Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Selemaia 31: Te Ne Tohi ʻEne Fonó ʻi Hotau Lotó

“Selemaia 31: Te Ne Tohi ʻEne Fonó ʻi Hotau Lotó,” Fuakava Motuʻá – Tohi Lēsoni ʻa e Faiako Seminelí (2026)

“Selemaia 31: Te Ne Tohi ʻEne Fonó ʻi Hotau Lotó,” Fuakava Motuʻá – Tohi Lēsoni ʻa e Faiako Seminelí

Selemaia 31–33; 36–38; Tangilaulau ʻa Selemaiá 1; 3: Lēsoni 134

Selemaia 31

Te Ne Tohi ʻEne Fonó ʻi Hotau Lotó

Ko e hā ha meʻa ʻe fai ʻe ha taha kapau naʻá ne ʻiloʻi e ongoongolelei ʻo Sīsū Kalaisí ʻi hono ʻatamaí kae ʻikai ke ne ongoʻi ia ʻi hono lotó? ʻOku malava nai ke nau ngāue taʻe te nau ongoʻi ʻa e mālohi ʻo e ʻofa ʻa e Fakamoʻuí? ʻOku liliu fēfē ʻetau ngaahi tōʻongá ʻi he taimi ʻoku tau ongoʻi ai ʻi hotau lotó ʻa e ʻofa ʻa e Tamai Hēvaní mo Sīsū Kalaisí? ʻOku talaʻofa mai ʻi he Selemaia 31, ʻi he taimi ʻoku tau tafoki ai ki he ʻEikí, te Ne hiki ʻEne fonó ʻi hotau lotó (vakai, Selemaia 31:18, 33). ʻE lava ke tokoni ʻa e lēsoni ko ʻení ke mahino ki he kau akó ʻa e ʻuhinga ke tohi ʻa e ongoongolelei ʻa e Fakamoʻuí ʻi honau lotó.

Teuteu ʻa e tokotaha akó: Fakaafeʻi e kau akó ke ʻeke ki he kau mēmipa ʻo e fāmilí mo e ngaahi kaungāmeʻá ʻa e fehuʻi ko ʻení: “Ko e hā e faikehekehe ʻi hono ʻiloʻi ʻi ho ʻatamaí ha moʻoni ʻo e ongoongoleleí pea ongoʻi ia ʻi ho lotó?” Te nau lava ʻo teuteu ke vahevahe ʻa e meʻa ne nau aleaʻí.

Ngaahi ʻEkitivitī Ako ʻOku Ala Fakahokó

Ko hono ʻiloʻi ha meʻa ʻi hotau ʻatamaí pea ongoʻi ia ʻi hotau lotó

Ke kamata e kalasí, fakaafeʻi e kau akó ke tali e fehuʻi ko ʻení.

Ko e hā ha ngaahi tūkunga te tau lava ai ʻo ʻiloʻi ʻoku totonu ke tau fai ha meʻa ka ʻoku tau faingataʻaʻia ke fai ia?

ʻE lava ke vahevahe ʻe he kau akó ha ngaahi sīpinga hangē ko e mohe taimi totonú, fai ha ngaahi fili ki he maʻu meʻatokoni moʻui leleí, pe fakakakato e ngāue fakaako mei ʻapí kimuʻa he taimi ke ʻosi ki aí. Tokoni ke mahino ki he kau akó ʻoku angamaheni pē ke faingataʻaʻia ke fakafenāpasi ʻetau ngaahi tōʻongá mo e meʻa ʻoku tau ʻilo ʻoku totonú. ʻE lava ke tatau ia mo ʻetau ʻiloʻi mo ngāueʻi ʻa e meʻa ʻoku tau ʻilo fekauʻaki mo e ongoongolelei ʻo Sīsū Kalaisí. Mahalo te tau ʻilo e meʻa ʻoku fiemaʻu ʻe he ongoongolelei ʻa e Fakamoʻuí, ka ʻoku ʻikai ke tau moʻui ʻaki ia ʻi he taimi kotoa pē. Ka neongo ia, te tau lava ʻo feinga ke tākiekina ʻe he Fakamoʻuí mo ʻEne ongoongoleleí ʻa e meʻa kotoa ʻoku tau faí.

ʻOku ʻikai ke hāsino maʻu pē ʻi heʻetau tōʻongá ʻa e meʻa ʻoku tau ʻilo fekauʻaki mo e muimui ki he Fakamoʻuí. Naʻe fakahoko ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ha fehuʻi te tau ala maʻu he taimi ʻe niʻihi ʻi he ngaahi tūkunga ko ʻení:

Te ke lava fēfē ʻo ʻai ke ʻoua naʻa hoko ʻa e ongoongolelei ʻa Sīsū Kalaisí ko ha faʻahinga ivi tākiekina pē ʻi hoʻo moʻuí ka ke hoko ia ko e ivi ʻokú ne puleʻi koé, ʻo hoko moʻoni ia ko e konga mahuʻinga taha ʻo hoʻo moʻuí? (“When Thou Art Converted,” Liahona, May 2004, 11)

ʻI hoʻo ako ʻa e Selemaia 31, fakaafeʻi ʻa e Laumālie Māʻoniʻoní ke tokoniʻi koe ke ke kumi ha ngaahi founga te ke lava ai ʻo ʻai ʻa e ongoongolelei ʻa e Fakamoʻuí ke hoko “ko e konga mahuʻinga taha ʻo hoʻo moʻuí.”

ʻOku kikiteʻi ʻe Selemaia ʻa e ngaahi tāpuaki ʻa e Fakamoʻuí ki ʻIsileli

ʻI he ʻekitivitī ako ko ʻení, te ke lava ʻo fokotuʻutuʻu ʻa e kau akó ki ha ngaahi kulupu tautau toko tolu. Fakaafeʻi e mēmipa takitaha ʻo e kulupú ke lau ha taha ʻo e ngaahi potufolofola ko ʻení pea ke vahevahe ʻenau tali ki he ngaahi fehuʻí mo e niʻihi kehe ʻi he kulupú.

Hili e fakatokanga ki he ngaahi nunuʻa ʻe mamahi ai ʻa e kau faiangahalá ʻi he ngaahi ʻaho fakaʻosí (vakai, Selemaia 30:23–24), naʻe kikite ʻa Selemaia ʻe toe tānaki ʻe he ʻEikí ʻa Hono kakai ʻo e fuakavá kiate Ia.

Lau ʻa e ngaahi potufolofola ko ʻení, ʻo kumi e meʻa ʻe fai ʻe he ʻEikí maʻa Hono kakaí:

Selemaia 31:1–3

Selemaia 31:6–10

Selemaia 31:17–20

Ko e hā ha niʻihi ʻo e ngaahi talaʻofa naʻá ke maʻú?
Ko e hā ʻoku akoʻi ʻe he ngaahi fakaafe ko ʻení fekauʻaki mo e ʻEikí?

Lau ʻa e Selemaia 31:31–33, ʻo kumi e founga ʻe fakahaaʻi ai ʻe he ʻEikí ʻEne angaʻofá ki Hono kakai ʻo e fuakavá.

Te ke fakamatalaʻi fakanounou fēfē nai ʻa e akonaki ko ʻení ko ha fakamatala ʻo e moʻoní?

Tokoni ke ʻiloʻi ʻe he kau akó ʻoku talaʻofa ʻe he ʻEikí ke tānaki fakataha kitautolu kiate Ia ko Hono kakai ʻo e fuakavá pea ke tohi ʻEne fonó ʻi hotau lotó.
ʻOkú ke pehē ʻoku ʻuhinga ki he hā ke tohi ʻa e fono ʻa e ʻEikí ʻi hotau lotó?

ʻE lava ke maʻu ʻe he kau akó ha ngaahi fakakaukau kehekehe. Tokoni ke mahino ki he kau akó ʻe lava ke ʻuhinga ʻa e kupuʻi lea tohi ʻi hotau lotó (vakai, veesi 33) ki he uluí, aʻusia ha liliú, mo e holi ke fakahoko e finangalo ʻo e Tamai Hēvaní mo Sīsū Kalaisi ʻaki e kotoa honau lotó. Mahalo te ke fie fakamahinoʻi ange naʻe fakaʻaongaʻi ʻe Paula ha lea fakatātā tatau ʻi he taimi naʻá ne fakamatalaʻi ai e Kāingalotu ʻi Kolinitoó ko ha “tohi ʻa Kalaisi … kuo tohi kae ʻikai ʻaki ʻa e vaitohi … ʻikai ʻi he ngaahi maka lafalafa, ka ʻi he kakano ʻo e lotó” (2 Kolinitō 3:3).

ʻOku tohi nai ʻa e ongoongoleleí ʻo e Fakamoʻuí ʻi ho lotó?

Fakahaaʻi ʻa e mahinó

Fakakaukau ke ʻoange ha faingamālie ki he kau akó ke akoako tali e fehuʻi ne nau filí. Te ke lava ʻo fakakulupu ʻa e kau akó mo kinautolu naʻa nau ako ʻa e fehuʻi ʻe tahá.

Te ke lava ʻo fakaafeʻi ʻa e kau akó ke vahevahe ʻa e founga ʻe lava ke tokoniʻi ai ha taha ʻe he meʻa ne nau akó ke ne fai maʻu pē ʻa e meʻa ʻokú ne ʻilo ʻoku totonú. Ke tokoni ke fakatātaaʻi ʻe he kau akó ʻa e meʻa kuo nau ako mo ongoʻí, fakakaukau ke fakaʻaliʻali ʻa e ngaahi fakahinohino ko ʻení.

Tali ‘i hoʻo tohinoa akó ha fehuʻi ‘e taha pe lahi ange ‘i he ngaahi fehuʻi ko ‘ení:

Ko e hā ha fakamoʻoni te ke fekumi ki ai ʻoku tohi ʻe he ʻEikí ʻEne fonó ʻi ho lotó?
Ko e hā ha meʻa ʻokú ke ongoʻi ʻoku ueʻi koe ke ke fai ke fakaafeʻi ʻa e Fakamoʻuí ke tohi ʻEne ongoongoleleí ʻi ho lotó?

Te ke lava foki ʻo kole ki he kau akó ke vahevahe ha ngaahi aʻusia kuo nau maʻu ʻi hono ʻiloʻi kuo tohi ʻe he Fakamoʻuí ʻEne fonó ʻi honau lotó. Te ke lava ʻo vahevahe ʻa e founga kuó ke mamata ai ki hono tohi ʻe he ʻEikí ʻEne fonó ʻi ho lotó. Poupouʻi e kau akó ke kole tokoni ki he ʻEikí pea ke ngāueʻi e ngaahi fakakaukau ʻoku nau maʻú.

Ngaahi Maʻuʻanga Tokoni Kehé

Ko e hā ha ngaahi ngāue ʻoku nau fakahaaʻi kuo tohi ʻe he ʻEikí ʻEne fonó ʻi hoku lotó?

Naʻe vahevahe ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku kamata e ului ki he ʻEikí ʻaki ha tukupā taʻe-ueʻia ki he ʻOtuá, ʻo iku ki hano ʻai e tukupā ko iá ke hoko ko ha konga ʻo kitautolu. Ko hono fakatōkakano ʻo e faʻahinga tukupā peheé ko ha ngāue ia ʻi he moʻuí kotoa, pea ʻoku fiemaʻu ki ai hoʻo kātakí mo e fakatomala taʻetukú. ʻE faifai pea hoko e tukupā ko ʻení ko e konga ʻo kitautolu, ʻo fakatōkakano ʻi hotau lotó pea ʻi heʻetau moʻuí. Kae hangē ko e ʻikai toe ngalo ʻiate kitautolu hotau hingoá neongo pe ko e hā ʻoku tau fakakaukauʻí, he ʻikai toe ngalo ha tukupā kuo tongia ʻi hotau lotó. …

ʻOku fokotuʻu maʻu kitautolu ʻe he ngaahi fuakavá ki he Fakamoʻuí pea mo tokoni ke tau muimui ʻi he hala ʻoku fakatau ki hotau ʻapi fakalangí. ʻOku tokoniʻi kitautolu ʻe he mālohi ʻo e ngaahi fuakavá ke tauhi ha liliu lahi ʻo e lotó, fakaloloto ʻetau ului ki he ʻEikí, pea maʻu kakato ange e ʻīmisi ʻo Kalaisí ʻi hotau fofongá. Ka ʻoku ʻikai lava ʻe he fakalotolotoua [ki heʻetau ngaahi fuakavá] ʻo fakapapauʻi mai ha faʻahinga meʻa kiate kitautolu. (“Tukupā Taʻeueʻia kia Sīsū Kalaisi,” Liahona, Nōvema 2019, 22, 23)

Naʻe akoʻi ʻe ʻEletā Keli R. Sionisoni ʻo e Kau Fitungofulú:

Ko kinautolu ʻoku nau maʻu ʻa e tuí pea mo e folofola ʻa e ʻOtuá ʻi honau lotó, te nau lava ʻo puke pea ikunaʻi a e ngaahi ngahau vela ʻa ia ʻe tuku mai ʻe he filí ke fakaʻauha ʻaki kitautolú. Ka ʻikai, mahalo he ʻikai tolonga ʻa ʻetau tuí, ʻamanaki leleí mo e loto-fakapapaú … te tau hoko ʻo taʻeʻaonga.

ʻOku ou iloʻi ʻoku fakaʻatā au ʻe hono tō loloto ʻa e folofola ʻa e ʻOtuá ʻi hoku lotó, ʻo fakatahaʻi mo e tui ki he ʻEiki ko Sīsu Kalaisí mo ʻEne Fakaleleí, ke u maʻu ʻa e mālohi ʻo e ʻOtuá ke ikunaʻi ʻa e filí pea mo ha meʻa pē te ne ʻahiʻahiʻi ʻaki au. ʻI heʻetau fehangahangai mo e ngaahi faingataʻá, ʻe lava ke tau fakafalala ki he talaʻofa ʻa e ʻEikí. …

ʻI Heʻene mateuteú, naʻe tupulaki ai ʻa e Fakamoʻuí ʻi he mālohi pea malava ke Ne matuʻuaki ʻa e ngaahi fakatauele kotoa ʻa Sētané. ʻI heʻetau muimui ki he sīpinga ʻa e Fakamoʻuí pea teuteu ʻi hono ako ʻa e folofola ʻa e ʻOtuá mo fakaloloto ʻetau tuí, te tau lava foki ʻo maʻu ʻa e mālohi ʻo e ʻOtuá ke matuʻuaki ʻa e ngaahi ʻahiʻahí. (“Mālohi Tuʻuloá,” Liahona, Nōvema 2020, 113)

Ngaahi ʻEkitivitī Fakalahi ki he Akó

Founga ʻe taha ke kamata ʻaki ʻa e lēsoní

Fili 1

Ke kamata e kalasí, fakakaukau ke fakaʻaliʻali ha ngaahi fakatātā ʻo Palesiteni Henelī B. ʻAealingi mo Palesiteni Kōtoni B. Hingikelī. Vahevahe ʻa e talanoa ko ʻeni naʻe fai ʻe Palesiteni ʻAealingi ʻi he meʻafakaʻeiki ʻo Palesiteni Hingikelií.

ʻI he taimi naʻá ku tokangaʻi ai hono akoʻi ʻo e ongoongoleleí ki hotau toʻu tupú ʻi heʻetau polokalama semineli he funga ʻo e māmaní, naʻá ne tātaaʻi hoku fatafatá ʻaki hono tuhú mo pehē mai, “Hale, ko e hā ʻoku ʻikai ke toe lelei ange ai hoʻo fakatō kakano ʻa e ongoongoleleí ki honau lotó?” (“ʻE Lelei e Meʻa Kotoa,” Liahona [ʻI he Manatu ʻOfa: Palesiteni Gordon B. Hinckley, Māʻasi 2008], Gospel Library)

Fakaafeʻi e kau akó ke aleaʻi ha ngaahi fehuʻi hangē ko ʻení:

ʻOkú ke pehē ko e ʻuhinga ki he hā ke fakatō-kakano e ongoongolelei ʻa e Fakamoʻuí ʻi ho lotó?
Ko e hā ʻe mahuʻinga ai ki he toʻu tupú ke fakatōkakano ʻa e ongoongoleleí ki honau lotó?

Poupouʻi e kau akó ke kumi e ngaahi talaʻofa ʻa e Fakamoʻuí ʻo fakafou ʻi Heʻene palōfita ko Selemaiá pea fakaafeʻi ʻa e Laumālié ke tokoni ke nau fakatokangaʻi ʻa e ngaahi moʻoni ʻo e ongoongoleleí te nau lava ʻo ongoʻi ʻi honau lotó.

Fili 2

Pe ko hoʻo kamata ʻaki hano fakaafeʻi e kau akó ke tā ha foʻi haati loto-fefeka mo ha foʻi haati loto-molū ʻi he palakipoé. Te ke lava ʻo vahevahe, ʻoku ʻasi ʻi he folofolá, ʻoku faʻa fakataipe ʻe he lotó ʻa e “fakakaukau mo e loto” ʻo ha taha (Fakahinohino ki he Ngaahi Folofolá, “Lotó,” Gospel Library). Ke teuteuʻi e kau akó ke ako e founga ʻoku tohi ai ʻe he ʻEikí ʻEne fonó ʻi hotau lotó, te ke lava ʻo fai ha ngaahi fehuʻi hangē ko ʻení:

Ko e hā ʻoku mahuʻinga ai ʻa e tuʻunga ʻo hotau lotó?
Kapau ʻoku fefeka hotau lotó, ko e hā te tau lava ʻo fai ke fekumi ki he tokoni ʻa e ʻEikí ke fakamolū iá?

Ko hono ongoʻi e ngaahi talaʻofa ʻa e ʻEikí ʻi hotau lotó

ʻE lava ke tokoni ʻa e ʻekitivitī ko ʻení ke ako ʻe he kau akó ha niʻihi ʻo e ngaahi tāpuaki maʻongoʻonga kuo talaʻofa ʻe he ʻEikí ki Hono kakai ʻo e fuakavá. Fili ha niʻihi pe kotoa ʻo e ngaahi potufolofola ko ʻení pea hiki kinautolu ʻi ha ʻū laʻipepa. Vahevahe e kau akó ki ha ngaahi hoa pe fanga kiʻi kulupu iiki. Fakaafeʻi e kulupu takitaha ke fili ha laʻipepa pea ako e potufolofolá. ʻE lava ke teuteu ʻa e ngaahi kulupú ke vahevahe ʻa e ngaahi tāpuaki ʻoku nau ʻiló.

Hili hono ako e ngaahi vēsí, ʻe lava ʻe ha tokotaha lea mei he kulupu takitaha ʻo hiki e fakamoʻoni fakafolofolá mo e ngaahi tāpuaki ʻa e ʻEikí ʻi he palakipoé.

Ko e hiva ʻo e ongoongoleleí ʻi hotau lotó

Ke tokoni ke mahino ki he kau akó ʻa e faikehekehe ʻi hono ʻiloʻi ʻo e ngaahi moʻoní ʻi hotau ʻatamaí pea mo hono ongoʻi kinautolu ʻi hotau lotó, te ke lava ʻo huluʻi ʻa e vitiō “The Music of the Gospel” (5:42).

5:42

Hili e vitioó, te ke lava ʻo fehuʻi ki he kau akó pe ʻe fēfē hano ʻiloʻi e ngaahi moʻoni ʻo e ongoongoleleí ʻi hotau ʻatamaí ʻo fakafehoanaki ki hono ongoʻi e ngaahi moʻoni ko ʻení ʻi hotau lotó. ʻE lava ke vahevahe ʻe he kau akó ha ngaahi sīpinga mei heʻenau moʻuí.

Ko e mālohi tuʻuloa ʻo e fono ʻa e ʻEikí kuo tohi ʻi he lotó

Mahalo ʻe ʻaonga ki he kau akó hano ako ha ngaahi sīpinga ʻo ha kakai naʻe tohi e fono ʻa e ʻEikí ʻi honau lotó. Te ke lava ʻo fakaafeʻi e kau akó ke vahevahe ha talanoa mei he folofolá ki ha taha pe falukunga kakai naʻa nau fakaʻatā ʻa e Fakamoʻuí ke tohi ʻEne fonó ʻi honau lotó. Kapau ʻoku fiemaʻu ʻe he kau akó ha fakahinohino lahi ange, te ke lava ʻo vahevahe ha ngaahi sīpinga hangē ko ʻení:

Ko e kau ākonga ʻi Selusalemá hili e toetuʻu ʻa e Fakamoʻuí (vakai, Ngāue 2:37–42).
Ko e kau Leimaná ʻi he taimi ʻo e Tuʻi ko Lamōnaí (vakai, ʻAlamā 23:5–8).
Ko e kau Nīfaí hili e hā mai ʻa e Fakamoʻuí (vakai, 4 Nīfai 1:2, 15–18).

Hili hono vahevahe ʻe he kau akó ʻenau ngaahi sīpingá, te ke lava ʻo fehuʻi ange pe ko e hā ha ngaahi lēsoni te tau lava ʻo ako mei he meʻa naʻe ongoʻi ʻe he kakaí mo e meʻa naʻa nau fai naʻe iku ai ki he liliu honau lotó.