Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻĪsaia 44–47: “ʻOku ʻIkai Ha ʻOtua Mo Au”

“ʻĪsaia 44–47: ‘ʻOku ʻIkai Ha ʻOtua Mo Au,’” Fuakava Motuʻá – Tohi Lēsoni ʻa e Faiako Seminelí (2026)

“ʻĪsaia 44–47: ‘ʻOku ʻIkai Ha ʻOtua Mo Au,’” Fuakava Motuʻá – Tohi Lēsoni ʻa e Faiako Seminelí

ʻĪsaia 40–49: Lēsoni 120

ʻĪsaia 44–47

“ʻOku ʻIkai Ha ʻOtua Mo Au”

ʻOku tau fehangahangai he ʻaho kotoa pē mo e ngaahi ivi tākiekina ʻokú ne fakafaingataʻaʻiaʻi ʻetau līʻoa ki he Tamai Hēvaní mo Sīsū Kalaisí. ʻI he fehangahangai ha niʻihi ʻo e kau ʻIsileli ʻi he kuonga ʻo ʻĪsaiá mo e ngaahi ʻahiʻahi tatau, naʻa nau tafoki ʻo lotu ki ha ngaahi ʻotua kehe. ʻI he tali ki aí, naʻe fakatokanga ʻa e ʻEikí ʻi he ʻofa kae mahino ki he kakai ʻIsilelí fekauʻaki mo e hū ki he ngaahi ʻotua loí. ʻE lava ke tokoni ʻa e lēsoni ko ʻení ke fakamuʻomuʻa ʻe he kau akó ʻa e Tamai Hēvaní mo Sīsū Kalaisi ʻi ha toe taha pe ha toe meʻa kehe ʻi heʻenau moʻuí.

Teuteu ʻa e tokotaha akó: Fakaafeʻi e kau akó ke fakakaukau ki he meʻa kuo nau ako ʻi he kotoa ʻo ʻenau ako e Fuakava Motuʻá. Fakaafeʻi leva kinautolu ke nau fakalaulauloto, “Kuo fakatupulaki fēfē ʻe he meʻa kuó u ako fekauʻaki mo e Tamai Hēvaní mo Sīsū Kalaisí ʻa ʻeku holi ke fakamuʻomuʻa Kinaua ʻi heʻeku moʻuí?”

Ngaahi ʻEkitivitī Ako ʻOku Ala Fakahokó

Hū ki he moʻungaʻi tangatá

Fakakaukau ke kamata e kalasí ʻaki hano fai e fehuʻi ko ʻení.

Kapau te mou saveaʻi e toʻu tupu ʻi hotau feituʻú fekauʻaki mo ʻenau kau moʻungaʻi tangatá, ʻokú ke pehē ko hai te nau ala fakakau maí?

Fakaafeʻi leva e kau akó ke fakahoko ʻeni ʻi heʻenau tohinoa akó.

Hiki ha lisi ʻo hoʻo kau moʻungaʻi tangata fakatāutahá. Fokotuʻu ha foʻi fetuʻu ʻi he tafaʻaki ʻo e niʻihi ʻoku nau tākiekina lahi taha hoʻo moʻuí.

Naʻe vahevahe ʻe Pīsope W. Kulisitofā Uātolo ʻo e Kau Pīsopeliki Pulé ʻa e faleʻi ko ʻení fekauʻaki mo ʻetau kau moʻungaʻi tangatá.

10:7

ʻI heʻeku kei siʻí, ko ʻeku fuofua kau moʻungaʻi tangatá ko ha kau sipoti. Ko ʻeku ngaahi fuofua manatu melié ko hono tānaki ʻo e ʻū kaati peisipolo ʻoku ʻi ai ʻa e tā mo e fakamatala fakasitetisitika ʻo e kau vaʻinga Peisipolo Liiki Lalahí. ʻE lava ke fakafiefia mo loto-maʻa ʻa e “fakahīkihikiʻi ʻa e moʻungaʻi tangatá” ʻi he kei siʻí, ʻo hangē ko e tui ʻe he fānaú ʻa e teunga ʻo e kau moʻungaʻi tangata ʻoku nau saiʻia taha aí ki he Halouiní. Neongo ʻoku tau tanganeʻia mo fakaʻapaʻapaʻi ha kau tangata mo fafine talēnitiʻia mo fakaofo tokolahi koeʻuhí ko e ngaahi meʻa ʻoku nau malavá mo ʻenau tokoní, ka ko e tuʻunga ko ia hono fakaʻapaʻapaʻi kinautolú, kapau ʻe fuʻu tōtuʻa, ʻe lava ke tatau ia mo e lotu ʻa e fānau ʻa ʻIsilelí ki he ʻuhikiʻi pulu koula ʻi he toafa ʻo Sainaí. …

Ko e moʻungaʻi tangatá—ko ʻetau moʻungaʻi tangatá, ʻi he taimi ní pea maʻu ai peé—ko Sīsū Kalaisi, pea ʻilonga ha meʻa pe tokotaha ʻokú ne tohoakiʻi kitautolu mei Heʻene ngaahi akonakí, ʻo hangē ko ia ʻoku hā ʻi he folofolá mo e ngaahi lea ʻa e kau palōfita moʻuí, te ne lava ʻo uesia kovi ʻetau fakalakalaka ʻi he hala ʻo e fuakavá. (“Mahulu Hake ʻi ha Moʻungaʻi Tangata,” Liahona, Nōvema 2023, 90)

Ko e hā e meʻa ʻoku makehe kiate koe mei he pōpoaki ʻa Pīsope Uātoló?

Ke tokoni ke vakaiʻi ʻe he kau akó e tuʻunga ʻo e Tamai Hēvaní mo Sīsū Kalaisi ʻi heʻenau moʻuí, te ke lava ʻo fakaafeʻi kinautolu ke nau toe vakai ki heʻenau lisi ʻo e kau moʻungaʻi tangatá ʻi heʻenau fakalaulauloto fakalongolongo ki he ngaahi fehuʻi ko ʻení.
ʻOku tohoakiʻi nai hoʻo tokangá ʻe ha taha ʻo e kau moʻungaʻi tangata ʻi hoʻo lisí mei hoʻo moihū ki he Tamai Hēvaní mo Sīsū Kalaisí?
ʻOku ʻi ai nai ha ngaahi meʻa fakamānako, ngaahi ʻekitivitī, pe ngaahi meʻa te ne ala tohoakiʻi koe mei hoʻo moihū kiate Kinauá?

ʻI he teuteu ʻa e kau akó ke ako ʻa e ngaahi akonaki ʻa ʻĪsaiá he ʻaho ní, fakaafeʻi kinautolu ke fakafanongo ki he ngaahi ueʻi mei he Laumālie Māʻoniʻoní fekauʻaki mo e ngaahi founga te nau lava ai ʻo fakamuʻomuʻa ʻa e Tamai Hēvaní mo Sīsū Kalaisi ʻi heʻenau moʻuí.

ʻIkai mo ha toe ʻOtua

Fakamatalaʻi ange naʻe fāinga ʻa e fānau ʻo ʻIsilelí ʻi he kuonga ʻo ʻĪsaiá ke fakamuʻomuʻa ʻa e ʻEikí ʻi heʻenau moʻuí. Ka, naʻa nau tafoki ki he ngaahi ʻotua loi hangē ko e ngaahi tamapuá ke maʻu ha tokoni.

Fakakaukau ke fakaafeʻi ha ngaahi hoa pe fanga kiʻi kulupu iiki ke lau e ngaahi veesi ko ʻení pea faʻu ha fakamatala fakanounou sētesi ʻe taha ʻo e meʻa ne nau akó.

Lau ʻa e ʻĪsaia 44:6, 8 mo e 46:9, ʻo kumi ʻa e meʻa naʻe finangalo ʻa e ʻEikí ke mahino ki he fānau ʻo ʻIsilelí fekauʻaki mo e meʻa ʻoku fakatefito ai ʻenau moihuú.

Fakaafeʻi ha kau ako ʻe niʻihi ke vahevahe ʻa e fakamatala fakanounou ʻo e meʻa naʻe ako ʻe heʻenau kulupú. Kapau ʻoku ʻikai fakanatula pē ʻenau vahevahe iá, tokoni ke ʻiloʻi ʻe he kau akó ha foʻi moʻoni hangē ko ʻení: ʻOku ʻikai ha taha pe ha meʻa ʻi he māmaní ʻe lava ʻo fakafehoanaki kia Sīsū Kalaisi.

Te ke lava ʻo fakakau ʻi hoʻomou alēleá hano fakamahinoʻi ange ʻoku ʻi he ʻĪsaia 44:6 ha ngaahi huafa lahi maʻa Sīsū Kalaisi. Te ke lava ʻo fakaafeʻi e kau akó ke vahevahe e meʻa ʻoku akoʻi ʻe he ngaahi huafa ko ʻení fekauʻaki mo Sīsū Kalaisí.

ʻOku fakamatalaʻi ʻe he ʻEikí ʻi he ʻĪsaia 44–46, ʻa e lotu ʻa e kakai ʻIsilelí ki he ngaahi ʻotua loí. ʻOkú ne fakamanatu ki he kakaí naʻa nau fakatupu, moihū, mo lotu ki he ngaahi ʻotua tamapua naʻa nau faʻu ʻaki ʻa e ʻakau tatau ne nau faʻa fakaʻaongaʻi ki he tafu afí mo e feimeʻatokoní. Pea ʻi he taimi naʻe ʻave pōpula ai ʻa e kau ʻIsilelí, naʻe fāinga ʻenau fanga monumanú ke toho ha ngaahi saliote naʻe mafasia ʻi heʻenau ngaahi tamapua mamafa naʻe faʻu ʻe he tangatá.

Lau ʻa e ʻĪsaia 44:14–19 mo e ʻĪsaia 46:1–2, ʻo kumi e fakamatala ʻa e ʻEikí ki he ngaahi ʻotua tamapua fakakuongamuʻa ʻe lava ke fakaʻaongaʻi ki he ngaahi meʻa ʻokú ne tohoakiʻi e tokanga ʻa e kakaí mei he ʻEikí ʻi hotau kuongá. (Mahalo ʻe tokoni ke ʻiloʻi naʻe ui ha ongo ʻotua tamapua naʻa nau lotu ki ai ko Peila mo Nepo.)

Ko e hā e meʻa naʻá ke maʻú?

Te ke lava ʻo hiki ʻa e kupuʻi lea “Te u foʻohifo ki he sino ʻo e ʻakaú?” (ʻĪsaia 44:19) ʻi he palakipoé. Kole ki he kau akó ke vahevahe e ʻuhinga ʻo e fehuʻi ko ʻení ʻi he lea pē ʻanautolú.

Hili iá pea toʻo ʻa e “sino ʻo e ʻakaú” mei he fehuʻí kae tuku pē ʻa e “Te u foʻohifo ki he ?”

Fakaafeʻi e kau akó ke nau omi ki he palakipoé ʻo fakaʻosi ʻa e sētesí ʻi ha ngaahi founga ʻoku kaunga ki he kakai ʻi hotau kuongá ni.
Ko e hā e fakatuʻutāmaki ʻo hono fakamuʻomuʻa e kakai pe ngaahi meʻa ko ʻení ʻi he Tamai Hēvaní mo Sīsū Kalaisí?
Ko e hā ʻe lava ke faingataʻa ai ke fakamuʻomuʻa maʻu pē ʻa e Tamai Hēvaní mo Sīsū Kalaisi ʻi heʻetau moʻuí?

Ko Hono Fakamuʻomuʻa ʻo Sīsū Kalaisí

Ke tokoni ke fakamuʻomuʻa ʻe he kau akó ʻa e Fakamoʻuí ʻi heʻenau moʻuí, te ke lava ʻo fakaʻaliʻali ha fakatātā ʻo Sīsū Kalaisi, hangē ko ia ʻi he kamataʻanga ʻo e lēsoní, ʻi lotomālie ʻi he palakipoé. ʻI hono fai ʻe he kau akó ʻa e ʻekitivitī ko ʻení, te nau lava ʻo hiki ʻa e ngaahi ʻulungaanga ʻoku nau maʻú ʻi he fakatātaá.

Ako ha potufolofola ʻe ua pe lahi ange mei he ngaahi potufolofola ko ʻení. ʻI hoʻo lau māmālie mo tokanga ʻa e ngaahi vēsí, kumi ʻa e meʻa te tau lava ʻo ako fekauʻaki mo Sīsū Kalaisi ʻokú ne ʻomi kiate kitautolu ʻa e loto-falala ke fakamuʻomuʻa Ia ʻi heʻetau moʻuí.

‘Īsaia 44:1–4
ʻĪsaia 44:21–23
ʻĪsaia 44:24–25
ʻĪsaia 45:20–22
ʻĪsaia 46:3–5

Te ke lava ʻo kole ki he kau akó ke tānaki atu ha ngaahi ʻulungaanga kehe ki he palakipoé ʻoku nau ʻilo fekauʻaki mo Sīsū Kalaisi mei heʻenau ngaahi aʻusiá pe mei he ngaahi folofola kehé.

Ke tokoni ke vahevahe ʻe he kau akó ʻenau ngaahi fakakaukau fekauʻaki mo e mālohi taʻe-mafakatataua ʻo Sīsū Kalaisí, te ke lava ʻo fehuʻi ange ʻeni.
ʻE tokoni fēfē ʻa e mahino ʻo e ngaahi moʻoni ko ʻeni fekauʻaki mo Sīsū Kalaisí ki ha taha ʻokú ne ʻiloʻi ʻoku faingataʻa ke fakamuʻomuʻa Ia ʻi heʻenau moʻuí?
Ko e hā ha ngaahi meʻa kuó ke aʻusia kuó ne tokoniʻi koe ke ke fakamuʻomuʻa ʻa e Tamai Hēvaní mo Sīsū Kalaisi ʻi hoʻo moʻuí?

Ko e palani ke fakamuʻomuʻa ʻa e Tamai Hēvaní mo Sīsū Kalaisí

Ngaahi Maʻuʻanga Tokoni Kehé

Ko e hā ha ngaahi founga ʻe lava ke tāpuekina ai au ʻe he ʻOtuá ʻi he taimi ʻoku ou fakamuʻomuʻa ai Ia ʻi heʻeku moʻuí?

Naʻe akonaki ʻa Palesiteni Lāsolo M. Nalesoni ʻo pehē:

ʻOku ou toe fakaongo atu ha akonaki kāfakafa ʻa Palesiteni ʻEselā Tafu Penisoni: “Ko e tangata mo e fefine kuo momoi ʻene moʻuí [ki he] ʻOtuá te nau ʻiloʻi ʻa e toe lahi ange ʻa e meʻa te Ne lava ke fai ʻaki ʻene moʻuí. Te Ne toe fakalahi ange ʻa ʻenau fiefiá, fakalahi e mahino ʻoku nau maʻú, fakamāmaʻi honau ʻatamaí, … hiki hake honau laumālié, liuliunga honau ngaahi tāpuakí, fakalahi honau ngaahi faingamālié, fakafiemālieʻi ʻenau moʻuí, fokotuʻu [hanau] ngaahi kaumeʻa, pea mo lilingi atu ʻa e [fiemālié].”

… ʻI hoʻomou tuku ke lāngilangiʻia ʻa e ʻOtuá ʻi homou moʻuí, ʻoku ou palōmesi atu ha nonga, loto-toʻa, fiefia, ʻio, mo ha fiemalie lahi ange. (“Ikuʻi ʻa Māmani mo Maʻu ha Fiemālie,” Liahona, Nōvema 2022, 97)

Ko e hā ha ngaahi nunuʻa ʻo hono fili ʻo e ngaahi ʻotua loí kae ʻikai ko e Tamai Hēvaní mo Sīsū Kalaisí?

Naʻe vahevahe ʻa ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

14:33

ʻOku iku e tafoki mei he hū ki he ʻOtua moʻoni mo moʻuí ʻo hū ki he ngaahi ʻotua loi hangē ko e koloá mo e ongoongoá pea fai e ngaahi tōʻonga angaʻuli mo taʻe angatonú, ki he pōpula mo hono nānunga koví kotoa. ʻOku kau heni e pōpula fakalaumālié, fakatuʻasinó, mo fakaʻatamaí pea ʻoku nau faʻa ʻomi e fakaʻauhá. (“Ko e Tangilaulau ʻa Selemaiá: Tokanga Telia ʻa e nofo Pōpulá,” Liahona, Nōvema 2013, 89)

Naʻe akonaki ʻa Palesiteni Lāsolo M. Nalesoni ʻo pehē:

ʻOku hanga ʻe ha faʻahinga maʻunimā pē—pe ko e vaʻinga, pele paʻanga, moʻua, faitoʻo kona tapu, kava mālohi, ʻita, ponokalafi, feʻauaki, pea naʻa mo e meʻakaí—ʻo fakahouhauʻi ʻa e ʻOtuá. Ko e hā hono ʻuhingá? He ʻoku hoko ʻa e meʻa ʻokú ke ʻāvea aí ko ho ʻotuá. ʻOkú ke hanga koe ki ai kae ʻikai kiate Ia ki ha fakafiemālie. (“Fakakaukau Fakasilesitiale,” Liahona, Nōvema 2023)

Ngaahi ʻEkitivitī Fakalahi ki he Akó

Ngaahi tūkunga akoako fakahokó

Ke tokoni ki he kau akó ke ʻahiʻahi fakamuʻomuʻa ʻa e Tamai Hēvaní mo Sīsū Kalaisi ʻi heʻenau moʻuí, te ke lava ʻo vahevahe ha taha pe fakatouʻosi ʻo e ongo tūkunga ko ʻení pe faʻu haʻo tūkunga pē ʻaʻau.

ʻOku saiʻia ʻa ʻAna ʻi he teunga ʻo e kuongá. ʻOkú ne fakaʻaongaʻi hono taimi ʻataá ke siofi e ngaahi ākenga fakamuimui tahá pea ngāue poʻuli mo e fakaʻosinga ʻo e uiké ke maʻu ha paʻanga ke fakatau mai ʻaki ha ngaahi meʻa lahi ange. ʻOku faʻa fuʻu ongosia ʻa ʻAna ʻi he lotú pe ako folofolá pea ʻoku faʻa liʻaki lotu he taimi ʻe niʻihi ke ngāue pe mohe.
ʻOku faʻa aleaʻi ʻe Seiloni ha ngaahi fakakaukau fakalotu kehekehe mo ha kaungāmeʻa ʻokú ne pehē ʻokú ne mahuʻingaʻia heʻene ngaahi fakakaukaú. Taimi ʻe niʻihi ʻoku ʻikai tui tatau hono kaungāmeʻá mo e ngaahi akonaki ʻa e kau palōfita mo e kau ʻaposetolo ʻa e ʻOtuá. ʻOku kamata ke fifili ʻa Seiloni pe ko e fē ngaahi akonaki fakaepalōfita ʻoku totonu ke ne tali mo muimui ki aí.

ʻE lava ke aleaʻi ʻe he kau akó ʻa e fehuʻi ʻi laló ʻi ha fanga kiʻi kulupu iiki kimuʻa pea vahevahe ʻenau ngaahi fakakaukaú mo e kalasí.

Ko e hā te ne ala ʻai ke faingataʻa ki he tokotahá ni ke fakamuʻomuʻa ʻa e Tamai Hēvaní mo Sīsū Kalaisi ʻi heʻene moʻuí?
Ko e hā nai ha ʻuluaki sitepu lelei ʻe lava ke fakahoko ʻe he tokotaha ko ʻení ke fakamuʻomuʻa ʻa e Tamai Hēvaní mo Sīsū Kalaisi ʻi heʻene moʻuí?

Tūkunga ʻe taha

Te ke lava ʻo vahevahe ʻa e fakamatala ko ʻení mo e kau akó kae ʻikai ko e “Ngaahi Tūkunga Akoako Fakahoko” ʻi ʻolungá. Te ke lava ʻo fakaafeʻi kinautolu ke ngāue ʻi ha fanga kiʻi kulupu iiki ke aleaʻi ha ngaahi faingataʻa tatau te nau ala fehangahangai mo ia pea fakakaukau ki ha ngaahi founga fakaleleiʻi kehekehe te nau ala fakakaukau ki aí.

Ko Teilá ko ha toketā ia ʻoku faʻa ngāue ʻi he Sāpaté ko ha konga ʻo ʻene ngāué. ʻOkú ke pehē ko e hā te ne lava ʻo fai ke ikunaʻi ha niʻihi ʻo e ngaahi faingataʻa ʻokú ne fehangahangai mo ia ke fakamuʻomuʻa ʻa e Tamai Hēvaní mo Sīsū Kalaisi ʻi heʻene moʻuí?

Hili iá pea huluʻi e foʻi vitiō ko ʻeni ʻa ʻEletā Teili G. Lenilaní mei he taimi 0:44 ki he 02:43.

3:1

Ko e hā naʻá ke ako mei he aʻusia ʻa ʻEletā Lenilaní ʻe lava ʻo tokoni atu ke ke fakamuʻomuʻa ʻa e Tamai Hēvaní mo Sīsū Kalaisi ʻi hoʻo moʻuí?

Ko e hā ʻoku ʻikai fai ai he taimi ní?

Ke tokoni ke ongoʻi ʻe he kau akó ʻa e mahuʻinga ʻo e fili ke fakamuʻomuʻa ʻa e Tamai Hēvaní mo Sīsū Kalaisi ʻi heʻenau moʻuí he ʻaho ní, fakaafeʻi kinautolu ke ako ʻa e ʻĪsaia 45:23. ʻE lava ke kumi ʻe he kau akó ʻa e founga naʻe folofola ʻe he ʻEikí ʻe faifai pea tali ai ʻa e tokotaha kotoa pē kiate Iá. Hili iá pea vahevahe ʻa e meʻá ni meia ʻEletā Niila A. Mekisuele (1926–2004) ʻo e Kōlomu ʻo e Kau ʻAposetolo ʻe Toko Hongofulu Mā Uá.

… Kapau ʻokú ke ongoʻi ʻe peluki ʻa e tui kotoa pē ʻi ha ʻaho pea ʻe fakahā ʻe he ʻelelo kotoa pē ko Sīsū Kalaisi ʻa e ʻEikí, ko e hā ʻoku ʻikai ke tau fai ai ia he taimi ní? (“Why Not Now?,” Ensign, Nōvema 1974, 13)

ʻOku fēfē ʻa e tūʻulutui ʻo fakahā ko Sīsū ʻa e ʻEikí ʻi heʻetau moʻuí he ʻaho ní?
Ko e hā ʻe mahuʻinga ai ke fakamuʻomuʻa ʻa e Tamai Hēvaní mo Sīsū Kalaisi ʻi heʻetau moʻuí he taimí ni kae ʻikai fakatoloí?