Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Tangilaulau ʻa Selemaiá 1; 3: “ʻOku ʻIkai Ke Ngata ʻEne Manavaʻofá”

“Tangilaulau ʻa Selemaiá 1; 3: ‘ʻOku ʻIkai Ke Ngata ʻEne Manavaʻofá,’” Fuakava Motuʻá – Tohi Lēsoni ʻa e Faiako Seminelí (2026)

“Tangilaulau ʻa Selemaiá 1; 3: ‘ʻOku ʻIkai Ke Ngata ʻEne Manavaʻofá,’” Fuakava Motuʻá – Tohi Lēsoni ʻa e Faiako Seminelí

Selemaia 31–33; 36–38; Tangilaulau ʻa Selemaiá 1; 3: Lēsoni 136

Tangilaulau ʻa Selemaiá 1; 3

“ʻOku ʻIkai Ke Ngata ʻEne Manavaʻofá”

A Hispanic man gives the Savior, Jesus Christ, a hug. Christ is wearing a white robe.

Koeʻuhí ʻoku fonu ʻa e Fakamoʻuí ʻi he manavaʻofa, ʻokú Ne hōifua ke fakamoʻui, fakafiemālieʻi, mo fakamolemoleʻi, ʻo aʻu ki he taimi ʻoku tau faiangahala ai kiate Iá. Hili hono fakaʻauha ʻo Selusalema koeʻuhí ko e angahalá mo e angatuʻú, naʻe feinga ʻa Selemaia ke tokoni ke mahino ki he kau Siú ʻa e manavaʻofa ʻa e Fakamoʻuí pea ke maʻu ha ʻamanaki lelei ai. ʻE lava ke tokoni ʻa e lēsoni ko ʻení ke ongoʻi ʻe he kau akó ʻa e manavaʻofa ʻa e Fakamoʻuí kiate kinautolú, ʻo aʻu ki he taimi ʻoku nau faiangahala aí.

Teuteu ʻa e tokotaha akó: Fakaafeʻi e kau akó ke nau fakamanatu ha talanoa mei he folofolá ʻokú ne fakahaaʻi e natula manavaʻofa ʻa e Fakamoʻuí. ʻE maʻu ʻe he kau akó ha faingamālie ke vakai ki he talanoa ko ʻení ʻi he lēsoní.

Ngaahi ʻEkitivitī Ako ʻOku Ala Fakahokó

Hili ʻetau faiangahalá

Fakakaukauloto kuo fai ʻe ha talavou hono lelei tahá ke fai ha ngaahi fili lelei ʻi heʻene moʻuí. ʻI ha ʻaho ʻe taha lolotonga ʻene ʻalu ki ha paati, ʻokú ne fakavaivai ki he teke fakamālohi hono toʻú peá ne inu kava mālohi koeʻuhí ʻokú ne loto ke tali lelei ia. ʻI he pongipongi hono hokó, ʻokú ne ʻā hake ʻo ongoʻi tuenoa, halaia, mo loto-mamahi. ʻOku kamata māmālie ai ke ne fai ha toe ngaahi fili hala pea kamata ke mole ʻa e ʻamanaki lelei ki hono kahaʻú.

Hiki e ngaahi tali ʻa e kau akó ki he ngaahi fehuʻi ko ʻení ʻi he palakipoé. ʻE fakaʻaongaʻi ʻa e ngaahi tali ʻe hikí ʻi he kotoa ʻo e lēsoní.

ʻI he taimi ʻoku faiangahala ai ʻa e kakaí, ko e hā ha meʻa te nau mamata ki ai pe ongoʻi fekauʻaki mo kinautolú?
ʻE fēfē nai ʻenau vakai pe ongo fekauʻaki mo e Tamai Hēvaní mo Sīsū Kalaisí?

Fakaafeʻi ʻa e kau akó ke nau fakalaulauloto ki he ngaahi fehuʻi ko ʻení ke fakafuofuaʻi e ngaahi ongo pē ʻanautolú.
Kuó ke fakakaukau nai ki ha taha ʻo e ngaahi fakamatala ʻi he palakipoé?
Ko e fē ʻi he ngaahi fakamatala ko ʻení ʻokú ke ʻilo ʻoku halá? Ko e fē ʻokú ke taʻepauʻia aí?

ʻOku mahuʻinga ke tau manatuʻi ʻoku tau faiangahala kotoa pē mo “tōmui ʻi he fakamālō mei he ʻOtuá” (Loma 3:23). ʻI hoʻo ako e Tangilaulau ʻa Selemaiá he ʻaho ní, kumi ha ngaahi ueʻi mei he Laumālie Māʻoniʻoní ʻe lava ʻo tokoni atu ke ke fakatokangaʻi ʻa e ongo ʻoku maʻu ʻe he Tamai Hēvaní mo Sīsū Kalaisi kiate koé, naʻa mo e taimi ʻokú ke fai ai ha ngaahi fehalākí.

Mamahi ʻi he angahalá

Fakakaukau ke fakaʻaliʻali ʻa e fakatātā ko ʻení. Fakaafeʻi ʻa e kau akó ke vahevahe ʻa e meʻa ʻoku nau mamata ki ai ʻi he fakatātā ko ʻení pe ko e meʻa ʻokú ne ʻai ke nau ongoʻí. Fakamatalaʻi ange ʻoku fakahaaʻi ʻe he fakatātā ko ʻení ʻa Selemaia mo ʻene mamahi lahí. ʻE lava ke vahevahe ʻe he kau akó ʻa e meʻa ʻoku nau manatuʻi fekauʻaki mo e talanoa ʻo Selemaiá pea mo e ʻuhinga naʻá ne ongoʻi mamahi aí. ʻI hano fiemaʻu, vahevahe ha ngaahi fakaikiiki mei he palakalafi ko ʻení.

The Cry of Jeremiah. From an engraving done at the Nazareen School.

Naʻe folofola ʻa e ʻEikí kia Selemaia ʻi ha taʻu nai ʻe 40, ke kikite ki he fale ʻo ʻIsilelí fekauʻaki mo hono fakaʻauha mo e nofo pōpula ʻa Selusalemá kapau te nau fili ke ʻoua te nau fakatomala pea tafoki ki he ʻOtuá (vakai, Selemaia 16:1–13). Lolotonga e pule ʻa e Tuʻi ko Setikiá, naʻe fakaʻauha ʻe he kau Papiloné ʻa Selusalema pea ʻomi ha kakai tokolahi ki he nofo pōpulá, ʻo fakahoko ai e kikite ʻa e ʻEikí (vakai, Selemaia 52). Hili ha taimi mei he ngaahi meʻa ko ʻeni naʻe hokó, naʻe lekooti ʻe Selemaia ʻa e tohi Tangilaulau ʻa Selemaiá.

Mahalo te ke fie fakamatalaʻi ange ʻoku ʻuhinga ʻa e foʻi lea tangilāulaú ki hono fakahaaʻi ʻo ha mamahi lahi pe tengihia.

ʻE lava ke tokoni ʻa e ʻekitivitī ko ʻení ke mahino ki he kau akó ʻa e mamahi naʻe aʻusia ʻe he kakai ʻo e ʻEikí. Te ke lava ʻo fokotuʻutuʻu ʻa e kau akó ke nau tauhoa pe fakakulupu iiki ke ako ʻa e ngaahi potufolofolá. Fakamatalaʻi ange naʻe hiki ʻe Selemaia ʻa e konga lahi ʻo e ngaahi veesi ko ʻení mei he fakakaukau ʻa Selusalemá ʻo hangē nai ko e koló tonu pē ia naʻe leá.

Lau ha potufolofola ʻe taha pe ua mei he ngaahi potufolofola ko ʻení, ʻo kumi ʻa e ngaahi foʻi lea pe kupuʻi lea ʻoku nau fakahaaʻi ʻa e ongo naʻe maʻu ʻe he kakaí hili ʻenau mamahi koeʻuhí ko ʻenau ngaahi angahalá.

Tangilaulau ʻa Selemaia 1:1–4

Tangilaulau ʻa Selemaia 1:16–18

Tangilaulau ʻa Selemaia 1:20–22

Ko e hā ha ngaahi foʻi lea pe ngaahi kupuʻi lea naʻá ke ʻiloʻi?

Ke tokoni ke vakaiʻi ʻe he kau akó ʻa e meʻa naʻa nau maʻú mei ha fakakaukau ʻoku taʻengatá, te ke lava ʻo fai ʻa e fehuʻi ko ʻení.
ʻI hoʻo ʻiloʻi ʻoku ʻofa ʻa e Tamai Hēvaní mo Sīsū Kalaisi ʻiate kitautolú, ʻokú ke pehē ko e hā ʻokú Na tuku ai ke tau aʻusia ʻa e faʻahinga mamahi ko ʻení ʻi he taimi ʻoku tau faiangahala aí?

Kapau ʻoku fiemaʻu tokoni ʻa e kau akó ʻi hono tali e fehuʻi ko ʻení, te ke lava ʻo fakaafeʻi kinautolu ke lau ʻa e ngaahi potufolofola hangē ko e 2 Kolinitō 7:9–10; ʻAlamā 42:18, 29; Tokāteline mo e Ngaahi Fuakava 95:1, ʻo kumi ha ngaahi tali ʻe ala maʻu.

Ko e manavaʻofa ʻa e Fakamoʻuí

ʻE lava ke tokoni ʻa e toenga ʻo e lēsoní ke ongoʻi ʻe he kau akó ʻa e manavaʻofa ʻa e Fakamoʻuí kiate kitautolú ʻo aʻu ki he taimi ʻoku tau faiangahala aí.

Te ke lava ʻo fokotuʻutuʻu ʻa e kau akó ki ha ngaahi hoa ke nau ako ʻa e ngaahi potufolofola ko ʻení pea tali ʻa e ngaahi fehuʻi ʻoku ʻomaí. Hangē ko ʻení, ʻe lava ke ako ʻe ha tokotaha ako ʻe taha ʻa e veesi 22–26, pea veesi 31–33 ʻe he tokotaha ʻe tahá.

Fakakaukau ki he fakamatala ʻi he palakipoé mei he kamata ʻa e lēsoní. Lau ʻa e Tangilaulau ʻa Selemaiá 3:22–26, 31–33, ʻo kumi ʻa e ngaahi foʻi lea pe kupuʻi lea te ke vahevahe mo ha taha ʻoku ongoʻi peheni.

Ko e hā ha ngaahi foʻi lea pe kupuʻi lea te ke vahevahe? Ko e hā hono ʻuhingá?
Ko e hā ha moʻoni mei he ngaahi veesi ko ʻení te ke loto ke mahino kiate ia?

ʻI he vahevahe ʻa e kau akó, te nau lava ʻo ʻiloʻi ʻa e moʻoni ko ʻení: ʻOku manavaʻofa mai ʻa e ʻEikí kiate kitautolu, ʻo aʻu ki he taimi ʻoku tau faiangahala aí.

Kapau ʻoku fiemaʻu tokoni ʻa e kau akó ke mahino ʻa e foʻi lea ʻofa mamahí, te ke lava ʻo vahevahe ʻa e fakaʻuhinga ko ʻení: “ʻOku ʻuhinga ʻa e ʻofa mamahí ʻi he folofolá, ki he ‘mamahi fakataha mo e.’ ʻOku toe ʻuhinga foki ia ki hono fakahā ʻo e fie kaungā-mamahi, ʻofa, mo e ʻaloʻofa ki ha taha kehe” (Fakahinohino ki he Ngaahi Folofolá, “ʻOfa Mamahí,” Gospel Library).

Ke mahino lelei ange ʻa e manavaʻofa ʻa e Fakamoʻuí, ʻe lava ke fakahoko ʻe he kau akó ʻa e ʻekitivitī ko ʻení. ʻE lava ke fakakaukau mo ako ʻe he kau akó ha talanoa kehe mei he folofolá ʻokú ne fakahaaʻi e manavaʻofa ʻa e Fakamoʻuí, kae ʻikai ako ha taha ʻo e ngaahi meʻa ko ʻení.

Fakakakato ha taha ʻo e ngaahi fili fakaako ko ʻení, ʻo kumi ʻa e meʻa ʻoku tokoni ke mahino lelei ange kiate koe ʻa e founga te ke lava ai ʻo aʻusia e manavaʻofa ʻa e Fakamoʻuí ʻi hoʻo moʻuí.

Ako ha taha ʻo e ngaahi talanoa ko ʻeni ʻokú ne fakahaaʻi e manavaʻofa ʻa e Fakamoʻuí: Mātiu 18:23–35; Sione 8:1–11.
Ako ha potufolofola ʻe taha pe ua mei he ngaahi potufolofola ko ʻení ʻoku akoʻi ai fekauʻaki mo e manavaʻofa ʻa e Fakamoʻuí: Mōsaia 15:7–9; Tokāteline mo e Ngaahi Fuakava 64:2–4; Tokāteline mo e Ngaahi Fuakava 101:9.

Fakakaukau ke fakaafeʻi e kau akó ke feakoʻiʻaki ʻa e meʻa ne nau ako mo ongoʻí. Te ke lava foki ʻo fakaafeʻi ha niʻihi ʻe loto-fiemālie ke vahevahe mo e kalasí.

ʻE lava foki ke tokoni ʻa e fakamoʻoni ko ʻení ʻi he fealēleaʻaki ko ʻení.

Naʻe fakamoʻoni ʻa ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

15:45

ʻE lava ʻe Sīsū Kalaisi ke fakamolemoleʻi he naʻá Ne totongi huhuʻi ʻetau ngaahi angahalá.

ʻOku fili hotau Huhuʻí ke faʻa fakamolemole tuʻunga ʻi Heʻene ʻofa mamahi, ʻaloʻofa mo e ʻofa taʻe-hano-tataú.

ʻOku finangalo hotau Fakamoʻuí ke tau fakamolemole he ko e taha ia ʻo Hono ngaahi ʻulungaanga fakalangí.

Pea ʻi Heʻene hoko ko e Tauhisipi Leleí, ʻokú Ne fiefia he taimi ʻoku tau fakatomala aí.

Naʻa mo ʻetau ongoʻi e mamahi fakaʻotuá tuʻunga heʻetau ngaahi angafaí, ʻoku tau fakaafeʻi e Fakamoʻuí ki heʻetau moʻuí, ʻi he taimi pē ʻoku tau fili ai ke fakatomalá. (“Fakatomalá: Ko ha Fili Fakafiefia,” Liahona, Nōvema 2016, 123)

Ko hono ongoʻi e manavaʻofa ʻa e Fakamoʻuí kiate aú

Ko e fē ha taimi kuó ke aʻusia ai pe ko ha taha ʻokú ke ʻiloʻi e manavaʻofa ʻa e Fakamoʻuí? (Manatuʻi ke ʻoua naʻá ke vahevahe ha ngaahi angahala he kuohilí pe ha meʻa ʻoku fuʻu fakataautaha.)

Fakamanatu ki he kau akó ʻa e talavou mei he kamataʻanga ʻo e lēsoní.
Ko e hā te ke vahevahe mo e talavoú ni ʻo makatuʻunga ʻi he meʻa naʻá ke ako he ʻaho ní?

Ngaahi Maʻuʻanga Tokoni Kehé

Fēfē kapau ʻoku ou ongoʻi kuo ʻave au ʻe heʻeku ngaahi filí ʻo fuʻu mamaʻo mei he Tamai Hēvaní mo Sīsū Kalaisi?

Naʻe akonaki ʻa ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

14:31

Mahalo ʻe fifili ha niʻihi, “ʻOku malava nai ke u toe foki? ʻE lumaʻi, fakasītuʻaʻi, mo liʻaki au ʻo taʻengata ʻe hoku ngaahi kaungāmeʻa kimuʻá? ʻE lelei ange nai ke u hē ai pē au? ʻE fēfē ʻa e fakafeangai ʻa e ʻOtuá kapau te u feinga ke foki?” …

ʻE hāʻele mai ʻetau Tamai Hēvaní kiate kitautolu, ʻoku fonu Hono lotó ʻi he ʻofa mo e manavaʻofa. …

ʻE fiefia ʻa e langí ʻi heʻetau fokí. (“Ko e Foha Maumau Koloá mo e Hala ʻOku Fakatau ki ʻApí,” Liahona, Nōvema 2023, 88)

ʻE tokoniʻi fēfē nai au ʻe he manavaʻofa ʻa e Fakamoʻuí?

Naʻe fakamatala ʻa ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku hanga ʻe he manavaʻofa ʻa e Fakamoʻuí neongo ʻetau ngaahi tōnounoú ʻo tohoakiʻi kitautolu kiate Ia mo fakaʻaiʻai kitautolu ʻi heʻetau toutou fāifeinga ke fakatomala mo muimui kiate Iá. (“Ko Hotau Tauhisipi Leleí,” Liahona, Mē 2017, 29)

Naʻe fakamoʻoni ʻa ʻEletā Pita F. Miua ʻo e Kau Fitungofulú ʻo pehē:

10:2

ʻOku tatau ai pē pe ʻokú ke fuesia ʻa e kavenga ʻo ha angahala kuo teʻeki fakaleleiʻi, faingataʻaʻia koeʻuhí ko ha faihala naʻe fai kiate koe ʻi he kuohilí, pe fefaʻuhi ke fakamolemoleʻi pē koe koeʻuhí ko ha fehalaaki fakatuʻupakē, ʻoku lava ke ke maʻu ʻa e mālohi faifakamoʻui mo e huhuʻi ʻa e Fakamoʻui ko Sīsū Kalaisí.

ʻOku ou fakamoʻoni ʻokú Ne moʻui. Ko Ia hotau Fakamoʻuí mo e Huhuʻí. ʻOkú Ne ʻofa ʻiate kitautolu. ʻOkú Ne manavaʻofa kiate kitautolu, ʻokú Ne fonu ʻi he ʻaloʻofa, pea te Ne lava ʻo fakamoʻui koe. (“Te Ne Lava ʻo Fakamoʻui Au!,” Liahona, Mē 2023, 41)

Fēfē kapau ʻoku ou feinga ke fakatomala kae kei hokohoko atu pē ʻeku faingataʻaʻiá?

Naʻe fakamoʻoni ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

15:26

Ko e ongoongo fakafiefia ki ha taha pē ʻoku loto ke ʻatā mei he ngaahi nunuʻa ʻo e fili taʻe fakapotopoto ʻo e kuohilí, ʻoku kehe e ʻafio ʻa e ʻEikí ki he ngaahi vaivaí mei Heʻene ʻafio ki he angatuʻú. Kuo fakatokanga e ʻEikí ʻe ʻi ai ha tautea ki he angatuʻu ʻoku teʻeki ke fakatomalaʻí, ka ʻoku folofola maʻu pē ʻa e ʻEikí ʻi he ʻaloʻofa ʻo kau ki he ngaahi vaivaí. (“Mālohi Fakataautaha ʻi he Fakalelei ʻa Sīsū Kalaisí,” Liahona, Nōvema 2013, 83)

Naʻe vahevahe ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Kapau ʻokú ke fakatokangaʻi ʻokú ke fai ʻa e ngaahi fehalaaki tatau, fefaʻuhi ke tuʻu maʻu ʻi hoʻo loto-holi ke liliú, fakahā ki hoʻo Tamai Hēvaní hoʻo ʻofa kiate Iá pea fakamālohia hoʻo tui ki he ʻEiki ko Sīsū Kalaisí. Ako ʻiate Ia, ako fekauʻaki mo ʻEne Fakalelei toputapú, pea fakakaukau lahi ki he meʻa naʻá Ne mamahi ai maʻaú. Tauhi ʻEne ngaahi fekaú ʻi he loto-fakapapau ange. ʻI hoʻo fai ho fatongiá ke langaki hoʻo tui ki he Fakamoʻuí, ʻoku ou palōmesi atu ʻe fakalahi ʻe he langí ʻa e meʻafoaki ko ʻeni ʻo e tuí, pea te ke maʻu ʻa e ivi fakalaumālie ke fakatomala mei hoʻo ngaahi angahalá pea ʻoua ʻe toe foki kiate kinautolu. (The Divine Gift of Forgiveness [2019], 104)

Ngaahi ʻEkitivitī Fakalahi ki he Akó

Founga ʻe taha ke kamata ʻaki ʻa e lēsoní

Ki ha founga ʻe taha ke kamata ʻaki e lēsoní, fakakaukau ke huluʻi ʻa e foʻi vitiō “Point of Safe Return” mei he taimi 0:00 ki he 1:58. Naʻe vahevahe ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he vitiō ko ʻení ha talanoa fakatātā ke akoʻi fekauʻaki mo e malava ʻa e Fakamoʻuí ke fakamoʻui mo fakamolemoleʻí.

15:40

Fakaafeʻi e kau akó ke aleaʻi e fehuʻi ko ʻení:

Ko e hā ha ngaahi founga ʻoku feinga ai ʻa Sētane ke fakalotoʻi kitautolu kuo tau fakalaka atu ʻi ha “tuʻunga ʻo e taʻetafokí” ʻi he taimi ʻoku tau faiangahala aí?

Fakaafeʻi e kau akó ke nau fakalaulauloto pe kuo nau ongoʻi he ʻikai lava ke fakamolemoleʻi kinautolu koeʻuhí ko ha angahala pe fehalaaki kuo nau fai. Fakakaukau ke vahevahe ʻa e fakamatala ko ʻení.

Naʻe hoko atu ʻa ʻEletā ʻUkitofa ʻo pehē:

Naʻe hifo mai ʻa Kalaisi ke fakamoʻui kitautolu. Kapau ne tau fai ha meʻa hala, ʻe lava ke fakapapauʻi mai ʻe he Fakalelei ʻa Sīsū Kalaisí ʻoku ʻikai ha tuʻunga ia he angahalá ʻe tapu ke toe foki mei ai. ʻE lava pē ha foki lelei mei ai ʻo kapau te tau muimui ki he palani ʻa e ʻOtuá ki hotau fakamoʻuí. (“Point of Safe Return,” Liahona, May 2007, 99)

ʻI heʻenau akó, ʻe lava ke kumi ʻe he kau akó ha fakamoʻoni ʻo e malava ʻe he Fakamoʻuí ke fakahaofi kitautolu mei heʻetau ngaahi angahalá.

Ko e fiemaʻu ʻo e mamahi ʻoku taau mo e ʻOtuá

Mahalo ʻe maʻu ʻe he kau akó ha ngaahi fehuʻi fekauʻaki mo e ʻuhinga ʻoku tau ongoʻi halaia pe faingataʻaʻia ai ʻi he taimi ʻoku tau faiangahala aí. Ko e founga ʻe taha ke tali ʻaki e ngaahi fehuʻi ko ʻení ko hono ako e fatongia ʻo e mamahi ʻoku taau mo e ʻOtuá.

Fakaafeʻi e kau akó ke fakalaulauloto ki he faikehekehe ʻi he mamahi ʻoku taau mo e ʻOtuá mo e mamahi fakamāmaní. ʻE lava ke ako ʻe he kau akó ʻa e meʻa naʻe akoʻi ʻe he ʻAposetolo ko Paulá ʻi he 2 Kolinitō 7:9–10. Te nau lava foki ʻo laukonga fekauʻaki mo e kau Nīfai naʻa nau aʻusia ʻa e mamahí koeʻuhí ko ʻenau ngaahi angahalá ʻi he Molomona 2:11–14. ʻE lava ke aleaʻi ʻe he kau akó ha fehuʻi hangē ko ʻení:

Ko e hā ʻokú ke ako fekauʻaki mo e mamahi ʻoku taau mo e ʻOtuá mo e mamahi fakamāmaní?

Te ke lava foki ʻo vahevahe e lea ko ʻeni ʻa Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí:

16:19

ʻOku ueʻi hake ʻe he mamahi ʻoku taau mo e ʻOtuá ʻa e liliú mo e ʻamanaki lelei tuʻunga ʻi he Fakalelei ʻa Sīsū Kalaisí. ‘Oku fusi hifo kitautolu ʻe he mamahi fakamāmaní, pea toʻo atu e ‘amanaki leleí, pea fakalotoʻi kitautolu ke tau fakavaivai ki ha ngaahi ‘ahiʻahi kehe.

ʻOku fakatupu ʻe he mamahi ʻoku taau mo e ʻOtuá ʻa e uluí mo ha liliu ʻo e lotó. ‘Okú ne ngaohi kitautolu ke tau fehiʻa ʻi he angahalá kae ʻofa ʻi he meʻa ʻoku leleí. ʻOkú ne poupouʻi kitautolu ke tau tuʻu hake ʻo ʻaʻeva ʻi he maama ʻo e ʻofa ʻa Kalaisí. Ko e fakatomala moʻoní ko hano liliu ka ‘oku ‘ikai ko hano fakamamahiʻi. ‘Io,ʻoku faʻa fakamamahi e fakaʻiseʻisá mo e mamahi moʻoni ko e talangataʻá pea ko e ongo sitepu mahuʻinga ia ʻi he founga toputapu ʻo e fakatomalá. Ka ko e taimi ko ia ‘oku langaki ai ‘e he loto-halaiá haʻate fakaliliʻa ‘iate kita peé, pe taʻofi kitautolu mei haʻatau toe tuʻu haké, ‘okú ne taʻofi leva ‘e ia pea ‘ikai ke ne poupouʻi ‘a ‘etau fakatomalá. (“Te Ke Lava ʻo Fai ia He Taimí Ni!,” Liahona, Nōvema 2013, 56)