ʻE lava ke fili ʻe he kau akó ha potufolofola ʻe taha ke ako mo kumi ha foʻi moʻoni pe meʻa naʻe hoko ʻi hono Fakafoki Mai ʻo e Ongoongoleleí ʻoku nau maʻu ʻi aí.

Selemaia 16:14–16 (ko hono tānaki ʻo ʻIsilelí ʻo fakafou ʻi he ngāue fakafaifekaú)
ʻIsikieli 37:15–19 (ʻoku fakatahaʻi ʻa e Tohi Tapú mo e Tohi ʻa Molomoná ko ha ongo fakamoʻoni ʻo Sīsū Kalaisi)
ʻĀmosi 3:7 (kau palōfitá)

ʻIkai ngata aí, te ke lava ʻo tānaki atu ʻa e Siosefa Sāmita—Hisitōlia 1:16–17 (ko e ʻUluaki Mata Meʻa-Hā-Maí) ki he ngaahi meʻa ke fili ʻe he kau akó ke ako mei aí.

ʻOku fakafonu ʻe he ongoongolelei ʻo Sīsū Kalaisí ʻa e māmaní

Hili hono ʻilo ʻe he kau akó ʻoku fakafofongaʻi ʻe he maka ʻi he Taniela 2 ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, te ke lava ʻo tokoniʻi kinautolu ke nau vakai ki heʻene tupulaki ʻi he funga ʻo e māmaní. Ke fai ʻení, te ke lava ʻo fakaʻaliʻali ha saati hangē ko ʻení ʻi he palakipoé:

	Kāingalotu ʻo e Siasí	Ngaahi Siteikí	Ngaahi Temipale Kuo Fakatapuí
6 ʻEpeleli 1830	Kāingalotu ʻo e Siasí 6	Ngaahi Siteikí 0	Ngaahi Temipale Kuo Fakatapuí 0
1880	Kāingalotu ʻo e Siasí 133,628	Ngaahi Siteikí 23	Ngaahi Temipale Kuo Fakatapuí 1
1930	Kāingalotu ʻo e Siasí 670,017	Ngaahi Siteikí 104	Ngaahi Temipale Kuo Fakatapuí 7
1980	Kāingalotu ʻo e Siasí 4,639,822	Ngaahi Siteikí 1,218	Ngaahi Temipale Kuo Fakatapuí 19
ʻAhó Ni	Kāingalotu ʻo e Siasí	Ngaahi Siteikí	Ngaahi Temipale Kuo Fakatapuí

ʻI he taʻu kotoa pē, ʻoku ʻi he pulusinga ʻo Mē ʻo e Liahoná ha lipooti fakasitetisitika ʻo e taʻu kimuʻá. ʻE lava ke fakaʻaongaʻi ʻeni ʻe he kau akó ke fakafonu ʻa e kōlomu ʻo e “Kāingalotu ʻo e Siasí” mo e “Ngaahi Siteikí” ʻi he kōlomu fakaʻosí. ʻE lava ke maʻu ʻe he kau akó ʻa e lahi ʻo e ngaahi temipale kuo fakatapuí ʻi he lisi temipale ʻi he ChurchofJesusChrist.org ʻaki haʻo lomiʻi ʻi he foʻi ngahau ʻoku hanga ki laló ʻi he “Tuʻungá.” Hili iá te ke lava ʻo ʻai ke vahevahe ʻe he kau akó ʻa e fakamatala ʻoku nau maʻu ki he ʻotu ki he “ʻAho Ní.”

Pe ko hoʻo fakaʻaliʻali ki he kau akó ʻa e tupulaki ʻa e Siasi ʻo Sīsū Kalaisí ʻo aʻu ki he taʻu 2017 ʻaki hono huluʻi ʻa e “The Gospel Shall Roll Forth” (2:47).

2:48

Ko hono maʻu e tokoni ʻa e ʻOtuá

Kimuʻa pea lau ʻe he kau akó ʻa e fakaʻuhinga ʻo e misi ʻa e Tuʻi ko Nepukanesá, te nau lava ʻo laukonga fekauʻaki mo e founga naʻe maʻu ai ʻe Taniela ʻa e poto ke fakaʻuhingaʻi iá. Fakaafeʻi e kau akó ke lau ʻa e Taniela 2:17–23, ʻo kumi e meʻa naʻe fai ʻe Taniela ke maʻu fakahā mei he Tamai Hēvaní. Te ke lava ʻo fakaafeʻi e kau akó ke fakakaukau ki he meʻa te nau lava ʻo fai ke muimui ai ki he sīpinga ʻa Tanielá. Te nau lava foki ʻo fakakaukau ki he ngaahi tūkunga ʻoku nau fehangahangai mo ia ʻa ia te nau fiemaʻu ai ha fakahā mei he Tamai Hēvaní.