« យេរេមា ៣៦ ៖ ព្រះបន្ទូលនៃព្រះ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« យេរេមា ៣៦ ៖ ព្រះបន្ទូលនៃព្រះ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
យេរេមា ៣១–៣៣; ៣៦–៣៨; បរិទេវ ១; ៣ ៖ មេរៀនទី ១៣៥
យេរេមា ៣៦
ព្រះបន្ទូលរបស់ព្រះ
ព្រះគម្ពីរគឺជាផ្នែកដ៏សំខាន់នៃទំនាក់ទំនងរបស់យើងជាមួយព្រះយេស៊ូវគ្រីស្ទ ។ ការរៀនពីព្រះគម្ពីរតម្រង់គំនិត និងចិត្តរបស់យើងឆ្ពោះទៅរកទ្រង់ ដែលយាងអញ្ជើញព្រះចេស្ដារបស់ទ្រង់មកក្នុងជីវិតរបស់យើង ។ ក្នុងអំឡុងពេលនៃការក្បត់សាសនា ព្រះអម្ចាស់បានណែនាំព្យាការីយេរេមាឲ្យសរសេរ ហើយផ្ញើព្រះបន្ទូលរបស់ព្រះអម្ចាស់ទៅកាន់ប្រជាជនយូដា ដើម្បីឲ្យពួកគេអាចងាកមករកទ្រង់ ហើយបានទទួលការអភ័យទោស ។ មេរៀននេះអាចជួយសិស្សឲ្យយល់ពីរបៀបដែលបទគម្ពីរទាំងឡាយជួយពួកគេឲ្យងាកទៅរកព្រះយេស៊ូវគ្រីស្ទ ដើម្បីទទួលបានលើកលែងទោសពីអំពើបាប ។
ការរៀបចំសិស្ស ៖ ពិចារណាអញ្ជើញសិស្សឲ្យពិនិត្យមើលនូវគោលដៅសិក្សាព្រះគម្ពីរផ្ទាល់ខ្លួនរបស់ពួកគេ និងការរីកចម្រើនអំពីការអានដែលត្រូវការសម្រាប់ឆ្នាំនេះ ។ អ្នកក៏អាចអញ្ជើញសិស្សឲ្យគិតពិចារណាពីរបៀបដែលការសិក្សាព្រះគម្ពីររបស់ពួកគេកំពុងជួយពួកគេឲ្យងាកទៅរកព្រះអម្ចាស់ផងដែរ ។
សកម្មភាពរៀនសូត្រដែលអាចមាន
ហ៊ាននិយាយ
សូមគិតអំពីរបៀបមួយដើម្បីជួយសិស្សឲ្យរៀបចំខ្លួនដើម្បីរៀនអំពីរបៀបដែលព្រះអម្ចាស់ប្រើបទគម្ពីរដើម្បីកែតម្រូវយើងដោយសេចក្តីស្រឡាញ់ ហើយនាំយើងទៅរកទ្រង់ ។ របៀបមួយដើម្បីធ្វើការណ៍នេះគឺឲ្យសិស្សគិតអំពីស្ថានភាពដែលវាអាចនឹងមិនស្រួលចិត្តក្នុងការនិយាយ ។ តាមការចាំបាច់អ្នកអាចប្រើស្ថានភាពខាងក្រោម ។
-
តើអ្នកដែលយកចិត្តទុកដាក់នឹងអ្នកអាចឆ្លើយតបយ៉ាងណាក្នុងស្ថានភាពដូចខាងក្រោម ?
-
បន្ទាប់ពីទទួលទានអាហារថ្ងៃត្រង់ មិត្តភក្តិរបស់អ្នកសង្កេតឃើញថា អ្នកមានអាហារជាប់ធ្មេញរបស់អ្នក ។
-
អ្នកត្រូវបានអញ្ជើញឲ្យចូលរួមក្នុងពិធីជប់លៀងដែលនឹងមានសកម្មភាពមិនសមរម្យ ។ មិត្តរបស់អ្នកដឹងពីសកម្មភាពទាំងនោះ ប៉ុន្តែដឹងថាអ្នកកំពុងទន្ទឹងរង់ចាំទៅចូលរួម ។
-
-
តើអ្វីអាចជំរុញចិត្តនរណាម្នាក់ឲ្យហ៊ាននិយាយក្នុងស្ថានភាពទាំងនេះ ?
-
តើមានលទ្ធផលអ្វីកើតឡើងប្រសិនបើនិយាយអ្វីមួយ ឬនៅស្ងៀម ?
ព្រះវរបិតាសួគ៌ និងព្រះយេស៊ូវគ្រីស្ទ ជ្រាប និងទតឃើញអ្វីៗដែលយើងមើលមិនឃើញ ។ ទ្រង់ទាំងទ្វេមានព្រះទ័យចង់ឲ្យអ្វីដែលល្អបំផុតសម្រាប់យើង ហើយទ្រង់ទាំងទ្វេមានព្រះបន្ទូលមកកាន់យើងតាមរយៈព្រះគម្ពីរ ( សូមមើល នីហ្វៃទី២ ៣២:៣; គោលលទ្ធិ និងសេចក្ដីសញ្ញា ១:៣៧–៣៨ ) ។ នៅពេលអ្នករៀននៅថ្ងៃនេះ សូមជញ្ជឹងគិតពីរបៀបដែលព្រះគម្ពីរអាចផ្ដល់ពរដល់ជីវិតអ្នក ។ ពិចារណាពីរបៀបដែលគំនិតទាំងនេះអាចមានឥទ្ធិពលលើការសិក្សាផ្ទាល់ខ្លួនរបស់អ្នក ។
គោលបំណងនៃព្រះគម្ពីរ
សូមអាន យេរេមា ៣៦:១–៣ ដោយរកមើលមូលហេតុដែលព្រះអម្ចាស់បានបញ្ជាដល់យេរេមាឲ្យកត់ត្រាព្រះបន្ទូលទ្រង់សម្រាប់ប្រជាជនយូដា ។
-
តើព្រះអម្ចាស់ចង់បានអ្វីសម្រាប់ប្រជាជនយូដា ?
-
តើខគម្ពីរទាំងនេះបង្រៀនយើងអ្វីខ្លះអំពីគោលបំណងមួយចំនួននៃព្រះគម្ពីរ ?
សិស្សអាចស្វែងយល់សេចក្តីពិតមួយដូចជា ព្រះគម្ពីរជួយយើងងាកទៅរកព្រះអម្ចាស់ ហើយទទួលបានការអភ័យទោសពីទ្រង់ ។
អ្នកអាចអញ្ជើញសិស្សឲ្យគូសចំណាំឃ្លា « ប្រយោជន៍ឲ្យគេបានវិលមកពីផ្លូវអាក្រក់របស់គេរៀងខ្លួន » និង « ដើម្បីឲ្យយើងបានអត់ទោសចំពោះអំពើទុច្ចរិត និងអំពើបាបរបស់គេ » ( ខទី ៣ ) ។ ពួកគេអាចសរសេរសេចក្តីពិតដែលពួកគេបានរកឃើញនៅជិតឃ្លាទាំងនេះនៅក្នុងព្រះគម្ពីររបស់ពួកគេ ។
-
តើព្រះគម្ពីរជួយយើងឲ្យងាកទៅរកព្រះអម្ចាស់ ហើយទទួលបានការអភ័យទោសរបស់ទ្រង់ដោយរបៀបណា ?
សូមពិចារណាសរសេរចម្លើយរបស់សិស្សនៅលើក្ដារខៀន ។ នៅពេលសិស្សចែកចាយ ពួកគេអាចយោងទៅគំនិតដែលមាននៅក្នុងបទគម្ពីរខាងក្រោម ។ អ្នកអាចនឹងចង់ស្គាល់បទគម្ពីរទាំងនេះ ដូច្នេះអ្នកអាចរកមើលបទគម្ពីរទាំងនេះនៅពេលសិស្សចែកចាយ ។ ជាជម្រើសមួយផ្សេងទៀត បន្ទាប់ពីសិស្សចែកចាយចម្លើយមួយចំនួនចំពោះសំណួរមុននេះ អ្នកអាចផ្តល់ការណែនាំខាងក្រោម ហើយឲ្យពួកគេបន្ថែមទៅក្នុងគំនិតទាំងឡាយនៅលើក្ដារខៀន ។
សូមអានវគ្គបទគម្ពីរខាងក្រោម ដោយរកមើលរបៀបបន្ថែមដែលបទគម្ពីរជួយយើងឲ្យងាកទៅរកព្រះអម្ចាស់ ហើយទទួលបានលើកលែងទោសពីអំពើបាបរបស់យើង ។
ធីម៉ូថេ ទី២ ៣:១៦
សំណួរទាំងឡាយដែលជួយសិស្សឲ្យវាយតម្លៃអំពីអ្វីដែលពួកគេកំពុងរៀន អាចជួយឲ្យអ្នកដឹងថាពេលពួកគេត្រៀមខ្លួនជាស្រេចដើម្បីបន្តទៅផ្នែកបន្ទាប់នៃមេរៀននេះ ។ ឧទាហរណ៍ អ្នកអាចនឹងសួរសំណួរដូចខាងក្រោម ៖
-
តើអ្នកកំពុងតែរៀនអ្វីខ្លះ ?
-
តើអ្នកមានសំណួរអ្វីខ្លះអំពីអ្វីដែលអ្នកបានអាន ?
ការឆ្លើយតបរបស់សិស្សអាចយាងអញ្ជើញព្រះវិញ្ញាណបរិសុទ្ធឲ្យជួយអ្នកស្វែងយល់ពីរបៀបដើម្បីឆ្លើយតបនឹងតម្រូវការរបស់ពួកគេ ។
សម្រាប់ការបំពាក់បំប៉នបន្ថែមលើការសួរសំណួរដើម្បីវាយតម្លៃការរៀនសូត្រ សូមមើល « តែងតែត្រៀមខ្លួនរួចជាស្រេចជានិច្ច ដើម្បីឆ្លើយតបទៅនឹងការបំផុសគំនិតខាងវិញ្ញាណអំពីសេចក្តីត្រូវការរបស់សិស្ស » នៅក្នុង ជំនាញអភិវឌ្ឍន៍គ្រូបង្រៀន ។
ស្តេច និងក្រាំង
អ្នកអាចសង្ខេប ឬអានកថាខណ្ឌខាងក្រោម ។
យេរេមាបានធ្វើតាមសេចក្ដីដែលព្រះអម្ចាស់បានបង្គាប់ ហើយបានសុំបុរសម្នាក់ឈ្មោះបារូក ឲ្យសរសេរព្រះបន្ទូលរបស់ព្រះអម្ចាស់នៅលើក្រាំងមួយ ។ ដោយសារយេរេមាត្រូវបានគេចាប់ដាក់គុក នោះលោកបានសុំបារូកឲ្យអានព្រះបន្ទូលរបស់ព្រះអម្ចាស់ដល់ប្រជាជនយូដា រួមទាំងពួកចៅហ្វាយមួយចំនួនផង ។ បន្ទាប់ពីធ្វើដូច្នេះ បារូកបានប្រគល់ក្រាំងនោះទៅឲ្យពួកចៅហ្វាយអានដល់យេហូយ៉ាគីម ដែល ជាស្តេចយូដា ( សូមមើល យេរេមា ៣៦:៤–១០, ១៤–១៥, ២០–២១ ) ។
សូមអាន យេរេមា ៣៦:២០–២៤ ដោយរកមើលរបៀបដែលស្ដេចយេហូយ៉ាគីមមានប្រតិកម្មពេលឮព្រះបន្ទូលនោះនៅលើក្រាំង ។ នៅក្នុង ខទី ២៣ « ស្តេចទ្រង់ » សំដៅលើស្ដេចយេហូយ៉ាគីម ។
-
ហេតុអ្វីបានជាអ្នកគិតថាស្តេចមានប្រតិកម្មបែបនេះ ?
សូមអាន យេរេមា ៣៦:២៥ ដោយរកមើលរបៀបដែលពួក ចៅហ្វាយមួយចំនួនព្យាយាមមានឥទ្ធិពលលើស្តេច ។
សូមអញ្ជើញសិស្សឲ្យស្រមៃថា ពួកគេជាពួកចៅហ្វាយនៅក្នុង ខទី ២៥ ។ ដោយប្រើអ្វីដែលពួកគេបានរៀនក្នុងថ្នាក់ថ្ងៃនេះ សូមឲ្យសិស្សរៀបចំចម្លើយឆ្លើយទៅកាន់ស្តេច ដែលនឹងជួយទ្រង់យល់ពីរបៀបដែលព្រះគម្ពីរអាចផ្ដល់ពរដល់ជីវិតរបស់ទ្រង់ ។
របៀបមួយដើម្បីធ្វើសកម្មភាពនេះគឺរៀបចំថ្នាក់ជាបីក្រុម ។ សិស្សម្នាក់ៗអាចតំណាងឲ្យចៅហ្វាយម្នាក់ ជាមួយនឹងក្រុមទាំងឡាយរៀបចំការឆ្លើយតបរបស់ពួកគេរួមគ្នា ។ បន្ទាប់មក អ្នកអាចអញ្ជើញក្រុមមួយឲ្យមកមុខថ្នាក់ ហើយសម្តែងការប្រាស្រ័យទាក់ទងរបស់ពួកគេជាមួយស្តេច ។ អ្នកអាចអញ្ជើញសិស្សម្នាក់ទៀតឲ្យដើរតួជាស្តេច ឬអ្នក ដែលជាគ្រូបង្រៀនអាចដើរតួនោះបាន ។ អ្នកអាចស្នើឲ្យសិស្សសម្តែង សាច់រឿងបញ្ចប់ ផ្ទុយពីរឿងនោះ ដែលស្តេចត្រូវបានបញ្ចុះបញ្ចូលមិនឲ្យដុតក្រាំង ។
-
តើស្ថានភាពនៅសម័យទំនើបបែបណា ដែលការបង្រៀនពីការឆ្លើយតបរបស់អ្នកអាចជួយដល់យុវវ័យបាន ?
គិតពិចារណាអំពីអ្វីដែលអ្នកបានរៀន
អ្នកអាចចែកចាយសេចក្តីថ្លែងការណ៍ខាងក្រោមនេះដើម្បីជួយសិស្សគិតពិចារណាអំពីអ្វីដែលពួកគេបានរៀនពីការសិក្សារបស់ពួកគេអំពី យេរេមា ៣៦ ។
អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់ បានបង្រៀន ៖
តាមរយៈព្រះគម្ពីរ នោះព្រះពិតជា « បង្ហាញព្រះចេស្ដារបស់ទ្រង់ » [ សូមមើល អាលម៉ា ៣៧:១៤ ] ដើម្បីសង្គ្រោះ និងលើកតម្កើងបុត្រាបុត្រីរបស់ទ្រង់ ។ តាមរយៈព្រះបន្ទូលរបស់ទ្រង់ … ទ្រង់ពង្រីកការចងចាំរបស់យើង បំភ្លឺពីការមិនពិត និងកំហុស ហើយនាំយើងទៅរកការប្រែចិត្ត ហើយរីករាយជាមួយព្រះយេស៊ូវគ្រីស្ទ ជាព្រះប្រោសលោះរបស់យើង ។ ( « The Blessing of Scripture » Ensign ឬ Liahona ខែឧសភា ឆ្នាំ២០១០ ទំព័រ ៣៣ )
ការផ្ដល់ពេលឲ្យសិស្សជញ្ជឹងគិត ឬកត់ត្រាពីចម្លើយរបស់ពួកគេអំពីសំណួរដូចតទៅនេះ ពីមុនពួកគេចែកចាយជាមួយសិស្សក្នុងថ្នាក់ អាចមានអត្ថប្រយោជន៍ ។
-
តើវាអាចមានឥទ្ធិពលដល់ការសិក្សាផ្ទាល់ខ្លួនរបស់អ្នកដើម្បីដឹងថាព្រះគម្ពីរអាចជួយអ្នកងាកទៅរកព្រះអម្ចាស់ ហើយទទួលបានការអភ័យទោស និងការណែនាំរបស់ទ្រង់យ៉ាងដូចម្ដេច ?
ការណ៍នេះអាចជាឱកាសដ៏ល្អសម្រាប់សិស្សដើម្បីគិតពិចារណាពីគោលដៅសិក្សាផ្ទាល់ខ្លួនរបស់ពួកគេ និងការអានដែលត្រូវការក្រេឌីឌសម្រាប់ថ្នាក់សិក្ខាសាលា ។ សូមពិចារណាអំពីការអញ្ជើញសិស្សឲ្យពិនិត្យមើលគោលដៅរបស់ពួកគេ ហើយគិតអំពីរបៀបដែលពួកគេអាចផ្តោតបន្ថែមទៀតលើការងាកទៅរកព្រះយេស៊ូវគ្រីស្ទ ជាផ្នែកនៃការសិក្សាព្រះគម្ពីរផ្ទាល់ខ្លួនរបស់ពួកគេ ។