« អេសាយ ៦០–៦៦ ៖ ការសោយរាជ្យក្នុងសហស្សវត្សរ៍របស់ព្រះអង្គសង្គ្រោះ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« អេសាយ ៦០–៦៦ ៖ ការសោយរាជ្យក្នុងសហស្សវត្សរ៍របស់ព្រះអង្គសង្គ្រោះ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
អេសាយ ៥៨–៦៦ ៖ មេរៀនទី ១២៩
អេសាយ ៦០–៦៦
ការសោយរាជ្យក្នុងសហស្សវត្សរ៍របស់ព្រះអង្គសង្គ្រោះ
ជាមួយនឹងពិភពលោកដ៏ចលាចលនេះ យើងទាំងអស់គ្នាចង់បានគ្រាដែលមានសេចក្តីសុខសាន្ត ។ ព្រះយេស៊ូវគ្រីស្ទដែលជាព្រះអង្គសង្គ្រោះនឹងយាងមកផែនដីវិញ ហើយសោយរាជ្យអស់មួយពាន់ឆ្នាំ ដោយចាប់ផ្ដើមនូវគ្រាដ៏មានសេចក្តីសុខសាន្ត ។ អេសាយបានព្យាករអំពីសម័យកាលនេះ ដែលត្រូវបានហៅថាសហស្សវត្សរ៍ ។ មេរៀននេះអាចជួយសិស្សឲ្យមានអារម្មណ៍រំភើបសម្រាប់ការយាងមកជាលើកទីពីរ និងការសោយរាជ្យក្នុងសហស្សវត្សរ៍របស់ព្រះអង្គសង្គ្រោះ ។
ការរៀបចំសិស្ស ៖ សូមអញ្ជើញសិស្សឲ្យជញ្ជឹងគិតអំពីអ្វីដែលពួកគេដឹងអំពីការយាងមកជាលើកទីពីរ និងការសោយរាជ្យក្នុងសហស្សវត្សរ៍របស់ព្រះអង្គសង្គ្រោះ ។ សូមអញ្ជើញពួកគេឲ្យជញ្ជឹងគិត ប្រសិនបើពួកគេទន្ទឹងរង់ចាំថ្ងៃនោះ ហើយហេតុអ្វី ។ ពួកគេអាចសួរឪពុក ឬម្តាយ ឬមជ្ឈិមវ័យដែលទុកចិត្តថាតើពួកគេមានអារម្មណ៍យ៉ាងណាចំពោះការយាងមកវិញរបស់ព្រះអង្គសង្គ្រោះ ។
សកម្មភាពរៀនសូត្រដែលអាចមាន
សហស្សវត្សរ៍
ដើម្បីជួយសិស្សយល់ពីមូលហេតុដែលការយាងត្រឡប់មកវិញរបស់ព្រះអង្គសង្គ្រោះនឹងជាពរជ័យមួយក្នុងជីវិតរបស់យើង សូមពិចារណាចាប់ផ្តើមដោយការសួរសំណួរខាងក្រោមនេះ ៖
-
តើពិភពលោកនេះមានបញ្ហាអ្វីខ្លះដែលអ្នកចង់ផ្លាស់ប្តូរ ?
អ្នកអាចសរសេរឃ្លាខាងក្រោមមួយចំនួននៅលើក្ដារខៀន ដើម្បីជួយសិស្សគិតអំពីចម្លើយ ៖
-
មូលហេតុដែលមនុស្សយំ ឬឈឺចាប់
-
ឧទាហរណ៍ពីអំពើហិង្សា ភាពអយុត្តិធម៌ ឬការបំផ្លិចបំផ្លាញ
-
ឥទ្ធិពលរបស់សាតាំង
សូមចំណាយពេលបន្តិចដើម្បីជញ្ជឹងគិតពីបញ្ហាណាមួយនៅក្នុងជីវិតរបស់អ្នក ឬក្នុងជីវិតរបស់មនុស្សដែលអ្នកស្រឡាញ់ដែលអ្នកប្រាថ្នាចង់ផ្លាស់ប្តូរ ។ នៅពេលអ្នកសិក្សាថ្ងៃនេះ សូមស្វែងរកការណែនាំពីព្រះវិញ្ញាណបរិសុទ្ធ នៅពេលអ្នកស្វែងរកសេចក្ដីពិតដែលអាចជួយយើង និងជួយពិភពលោក ។
ជំពូកចុងក្រោយនៃគម្ពីរអេសាយ
សូមបង្ហាញរូបភាពនៃការយាងមកជាលើកទីពីររបស់ព្រះអង្គសង្គ្រោះ ហើយពន្យល់ថាព្រះគម្ពីរបង្រៀនថា នៅពេលអនាគត ព្រះអង្គសង្គ្រោះនឹងយាងមកផែនដីវិញ ហើយសោយរាជ្យសម្រាប់មួយពាន់ឆ្នាំ ។ អំឡុងពេលនេះត្រូវបានហៅថា សហស្សវត្សរ៍ ។
ជំពូកចុងក្រោយនៅក្នុងគម្ពីរអេសាយមាននូវការបង្រៀន និងការព្យាករអំពី ការយាងមកជាលើកទីពីររបស់ព្រះអង្គសង្គ្រោះ និងសហស្សវត្សរ៍ ។
សូមអានខគម្ពីរខាងក្រោមនេះ ដោយគូសចំណាំឃ្លាដែលជួយឲ្យអ្នកមានអារម្មណ៍រំភើបចំពោះការយាងមកវិញរបស់ព្រះអង្គសង្គ្រោះ ៖
-
អេសាយ ៦០:១៨–២០
-
អេសាយ ៦២:១១–១២
-
អេសាយ ៦៥:១៧–២៥
សូមអញ្ជើញសិស្សឲ្យចែកចាយឃ្លាមួយចំនួនដែលពួកគេបានរកឃើញ ហើយមូលហេតុដែលពួកគេទន្ទឹងរង់ចាំព្រះអង្គសង្គ្រោះប្រទានពរដល់ពួកគេ ។ សិស្សអាចចែកចាយឃ្លាដែលបង្ហាញថាព្រះអង្គសង្គ្រោះនឹងយកឈ្នះលើបញ្ហារបស់ពិភពលោក ។ ទាំងនេះគឺជាឧទាហរណ៍មួយចំនួន ៖
-
« នៅក្នុងស្រុកឯងនឹងមិនដែលឮនិយាយពីសេចក្តីច្រឡោតទៀត » ឡើយ ( អេសាយ ៦០:១៨ )
-
« គ្រានៃសេចក្តីសោកសៅរបស់ឯងនឹងផុតទៅ » ( អេសាយ ៦០:២០ )
-
« នឹងលែងឮសំឡេងយំ និងសម្រែកទៀត » ( អេសាយ ៦៥:១៩ )
-
« សត្វទាំងឡាយនឹងមិនបៀតបៀន ឬបំផ្លាញអ្វីទៀតឡើយ » ( អេសាយ ៦៥:២៥ )
ការលើកទឹកចិត្តសិស្សឲ្យគូសចំណាំឃ្លានៅក្នុងបទគម្ពីរដែលមិត្តរួមថ្នាក់របស់ពួកគេចែកចាយក៏អាចមានប្រសិទ្ធភាពផងដែរ ។
-
-
តើអ្នកនឹងសង្ខេបអ្វីដែលព្រះអង្គសង្គ្រោះនឹងធ្វើសម្រាប់រាស្រ្តរបស់ទ្រង់ នៅពេលទ្រង់យាងត្រឡប់មកវិញដោយរបៀបណា ?
សិស្សអាចចែកចាយសេចក្តីពិតផ្សេងៗគ្នា ។ សេចក្តីពិតមួយប្រហែលជាស្រដៀងដូចខាងក្រោម ៖ ដោយសារព្រះអង្គសង្គ្រោះ រាស្រ្តរបស់ទ្រង់នឹងរីករាយនឹងសុភមង្គល ភាពសុខសាន្ដ និងភាពរុងរឿងក្នុងអំឡុងសហស្សវត្សរ៍ ។ សូមពិចារណាសរសេរគោលការណ៍នេះ ឬគោលការណ៍មួយដែលដូចគោលការណ៍នេះនៅលើក្ដារខៀនដោយប្រើពាក្យសម្តីរបស់សិស្ស ។
ការពង្រឹងការយល់ដឹង
សូមមើលរូបភាពការយាងមកជាលើកទីពីររបស់ព្រះអង្គសង្គ្រោះ ។ សូមអញ្ជើញសិស្សឲ្យចងចាំអ្វីដែលពួកគេដឹង និងទទួលអារម្មណ៍អំពីព្រះយេស៊ូវគ្រីស្ទ ។
-
ហេតុអ្វីបានជាអ្នកគិតថា ការមានព្រះយេស៊ូវគ្រីស្ទនៅលើផែនដីនឹងនាំទៅរកសុភមង្គល ភាពសុខសាន្ដ និងអំណរ ?
សូមចំណាយពេលបន្តិច ដើម្បីជញ្ជឹងគិតនូវសំណួរទាំងឡាយដែលអ្នកមានអំពីសហស្សវត្សរ៍ និងពរជ័យនៃការយាងមករបស់ព្រះអង្គសង្គ្រោះ ។ ព្រះអម្ចាស់បានបើកសម្ដែងបន្ថែមទៀតលើប្រធានបទនោះ ។
សូមពិចារណាបង្ហាញសំណួរខាងក្រោមនេះ ។
ជ្រើសរើសសំណួរផ្ទាល់ខ្លួនមួយ ឬពីរអំពីសហស្សវត្សរ៍ ឬសំណួរខាងក្រោមដែលអ្នកចាប់អារម្មណ៍បំផុត ។ ចំណាយពេលជាច្រើននាទីដើម្បីស្វែងរកចម្លើយក្នុងបទគម្ពីរ និងប្រភពដែលបានតែងតាំងដ៏ទេវភាព ។ ផ្នែកដែលមានចំណងជើងថា « សហស្សវត្សរ៍ » នៅក្នុង សេចក្តីណែនាំដល់បទគម្ពីរទាំងឡាយ និង Topics and Questions នៅគេហទំព័រ ChurchofJesusChrist.org អាចមានប្រយោជន៍ ។
-
តើវាមានន័យយ៉ាងណាដែលព្រះអម្ចាស់នឹង « បង្កើតផ្ទៃមេឃថ្មី ហើយនឹងផែនដីថ្មី » ? ( អេសាយ ៦៥:១៧ ) ។ សូមអាន គោលលទ្ធិ និងសេចក្ដីសញ្ញា ៨៨:២៥–២៦ និង មាត្រានៃសេចក្ដីជំនឿ ១:១០ ។ សូមគិតអំពីអ្វីដែលខគម្ពីរទាំងនេះបង្រៀនអំពីព្រះចេស្ដារបស់ព្រះអង្គសង្គ្រោះ និងអារម្មណ៍របស់ទ្រង់ចំពោះពួកសុចរិត ។
-
តើនឹងមានសេចក្តីស្លាប់ក្នុងអំឡុងសហស្សវត្សរ៍ដែរឬទេ ? តើវាមានន័យយ៉ាងណាដែលថា ដោយសារព្រះអង្គសង្គ្រោះនោះកូនតូចៗ « ស្លាប់ក្នុងអាយុ ១០០ ឆ្នាំ » ? ( អេសាយ ៦៥:២០ ) ។ សូមអាន គោលលទ្ធិ និងសេចក្តីសញ្ញា ១០១:២៩–៣១ ហើយជញ្ជឹងគិតពីអ្វីដែលខគម្ពីរទាំងនេះបង្រៀនអ្នកអំពីព្រះចេស្ដារបស់ព្រះអង្គសង្គ្រោះ ។
-
តើនឹងមានអ្វីកើតឡើងចំពោះសាតាំង ដោយសារការយាងមករបស់ព្រះអង្គសង្គ្រោះ ? សូមអានខគម្ពីរមួយចំនួនដូចខាងក្រោមនេះ ៖ គោលលទ្ធិ និងសេចក្ដីសញ្ញា ៤៥:៥៥, ១០១:២៨, នីហ្វៃទី១ ២២:២៦ និង វិវរណៈ ២០:១–៣ ។ សូមគិតពីអ្វីដែលខគម្ពីរទាំងនេះបង្រៀនអ្នកអំពីព្រះអម្ចាស់ ។
-
តើព្រះអង្គសង្គ្រោះនឹងមានតួនាទីអ្វីខ្លះក្នុងអំឡុងសហស្សវត្សរ៍ ? តើទ្រង់នឹងធ្វើអ្វីខ្លះ ? សូមអាន គោលលទ្ធិ និងសេចក្ដីសញ្ញា ២៩:១១ និង ៤៥:៥៩ និង មាត្រានៃសេចក្ដីជំនឿ ១:១០ ។
-
តើព្រះអម្ចាស់បានបើកសម្ដែងអ្វីខ្លះអំពីសហស្សវត្សរ៍ ? សូមអានខគម្ពីរមួយចំនួនដូចខាងក្រោមនេះ ៖ គោលលទ្ធិ និងសេចក្ដីសញ្ញា ៤៥:៥៤, ៥៦–៥៨; ១០១:២៦–២៩ និង « Millennium » នៅក្នុង Topics and Questions នៅគេហទំព័រ ChurchofJesusChrist.org ។
សូមឲ្យសិស្សចែកចាយអ្វីដែលពួកគេបានរៀន ។ សូមពិចារណាអំពីរបៀបដែលអ្វីដែលពួកគេបានរៀនជួយបង្កើនក្តីរំភើបរបស់ពួកគេសម្រាប់ការយាងមកវិញរបស់ព្រះអង្គសង្គ្រោះ និងសហស្សវត្សរ៍ ។
ប្រសិនបើសិស្សសួរពីអត្ថន័យដែលថាសាតាំងនឹងត្រូវបាន « ស្រាយវាលែងបន្តិច » ( វិវរណៈ ២០:៣ ) នៅខាងចុងសហស្សវត្សរ៍ សូមអញ្ជើញពួកគេឲ្យអាន គោលលទ្ធិ និងសេចក្ដីសញ្ញា ៨៨:១១១–១១៥ ។
ស្រមៃនូវអ្វីដែលអ្នកបានរៀន
នៅពេលខ្លះការស្រមៃនូវអ្វីដែលអ្នកកំពុងរៀនអាចមានប្រសិទ្ធភាព ។ បិទភ្នែករបស់អ្នក ហើយស្រមៃនូវអ្វីដែលអ្នកបានរៀនអំពីព្រះអង្គសង្គ្រោះ និងនៅពេលដែលទ្រង់សោយរាជ្យនៅលើផែនដីក្នុងអំឡុងសហស្សវត្សរ៍ ។ អធិស្ឋានទូលសូមជំនួយពីព្រះវិញ្ញាណបរិសុទ្ធ ដើម្បីធ្វើឲ្យសកម្មភាពនេះមានអត្ថន័យសម្រាប់អ្នក ។ សូមស្រមៃមើលការយាងមកវិញរបស់ព្រះអង្គសង្គ្រោះ និងរបៀបដែលទ្រង់អាចនឹងប្រទានពរដល់អ្នក មនុស្សជាទីស្រឡាញ់ និងមនុស្សលោកទាំងអស់ ។
អ្នកអាចអានសេចក្ដីថ្លែងការណ៍ខាងក្រោមពីអែលឌើរ អាន់ឌើរសិន ដោយអញ្ជើញសិស្សឲ្យស្រមៃមើលនូវអ្វីដែលពួកគេបានឮ ។
អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់បានថ្លែងទីបន្ទាល់ ៖
គំនិតអំពីការយាងមករបស់ទ្រង់ធ្វើឲ្យព្រលឹងខ្ញុំរំភើបណាស់ ។ វានឹងក្លាយជាការណ៍អស្ចារ្យណាស់ ! ព្រំដែន និងភាពធំសម្បើម ភាពធំធេង និងសិរីរុងរឿងនេះនឹងមានលើសពីភ្នែកនៃជីវិតរមែងស្លាប់ដែលធ្លាប់បានឃើញ ឬបានជួបប្រទះ ។
… ទ្រង់នឹងយាងមក « លើពពកនៅលើមេឃ បំពាក់ដោយព្រះចេស្តា និងសិរីល្អជាខ្លាំង ជាមួយនឹងពួកទេវតាបរិសុទ្ធទាំងអស់ » ( គោលលទ្ធិ និងសេចក្ដីសញ្ញា ៤៥:៤៤ ) ។
… យើងនឹងលុតជង្គង់ចុះដោយគាវរភាព « ហើយព្រះអម្ចាស់ទ្រង់នឹងបន្លឺសំឡេងរបស់ទ្រង់ ហើយអស់ទាំងចុងផែនដីនឹងបានឮ » ( គោលលទ្ធិ និងសេចក្តីសញ្ញា ៤៥:៤៩ ) …
បន្ទាប់មកការជួបជុំគ្នានៃពួកទេវតាស្ថានសួគ៌ និងពួកបរិសុទ្ធនៅលើផែនដីដែលនឹងមិនអាចបំភ្លេចបាននឹងមកដល់ ( សូមមើល ម៉ូសេ ៧:៦៣ ) ។ ប៉ុន្តែអ្វីដែលសំខាន់បំផុតនោះ អេសាយបានប្រកាសថា « ហើយអស់ទាំងចុងផែនដី បានឃើញសេចក្តីសង្គ្រោះរបស់ព្រះនៃយើងរាល់គ្នា » ( អេសាយ ៥២:១០ ) ហើយទ្រង់ « នឹងសោយរាជ្យលើសាច់ឈាមទាំងអស់ » ( គោលលទ្ធិ និងសេចក្តីសញ្ញា ១៣៣:២៥ ) ។ ( « Thy Kingdom Come » Liahona ខែឧសភា ឆ្នាំ២០១៥ ទំព័រ ១២២ )
សូមឲ្យសិស្សសរសេរនៅក្នុងសៀវភៅកំណត់ហេតុការសិក្សារបស់ពួកគេនូវអ្វីដែលពួកគេបានរៀនអំពីព្រះអង្គសង្គ្រោះនៅថ្ងៃនេះ និងអារម្មណ៍របស់ពួកគេអំពីការយាងមកវិញរបស់ទ្រង់ ។ សូមអញ្ជើញសិស្សស្ម័គ្រចិត្តឲ្យចែកចាយយោបល់ និងការយល់ដឹងរបស់ពួកគេ ។ សូមពិចារណាចែកចាយគំនិត និងទីបន្ទាល់របស់អ្នកផងដែរ ។