“Akoako Fakataukei Fakatokāteline 8: Fakaʻaongaʻi e Ngaahi Moʻoni ʻi he Ngaahi Potufolofola Fakataukei Fakatokāteliné mo e Ngaahi Tefitoʻi Moʻoni ki Hono Maʻu ʻo e ʻIlo Fakalaumālié,” Fuakava Motuʻá – Tohi Lēsoni ʻa e Faiako Seminelí (2026)
“Akoako Fakataukei Fakatokāteline 8: Fakaʻaongaʻi e Ngaahi Moʻoni ʻi he Ngaahi Potufolofola Fakataukei Fakatokāteliné mo e Ngaahi Tefitoʻi Moʻoni ki Hono Maʻu ʻo e ʻIlo Fakalaumālié,” Fuakava Motuʻá – Tohi Lēsoni ʻa e Faiako Seminelí
ʻĪsaia 40–49: Lēsoni 122
Akoako Fakataukei Fakatokāteline 8
Fakaʻaongaʻi e Ngaahi Moʻoni ʻi he Ngaahi Potufolofola Fakataukei Fakatokāteliné mo e Ngaahi Tefitoʻi Moʻoni ki Hono Maʻu ʻo e ʻIlo Fakalaumālié
ʻE lava ke tokoni ʻa e fakataukei fakatokāteliné ki he kau akó ke langa ʻenau moʻuí ʻi he fakavaʻe ʻo Sīsū Kalaisí mo ʻEne ongoongoleleí. ʻE lava ke tokoni ʻa e lēsoni ko ʻení ke fakaʻaongaʻi ʻe he kau akó ʻa e ngaahi moʻoni ʻoku maʻu ʻi he ngaahi potufolofola fakataukei fakatokāteliné pea mo e ngaahi tefitoʻi moʻoni fakalangi ki hono maʻu ʻo e ʻilo fakalaumālié.
Teuteu ʻa e tokotaha akó: Fakaafeʻi e kau akó ke fekumi ʻi he ngaahi potufolofola fakataukei fakatokāteliné pea fili ha potufolofola ʻe ua pe tolu ʻoku nau ongoʻi ʻe lava ke fakaʻaongaʻi ki ha faʻahinga tūkunga pē ʻe lava ke fehangahangai mo ha toʻu tupu.
Ngaahi ʻEkitivitī Ako ʻOku Ala Fakahokó
Toe vakaiʻi ʻo e fakataukei fakatokāteliné: Fakaʻaongaʻí
Fakakaukau ke ʻoange ha kiʻi laʻipepa siʻisiʻi ki he tokotaha ako takitaha. Fakaafeʻi kinautolu ke hiki ha fakamatala nounou ʻo ha tūkunga faingataʻa ʻoku fehangahangai mo ha taha ʻoku nau ʻilo pea faʻo ʻenau laʻipepá ʻi ha foʻi hina. Kole ki he kau akó ke ʻoua ʻe fakakau ha ngaahi hingoa pe fakaikiiki ʻoku fuʻu fakataautaha koeʻuhí ʻe lau ʻe he kau ako kehé ʻenau laʻipepá.
Hili iá pea vahe e kau akó ki ha ngaahi hoa. ʻAi ke fili ʻe he hoa takitaha ha laʻipepa ʻe ua mei he foʻi hiná pea fakakakato ʻa e sitepu ʻe tolu ʻi laló.
-
Toe vakaiʻi e ngaahi potufolofola fakataukei fakatokāteline ʻo e Fuakava Motuʻá ʻo fakaʻaongaʻi e lisi ʻi he Fakamatala ki he ʻElito ʻo e Fakataukei Fakatokāteliné (2023).
-
Aleaʻi e founga ʻe lava ke fakaʻaongaʻi ai ha ngaahi potufolofola kehekehe ki ha taha ʻo e ngaahi tūkunga ʻi hoʻo laʻipepá. (Te ke lava foki ʻo fakaʻaongaʻi ha ngaahi potufolofola fakataukei fakatokāteline mei he ngaahi tohi folofola kehé.)
-
Vahevahe ʻa e founga ʻe lava ke fakamālohia ai honau vā fetuʻutaki mo e Tamai Hēvaní mo Sīsū Kalaisí ʻi hono fakaʻaongaʻi e ngaahi akonaki ʻi he ngaahi potufolofola ko iá.
Ka hili ha taimi feʻunga, fakaafeʻi e ngaahi hoá ke vahevahe mo e kalasí ʻa e meʻa ne nau aleaʻí.
Kapau ʻoku fiemaʻu tokoni ʻa e kau akó ke ʻiloʻi ha potufolofola fakataukei fakatokāteline ʻoku fekauʻaki mo honau tūkungá, te ke lava ʻo tataki kinautolu ki ha potufolofola ʻe lava ke fakaʻaongaʻi ki ha ngaahi tūkunga lahi, hangē ko e Lea Fakatātā 3:5–6 pe 2 Nīfai 32:3.
ʻOku totonu ke miniti pē ʻe 10–15 ʻa e ʻekitivitī ko ʻení ke fakaʻatā ha taimi ke ako mo fakaʻaongaʻi ai ʻe he kau akó ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi he toenga ʻo e lēsoní.
Ako mo fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié
ʻOku fakataumuʻa e toenga ʻo e lēsoní ki hono tokoniʻi ʻo e kau akó ke fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ki ha tūkunga moʻoni ʻo e moʻuí.
Fakakaukau ke fakaʻaliʻali e fakatātā ʻo ha finemui pea mo e tūkunga ʻi laló.
Mahalo ʻe ongo moʻoni ange ʻa e tūkungá kapau te ke tuku ʻatā ʻa e ngaahi konga kuo laineʻí pea fakaafeʻi e kau akó ke fakafonu ʻa e ngaahi konga ʻoku ʻataá ʻaki ʻa e tokāteline mo e ngaahi tuʻunga moʻui ʻo e Siasí ʻoku felāveʻi mo ʻenau moʻuí.
ʻI he kei siʻi ʻa Sulietá, naʻá ne fakakaukau ʻoku tui e tokolahi taha ʻo e kakaí ki he ngaahi akonaki ʻa Sīsū Kalaisi naʻá ne ako ʻi hono ʻapí pea ʻi he lotú. ʻOkú ne ʻi he ako maʻolungá ʻeni he taimí ni, hangē ʻoku kehe e meʻa ia ʻoku hokó. Ko e tokolahi taha ʻo e kakai ʻokú ne ʻiló ʻoku hangē ʻoku ʻikai ke nau tui ki he tokāteline mo e ngaahi tuʻunga moʻui ʻoku akoʻi ʻi he ongoongolelei ʻo Sīsū Kalaisi kuo fakafoki maí.
Hangē ko ʻení, ʻoku fakakata ʻaki ʻe he tokolahi ʻo hono kaungāakó ʻa ʻene tui ki ha kau palōfita moʻuí; naʻa mo ha niʻihi ʻo hono ngaahi kaungāmeʻá ʻoku ʻikai mahino kiate kinautolu e ʻuhinga ʻokú ne fili ai ke ʻoua te ne kau ʻi he ngaahi ʻekitivitī mo e fakafiefia ʻoku koví.
Mahalo he ʻikai felāveʻi lelei ha niʻihi ʻo hoʻo kau akó mo Sulieta. Te ke lava ʻo kole ki ha niʻihi ʻe loto-lelei ʻa ia kuo nau aʻusia ha tūkunga tatau ke fakamatalaʻi ʻa e ongo ʻokú te maʻú pea mo e meʻa ʻoku faingataʻa ai ke fehangahangai mo iá. Te ke lava ʻo fakamahinoʻi ange tatau ai pē pe kuo nau maʻu ha aʻusia tatau mo Sulieta pe ʻikai, ko e taumuʻa ʻo e tūkungá ke fakaʻatā kinautolu ke nau akoako fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié mo e tokāteline ne nau toki akó.
Kole ki he kau akó ke nau toe vakaiʻi e ngaahi tefitoʻi moʻoni ʻi he palakalafi 5–12 ʻo e konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné, ʻo kumi e ngaahi tefitoʻi moʻoni ʻe lava ʻo tokoni ki ha taha ʻokú ne aʻusia ha tūkunga tatau mo Sulietá.
ʻI he ʻosi hono toe vakaiʻi ʻe he kau akó, tuku ange ha taimi lahi ke nau aleaʻi ai e ngaahi tefitoʻi moʻoni ʻoku nau ongoʻi ʻe ala tokoni kia Sulietá.
Makatuʻunga ʻi heʻenau fealēleaʻakí, te ke lava ʻo fili ha ngaahi konga mei he toenga ʻo e naunau fakalēsoní ʻe lava ʻo tokoni ke mahino lelei ange ki hoʻo kau akó ʻa e ngaahi tefitoʻi moʻoni ki hono maʻu ʻo e ʻilo fakalaumālié.
Ngāue ʻi he tuí
Fakakaukau ke fakaʻaliʻali e ngaahi fehuʻi ko ʻení pea fakaafeʻi e kau akó ke aleaʻi ʻenau ngaahi talí ʻi ha ngaahi kulupu iiki. ʻUnu takai holo ʻi he lokí pea fanongo ki heʻenau ngaahi fealēleaʻakí, ʻo tānaki atu ha ngaahi fakakaukau pe fakahinohino ʻo ka fiemaʻu.
-
ʻE lava fēfē ke hoko e tūkunga ʻo Sulietá ko ha faingamālie ke ne fakamālohia ai ʻene tui kia Sīsū Kalaisí mo ʻene tukupā ki Hono Siasí?
-
Ko e hā ha meʻa te ne ongoʻi ʻoku ʻahiʻahiʻi ia ke ne fai ʻa ia te ne lava ʻo taki ia ke mamaʻo meia Sīsū Kalaisí?
-
ʻE fēfē haʻo fokotuʻu ange ke ne matuʻuaki e ngaahi ʻahiʻahi ko iá ʻi he tui kia Sīsū Kalaisí?
Vakaiʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá
ʻOku fakaʻatā ʻe he ngaahi fakahinohino ko ʻení ʻa e kau akó ke vahevahe ʻa e meʻa naʻa nau maʻú. Tatali kae ʻoua kuo nau fakakakato ʻa e sitepu takitaha kimuʻa pea toki fakahoko ʻa e sitepu hokó.
(Makehe mei hono toe vakaiʻi ʻo e palakalafi 8 ʻi he Fakamatala ki he ʻElito ʻo e Fakataukei Fakatokāteliné ʻi he sitepu 1, te ke lava foki ʻo ʻoange ki he kau akó ha ngaahi miniti siʻi ke nau ako ʻa e konga “Fekumi ki he Ngaahi Maʻuʻanga Tokoni Falalaʻangá” ʻi he Ko Hono Kumi ha Ngaahi Tali ki Hoʻo Ngaahi Fehuʻí [Gospel Library, Ngaahi Tefitó mo e Ngaahi Fehuʻí].)
-
Lekooti ʻi hoʻo tohinoa akó ha fakamatala ʻe taha mei he palakalafi 8 ʻo e konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné ʻokú ke pehē ʻe tokoni kia Sulietá pea mo hono ʻuhingá.
-
ʻUnu takai holo ʻi he lokí ʻo kumi ha tokotaha ako ʻe taha naʻá ne fili ʻa e fakamatala tatau mo koé. Aleaʻi ʻa e founga ʻe lava ke tokoni ai ia kia Sulietá.
-
Tānaki atu ki hoʻo peesi tohinoá ha ngaahi fakakaukau mahuʻingamālie naʻe vahevahe atu ʻe ha tokotaha ako kehe mo koe.
-
Toe ʻunu takai holo ʻi he lokí, pea kumi ha tokotaha ako ʻe taha naʻá ne fili ha fakamatala kehe mei he fakamatala naʻá ke filí. Vahevahe e ngaahi fakakaukau mei hoʻo tohinoá.
ʻI he fakakakato ʻe he kau akó ʻa e ʻekitivitií, te ke lava ʻo kole ki ha niʻihi te nau loto-fiemālie ke vahevahe ha ngaahi fakakaukau naʻe akoʻi ange ʻe honau kaungāakó. Te ke lava foki ʻo fakaafeʻi kinautolu ke lekooti ha faʻahinga ongo ne nau maʻu ʻi heʻenau moʻuí.
Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí
ʻE lava ke tokoni hono tānaki atu e ngaahi meʻá ni ki he tūkunga ʻa Sulietá ke teuteu ʻa e kau akó ke aleaʻi ʻa e mahuʻinga ʻo e ngaahi maʻuʻanga tokoni ʻoku tau tafoki ki ai ʻi heʻetau moʻuí.
Koeʻuhí ʻoku tokolahi ha kakai ʻoku ʻikai ke nau tui tatau mo Sulietá, ʻoku kamata ke ne fifili pe ʻoku mei he ʻOtuá nai ʻa e tokāteline mo e ngaahi tuʻunga moʻui ʻoku akoʻi ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Fakakaukau ke fakaafeʻi e kau akó ke aleaʻi e ngaahi fakakaukau ko ʻení mo hanau hoa.
-
ʻOku mahuʻinga ʻa e kakai mo e ngaahi maʻuʻanga tokoni ʻoku fakaʻaongaʻi ʻe Sulieta ke kumi fakamatala aí koeʻuhí …
-
Te u faleʻi ʻa Sulieta ke kumi ha ngaahi tali ʻaki ʻene ʻalu ki he … pea ʻoua naʻa ʻalu ke kumi ha ngaahi tali mei he …
ʻI he ʻosi e fealeaʻaki ʻa e ngaahi hoá, fakaafeʻi ha niʻihi ʻe loto-fiemālie ke vahevahe e meʻa ne nau aleaʻí mo e kalasí. Te ke lava ʻo kole ki he kau akó ke vahevahe ʻa e ʻuhinga naʻa nau tali ai ʻi he founga ne nau fakahokó. Fakakaukau ke tokoni ke mahino ki he kau akó ʻe lava ʻe he ngaahi maʻuʻanga tokoni ʻoku nau tafoki ki aí ʻo tataki kinautolu ke nau ofi ange pe mamaʻo ange mei he Tamai Hēvaní.
Ke ʻoange ki he kau akó ke nau akoako fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí, ʻe lava foki ke kumi mo vahevahe ʻe he ngaahi hoá ha ngaahi potufolofola fakataukei fakatokāteline ʻe lava ʻo tokoni kia Sulietá. ʻOku kau ʻi he sīpinga ʻo e ngaahi potufolofola te nau ala fakakaú ʻa e Sōsiua 24:15; Lea Fakatātā 3:5–6; ʻĪsaia 5:20; Mātiu 5:14–16; mo e Tokāteline mo e Ngaahi Fuakava 6:36.
Fakaʻaongaʻi fakatāutahá
Te ke lava ʻo fakaʻosi e kalasí ʻaki hono fakaafeʻi e kau akó ke nau tali ʻi he faʻa lotu ha taha ʻo e ongo fehuʻi ko ʻení ʻi heʻenau tohinoa akó. Poupouʻi kinautolu ke tokanga ki he ngaahi ueʻi mei he Laumālie Māʻoniʻoní ʻi heʻenau fakalaulauloto mo tohí.
-
Ko e hā ʻokú ke ongoʻi ʻe finangalo ʻa e Tamai Hēvaní ke ke fakahoko ʻaki e ngaahi meʻa kuó ke ako ʻi he ʻaho ní?
-
ʻE liliu fēfē ho vā fetuʻutaki mo e Tamai Hēvaní mo Sīsū Kalaisí ʻi hoʻo fili ke muimui ki he ngaahi tefitoʻi moʻoni ki hono maʻu ʻo e ʻilo fakalaumālié ʻi hoʻo moʻuí?