« អេសាយ ៤៤–៧ ៖ ‹ ក្រៅពីយើងគ្មានព្រះណាទៀតឡើយ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« អេសាយ ៤៤–៤៧ ៖ ‹ ក្រៅពីយើងគ្មានព្រះណាទៀតឡើយ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
អេសាយ ៤០–៤៩ ៖ មេរៀនទី ១២០
អេសាយ ៤៤–៤៧
« ក្រៅពីយើងគ្មានព្រះណាទៀតឡើយ »
ជារៀងរាល់ថ្ងៃ យើងប្រឈមមុខនឹងឥទ្ធិពលដែលប្រឈមនឹងការលះបង់របស់យើងចំពោះព្រះវរបិតាសួគ៌ និងព្រះយេស៊ូវគ្រីស្ទ ។ ប្រឈមមុខនឹងការល្បួងស្រដៀងគ្នា ពួកសាសន៍អ៊ីស្រាអែលខ្លះនៅសម័យអេសាយបានងាកទៅថ្វាយបង្គំប្រភពផ្សេងទៀត ។ ជាការឆ្លើយតប ព្រះអម្ចាស់ដោយសេចក្ដីស្រឡាញ់ ប៉ុន្តែយ៉ាងច្បាស់បានព្រមានពួកសាសន៍អ៊ីស្រាអែលកុំឲ្យថ្វាយបង្គំព្រះក្លែងក្លាយ ។ មេរៀននេះអាចជួយសិស្សដាក់ព្រះវរបិតាសួគ៌ និងព្រះយេស៊ូវគ្រីស្ទមុនមនុស្សគ្រប់គ្នា ឬអ្វីផ្សេងទៀតនៅក្នុងជីវិតរបស់ពួកគេ ។
ការរៀបចំសិស្ស ៖ សូមអញ្ជើញសិស្សឲ្យគិតអំពីអ្វីដែលពួកគេបានរៀនពេញមួយការសិក្សាព្រះគម្ពីរសញ្ញាចាស់ ។ បន្ទាប់មក សូមអញ្ជើញពួកគេឲ្យជញ្ជឹងគិតថា « តើអ្វីដែលខ្ញុំបានរៀនអំពីព្រះវរបិតាសួគ៌ និងព្រះយេស៊ូវគ្រីស្ទបានបង្កើនបំណងប្រាថ្នារបស់ខ្ញុំដើម្បីដាក់ទ្រង់ទាំងទ្វេជាអាទិភាពក្នុងជីវិតរបស់ខ្ញុំដោយរបៀបណា ? »
សកម្មភាពរៀនសូត្រដែលអាចមាន
ការគោរពបូជាវីរបុរស
សូមពិចារណាចាប់ផ្ដើមថ្នាក់ដោយការសួរសិស្សនូវសំណួរដូចខាងក្រោម ។
-
ប្រសិនបើអ្នកត្រូវស្ទង់មតិក្មេងវ័យជំទង់ក្នុងតំបន់របស់យើងថាតើវីរបុរសរបស់ពួកគេជានរណា តើអ្នកគិតថាពួកគេអាចរួមបញ្ចូលនរណាខ្លះ ?
បន្ទាប់មក សូមអញ្ជើញសិស្សឲ្យធ្វើដូចខាងក្រោមនេះនៅក្នុងសៀវភៅកំណត់ហេតុការសិក្សារបស់ពួកគេ ។
បង្កើតបញ្ជីវីរបុរសផ្ទាល់ខ្លួនរបស់អ្នក ។ ដាក់ផ្កាយមួយនៅក្បែរអ្នកដែលហាក់ដូចជាមានឥទ្ធិពលបំផុតក្នុងជីវិតរបស់អ្នក ។
ប៊ីស្សព ដបុលយូ គ្រីស្តូហ្វើរ វ៉តឌែល នៃគណៈប៊ីស្សពប្រធានបានចែកចាយដំបូន្មានដូចខាងក្រោមអំពីវីរបុរសរបស់យើង ។
កាលខ្ញុំនៅក្មេង វីរបុរសដំបូងរបស់ខ្ញុំគឺក្រុមអត្តពលិក ។ ខ្ញុំចងចាំកាលពីក្មេង ខ្ញុំប្រមូលកាតកីឡាវាយកូនបាល់ជាមួយនឹងរូបភាព និងស្ថិតិរបស់ក្រុមកីឡាករវាយកូលបាល់ មេជ័រ លីក ។ « ការគោរពបូជាវីរបុរស » កាលជាកុមារភាពអាចជាងសប្បាយ និងស្លូតត្រង់ ដូចជាពេលកុមារស្លៀកពាក់តាមវីរបុរសដែលពួកគេចូលចិត្ត ក្នុងពិធីបុណ្យហាឡូវិនជាដើម ។ ទោះជាយើងកោតសរសើរ និងគោរពដល់វីរភាពរបស់បុរស និងស្ត្រីដែលមានទេពកោសល្យ និងមានសមត្ថភាព និងការរួមចំណែកដ៏អស្ចារ្យក្តី ក៏កម្រិតនៃការ « ការសាទរ » នោះបើជ្រុលហួសហេតុពេកវាអាចប្រៀបដូចជា កូនចៅអ៊ីស្រាអែល ថ្វាយបង្គំរូបគោមាស នៅវាលខ្សាច់នៃភ្នំស៊ីណាយអ៊ីចឹងដែរ ។ …
វីរបុរស —អង់អាចរបស់យើងក្នុងពេលបច្ចុប្បន្ន និងជារៀងរហូតគឺជា ព្រះយេស៊ូវគ្រីស្ទ ហើយអ្វីមួយ ឬនរណាម្នាក់ ដែលបង្វែរយើងចេញពីការបង្រៀនរបស់ទ្រង់ ដូចមានក្នុងព្រះគម្ពីរ និងតាមរយៈពាក្យសម្ដីរបស់ព្យាការីនៅរស់ វាអាចជះឥទ្ធិពលអវិជ្ជមានដល់ការរីកចម្រើនរបស់យើងនៅលើផ្លូវនៃសេចក្ដីសញ្ញា ។ ( « លើសពីវីរបុរសធម្មតា » Liahona ខែវិច្ឆិកា ឆ្នាំ២០២៣ ទំព័រ ៩០ )
-
តើអ្នកចាប់អារម្មណ៍អ្វីខ្លះមកពីសេចក្តីថ្លែងការណ៍របស់ប៊ីស្សព វ៉តឌែល ?
ដើម្បីជួយសិស្សវាយតម្លៃកន្លែងដែលពួកគេដាក់ព្រះវរបិតាសួគ៌ និងព្រះយេស៊ូវគ្រីស្ទនៅក្នុងជីវិតរបស់ពួកគេ អ្នកអាចអញ្ជើញពួកគេឲ្យមើលត្រឡប់ទៅក្រោយវិញនូវបញ្ជីវីរបុរសរបស់ពួកគេ នៅពេលពួកគេពិចារណាសំណួរខាងក្រោមដោយស្ងៀមស្ងាត់ ។
-
តើមានវីរបុរសណាម្នាក់នៅក្នុងបញ្ជីរបស់អ្នក បង្អាក់អ្នកពីការថ្វាយបង្គំព្រះវរបិតាសួគ៌ និងព្រះយេស៊ូវគ្រីស្ទដែរឬទេ ?
-
តើមានចំណាប់អារម្មណ៍ សកម្មភាព ឬវត្ថុណាមួយដែលអាចរំខានអ្នកពីការថ្វាយបង្គំទ្រង់ទាំងទ្វេដែរឬទេ ?
នៅពេលសិស្សរៀបចំសិក្សាការបង្រៀនរបស់អេសាយថ្ងៃនេះ សូមអញ្ជើញពួកគេឲ្យស្តាប់ការចាប់អារម្មណ៍ពីព្រះវិញ្ញាណបរិសុទ្ធអំពីរបៀបដែលពួកគេអាចដាក់ព្រះវរបិតាសួគ៌ និងព្រះយេស៊ូវគ្រីស្ទជាអាទិភាពក្នុងជីវិតរបស់ពួកគេ ។
គ្មានព្រះឯណាទៀតទេ
សូមពន្យល់ថា កូនចៅនៃអ៊ីស្រាអែលនៅសម័យអេសាយបានពុះពារដើម្បីដាក់ព្រះអម្ចាស់ជាអាទិភាពក្នុងជីវិតរបស់ពួកគេ ។ ផ្ទុយទៅវិញ ពួកគេបែរទៅរកព្រះក្លែងក្លាយដូចជារូបព្រះដើម្បីសុំជំនួយ ។
សូមពិចារណាអញ្ជើញដៃគូ ឬក្រុមតូចៗឲ្យអានខគម្ពីរខាងក្រោម ហើយបង្កើតការសង្ខេបមួយឃ្លាអំពីអ្វីដែលពួកគេបានរៀន ។
សូមអាន អេសាយ ៤៤:៦, ៨ និង ៤៦:៩ ដោយរកមើលអ្វីដែលព្រះអម្ចាស់ចង់ឲ្យកូនចៅអ៊ីស្រាអែលយល់អំពីការផ្តោតអារម្មណ៍នៃការថ្វាយបង្គំរបស់ពួកគេ ។
សូមអញ្ជើញសិស្សមួយចំនួនឲ្យចែកចាយសេចក្ដីសង្ខេបនៃអ្វីដែលក្រុមរបស់ពួកគេបានរៀន ។ ប្រសិនបើពួកគេមិនចែកចាយវាដោយឯកឯងទេ សូមជួយសិស្សឲ្យស្គាល់សេចក្តីពិតស្រដៀងគ្នានឹងព័ត៌មានខាងក្រោមនេះ ៖ គ្មាននរណាម្នាក់ និងគ្មានអ្វីនៅលើផែនដីនេះអាចប្រៀបធៀបនឹងព្រះយេស៊ូវគ្រីស្ទបានឡើយ ។
ដោយជាផ្នែកមួយនៃការពិភាក្សារបស់អ្នក នោះអ្នកអាចចង្អុលបង្ហាញថា អេសាយ ៤៤:៦ មានព្រះបរមងារជាច្រើនសម្រាប់ព្រះយេស៊ូវគ្រីស្ទ ។ អ្នកអាចអញ្ជើញសិស្សឲ្យចែកចាយអ្វីដែលព្រះបរមងារទាំងនេះបង្រៀនយើងអំពីព្រះយេស៊ូវគ្រីស្ទ ។
នៅក្នុង អេសាយ ៤៤–៤៦ ព្រះអម្ចាស់ពិពណ៌នាអំពីការថ្វាយបង្គំក្លែងក្លាយរបស់ពួកសាសន៍អ៊ីស្រាអែល ។ ទ្រង់រំឭកប្រជាជនថា ពួកគេបានបង្កើត បានថ្វាយបង្គំ និងបានអធិស្ឋានដល់រូបព្រះដែលធ្វើពីឈើដូចគ្នា ដែលពួកគេធ្លាប់ដើម្បីបង្កាត់ជាភ្លើង និងចម្អិនម្ហូបអាហារ ។ ហើយនៅពេលដែលពួកសាសន៍អ៊ីស្រាអែលត្រូវបានចាប់ធ្វើជាឈ្លើយ សត្វរបស់ពួកគេបានពុះពារដើម្បីទាញរទេះដែលមានទម្ងន់ធ្ងន់ពីរូបព្រះដែលមនុស្សបានធ្វើរបស់ពួកគេ ។
សូមអាន អេសាយ ៤៤:១៤–១៩ និង អេសាយ ៤៦:១–២ ដោយរកមើលការពិពណ៌នារបស់ព្រះអម្ចាស់អំពីរូបព្រះពីបុរាណ ដែលអាចអនុវត្តចំពោះអ្វីៗដែលបង្វែរអារម្មណ៍មនុស្សចេញពីព្រះអម្ចាស់ក្នុងជំនាន់របស់យើង ។ ( វាអាចមានប្រយោជន៍ដើម្បីដឹងថារូបព្រះពីរដែលពួកគេថ្វាយបង្គំមានឈ្មោះថា ព្រះបាល និង ព្រះនេបូរ ) ។
-
តើអ្នកបានរកឃើញអ្វីខ្លះ ?
អ្នកអាចសរសេរឃ្លា « តើគួរឲ្យយើងក្រាបចុះចំពោះដុំឈើឬអី ? » ( អេសាយ ៤៤:១៩ ) នៅលើក្ដារខៀន ។ សុំឲ្យសិស្សចែកចាយអ្វីដែលសំណួរនេះមាន អត្ថន័យ តាមពាក្យពេចន៍របស់ពួកគេផ្ទាល់ ។
បន្ទាប់មក លុបឃ្លា « ដុំឈើ » ចេញពីសំណួរនេះ ដោយទុក « តើគួរឲ្យយើងក្រាបចុះ ? »
សូមអញ្ជើញសិស្សឲ្យឡើងមកលើក្ដារខៀន ហើយបញ្ចប់ប្រយោគតាមរបៀបដែលអនុវត្តចំពោះមនុស្សនៅជំនាន់របស់យើង ។
-
តើអ្វីទៅជាគ្រោះថ្នាក់នៃការដាក់មនុស្សទាំងនេះ ឬអ្វីៗពីមុនព្រះវរបិតាសួគ៌ និងព្រះយេស៊ូវគ្រីស្ទ ?
-
ហេតុអ្វីបានជាវាអាចជាការលំបាកក្នុងការដាក់ព្រះវរបិតាសួគ៌ និងព្រះយេស៊ូវគ្រីស្ទជាអាទិភាពក្នុងជីវិតរបស់យើងជានិច្ច ?
ការដាក់ព្រះយេស៊ូវគ្រីស្ទជាអាទិភាព
ដើម្បីជួយសិស្សដាក់ព្រះអង្គសង្គ្រោះជាអាទិភាពក្នុងជីវិតរបស់ពួកគេ អ្នកអាចបង្ហាញរូបភាពព្រះយេស៊ូវគ្រីស្ទ ដូចជារូបនៅដើមមេរៀននេះ នៅកណ្តាលក្ដារខៀន ។ នៅពេលសិស្សធ្វើសកម្មភាពខាងក្រោម ពួកគេអាចសរសេរគុណលក្ខណៈដែលពួកគេរកឃើញជុំវិញរូបភាពនោះ ។
សូមសិក្សាវគ្គបទគម្ពីរខាងក្រោមនេះយ៉ាងហោចណាស់ឲ្យបានពីរ ។ នៅពេលអ្នកអានខគម្ពីរយឺតៗ និងដោយប្រុងប្រយ័ត្ន សូមរកមើលអ្វីដែលយើងអាចរៀនអំពីព្រះយេស៊ូវគ្រីស្ទ ដែលផ្តល់ឲ្យយើងនូវទំនុកចិត្តដើម្បីដាក់ទ្រង់ជាអាទិភាពនៅក្នុងជីវិតរបស់យើង ។
-
អេសាយ ៤៤:១–៤
-
អេសាយ ៤៤:២១–២៣
-
អេសាយ ៤៤:២៤–២៥
-
អេសាយ ៤៥:២០–២២
-
អេសាយ ៤៦:៣–៥
អ្នកអាចសុំសិស្សឲ្យបន្ថែមគុណលក្ខណៈផ្សេងទៀតនៅលើក្ដារខៀន ដែលពួកគេដឹងអំពីព្រះយេស៊ូវគ្រីស្ទពីបទពិសោធន៍របស់ពួកគេ ឬពីបទគម្ពីរផ្សេងទៀត ។
ដើម្បីជួយសិស្សចែកចាយគំនិតរបស់ពួកគេអំពីព្រះចេស្ដាដែលមិនអាចប្រៀបផ្ទឹមបាននៃព្រះយេស៊ូវគ្រីស្ទ អ្នកអាចនឹងសួរសំណួរខាងក្រោមនេះ ។
-
តើការយល់ដឹងអំពីសេចក្តីពិតទាំងនេះអំពីព្រះយេស៊ូវគ្រីស្ទអាចជួយនរណាម្នាក់ដែលពិបាកដាក់ទ្រង់ជាអាទិភាពក្នុងជីវិតរបស់ពួកគេដោយរបៀបណា ?
-
តើអ្នកមានបទពិសោធន៍អ្វីខ្លះ ដែលបានជួយអ្នកដាក់ព្រះវរបិតាសួគ៌ និងព្រះយេស៊ូវគ្រីស្ទជាអាទិភាពក្នុងជីវិតអ្នក ?
ផែនការដាក់ព្រះវរបិតាសួគ៌ និងព្រះយេស៊ូវគ្រីស្ទជាអាទិភាព
ដើម្បីជួយសិស្សបង្កើតផែនការមួយ ដើម្បីដាក់ព្រះវរបិតាសួគ៌ និងព្រះយេស៊ូវគ្រីស្ទឲ្យបានពេញលេញជាដំបូងក្នុងជីវិតរបស់ពួកគេ អ្នកអាចប្រើសំណៅមេរៀនដែលមានចំណងជើងថា « ការដាក់ផែនការ » ។ សូមលើកទឹកចិត្តពួកគេឲ្យស្តាប់ពីចំណាប់អារម្មណ៍ពីព្រះវិញ្ញាណបរិសុទ្ធ នៅពេលពួកគេកំណត់នូវអ្វីដែលពួកគេចង់ធ្វើ ដើម្បីសម្រេចគោលដៅរបស់ពួកគេ ។