« ការអនុវត្តចំណេះចំណានខាងគោលលទ្ធិទី ៨ ៖ អនុវត្តសេចក្តីពិតនៅក្នុងវគ្គបទគម្ពីរចំណេះចំណានខាងគោលលទ្ធិ និងគោលការណ៍នៃការទទួលបានចំណេះដឹងខាងវិញ្ញាណ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ការអនុវត្តចំណេះចំណានខាងគោលលទ្ធិទី ៨ ៖ អនុវត្តសេចក្តីពិតនៅក្នុងវគ្គបទគម្ពីរចំណេះចំណានខាងគោលលទ្ធិ និងគោលការណ៍នៃការទទួលបានចំណេះដឹងខាងវិញ្ញាណ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
អេសាយ ៤០–៤៩ ៖ មេរៀនទី ១២២
ការអនុវត្តចំណេះចំណានខាងគោលលទ្ធិទី ៨
អនុវត្តសេចក្តីពិតនៅក្នុងវគ្គបទគម្ពីរចំណេះចំណានខាងគោលលទ្ធិ និងគោលការណ៍នៃការទទួលបានចំណេះដឹងខាងវិញ្ញាណ
ចំណេះចំណានខាងគោលលទ្ធិជួយសិស្សឲ្យស្ថាបនាជីវិតរបស់ពួកគេនៅលើគ្រឹះនៃព្រះយេស៊ូវគ្រីស្ទ និងដំណឹងល្អរបស់ទ្រង់ ។ មេរៀននេះអាចជួយសិស្សឲ្យអនុវត្តសេចក្តីពិតដែលមាននៅក្នុងវគ្គបទគម្ពីរចំណេះចំណានខាងគោលលទ្ធិ និងគោលការណ៍ដ៏ទេវភាពនៃការទទួលបានចំណេះដឹងខាងវិញ្ញាណ ។
ការរៀបចំសិស្ស ៖ សូមអញ្ជើញសិស្សឲ្យស្រាវជ្រាវវគ្គចំណេះចំណានខាងគោលលទ្ធិ ហើយជ្រើសរើសវគ្គបទគម្ពីរពីរ ឬបីដែលពួកគេមានអារម្មណ៍ថាអាចអនុវត្តបានចំពោះស្ទើរតែគ្រប់ស្ថានភាពដែលក្មេងវ័យជំទង់អាចប្រឈមមុខ ។
សកម្មភាពរៀនសូត្រដែលអាចមាន
ការរំឭកចំណេះចំណានខាងគោលលទ្ធិ ៖ អនុវត្ត
សូមពិចារណាចែកក្រដាសតូចមួយដល់សិស្សម្នាក់ៗ ។ សូមអញ្ជើញពួកគេឲ្យសរសេរការពិពណ៌នាសង្ខេបខ្លីមួយអំពីស្ថានភាពលំបាកមួយដែលពួកគេស្គាល់នរណាម្នាក់កំពុងប្រឈមមុខ ហើយបន្ទាប់មកដាក់ក្រដាសរបស់ពួកគេក្នុងធុងមួយ ។ សុំឲ្យសិស្សកុំបញ្ចូលឈ្មោះ ឬព័ត៌មានលម្អិតដែលមានលក្ខណៈផ្ទាល់ខ្លួនពេក ព្រោះសិស្សផ្សេងទៀតនឹងអានក្រដាសរបស់ពួកគេ ។
បន្ទាប់មក ចាត់សិស្សជាដៃគូ ។ ឲ្យដៃគូនីមួយៗជ្រើសរើសក្រដាសពីរពីធុង ហើយបំពេញជំហានទាំងបីខាងក្រោម ។
-
ពិនិត្យមើលនូវវគ្គបទគម្ពីរចំណេះចំណានខាងគោលលទ្ធិក្នុងព្រះគម្ពីរសញ្ញាចាស់ដោយប្រើបញ្ជីនៅក្នុង ឯកសារគោលនៃចំណេះចំណានខាងគោលលទ្ធិ ( ឆ្នាំ២០២៣ ) ។
-
ពិភាក្សាអំពីរបៀបដែលវគ្គផ្សេងៗអាចអនុវត្តចំពោះស្ថានភាពយ៉ាងហោចណាស់មួយនៅលើក្រដាសរបស់អ្នក ។ ( អ្នកក៏អាចប្រើវគ្គបទគម្ពីរចំណេះចំណានខាងគោលលទ្ធិពីព្រះគម្ពីរផ្សេងទៀតផងដែរ ) ។
-
សូមចែកចាយពីរបៀបដែលការអនុវត្តការបង្រៀននៅក្នុងវគ្គបទគម្ពីរទាំងនោះអាចពង្រឹងទំនាក់ទំនងរបស់ពួកគេជាមួយព្រះវរបិតាសួគ៌ និងព្រះយេស៊ូវគ្រីស្ទ ។
បន្ទាប់ពីទុកពេលគ្រប់គ្រាន់ហើយនោះ សូមអញ្ជើញឲ្យដៃគូទាំងឡាយចែកចាយដល់សិស្សក្នុងថ្នាក់នូវអ្វីដែលពួកគេបានពិភាក្សា ។
ប្រសិនបើសិស្សត្រូវការជំនួយក្នុងការស្វែងរកនូវវគ្គបទគម្ពីរចំណេះចំណានខាងគោលលទ្ធិដែលអនុវត្តចំពោះស្ថានភាពរបស់ពួកគេ នោះអ្នកអាចណែនាំពួកគេទៅកាន់វគ្គបទគម្ពីរដែលអាចអនុវត្តចំពោះស្ថានភាពជាច្រើនដូចជា សុភាសិត ៣:៥–៦ ឬ នីហ្វៃទី២ ៣២:៣ ។
សកម្មភាពនេះគួរតែចំណាយពេលត្រឹមតែ ១០–១៥ នាទីប៉ុណ្ណោះ ដើម្បីទុកពេលឲ្យសិស្សរៀន និងអនុវត្តគោលការណ៍នៃការទទួលបានចំណេះដឹងខាងវិញ្ញាណសម្រាប់មេរៀនដែលមិនទាន់បានរៀន ។
រៀន និងអនុវត្តតាមគោលការណ៍នៃការទទួលបានចំណេះដឹងខាងវិញ្ញាណ
មេរៀនដែលមិនទាន់បានរៀនគឺក្នុងគោលបំណងចង់ជួយសិស្សឲ្យអនុវត្តគោលការណ៍នៃការទទួលបានចំណេះដឹងខាងវិញ្ញាណទៅនឹងស្ថានភាពជាក់ស្តែងមួយ ។
សូមពិចារណាបង្ហាញរូបភាពយុវនារី និងសាច់រឿងដូចខាងក្រោម ។
សាច់រឿងអាចនឹងមានអារម្មណ៍ប្រាកដនិយមជាង បើអ្នកទុកផ្នែកដែលបានគូសបន្ទាត់នៅទទេ ហើយអញ្ជើញសិស្សឲ្យបំពេញចន្លោះនោះជាមួយនឹងគោលលទ្ធិ និងបទដ្ឋានសាសនាចក្រដែលទាក់ទងនឹងជីវិតរបស់ពួកគេ ។
នៅពេលដែល ជូលីតា នៅក្មេង នាងសន្មតថាមនុស្សភាគច្រើនយល់ស្របជាមួយនឹងការបង្រៀនរបស់ព្រះយេស៊ូវគ្រីស្ទដែលនាងបានរៀននៅក្នុងផ្ទះរបស់នាង និងនៅឯព្រះវិហារ ។ ឥឡូវនេះ នាងកំពុងរៀននៅវិទ្យាល័យ វាហាក់ដូចជាផ្ទុយពីនោះ ។ មនុស្សភាគច្រើនដែលនាងស្គាល់ហាក់ដូចជាមិនយល់ស្របនឹងគោលលទ្ធិ និងបទដ្ឋានដែលបានបង្រៀននៅក្នុងដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទទេ ។
ឧទាហរណ៍ មិត្តរួមថ្នាក់របស់នាងជាច្រើននាក់សើចចំអកចំពោះជំនឿរបស់នាងលើ ពួកព្យាការីដែលនៅរស់ សូម្បីតែមិត្តភក្តិមួយចំនួនរបស់នាងក៏មិនអាចយល់បានថាហេតុអ្វីបានជានាងជ្រើសរើសមិនចូលរួមក្នុង សកម្មភាពអសីលធម៌ និងការកម្សាន្តនានា ។
សិស្សរបស់អ្នកមួយចំនួនប្រហែលជាមិនមានទំនាក់ទំនងល្អជាមួយ ជូលីតា ទេ ។ អ្នកអាចសុំឲ្យអ្នកស្ម័គ្រចិត្តដែលបានឆ្លងកាត់នឹងស្ថានភាពស្រដៀងគ្នានេះ ឲ្យពិពណ៌នាអំពីអារម្មណ៍ និងអ្វីដែលពិបាកប្រឈមមុខ ។ អ្នកអាចលើកឡើង មិនថាពួកគេមាន ឬគ្មានបទពិសោធន៍ស្រដៀងគ្នានឹងជូលីតា ឬអត់នោះទេ គោលបំណងនៃសាច់រឿងនេះគឺដើម្បីអនុញ្ញាតឲ្យពួកគេអនុវត្តប្រើប្រាស់គោលការណ៍នៃការទទួលបានចំណេះដឹងខាងវិញ្ញាណ និងគោលលទ្ធិដែលពួកគេបានរៀនក្នុងពេលថ្មីៗនេះ ។
សុំឲ្យសិស្សពិនិត្យមើលគោលការណ៍នៅក្នុងកថាខណ្ឌទី ៥–១២ នៃផ្នែក « ការទទួលបានចំណេះដឹងខាងវិញ្ញាណ » នៅក្នុង ឯកសារគោលនៃចំណេះចំណានខាងគោលលទ្ធិ ដោយរកមើលគោលការណ៍ដែលអាចជួយនរណាម្នាក់ដែលជួបប្រទះស្ថានភាពស្រដៀងទៅនឹងជូលីតា ។
នៅពេលសិស្សបញ្ចប់ការពិនិត្យមើលរួចហើយ សូមអនុញ្ញាតឲ្យសិស្សមានពេលច្រើនដើម្បីពិភាក្សាអំពីគោលការណ៍ដែលពួកគេមានអារម្មណ៍ថា អាចជួយដល់ជូលីតាបាន ។
ផ្អែកលើការពិភាក្សារបស់ពួកគេ អ្នកអាចជ្រើសរើសផ្នែកពីសម្ភារមេរៀនដែលមិនទាន់បានរៀន ដែលអាចជួយសិស្សរបស់អ្នកឲ្យយល់កាន់តែច្បាស់អំពីគោលការណ៍នៃការទទួលបានចំណេះដឹងខាងវិញ្ញាណ ។
ធ្វើសកម្មភាពដោយសេចក្ដីជំនឿ
សូមពិចារណាដាក់បង្ហាញសំណួរខាងក្រោមនេះ ហើយអញ្ជើញសិស្សឲ្យពិភាក្សាពីចម្លើយរបស់ពួកគេនៅក្នុងក្រុមតូចៗ ។ សូមដើរចុះឡើងជុំវិញបន្ទប់ ហើយស្តាប់ការពិភាក្សារបស់ពួកគេ បន្ថែមការយល់ដឹង ឬការណែនាំតាមតម្រូវការ ។
-
តើស្ថានភាពរបស់ជូលីតាអាចជាឱកាសសម្រាប់នាង ដើម្បីពង្រឹងសេចក្តីជំនឿរបស់នាងលើព្រះយេស៊ូវគ្រីស្ទ និងការតាំងចិត្តចំពោះសាសនាចក្ររបស់ទ្រង់ដោយរបៀបណា ?
-
តើនាងអាចមានអារម្មណ៍ចង់ធ្វើអ្វី ដែលអាចនាំនាងងាកចេញឆ្ងាយពីព្រះយេស៊ូវគ្រីស្ទ ?
-
តើអ្នកនឹងផ្តល់យោបល់ដល់នាងឲ្យដោះស្រាយការល្បួងទាំងនោះដោយសេចក្តីជំនឿលើព្រះយេស៊ូវគ្រីស្ទយ៉ាងដូចម្តេច ?
ពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏អស់កល្បមួយ
ការណែនាំខាងក្រោមអនុញ្ញាតឲ្យសិស្សចែកចាយអ្វីដែលពួកគេបានរកឃើញ ។ សូមរង់ចាំរហូតដល់ពួកគេបានបញ្ចប់ជំហាននីមួយៗ មុននឹងផ្តល់ជំហានបន្តបន្ទាប់នីមួយៗ ។
( បន្ថែមពីលើការពិនិត្យមើល កថាខណ្ឌទី ៨ នៅក្នុង ឯកសារគោលនៃចំណេះចំណានខាងគោលលទ្ធិ ក្នុងជំហានទី ១ អ្នកក៏អាចផ្តល់ឲ្យសិស្សពីរបីនាទីដើម្បីសិក្សាផ្នែក « ប្រឹក្សានឹងធនធានដែលអាចទុកចិត្តបាន » នៃ ការស្វែងរកចម្លើយចំពោះសំណួររបស់អ្នក [ បណ្ណាល័យដំណឹងល្អ ប្រធានបទ និងសំណួរ ] ) ។
-
កត់ត្រានៅក្នុងសៀវភៅកំណត់ហេតុការសិក្សារបស់អ្នកនូវសេចក្តីថ្លែងការណ៍មួយពីកថាខណ្ឌទី ៨ នៃផ្នែក « ការទទួលបានចំណេះដឹងខាងវិញ្ញាណ » នៅក្នុង ឯកសារគោលនៃចំណេះចំណានខាងគោលលទ្ធិ ដែលអ្នកគិតថាអាចជួយ ជូលីតា ហើយមូលហេតុអ្វី ។
-
សូមដើរចុះឡើងជុំវិញបន្ទប់ ហើយស្វែងរកសិស្សផ្សេងទៀតដែលជ្រើសរើសយកសេចក្តីថ្លែងការណ៍ដូចគ្នានឹងអ្នក ។ សូមពិភាក្សាអំពីរបៀបដែលវាអាចជួយដល់ជូលីតា ។
-
បន្ថែមទៅក្នុងទំព័រសៀវភៅកំណត់ហេតុរបស់អ្នកនូវការយល់ដឹងដ៏មានអត្ថន័យដែលសិស្សម្នាក់ទៀតបានចែកចាយជាមួយអ្នក ។
-
សូមដើរចុះឡើងជុំវិញបន្ទប់ម្តងទៀត ហើយស្វែងរកសិស្សម្នាក់ដែលជ្រើសរើសយកសេចក្តីថ្លែងការណ៍ខុសពីអ្នក ។ សូមចែកចាយការយល់ដឹងពីសៀវភៅកំណត់ហេតុរបស់អ្នក ។
នៅពេលសិស្សធ្វើសកម្មភាពនេះរួចរាល់ហើយ អ្នកអាចស្នើសុំអ្នកស្ម័គ្រចិត្តឲ្យចែកចាយការយល់ដឹងដែលមិត្តរួមថ្នាក់របស់ពួកគេបានបង្រៀនដល់ពួកគេ ។ អ្នកក៏អាចអញ្ជើញពួកគេឲ្យកត់ត្រាចំណាប់អារម្មណ៍ដែលពួកគេអាចទទួលបានសម្រាប់ជីវិតផ្ទាល់ខ្លួនរបស់ពួកគេ ។
ស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព
ការបន្ថែមចំណុចខាងក្រោមទៅក្នុងសាច់រឿងរបស់ជូលីតា អាចជួយសិស្សរៀបចំខ្លួនដើម្បីពិភាក្សាអំពីសារៈសំខាន់នៃប្រភពដែលយើងងាកទៅរកក្នុងជីវិតរបស់យើង ។
ដោយសារមនុស្សជាច្រើនមិនយល់ស្របនឹងនាង ជូលីតាចាប់ផ្តើមងឿងឆ្ងល់ថាតើគោលលទ្ធិ និងបទដ្ឋានដែលបានបង្រៀននៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយគឺពិតជាមកពីព្រះឬអត់ ។
សូមពិចារណាអញ្ជើញសិស្សឲ្យពិភាក្សាការបំផុសគំនិតខាងក្រោមជាមួយនឹងដៃគូ ។
-
មនុស្ស និងប្រភពដែលជូលីតាប្រើដើម្បីស្វែងរកព័ត៌មាន គឺមានសារៈសំខាន់ពីព្រោះ …
-
ខ្ញុំនឹងផ្ដល់ដំបូន្មានឲ្យជូលីតា រកមើលចម្លើយដោយចូលទៅកាន់ … ហើយផ្ទុយនឹងការរកមើលចម្លើយដោយការចូលទៅកាន់ …
នៅពេលដែលដៃគូទាំងឡាយបានពិភាក្សារួចរាល់ហើយ សូមអញ្ជើញអ្នកស្ម័គ្រចិត្តឲ្យចែកចាយពីអ្វីដែលពួកគេបានរៀនក្នុងថ្នាក់ ។ អ្នកអាចនឹងសុំសិស្សឲ្យចែកចាយពីមូលហេតុដែលពួកគេឆ្លើយតាមរបៀបដែលពួកគេបានធ្វើ ។ សូមពិចារណាជួយសិស្សឲ្យយល់ថា ប្រភពដែលពួកគេងាកទៅរក អាចនាំពួកគេខិតជិត ឬឆ្ងាយពីព្រះវរបិតាសួគ៌ ។
ដើម្បីផ្តល់ឲ្យសិស្សនូវការអនុវត្តក្នុងការស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព ដៃគូទាំងឡាយក៏អាចស្វែងរក និងចែកចាយវគ្គបទគម្ពីរចំណេះចំណានខាងគោលលទ្ធិដែលអាចជួយដល់ជូលីតាផងដែរ ។ ឧទាហរណ៍នៃវគ្គបទគម្ពីរដែលពួកគេអាចប្រើរួមមាន យ៉ូស្វេ ២៤:១៥; សុភាសិត ៣:៥–៦; អេសាយ ៥:២០; ម៉ាថាយ ៥:១៤–១៦ និង គោលលទ្ធិ និងសេចក្ដីសញ្ញា ៦:៣៦ ។
ការអនុវត្តផ្ទាល់ខ្លួន
អ្នកអាចនឹងបញ្ចប់ថ្នាក់ដោយការអញ្ជើញសិស្សឲ្យឆ្លើយសំណួរមួយក្នុងចំណោមសំណួរខាងក្រោមនេះ ដែលមាននៅក្នុងសៀវភៅកំណត់ហេតុការសិក្សារបស់ពួកគេប្រកបដោយការអធិស្ឋាន ។ សូមលើកទឹកចិត្តពួកគេឲ្យយកចិត្តទុកដាក់ចំពោះចំណាប់អារម្មណ៍ពីព្រះវិញ្ញាណបរិសុទ្ធ នៅពេលពួកគេជញ្ជឹងគិត និងសរសេរ ។
-
តើអ្នកគិតថាព្រះវរបិតាសួគ៌ចង់ឲ្យអ្នកធ្វើអ្វីខ្លះពីអ្វីដែលអ្នកបានរៀន ឬទទួលអារម្មណ៍នៅថ្ងៃនេះ ?
-
តើការជ្រើសរើសធ្វើតាមគោលការណ៍នៃការទទួលបានចំណេះដឹងខាងវិញ្ញាណក្នុងជីវិតរបស់អ្នកអាចជះឥទ្ធិពលដល់ទំនាក់ទំនងរបស់អ្នកជាមួយព្រះវរបិតាសួគ៌ និងព្រះយេស៊ូវគ្រីស្ទយ៉ាងដូចម្ដេច ?