Isaias 60–66

• Unsa ang pipila ka problema sa kalibotan nga gusto ninyong mausab?

Paggahin og panahon sa pagpamalandong og bisan unsang mga problema sa imong kinabuhi o sa kinabuhi niadtong inyong minahal nga nangandoy ka nga mausab. Sa imong pagtuon karon, tinguhaa ang giya sa Espiritu Santo samtang mangita ka sa mga kamatuoran nga mahimong motabang kanato ug sa kalibotan.

Ablihan ang PDF

Ang kataposang mga kapitulo diha sa basahon ni Isaias naglangkob og pagtulun-an ni Isaias ug mga panagna mahitungod sa Ikaduhang Pag-anhi sa Manluluwas ug sa Milenyum.

Basaha ang mosunod nga mga bersikulo, nga magmarka sa mga hugpong sa mga pulong nga makatabang nimo nga mobati og kahinam sa pagbalik sa Manluluwas:

• Isaias 60:18–20

• Isaias 62:11–12

• Isaias 65:17–25

  Dapita ang mga estudyante sa pagpakigbahin sa pipila sa hugpong sa mga pulong nga ilang nakit-an ug nganong nagpaabot sila sa Manluluwas nga mohatag niini nga panalangin. Mahimong mopakigbahin ang mga estudyante og mga hugpong sa mga pulong nga nagpakita nga ang Manluluwas mobuntog sa mga problema sa kalibotan. Ang pipila ka ehemplo mao ang:

  • “Ang pagpanlupig dili na madungog diha sa imong yuta” (Isaias 60:18)

  • “Ang mga adlaw sa imong pagbalata pagatapuson” (Isaias 60:20)

  • “Dili na pagahidunggan diha kaniya ang tingog sa pagbakho” (Isaias 65:19)

  • “Sila dili modaut ni molaglag” (Isaias 65:25)

  Ang pag-awhag sa mga estudyante sa pagmarka sa mga hugpong sa mga pulong diha sa mga kasulatan nga gipakigbahin sa ilang mga klasmeyt mahimong epektibo usab.

• Unsaon nimo sa pag-summarize kon unsa ang buhaton sa Manluluwas alang sa Iyang mga katawhan kon Siya mobalik?

• Ngano sa imong hunahuna nga ang pag-anhi ni Jesukristo sa yuta moresulta ngadto sa kalipay, kalinaw, ug hingpit nga kamaya?

Gahini og panahon nga pamalandongan ang bisan unsa nimong mga pangutana kabahin sa Milenyum ug sa mga panalangin sa pagbalik sa Manluluwas. Ang Ginoo mipadayag pa og dugang sa maong hilisgotan.

Pagpili og usa o duha sa imong kaugalingong mga pangutana kabahin sa Milenyum o sa mosunod nga mga pangutana nga interesado kaayo ka. Paggahin og pipila ka minuto sa pagpangita og mga tubag diha sa mga kasulatan ug sa balaanong gitudlo nga mga tinubdan. Ang seksiyon nga giulohan og “Milenyum” sa Giya ngadto sa mga Kasulatan ug sa Mga Hilisgotan ug mga Pangutana sa ChurchofJesusChrist.org mahimong magamit.

1. Unsay buot ipasabot nga ang Ginoo “mohimo og bag-ong mga langit ug usa ka bag-ong kalibotan?” (Isaias 65:17). Basaha ang Doktrina ug mga Pakigsaad 88:25–26 ug Mga Artikulo sa Hugot nga Pagtuo 1:10. Hunahunaa kon unsay matudlo niini nga mga bersikulo mahitungod sa gahom sa Manluluwas ug sa Iyang gibati alang sa mga matarong.

2. Duna bay kamatayon atol sa Milenyum? Unsay buot ipasabot nga tungod sa Manluluwas ang usa ka bata “mamatay sa usa ka gatus ka tuig?” (Isaias 65:20). Basaha ang Doktrina ug mga Pakigsaad 101:29–31 ug pamalandongi kon unsay matudlo niini nga mga bersikulo kanimo mahitungod sa gahom sa Manluluwas.

3. Unsay mahitabo ni Satanas tungod sa pagbalik sa Manluluwas? Basaha ang pipila sa mosunod nga mga bersikulo: Doktrina ug mga Pakigsaad 45:55, 101:28, 1 Nephi 22:26, ug Pinadayag 20:1–3. Hunahunaa kon unsay matudlo niini nga mga bersikulo kabahin sa Ginoo.

4. Unsay mga tahas sa Manluluwas atol sa Milenyum? Unsay Iyang buhaton? Basaha ang Doktrina ug mga Pakigsaad 29:11 ug 45:59 ug Mga Artikulo sa Hugot nga Pagtuo 1:10.

5. Unsa pa ang gipadayag sa Ginoo mahitungod sa Milenyum? Basaha ang pipila sa mosunod: Doktrina ug mga Pakigsaad 45:54, 56–58; 101:26–29; ug “Milenyum” diha sa Mga Hilisgotan ug mga Pangutana sa ChurchofJesusChrist.org.

Ang paghanduraw sa inyong nakat-onan mahimong epektibo usahay. Piyonga ang inyong mga mata ug handurawa kon unsay imong nakat-onan mahitungod sa Manluluwas ug sa dihang Siya maghari sa yuta atol sa Milenyum. Pag-ampo alang sa tabang sa Espiritu Santo aron mahimo kini nga kalihokan nga makahuloganon alang kanimo. Hunahunaa ang pagbalik sa Manluluwas ug sa unsang paagi Siya mahimong mopanalangin kaninyo, sa inyong hinigugma, ug sa tanang katawhan.

Si Elder Neil L. Andersen sa Korum sa Napulog Duha ka Apostoles mipamatuod:

Ang paghunahuna sa Iyang pag-anhi nagpahinam kanako. Kini kulbahinam gayod! Ang gidak-on ug kahalangdon, ang gilapdon ug katalagsaon, mas molabaw pa sa makita sa mortal nga mga mata o masinati.

… Siya mopakita “diha sa mga panganod sa langit, nagbisti og gahom ug sa dakong himaya; uban sa tanang balaang mga anghel” (Doktrina ug Mga Pakigsaad 45:44).

… Kita moluhod uban sa pagtahod, “ug ang Ginoo mopadungog sa iyang tingog, ug ang tanan nga mga lumulupyo sa yuta makadungog niini” (Doktrina ug mga Pakigsaad 45:49) …

Dayon ang dili malimtang panagkita og usab sa mga anghel sa langit ug mga Santos sa yuta (tan-awa sa Moises 7:63). Apan ang pinakaimportante, si Isaias mipahayag, “Ang tanang mga kinatumyan sa yuta nakakita na sa kaluwasan sa atong Dios,” (Isaias 52:10) ug Siya “mohari ibabaw sa tanan nga mga tawo” (Doktrina ug mga Pakigsaad 133:25). (“Paanhia ang Imong Gingharian,” Liahona, Mayo 2015, 122)