Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Selemaia 36: Ko e Folofola ʻa e ʻOtuá

“Selemaia 36: Ko e Folofola ʻa e ʻOtuá,” Fuakava Motuʻá – Tohi Lēsoni ʻa e Faiako Seminelí (2026)

“Selemaia 36: Ko e Folofola ʻa e ʻOtuá,” Fuakava Motuʻá – Tohi Lēsoni ʻa e Faiako Seminelí

Selemaia 31–33; 36–38; Tangilaulau ʻa Selemaiá 1; 3: Lēsoni 135

Selemaia 36

Ko e Folofola ʻa e ʻOtuá

Old Testament Prophet writing on a scroll

Ko e folofolá ko ha konga mahuʻinga ia ʻo ʻetau fehokotaki mo Sīsū Kalaisí. ʻOku hanga ʻe heʻetau ako mei he folofolá ʻo tataki ʻetau ngaahi fakakaukaú mo hotau lotó kiate Ia, ʻa ia ʻokú ne fakaafeʻi Hono mālohí ki heʻetau moʻuí. Lolotonga ha taimi ʻo e hē mei he moʻoní, naʻe fakahinohinoʻi ʻe he ʻEikí ʻa e palōfita ko Selemaiá ke ne tohi pea ʻoatu ʻa e ngaahi lea ʻa e ʻEikí ki he kakai ʻo Siutá koeʻuhí ke nau tafoki kiate Ia pea fakamolemoleʻi kinautolu. ʻE lava ke tokoni ʻa e lēsoni ko ʻení ke mahino ki he kau akó ʻa e founga ʻoku fakatafoki ai kinautolu ʻe he folofolá kia Sīsū Kalaisi ke fakamolemoleʻi ʻenau angahalá.

Teuteu ʻa e tokotaha akó: Fakakaukau ke fakaafeʻi e kau akó ke toe vakaiʻi ʻenau ngaahi taumuʻa ako folofola fakatāutahá mo e fakalakalaka ʻi he laukonga ʻoku fiemaʻu ki he taʻú. Te ke lava foki ʻo fakaafeʻi e kau akó ke fakakaukau ki he founga ʻoku tokoniʻi ai kinautolu ʻe heʻenau ako folofolá ke nau tafoki ki he ʻEikí.

Ngaahi ʻEkitivitī Ako ʻOku Ala Fakahokó

Leá

Fakakaukau ki ha founga ke tokoniʻi ai e kau akó ke nau teuteu ke ako fekauʻaki mo e founga ʻoku fakaʻaongaʻi ai ʻe he ʻEikí ʻa e folofolá ke fakatonutonu kitautolu ʻi he ʻofa mo ʻomi kitautolu kiate Iá. Ko e founga ʻe taha ke fai ai ʻení ko hono ʻai ke fakakaukau ʻa e kau akó ki ha ngaahi tūkunga ʻe ngali taʻe-fakafiemālie ai ke lea. Kapau ʻe fiemaʻu, te ke lava ʻo fakaʻaongaʻi e ngaahi tūkunga ko ʻení.

ʻE anga fēfē ha tali ʻa ha taha ʻoku tokanga kiate koe ʻi he ngaahi tūkunga ko ʻení?
- Hili e maʻu meʻatokoni hoʻataá, ʻoku fakatokangaʻi atu ʻe hoʻo kaungāmeʻá ʻoku fihia ha meʻi meʻakai ʻi ho nifó.
- ʻOku fakaafeʻi koe ki ha paati ʻe fai ai ha ngaahi ʻekitivitī taʻefeʻunga. ʻOku ʻiloʻi ʻe hoʻo kaungāmeʻá ʻa e ngaahi ʻekitivitií ka ʻokú ne ʻiloʻi ʻokú ke hanganaki fiefia atu ke ke ʻalu.
Ko e hā te ne ala fakaʻaiʻai ha taha ke lea ʻi he ngaahi tūkunga ko ʻení?
Ko e hā nai ha ola ʻo haʻo lea pe fakalongolongo peé?

ʻOku ʻafioʻi ʻe he Tamai Hēvaní mo Sīsū Kalaisi ʻa e ngaahi meʻa ʻoku ʻikai ke tau sio ki aí. ʻOkú Na fiemaʻu ʻa e lelei tahá maʻatautolu, pea ʻokú Na folofola mai kiate kitautolu ʻo fakafou ʻi he folofolá (vakai, 2 Nīfai 32:3; Tokāteline mo e Ngaahi Fuakava 1:37–38). ʻI hoʻo ako he ʻaho ní, fakalaulauloto ki ha ngaahi founga ʻe lava ke faitāpuekina ai ʻe he folofolá hoʻo moʻuí. Fakakaukau ki he founga ʻe lava ke tākiekina ai ʻe he ngaahi fakakaukau ko ʻení hoʻo ako fakatāutahá.

Ko ha taumuʻa ʻo e folofolá

Lau ʻa e Selemaia 36:1–3, ʻo kumi e ʻuhinga naʻe fekau ai ʻe he ʻEikí ʻa Selemaia ke lekooti ʻEne ngaahi leá maʻá e kakai ʻo Siutá.

Ko e hā naʻe finangalo ʻa e ʻEikí ke fai ʻe he kakai ʻo Siutá?
Ko e hā ʻoku akoʻi mai ʻe he ngaahi vēsí ni ʻo fekauʻaki mo ha ngaahi taumuʻa ʻe niʻihi ʻo e folofolá?

ʻE lava ke ʻiloʻi ʻe he kau akó ha foʻi moʻoni hangē ko e ʻoku tokoniʻi kitautolu ʻe he folofolá ke tau tafoki ki he ʻEikí pea maʻu ʻEne fakamolemolé.

Mahalo te ke fie fakaafeʻi e kau akó ke fakaʻilongaʻi ʻa e ongo kupuʻi lea “koeʻuhí ke nau tafoki ʻa e tangata takitaha mei hono hala koví” mo e “koeʻuhí ke u fakamolemole ai ʻenau hiá” (veesi 3). Te nau lava ʻo hiki ʻa e moʻoni naʻa nau maʻú ʻo ofi ki he ngaahi kupuʻi lea ko ʻení ʻi heʻenau folofolá.
ʻOku tokoniʻi fēfē kitautolu ʻe he folofolá ke tau tafoki ki he ʻEikí pea maʻu ʻEne fakamolemolé?

Fakakaukau ke hiki e ngaahi tali ʻa e kau akó ʻi he palakipoé. ʻI he vahevahe ʻa e kau akó, te nau lava ʻo vakai ki he ngaahi fakakaukau ʻoku maʻu ʻi he ngaahi potufolofola ko ʻení. Mahalo te ke fie ʻilo e ngaahi potufolofola ko ʻení koeʻuhí ke ke lava ʻo vakaiʻi kinautolu lolotonga e vahevahe ʻa e kau akó. Pe ʻi he hili e vahevahe ʻa e kau akó ha ngaahi tali ki he fehuʻi kimuʻá, te ke lava ʻo ʻoange ʻa e ngaahi fakahinohino ko ʻení pea ʻai ke nau tānaki atu ki he ngaahi fakakaukau ʻi he palakipoé.

Lau ʻa e ngaahi potufolofola ko ʻení, ʻo kumi ha toe ngaahi founga ʻoku tokoniʻi ai kitautolu ʻe he folofolá ke tau tafoki ki he ʻEikí pea fakamolemoleʻi ʻetau ngaahi angahalá.

2 Tīmote 3:16

ʻAlamā 37:8

Hilamani 15:7

Ko e tuʻí mo e takainga tohí

Te ke lava ʻo fakamatalaʻi fakanounou pe lau ʻa e palakalafi ko ʻení.

Naʻe fai ʻe Selemaia ʻa e meʻa naʻe fekau ʻe he ʻEikí peá ne kole ki ha tangata ko Paluki ke ne hiki e folofola ʻa e ʻEikí ʻi ha takainga tohi. Koeʻuhí naʻe tuku pōpula ʻa Selemaia, naʻá ne kole kia Paluki ke lau e folofola ʻa e ʻEikí ki he kakai ʻo Siutá, kau ai ha kau houʻeiki tokolahi. Hili hono fai iá, naʻe ʻoange ʻe Paluki ʻa e takainga tohí ki he kau houʻeikí ke nau lau kia Sihoiakimi, ko e tuʻi ʻo Siutá (vakai, Selemaia 36:4–10, 14–15, 20–21).

Lau ʻa e Selemaia 36:20–24, ʻo kumi e tali ʻa e Tuʻi ko Sihoiakimí ki heʻene fanongo ki he ngaahi lea ʻi he takainga tohí. ʻOku ʻuhinga ʻa e “naʻá ne” ʻi he veesi 23, ki he Tuʻi ko Sihoiakimí.

ʻOkú ke pehē ko e hā naʻe pehē ai e tuʻí?

Lau ʻa e Selemaia 36:25, ʻo kumi e founga naʻe feinga ai ha kau houʻeiki ʻe niʻihi ke tākiekina e tuʻí.

Fakaafeʻi e kau akó ke nau fakakaukauloto ko e kau houʻeiki kinautolu ʻi he veesi 25. ʻI hono fakaʻaongaʻi ʻo e meʻa kuo nau ako ʻi he kalasí he ʻaho ní, kole ki he kau akó ke teuteu ha tali ki he tuʻí ʻe tokoni ke mahino kiate ia ʻa e founga ʻe lava ke faitāpuekina ai ʻe he folofolá ʻene moʻuí.

Ko e founga ʻe taha ke fai ai e ʻekitivitī ko ʻení ko hono vahevahe ʻa e kalasí ki ha kulupu ʻe tolu. ʻE lava ke fakafofongaʻi ʻe he tokotaha ako takitaha ha taha ʻo e kau houʻeikí, pea teuteu fakataha ʻe he ngaahi kulupú ʻenau ngaahi talí. Hili iá, te ke lava ʻo fakaafeʻi ha kulupu ke haʻu ki muʻa ʻi he kalasí pea tulamaʻi ʻa e fakafōtunga te nau fai ki he tuʻí. Te ke lava ʻo fakaafeʻi ha tokotaha ako ʻe taha ke ne fakatātaaʻi ʻa e tuʻí pe ko hoʻo fakatātaaʻi ʻe koe faiakó e fatongia ko iá. Mahalo te ke fie fokotuʻu ange ke tulamaʻi ʻe he kau akó ha ikuʻanga ʻe taha ki he talanoá ʻoku fakalotoʻi ai ʻa e tuʻí ke ʻoua te ne tutu ʻa e takainga tohí.

Ko e hā ha tūkunga fakaonopooni ʻe ala tokoni ai e ngaahi akonaki mei hoʻo talí ki ha toʻu tupu?

Fakakaukauloto ki he meʻa kuó ke akó

Te ke lava ʻo vahevahe ʻa e fakamatala ko ʻení ke tokoni ki he kau akó ke fakakaukau ki he meʻa ne nau ako mei heʻenau ako ʻa e Selemaia 36.

Naʻe akonaki ʻa ʻEletā D. Toti Kulisitofāsoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku “fakahā atu [ʻe he ʻOtuá] ʻa hono māfimafí” [vakai, ʻAlamā 37:14] ʻi he ngaahi folofolá, ke fakamoʻui mo hakeakiʻi ʻEne fānaú. ʻI Heʻene folofolá … ʻokú Ne tokoni lahi ki heʻetau manatú, fakatonutonu ʻa e meʻa ʻoku loi mo halá, peá Ne ʻomi kitautolu ki he fakatomalá mo e fiefia ʻia Sīsū Kalaisi, ko hotau Huhuʻí. (“Ko e Tāpuaki ʻo e Folofolá,” Ensign pe Liahona, Mē 2010, 33)

ʻE ala tokoni ke ʻoange ha taimi ki he kau akó ke nau fakalaulauloto pe lekooti ʻenau ngaahi tali ki he fehuʻi ko ʻení kimuʻa pea nau vahevahe mo e kalasí.

ʻE tokoni fēfē nai ki hoʻo ako fakatāutahá ke ʻiloʻi ʻe lava ke tokoniʻi koe ʻe he folofolá ke ke tafoki ki he ʻEikí pea maʻu ʻEne fakamolemolé mo e fakahinohinó?

ʻE lava ke hoko ʻeni ko ha faingamālie lelei ki he kau akó ke fakakaukau ki heʻenau ngaahi taumuʻa ako fakatāutahá pea mo e laukonga ʻoku fiemaʻu ki he maaka ʻi he seminelí. Fakakaukau ke fakaafeʻi e kau akó ke toe vakaiʻi ʻenau ngaahi taumuʻá pea fakakaukau ki he founga te nau lava ʻo tokanga taha ange ai ki he tafoki kia Sīsū Kalaisí ko ha konga ʻo ʻenau ako folofola fakatāutahá.

Ngaahi Maʻuʻanga Tokoni Kehé

Ko e hā ha ngaahi tāpuaki ʻe lava ke maʻu mei he ako folofolá?

Naʻe akonaki ʻa Palesiteni Lāsolo M. Nalesoni ʻo pehē:

15:2

ʻOku ou palōmesi atu ʻi hoʻo ako [ʻi he faʻa lotu] e Tohi ʻa Molomoná ʻi he ʻaho kotoa peé, ʻe toe lelei ange ai hoʻo fai tuʻutuʻuní he—ʻaho kotoa pē. ʻOku ou palōmesi atu ʻi hoʻo fakalaulauloto ki he meʻa ʻokú ke akó, ʻe fakaava mai e ngaahi matapā ʻo e langí, pea te ke maʻu e tali ki hoʻo ngaahi fehuʻí mo e tataki ki hoʻo moʻuí. ʻOku ou palōmesi atu ʻi hoʻo fakaʻutumauku fakaʻaho he Tohi ʻa Molomoná, ʻe lava ke maluʻi koe mei he ngaahi kovi ʻo e kuongá. (“Ko e Tohi ʻa Molomoná: Ne Mei Fēfē Nai Hoʻo Moʻuí Ka Ne ʻIkai Ia?,” Liahona, Nōvema 2017, 62–63)

Naʻe pehē ʻe Palesiteni ʻEselā Tafu Penisoni:

Ko e folofola ‘a e ‘Otuá, ʻo hangē ko ʻene hā ʻi he folofolá … ʻokú ne maʻu ‘a e mālohi ke maluʻi ‘a e Kāingalotú mo fakateunga kinautolu ‘aki ‘a e Laumālié ke nau lava ‘o tekeʻi ‘a e koví, tuʻu maʻu ʻi he leleí, mo maʻu ha fiefia ‘i he moʻui ko ʻení. (Ngaahi Akonaki ʻa e Kau Palesiteni ʻo e Siasí: ʻEselā Tafu Penisoni [2014], 137)

Naʻe vahevahe ʻe ʻEletā D. Toti Kulisitofāsoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻI he ikuʻangá, ko e taumuʻa mahuʻinga taha ʻo e folofola kotoa pē ko hono fakafonu ʻaki hotau laumālié ʻa e tui ki he ʻOtua ko e Tamaí mo Hono ʻAlo ko Sīsū Kalaisí—tui ʻokú Na moʻui; tui ki he palani ʻo ʻetau Tamaí ki heʻetau moʻui taʻe-faʻa-maté mo e moʻui taʻengatá; tui ki he Fakalelei mo e Toetuʻu ʻa Sīsū Kalaisí ʻa ia ʻoku lava ai ke fakahoko ʻa e palani ko ʻeni ʻo e fiefiá; tui ki hono moʻui ʻaki ʻo e ongoongolelei ʻo Sīsū Kalaisí, pea mo e tui ke ʻiloʻi “[ʻa] e ʻOtua moʻoni pē tahá, mo Sīsū Kalaisi, ʻa ia naʻá [Ne] fekaú” (Sione 17:3). …

[Ko] e ngaahi lea [ʻa e] kau palōfitá … ʻoku meimei ke ʻomi hokohoko kiate kitautolu ʻi he televīsoné, letioó, ʻInitanetí, satelaité … pea [paaki] foki. ʻOku ou pehē ʻoku teʻeki ke ʻi he hisitōliá ha kakai kuo tāpuekina ʻaki ha ngaahi folofola lahi ʻaupito. Pea ʻikai ngata aí, ka ʻoku malava ke maʻu ʻe he tangata, fefine, mo e fānau kotoa pē ha tatau fakataautaha ʻo e ngaahi tohi toputapú ni ʻi heʻenau lea fakafonuá. … ʻOku hanga ʻe he tāpuaki ko ʻení ʻo fakahā mai ʻa e naʻinaʻi ʻa e ʻEikí ki hono mahuʻinga ʻo ʻetau toutou fakaʻaongaʻi ʻa e ngaahi folofolá ʻo lahi ange ʻi ha toe kuonga he kuohilí. (“Ko e Tāpuaki ʻo e Folofolá,” Liahona, Mē 2010, 34, 35)

Ngaahi ʻEkitivitī Fakalahi ki he Akó

ʻE lava ke tokoniʻi kitautolu ʻe he folofolá ke ikunaʻi ʻa e ʻahiʻahí

Te ke lava ʻo fai ʻeni ʻi he fakaʻosinga ʻo e konga ʻoku ui “Ko ha taumuʻa ʻo e folofolá.”

Vahevahe ʻa e talanoa ko ʻeni naʻe fakamatalaʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá. Ko e founga ʻe taha ke vahevahe ai ʻa e talanoa ko ʻení ko hono fokotuʻutuʻu ʻo e kau akó ki ha ngaahi kulupu tautau toko tolu pea tufaki ha tatau ʻo e konga leá ki he kulupu takitaha. ʻE lava ke lau ʻe he tokotaha ako takitaha ha palakalafi ʻe taha. Te ke lava ʻo hiki ʻa e ngaahi fehuʻi ko ʻení ʻi he palakipoé ke fakakaukau ki ai ʻa e kau akó lolotonga ʻenau laukongá pea aleaʻi ʻi heʻene ʻosí.

ʻI heʻeku ʻalu ki he seminelí ʻi he ako māʻolungá, naʻe ʻi ai haku kaungāmeʻa naʻe tangutu ʻi he tafaʻaki ʻe tahá meiate au. Naʻá ne poto mo angaʻofa, pea naʻá ne ʻulungaanga lelei. Naʻe tātātaha ke ma fesioaki ʻi tuʻa he seminelí. ʻI hoku taʻu fakaʻosi ʻi he akoʻanga māʻolungá, ne ma maheni ai ʻi he kalasi seminelí mo aleaʻi ha ngaahi meʻa lahi naʻe mahuʻingamālie kiate kimaua.

Naʻe hangē naʻe maʻu ʻe hoku kaungāmeʻá ha loto-holi ke fai ʻa e meʻa ʻoku totonú mo tauhi e ngaahi fekaú, ka ʻi he taimi tatau pē naʻe faingataʻa ke ne talangofua maʻu pē ki he ngaahi fekaú. ʻI he seminelí, te ne talanoa fekauʻaki mo ʻene ʻofa ki he ʻOtuá pea mo e ongoongoleleí, ka ʻi he pongipongi Mōnité, te u ʻilo ai fekauʻaki mo e ngaahi meʻa naʻá ne fakahoko ʻi he fakaʻosinga ʻo e uiké mo ʻene faingataʻaʻia ʻi he muimui ki he Lea ʻo e Potó mo hono tauhi e ngaahi tuʻunga moʻui kehe ʻo e Siasí. Naʻá ne faʻa talanoa mai fekauʻaki mo ʻene meʻa ʻoku fai he fakaʻosinga ʻo e uiké. Naʻe hangē naʻá ne fakaʻiseʻisa ʻi he meʻa naʻá ne faí pea naʻá ne fakaʻamu ke toe lelei ange. Te u poupouʻi ia ʻaki haʻaku talanoa fekauʻaki mo e loto-toʻá, fili ʻa e ngaahi kaungāmeʻa totonú, ʻikai tō ki ha ngaahi tūkunga paú, mo e lava ke tali ʻikaí. Naʻe hangē naʻá ne houngaʻia ʻi he fakalotolahí, ka naʻe hokohoko atu ʻene fai ʻa e ngaahi meʻa tatau ʻi he māhina ki he māhina. Naʻá ne fakamatala fekauʻaki mo ʻene fie fakatomalá, ka naʻe hangē naʻe ʻikai pē ke hoko ia.

Kapau te u talanoa ki ai he ʻahó ni, ʻe siʻisiʻi ange ʻeku talanoa kiate ia fekauʻaki mo e ngaahi sitepu ʻe fiemaʻu ki he fakatomalá, kae toe lahi ange fekauʻaki mo e tupuʻanga mo e mālohi ʻo ʻene malava ke liliú, fakatomalá, pea mo hono fakamolemoleʻí. Te u talanoa fekauʻaki mo ʻene tui kia Sīsū Kalaisí. Te u feinga ke tokoniʻi ia ke ne ʻiloʻi kapau te ne fakatupulaki ʻene ʻilo mo e tui kia Kalaisí, mo fakamālohia ʻene tui kiate Iá, ʻe ʻomi leva ʻe heʻene tui mo e falala kiate Iá ha mālohi—Hono mālohí ke tokoni ke fakamālohia ia ke liliu hono ʻulungāngá. (The Divine Gift of Forgiveness [2019], 98–99)

Ko e hā naʻe mei kehe hono fakahoko ʻe ʻEletā ʻEnitasení? Ko e hā hono ʻuhingá?
Naʻe mei tokoni fēfē nai ʻa e folofolá ki he finemui ko ʻení? (Fakakaukau ke fakaʻaongaʻi ʻa e fakamatala meia ʻEletā Kulisitofasoni ʻi he Ngaahi Maʻuʻanga Tokoni Kehé ke tokoni ki hono tali ʻo e fehuʻi ko ʻení.)

Ko e mahuʻinga ʻo e folofolá

Ke tokoni ke ongoʻi ʻe he kau akó e mahuʻinga ʻo e folofolá, te ke lava ʻo huluʻi e foʻi vitiō ko ʻení. Te ke lava ʻo fai ʻeni kimuʻa he konga fakaʻosi ʻo e lēsoní.

0:60

Ko e hā ʻoku makehe kiate koe fekauʻaki mo e fakamatala ʻa Palesiteni Nalesoní?
Kuo tokoniʻi fēfē koe ʻe he folofolá ke ke tafoki kia Sīsū Kalaisí?

Ko Paluki mo e Tuʻi ko Sihoiakimí

Ke tokoni ke akoako fakahoko ʻe he kau akó ʻa e taukei ako folofola ʻo e fakafaikehekeheʻí, te ke lava ʻo fakaafeʻi kinautolu ke nau fakafehoanaki ʻa e fakafeangai ʻa e Tuʻi ko Sihoiakimí ki he takainga tohí (vakai, Selemaia 36:20–23) mo e fakafeangai ʻa Paluki ko e tangata tohi ʻa Selemaiá (vakai, Selemaia 36:27–28, 32).

Mahalo te ke fie talaange naʻe fuesia ʻe he Tuʻi ko Sihoiakimí ʻa e ngaahi nunuʻa ʻo hono fakafisingaʻi e folofola ʻa e ʻEikí ne lea ʻaki ʻo fakafou ʻia Selemaiá. Naʻe haʻi ʻa Sihoiakimi ʻo ʻave pōpula ki Pāpilone (vakai, Selemaia 22:18–19). Ka neongo ia, naʻe tāpuekina ʻa Paluki ʻi heʻene faivelenga ki he ngaahi folofola ʻa e ʻEikí ne folofola ʻaki ʻia Selemaiá (vakai, Selemaia 45:5).