« ការអនុវត្តចំណេះចំណានខាងគោលលទ្ធិទី ៩ ៖ ការទន្ទេញឃ្លាគន្លឹះ និងការអនុវត្តគោលការណ៍នៃការទទួលបានចំណេះដឹងខាងវិញ្ញាណ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« ការអនុវត្តចំណេះចំណានខាងគោលលទ្ធិទី ៩ ៖ ការទន្ទេញឃ្លាគន្លឹះ និងការអនុវត្តគោលការណ៍នៃការទទួលបានចំណេះដឹងខាងវិញ្ញាណ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
យេរេមា ៣១–៣៣; ៣៦; ៣៨; បរិទេវ ១; ៣ ៖ មេរៀនទី ១៣៧
ការអនុវត្តចំណេះចំណានខាងគោលលទ្ធិទី ៩
ការទន្ទេញឃ្លាគន្លឹះ និងការអនុវត្តតាមគោលការណ៍នៃការទទួលបានចំណេះដឹងខាងវិញ្ញាណ
ចំណេះចំណានខាងគោលលទ្ធិអាចជួយសិស្សឲ្យស្ថាបនាគ្រឹះសម្រាប់ជីវិតរបស់ពួកគេនៅលើព្រះយេស៊ូវគ្រីស្ទ និងដំណឹងល្អរបស់ទ្រង់ ។ មេរៀននេះអាចជួយសិស្សទន្ទេញឃ្លាបទគម្ពីរគន្លឹះនៅក្នុងវគ្គបទគម្ពីរចំណេះចំណានខាងគោលលទ្ធិ ហើយអនុវត្តគោលការណ៍ដ៏ទេវភាពនៃការទទួលបានចំណេះដឹងខាងវិញ្ញាណ ។
ការរៀបចំសិស្ស ៖ សូមអញ្ជើញសិស្សឲ្យជ្រើសរើសវគ្គចំណេះចំណានខាងគោលលទ្ធិមួយ ឬពីរចេញពីព្រះគម្ពីរសញ្ញាចាស់ ហើយទន្ទេញសេចក្តីយោងនៃបទគម្ពីរគន្លឹះ ។ ប្រសិនបើពួកគេចង់ ពួកគេក៏អាចទន្ទេញមេរៀនទាំងមូលបានដែរ ។ សូមអញ្ជើញពួកគេឲ្យគិតអំពីរបៀបដែលការទន្ទេញឃ្លា ឬបទគម្ពីរគន្លឹះអាចជួយពួកគេក្នុងជីវិតរបស់ពួកគេ ។
សកម្មភាពរៀនសូត្រដែលអាចមាន
ការរំឭកចំណេះចំណានខាងគោលលទ្ធិ ៖ ទន្ទេញ
សូមបង្ហាញដល់សិស្សនូវគម្ពីរបមាណី រួមមាន ៖ ព្រះគម្ពីរប៊ីប ព្រះគម្ពីរមរមន ព្រះគម្ពីរគោលលទ្ធិ និងសេចក្តីសញ្ញា ព្រះគម្ពីរមុក្តាដ៏មានតម្លៃមហិមា ។ ( អ្នកអាចបង្ហាញច្បាប់ចម្លងរូបវន្ត ឬជាអេឡិចត្រូនិច ឬអ្នកអាចប្រើរូបភាពខាងលើ ) ។
-
តើព្រះគម្ពីរមួយណានៃព្រះគម្ពីរទាំងនេះ ដែលព្រះអង្គសង្គ្រោះបានសិក្សាក្នុងវ័យកុមារភាព យុវវ័យ និងពេលទ្រង់បានធ្វើការងារបម្រើនៅលើផែនដី ?
ប្រសិនបើចាំបាច់ សូមពន្យល់ថា ព្រះអង្គសង្គ្រោះនឹងចូលមើលព្រះគម្ពីរជាច្រើននៅក្នុងព្រះគម្ពីរសញ្ញាចាស់ ដែលជាព្រះគម្ពីរយុវវ័យកំពុងសិក្សាឥឡូវនេះ ។
សូមអានបទគម្ពីរមួយ ឬពីរខាងក្រោម ដោយរកមើលពីរបៀបដែលព្រះអង្គសង្គ្រោះបានប្រើឃ្លា ឬខគម្ពីរដែលទន្ទេញចាំចេញពីព្រះគម្ពីរសញ្ញាចាស់ ៖ ម៉ាថាយ ៤:២–៤; ១៩:៤–៥; ម៉ាកុស ៧:៩–១០; លូកា ២៤:២៧ ។
-
តើអ្នកបានរកឃើញអ្វីខ្លះ ?
សិស្សអាចចង្អុលបង្ហាញថា ព្រះអង្គសង្គ្រោះបានប្រើព្រះគម្ពីរដែលទន្ទេញចាំដើម្បីយកឈ្នះលើការល្បួង ឆ្លើយសំណួររបស់អ្នកដទៃ កែតម្រូវការយល់ខុស និងបង្រៀនអ្នកដទៃ ។ ប្រសិនបើសិស្សចង់ដឹងពីខគម្ពីរដែលព្រះអង្គសង្រ្គោះបានដកស្រង់ សូមចែកចាយការណ៍នោះនៅក្នុង ម៉ាថាយ ៤:២–៤ ព្រះអង្គសង្រ្គោះបានដកស្រង់ ចោទិយកថា ៨:៣ នៅក្នុង ម៉ាថាយ ១៩:៤–៥ ទ្រង់បានដកស្រង់ លោកុប្បត្តិ ២:២៤ និងនៅក្នុង ម៉ាកុស ៧:៩–១០ ទ្រង់បានដកស្រង់ និក្ខំមនំ ២០:១២ និង ចោទិយកថា ៥:១៦ ។
សូមជួយសិស្សយល់ថា នៅពេលពួកគេទន្ទេញវគ្គបទគម្ពីរចំណេះចំណានខាងគោលលទ្ធិ និងឃ្លាបទគម្ពីរគន្លឹះ ហើយប្រើវានៅក្នុងជីវិតរបស់ពួកគេ នោះពួកគេកំពុងធ្វើតាមគំរូរបស់ព្រះយេស៊ូវគ្រីស្ទហើយ ។
-
តើស្ថានភាពមួយចំនួនដែលអ្នកបានឆ្លងកាត់ ឬអាចនឹងប្រឈមមុខនៅពេលអនាគត នៅពេលបទគម្ពីរដែលបានទន្ទេញចាំនោះនឹងមាន ឬនឹងអាចមានប្រយោជន៍អ្វីខ្លះ ?
ឧទាហរណ៍មួយចំនួនអាចរួមមាន នៅពេលបង្រៀនមេរៀន ឬការថ្លែងសុន្ទរកថា ការឆ្លើយសំណួររបស់អ្នកដទៃ ការស្វែងរកចម្លើយផ្ទាល់ខ្លួន និងការប្រឈមមុខនឹងការល្បួង ។
-
តើមានកិច្ចការអ្វីខ្លះដែលអ្នកធ្វើ ឬអាចបានធ្វើដែលអាចជួយអ្នកទន្ទេញឃ្លា ឬវគ្គបទគម្ពីរគន្លឹះនេះបាន ?
ចម្លើយទាំងឡាយអាចនឹងរួមបញ្ចូលការនិយាយឡើងវិញនូវឃ្លា ឬវគ្គបទគម្ពីរ ការសរសេរវា ហើយលុបពាក្យ ឬការប្រើប័ណ្ណពាក្យ ឬឯកសារដែលសិស្សបានបង្កើតក្នុងមេរៀនទី ១៥ ៖ « ការអនុវត្តចំណេះចំណានខាងគោលលទ្ធិទី ១ » ។
សូមពិចារណាបង្ហាញ ឬផ្តល់ដល់សិស្សម្នាក់ៗនូវវគ្គបទគម្ពីរចំណេះចំណានខាងគោលលទ្ធិ ដែលពួកគេបានសិក្សាកន្លងមក ។ រាយបញ្ជីមួយអំពីសេចក្តីយោងនៃចំណេះចំណានខាងគោលលទ្ធិ និងឃ្លាបទគម្ពីរគន្លឹះក្នុងព្រះគម្ពីរសញ្ញាចាស់ ដែលមាននៅក្នុង ឯកសារគោលនៃចំណេះចំណានខាងគោលលទ្ធិ ( ឆ្នាំ២០២៣ ) ។
សូមអញ្ជើញសិស្សឲ្យបំពេញសកម្មភាពខាងក្រោមដោយប្រើបច្ចេកទេសនៃការទន្ទេញជម្រើសរបស់ពួកគេ ។ គំនិតមួយចំនួនរួមមានការប្រើអក្សរដំបូងនៃពាក្យនីមួយៗក្នុងឃ្លាចំណេះចំណានខាងគោលលទ្ធិ ឬការប្រើកម្មវិធី Doctrinal Mastery ។ គំនិតជាច្រើនទៀតត្រូវបានរៀបរាប់នៅក្នុង « សកម្មភាពរំឭកចំណេះចំណានខាងគោលលទ្ធិ » នៅក្នុងឧបសម្ព័ន្ធនេះ ។
សូមចំណាយពេលពីរបីនាទីដើម្បីទន្ទេញសេចក្តីយោង និងឃ្លាគន្លឹះនៃវគ្គបទគម្ពីរចំណេះចំណានខាងគោលលទ្ធិពីរបី ។ ( ប្រសិនបើអ្នកចង់ អ្នកអាចទន្ទេញវគ្គបទគម្ពីរទាំងមូលបន្ថែមពីលើឃ្លាគន្លឹះបាន ) ។
សូមអញ្ជើញសិស្សឲ្យជ្រើសរើសឃ្លា ឬវគ្គបទគម្ពីរមួយដែលពួកគេបានទន្ទេញ និងរៀបចំខ្លួនដើម្បីឆ្លើយសំណួរដូចខាងក្រោមនេះ ៖
-
តើឃ្លា ឬវគ្គបទគម្ពីរទាំងនេះជួយអ្នកនៅក្នុងជីវិតរបស់អ្នកដោយរបៀបណា ?
-
តើវាអាចជួយអ្នកឲ្យប្រែក្លាយកាន់តែដូចព្រះអង្គសង្គ្រោះយ៉ាងដូចម្ដេច ?
សូមអញ្ជើញសិស្សមួយចំនួនឲ្យចែកចាយ និងពិចារណាចែកចាយគំនិតរបស់អ្នកផងដែរ ។ សូមរកមើលវិធីដើម្បីលើកទឹកចិត្តសិស្សឲ្យបន្តទន្ទេញបទគម្ពីរ ។
រៀន និងអនុវត្តតាមគោលការណ៍នៃការទទួលបានចំណេះដឹងខាងវិញ្ញាណ
មេរៀនដែលនៅសល់ផ្តោតលើការជួយសិស្សឲ្យអនុវត្តតាមគោលការណ៍នៃការទទួលបានចំណេះដឹងខាងវិញ្ញាណទៅក្នុងស្ថានភាពដែលទាក់ទង ។ ពីមុនបន្ត អ្នកអាចអញ្ជើញសិស្សឲ្យរំឭកគោលការណ៍ទាំងនេះ ។ សមត្ថភាពរបស់សិស្សក្នុងការរំឭកឡើងវិញ និងអនុវត្តតាមគោលការណ៍នៃការទទួលបានចំណេះដឹងខាងវិញ្ញាណទាំងនេះនឹងកើនឡើងតាមរយៈការរំឭក និងការអនុវត្តម្តងហើយម្តងទៀត ។ សកម្មភាពរំឭកដែលបានណែនាំត្រូវបានដាក់បញ្ចូលនៅក្នុងផ្នែកឧបសម្ព័ន្ធដែលមានចំណងជើងថា « សកម្មភាពរំឭកចំណេះចំណានខាងគោលលទ្ធិឡើងវិញ » ។ ការពិពណ៌នាអំពីគោលការណ៍ទាំងនេះមាននៅក្នុងកថាខណ្ឌទី ៥–១២ នៃ ឯកសារគោលនៃចំណេះចំណានខាងគោលលទ្ធិ ( ឆ្នាំ២០២៣ ) ។
សូមចែកចាយសាច់រឿងដូចតទៅនេះជាមួយសិស្សរបស់អ្នក ។ អ្នកក៏អាចជ្រើសរើសដើម្បីសម្របសាច់រឿងនេះចំពោះកាលៈទេសៈរបស់សិស្សរបស់អ្នក ឬអាចសួរសិស្សរបស់អ្នកពីរបៀបដែលពួកគេចង់សម្របវាដើម្បីធ្វើឲ្យវាកាន់តែទាក់ទងជាមួយពួកគេ ។
ស្រមៃថាមិត្តភក្តិរបស់អ្នកឈ្មោះ មៀ និយាយ ៖ « រឿងដែលយើងត្រូវធ្វើនៅថ្ងៃអាទិត្យគឺធុញទ្រាន់ណាស់ ហើយមានអារម្មណ៍ថាចំណាយពេលឥតប្រយោជន៍ ។ តើបងមិនគិតថាពេលវេលាចុងសប្តាហ៍របស់យើងនឹងបានប្រសើរជាងនេះប្រសិនបើយើងមិនបាច់ត្រូវព្រួយបារម្ភអំពីការរក្សាថ្ងៃឈប់សម្រាកឲ្យបរិសុទ្ធដែរឬទេ ?
-
តើមានហេតុផលណាខ្លះដែលមៀអាចកំពុងតស៊ូជាមួយនឹងបទបញ្ញត្តិនេះ ?
សូមពិចារណាសួរថាហេតុអ្វីបានជាវាមានប្រយោជន៍ដើម្បីដឹងថាហេតុអ្វីបានជា មៀ អាចមានអារម្មណ៍តាមតឹង ។
សូមអញ្ជើញសិស្សឲ្យជញ្ជឹងគិតពីរបៀបដែលពួកគេអាចប្រើគោលការណ៍នៃការទទួលបានចំណេះដឹងខាងវិញ្ញាណដើម្បីជួយ មៀ ផ្លាស់ប្តូរពីអារម្មណ៍បច្ចុប្បន្នរបស់នាងទៅជាការយល់ដឹង និងអារម្មណ៍រីករាយនៅថ្ងៃឈប់សម្រាកវិញ ។
សិស្សអាចធ្វើដូចខាងក្រោមនេះរៀងៗខ្លួន ឬជាក្រុមតូចៗ ៖
ចំណាយពេលប៉ុន្មាននាទីដើម្បីរៀបចំអ្វីដែលអ្នកគិតថាអាចជួយ មៀ ដែលអាចរួមបញ្ចូល ៖
-
បទគម្ពីរ សេចក្ដីថ្លែងការណ៍ពីថ្នាក់ដឹកនាំសាសនាចក្រ ឬប្រភពដែលបានតែងតាំងដ៏ទេវភាពផ្សេងៗទៀត ។ ការណ៍ទាំងនេះអាចរួមមានខគម្ពីរវគ្គបទគម្ពីរចំណេះចំណានខាងគោលលទ្ធិ ដូចជា និក្ខំមនំ ២០:៨; អេសាយ ៥៨:១៣–១៤; ម៉ូសាយ ២:៤១; ឬខគម្ពីរផ្សេងទៀត ដូចជា គោលលទ្ធិ និងសេចក្តីសញ្ញា ៥៩:៩, ១៣–១៥ ។
-
សេចក្តីពិត ឬគោលលទ្ធិដែលអ្នកដឹងថាអាចជួយ មៀ មើលឃើញស្ថានភាពនេះជាមួយនឹងទស្សនវិស័យដ៏អស់កល្បមួយ ( ឧទាហរណ៍ របៀបដែលវាអាចនឹងជួយយើងឲ្យកាន់តែប្រែក្លាយដូចជាព្រះអម្ចាស់ [ សូមមើល ម៉ូសេ ៣:៣ ] ) ។
-
ឧទាហរណ៍មួយមកពីបទគម្ពីរ សុន្ទរកថាពីសន្និសីទទូទៅ ឬបទពិសោធន៍ផ្ទាល់ខ្លួនមួយដែលបង្ហាញពីរបៀបដែលនរណាម្នាក់អាចធ្វើសកម្មភាពដោយសេចក្ដីជំនឿលើព្រះអម្ចាស់ព្រះយេស៊ូវគ្រីស្ទ ដើម្បីរក្សាថ្ងៃឈប់សម្រាក ដែលអាចរួមមានការចូលរួមព្រះវិហារ និងការទទួលទានសាក្រាម៉ង់ ។ អ្នកក៏អាចពិពណ៌នាអំពីរបៀបដែលព្រះអម្ចាស់បានប្រទានពរដល់ពួកគេ នៅពេលពួកគេបង្ហាញសេចក្ដីជំនឿ ។ ( គំរូឧទាហរណ៍ខាងបទគម្ពីរមួយចំនួន រួមទាំង និក្ខំមនំ ១៦:១៤–៣០ និង យ៉ារ៉ុម ១:៥–៩ ) ។
ខាងក្រោមនេះគឺជារបៀបមួយដែលអ្នកអាចឲ្យសិស្សរៀបចំខ្លួនដើម្បីចែកចាយគំនិតរបស់ពួកគេជាមួយគ្នាទៅវិញទៅមក ។
-
សូមចែកក្រដាសមួយសន្លឹកដល់សិស្ស ។ សូមឲ្យពួកគេបែងចែកវាជាបីផ្នែកដោយបត់វា ឬគូរបន្ទាត់ ។
-
សូមឲ្យពួកគេដាក់ស្លាកផ្នែកនីមួយៗជាមួយគោលការណ៍ផ្សេងគ្នានៃការទទួលបានចំណេះដឹងខាងវិញ្ញាណ ។
-
ជ្រើសរើសគោលការណ៍មួយ ហើយឲ្យសិស្សទាំងអស់សរសេរនៅលើក្រដាសរបស់ពួកគេនូវរបៀបមួយដែលការប្រើគោលការណ៍ដែលបានជ្រើសរើសអាចជួយ មៀ ។
-
សិស្សអាចហុចក្រដាស ហើយសរសេរអំពីគោលការណ៍ផ្សេងនៅលើសន្លឹកក្រដាសផ្សេង ។ សូមឲ្យសិស្សបន្តហុច និងសរសេរ ។
-
នៅពេលក្រដាសនីមួយៗមានគំនិតជាច្រើន សូមអញ្ជើញសិស្សឲ្យរក្សាទុកក្រដាស ហើយអានអ្វីដែលបានសរសេរ ។
សូមអញ្ជើញសិស្សជាច្រើននាក់ដែលស្ម័គ្រចិត្តឆ្លើយសំណួរខាងក្រោមដោយផ្អែកលើអ្វីដែលពួកគេបានអាន ។ អ្នកប្រហែលជាចង់សួរសិស្ស ដែលជាធម្មតាមិនបានចូលរួម ដើម្បីឆ្លើយសំណួរមួយ ឬច្រើននៃសំណួរទាំងនេះ ។ សិស្សមួយចំនួនអាចមានអារម្មណ៍ស្រណុកចិត្តដើម្បីចែកចាយអ្វីដែលនរណាម្នាក់ផ្សេងទៀតបានសរសេរ ។
-
-
តើរឿងមួយណាដែលអ្នកបានអាន ឬបានសរសេរ ដែលអ្នកមានអារម្មណ៍ថាមានប្រយោជន៍ជាពិសេសចំពោះ មៀ ? ហេតុអ្វី ?
-
តើអ្នកអាចនឹងបន្ថែមអ្វីខ្លះ ?
បន្ទាប់ពីសិស្សជាច្រើននាក់បានចែកចាយ សូមពិចារណាសួរថាតើសិស្សមានអារម្មណ៍ថាមានអ្វីផ្សេងទៀតដែល មៀ អាចត្រូវការនៅពេលនេះ ។ តើមានគោលការណ៍នៃការទទួលបានចំណេះដឹងខាងវិញ្ញាណ ដែលអ្នកមិនបានពិភាក្សានោះមានប្រយោជន៍ឬទេ ? សូមបន្តរហូតដល់ថ្នាក់មានអារម្មណ៍ថា មៀ នឹងទទួលបានជំនួយគ្រប់គ្រាន់ ។
តើអ្នកបានរៀនអ្វីខ្លះ ?
នៅក្នុងសៀវភៅកំណត់ហេតុការសិក្សារបស់អ្នក សូមសរសេរអ្វីដែលអ្នកបានរៀនពីបទពិសោធន៍នេះដែលអ្នកចង់ចងចាំ ដែលអាចរួមបញ្ចូលពីរបៀបនៃការប្រើគោលការណ៍នៃការទទួលបានចំណេះដឹងខាងវិញ្ញាណ ដែលអាចជួយអ្នកជាមួយនឹងសំណួរ ឬកង្វល់ទាំងឡាយដែលអ្នកមាន ។