« អេសាយ ៤០–៤៣ ៖ ព្រះលួងលោមប្រជារាស្រ្តរបស់ទ្រង់ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« អេសាយ ៤០–៤៣ ៖ ព្រះលួងលោមប្រជារាស្រ្តរបស់ទ្រង់ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
អេសាយ ៤០–៤៣ ៖ មេរៀនទី ១១៩
អេសាយ ៤០–៤៣
ព្រះលួងលោមប្រជារាស្រ្តរបស់ទ្រង់
ព្រះនឹងមិនបោះបង់ចោលបុត្រាបុត្រីនៃសេចក្តីសញ្ញារបស់ទ្រង់ទេ ។ តាមរយៈព្យាការីអេសាយរបស់ទ្រង់ ព្រះបានលួងលោមអ្នកដែលនៅទីបំផុតត្រូវចាប់ជាឈ្លើយនៅក្រុងបាប៊ីឡូន ។ ព្រះបានប្រទានដល់យើង ជារាស្ដ្រនៃសេចក្ដីសញ្ញារបស់ទ្រង់នៅថ្ងៃនេះ ជាពាក្យលួងលោមដូចគ្នា ៖ « កុំឲ្យភ័យខ្លាចឡើយ ដ្បិតយើងនៅជាមួយនឹងឯង » ( អេសាយ ៤១:១០ ) ។ មេរៀននេះអាចជួយសិស្សឲ្យទទួលអារម្មណ៍លួងលោមរបស់ព្រះ ។
ការរៀបចំសិស្ស ៖ សូមអញ្ជើញសិស្សឲ្យអាន ឬស្ដាប់ពាក្យនៃខគម្ពីរមួយចំនួន ឬទាំងអស់នៅក្នុងទំនុកតម្កើង « How Firm a Foundation » ( Hymns—for Home and Church ) ។ សូមឲ្យពួកគេសម្គាល់ពាក្យ ឬឃ្លាដែលផ្តល់ការលួងលោម ហើយមកថ្នាក់រៀនដោយត្រៀមខ្លួនដើម្បីចែកចាយ ។
សកម្មភាពរៀនសូត្រដែលអាចមាន
ភាពភ័យខ្លាចពុំមែនជារឿងថ្មីនោះទេ
សូមពិចារណាចាប់ផ្តើមថ្នាក់ដោយបង្ហាញសេចក្តីថ្លែងការណ៍ និងសំណួរដូចខាងក្រោម ។ សិស្សអាចត្រូវបានអញ្ជើញឲ្យសរសេរចម្លើយរបស់ពួកគេនៅលើក្ដារខៀន ។
អែលឌើរ រ៉ូណល អេ រ៉ាសបាន ក្នុងកូរ៉ុមនៃពួកសាវកដប់ពីរនាក់បានចែកចាយការសង្កេតឃើញដូចខាងក្រោម ៖
ភាពភ័យខ្លាចពុំមែនជារឿងថ្មីនោះទេ ។ ពួកសាវករបស់ព្រះយេស៊ូវគ្រីស្ទ កាលនៅលើសមុទ្រកាលីឡេ បានមានការភ័យខ្លាចចំពោះ« ខ្យល់ព្យុះជាខ្លាំង ហើយរលក » នៅយប់នោះ ( ម៉ាកុស ៤:៣៤ ) ។ សព្វថ្ងៃនេះ ក្នុងនាមជាពួកសាវករបស់ទ្រង់ យើងក៏មានការភ័យខ្លាចដែរ ។ ( « Be Not Troubled » Liahona ខែវិច្ឆិកា ឆ្នាំ២០១៨ ទំព័រ ១៨ )
-
តើមនុស្សទូទាំងពិភពលោកមានការភ័យខ្លាចអ្វីខ្លះ រួមទាំងសិស្សរបស់ព្រះយេស៊ូវគ្រីស្ទ អាចនឹងមានការភ័យខ្លាច ?
បន្ទាប់ពីសិស្សបានរាយបញ្ជីការភ័យខ្លាចផ្សេងៗ សូមចែកចាយសេចក្ដីថ្លែងការណ៍របស់អែលឌើរ រ៉ាសបោន ដែលរួមមានការភ័យខ្លាចដែលលោកបានឃើញនៅក្នុងពិភពលោកសព្វថ្ងៃនេះ ។ អ្នកអាចបន្ថែមអ្វីមួយចំនួនទាំងនេះទៅក្នុងបញ្ជីនៅលើក្តារខៀន ។
អែលឌើរ រ៉ាសបាន បានបន្ត ៖
ពួកយុវមជ្ឈិមវ័យរបស់យើងភ័យខ្លាចដើម្បីធ្វើការតាំងចិត្តផ្សេងៗដូចជា ការរៀបការជាដើម ។ អ្នកដែលបានរៀបការថ្មីថ្មោង … អាចមានការភ័យខ្លាចក្នុងការមានកូននៅក្នុងពិភពលោកដែលសម្បូរទៅដោយអំពើទុច្ចរិត ។ ពួកអ្នកផ្សព្វផ្សាយសាសនាភ័យខ្លាចចំពោះរឿងច្រើនយ៉ាង ជាពិសេសការនិយាយនឹងមនុស្សដែលពុំស្គាល់ ។ ពួកស្ត្រីមេម៉ាយភ័យខ្លាចចំពោះការរស់នៅតែម្នាក់ឯង ។ ពួកយុវវ័យជំទង់ៗភ័យខ្លាចថា មិត្តភក្តិរបស់ខ្លួនពុំរាប់រក កុមារតូចៗខ្លាចថ្ងៃបើកបវេសនកាលនៅសាលា និស្សិតនៅសាកលវិទ្យាល័យភ័យខ្លាចចំពោះលទ្ធផលនៃការប្រឡង ។ យើងភ័យខ្លាចចំពោះភាពបរាជ័យ ការបដិសេធ ការខកចិត្ត និងអ្វីៗដែលពុំបានដឹង ។ យើងភ័យខ្លាចចំពោះព្យុះសង្ឃរា ការរញ្ជួយដី និងអគ្គីភ័យដែលបំផ្លិចបំផ្លាញដែនដី និងជីវិតរបស់យើង ។ យើងភ័យខ្លាចចំពោះការពុំត្រូវការបានគេជ្រើសរើស ហើយក្នុងស្ថានភាពផ្សេងទៀត យើងភ័យខ្លាចចំពោះការត្រូវបានគេជ្រើសរើស ។ យើងភ័យខ្លាចចំពោះការពុំល្អគ្រប់គ្រាន់ យើងភ័យខ្លាចថា ព្រះអម្ចាស់គ្មានពរជ័យឲ្យយើងទេ ។ យើងភ័យខ្លាចចំពោះការផ្លាស់ប្ដូរ ហើយការភ័យខ្លាចរបស់យើងអាចនាំឲ្យមានសភាពកាន់តែវឹកវរខ្លាំងឡើង ។ តើខ្ញុំបានរៀបរាប់ពីការភ័យខ្លាចអស់ហើយឬនៅ ? ( « Be Not Troubled » Liahona ខែវិច្ឆិកា ឆ្នាំ២០១៨ ទំព័រ ១៨ )
-
តើការបង្ហាញអំណរគុណមានឥទ្ធិពលអ្វីខ្លះមកលើយើង ?
សូមពិចារណាអញ្ជើញសិស្សឲ្យជញ្ជឹងគិតថាតើពួកគេអាចទាក់ទងនឹងការភ័យខ្លាចណាមួយដែលបានរាយបញ្ជី ឬដើម្បីគិតអំពីការភ័យខ្លាចរបស់ពួកគេផ្ទាល់ ។ សូមចែកចាយបរិបទខាងក្រោមនេះដើម្បីជួយសិស្សមើលឃើញពីកាលៈទេសៈដែលអាចបណ្ដាលឲ្យពួកសាសន៍អ៊ីស្រាអែលភ័យខ្លាច ។
អេសាយបានទស្សន៍ទាយអំពីការបំផ្លិចបំផ្លាញ និងការចាប់ជាឈ្លើយដែលនឹងធ្លាក់លើអ៊ីស្រាអែល និងយូដា ។ នៅដើម អេសាយ ៤០ ព្រះបានបំផុសគំនិតអេសាយឲ្យសរសេរទៅកាន់ពួកសាសន៍យូដានៅពេលអនាគតដ៏យូរអង្វែង ដែលនឹងត្រូវរស់នៅក្នុងការជាប់ឃុំឃាំង ។
-
តើមនុស្សម្នាក់ដែលជាប់ឃុំឃាំងអាចនឹងមានការភ័យខ្លាច ឬកង្វល់អ្វីខ្លះ ?
សូមអាន អេសាយ ៤០:១–២ ដោយរកមើលសារលិខិតដែលព្រះបានណែនាំអេសាយឲ្យចែកចាយដល់រាស្រ្តនៃសេចក្តីសញ្ញារបស់ទ្រង់ ។
-
តើគុណលក្ខណៈ ឬចរិកលក្ខណៈអ្វីខ្លះនៃព្រះដែលអ្នករៀនពីខគម្ពីរទាំងនេះ ?
សូមចែកចាយសាក្សីរបស់អ្នកថា ព្រះលួងលោមរាស្ដ្រនៃសេចក្ដីសញ្ញារបស់ទ្រង់នៅសម័យយើង ។ សូមពិចារណាដាក់បង្ហាញរូបភាពដូចខាងក្រោមនេះ ។ សិស្សអាចគូររូបនេះ ឬអ្វីដែលស្រដៀងនេះនៅក្នុងសៀវភៅកំណត់ហេតុការសិក្សារបស់ពួកគេ ។ អញ្ជើញពួកគេឲ្យគូសចំណាំនៅលើគំនូររបស់ពួកគេ ដើម្បីឆ្លើយសំណួរដែលភ្ជាប់មកជាមួយ ។
ការលួងលោមការភ័យខ្លាច
-
ជាទូទៅ នៅលើរង្វាស់នេះ តើអ្នកនឹងដាក់អារម្មណ៍របស់អ្នកអំពីជីវិតរបស់អ្នកនៅពេលនេះនៅត្រង់ណា ?
-
តើអ្នកនឹងដាក់អារម្មណ៍របស់អ្នកអំពីអនាគតនៅត្រង់ណា ?
នៅពេលអ្នកសិក្សា រកមើលអ្វីដែលព្រះបង្រៀនថា អាចជួយអ្នកដកពិសោធន៍ ការលួងលោម របស់ទ្រង់បន្ថែមទៀត ។ ប្រសិនបើអ្នកអាន ឬឮអ្វីមួយដែលអ្នកគិតថាអាចនឹងនាំមកនូវការលួងលោម នោះគំនិតទាំងនោះអាចជាព្រះវិញ្ញាណបរិសុទ្ធកំពុងទាក់ទងនឹងអ្នក ។ សូមពិចារណាកត់ត្រាការយល់ដឹងទាំងនេះនៅជិតគំនូរនៅក្នុងសៀវភៅកំណត់ហេតុរបស់អ្នក ។
ព្រះលួងលោមប្រជារាស្រ្តរបស់ទ្រង់
ដើម្បីជួយលួងលោមរាស្រ្តនៃសេចក្ដីសញ្ញារបស់ទ្រង់ ព្រះបានបំផុសគំនិតអេសាយឲ្យបង្រៀនរឿងជាច្រើនអំពីទ្រង់ អេសាយ ៤០–៤៣ ។ អ្នកនឹងមានឱកាសដើម្បីកំណត់ស្វែងរកសេចក្តីពិតមួយចំនួននេះ ហើយពិចារណាអំពីរបៀបដែលវាអាចជួយលួងលោមអ្នកដែលភ័យខ្លាច ។
បង្ហាញការណែនាំខាងក្រោម ហើយពន្យល់ថាសិស្សនឹងមានឱកាសបំពេញសកម្មភាពនេះនៅពេលក្រោយនៅក្នុងមេរៀននេះ ។
ដោយប្រើអត្ថបទពីអេសាយ សូមបង្កើតសារខ្លីមួយដែលអាចលួងលោមនរណាម្នាក់ដែលភ័យខ្លាច ។ សូមបញ្ចូលអ្វីដូចខាងក្រោមនេះ ៖
ជំហានទី ១ ។ ពាក្យ ឬឃ្លាចេញពីវគ្គបទគម្ពីរដែលអាចជួយនរណាម្នាក់ទទួលអារម្មណ៍លួងលោមពីព្រះ ។ សង្ខេបអ្វីៗទាំងនេះទៅជាសេចក្តីថ្លែងការណ៍នៃសេចក្តីពិតសាមញ្ញមួយ ។
ជំហានទី ២ ។ បទគម្ពីរ ទំនុកតម្កើង ឬសេចក្តីថ្លែងការណ៍ពីអ្នកដឹកនាំសាសនាចក្រ ដើម្បីគាំទ្រការបង្រៀននៅក្នុងវគ្គបទគម្ពីរនេះ ។
ជំហានទី ៣ ។ បទពិសោធន៍ផ្ទាល់ខ្លួន ឬគំរូសម័យទំនើបដែលបង្ហាញពីរបៀបដែលការដឹងការណ៍នេះអំពីព្រះអាចនាំមកនូវការលួងលោម ។
គំរូ
មុនពេលសិស្សបំពេញសកម្មភាពនេះ សូមពន្យល់ថាអ្នកនឹងផ្តល់គំរូមួយដោយប្រើប្រាស់ អេសាយ ៤១:១០–១៤ ។ ខាងក្រោមនេះគឺជារបៀបមួយដែលអាចបង្ហាញជំហានទាំងនេះ ។ សូមបន្តបង្ហាញជំហានទាំងបី ហើយបញ្ជាក់ឲ្យច្បាស់ជាមួយសិស្សនៅពេលអ្នកបង្ហាញជំហាននីមួយៗ ។
សូមអាន អេសាយ ៤១:១០–១៤ ដោយស្វែងរកព្រះបន្ទូលនៃការលួងលោមរបស់ព្រះចំពោះរាស្ដ្រនៃសេចក្ដីសញ្ញារបស់ទ្រង់ ។ សូមកត់ចំណាំថាពាក្យ ដង្កូវ នៅក្នុង ខទី ១៤ អាចមានន័យថា ស្លូតបូត និងរាបទាប ។
ជំហានទី ១
-
តើពាក្យ ឬឃ្លាអ្វីខ្លះដែលអ្នកគិតថាអាចលួងលោម ? ហេតុអ្វី ?
-
តើអ្នកនឹងសង្ខេបវាទៅជាសេចក្តីថ្លែងការណ៍នៃសេចក្តីពិតសាមញ្ញមួយដោយរបៀបណា?
នៅក្នុងពាក្យពេចន៍របស់ពួកគេ សិស្សអាចរកឃើញអ្វីមួយដូចជា ៖ យើងមិនចាំបាច់ភ័យខ្លាចទៀតទេ ព្រោះព្រះនឹងគង់នៅជាមួយ ហើយពង្រឹងរាស្ដ្រនៃសេចក្ដីសញ្ញារបស់ទ្រង់ ។
ជំហានទី ២
ដើម្បីជួយសិស្សយល់ពីសេចក្ដីពិតនេះ សូមពិចារណាពីការច្រៀង ឬស្តាប់បទ « How Firm a Foundation » ( Hymns—for Home and Church ) ជាថ្នាក់រៀនទាំងមូល ។ សូមអញ្ជើញសិស្សឲ្យរកមើល ហើយចែកចាយពាក្យ ឬឃ្លាដែលពួកគេរកឃើញការលួងលោម ។ អាស្រ័យលើពេលវេលា អ្នកអាចច្រៀងតែឃ្លាទី ៣ និងទី ៧ ប៉ុណ្ណោះ ។ អ្នកក៏អាចអញ្ជើញសិស្សឲ្យភ្ជាប់ អេសាយ ៤១:១០ ទៅនឹងឃ្លាទី ៣ នៃទំនុកតម្កើងនេះនៅក្នុងបណ្ណាល័យដំណឹងល្អផងដែរ ។
-
តើការដឹងថាព្រះនឹងគង់នៅជាមួយ និងពង្រឹងយើង អាចជួយយើងមិនឲ្យភ័យខ្លាចដោយរបៀបណា ?
អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់បានចែកចាយពីរបៀបដែលទំនាក់ទំនងរបស់យើងជាមួយព្រះអម្ចាស់អាចជួយយើងមិនឲ្យភ័យខ្លាច ៖
ទោះជាមានឥទ្ធិពលលោកិយកើនឡើងនៅជុំវិញខ្លួនយើងក្តី ក៏យើងពុំចាំបាច់ភ័យខ្លាចឡើយ ។ ព្រះអម្ចាស់នឹងមិនដែលបោះបង់រាស្ដ្រក្នុងសេចក្ដីសញ្ញារបស់ទ្រង់ចោលឡើយ ។ មានអំណាចតបស្នងមកវិញនៃអំណោយទានខាងវិញ្ញាណ និងការដឹកនាំដ៏ទេវភាពសម្រាប់ពួកសុចរិត ។ ប៉ុន្ដែពរជ័យបន្ថែមនៃអំណាចខាងវិញ្ញាណនេះ មិននៅមាំមួនជាមួយយើង ដោយព្រោះតែយើងគឺជាផ្នែកមួយនៃជំនាន់នេះឡើយ ។ វានឹងនៅមាំមួន នៅពេលយើងពង្រឹងសេចក្ដីជំនឿរបស់យើងលើព្រះអម្ចាស់ព្រះយេស៊ូវគ្រីស្ទ ហើយកាន់តាមព្រះបញ្ញត្តិរបស់ទ្រង់ កាលយើងរៀនស្គាល់ និងស្រឡាញ់ទ្រង់ ។ ( នែល អិល អាន់ឌើរសិន « ចូលមកកាន់តែជិតព្រះអង្គសង្គ្រោះ » លីអាហូណា ខែវិច្ឆិកា ឆ្នាំ២០២២ ទំព័រ ៧៣–៧៤ )
ជំហានទី ៣
-
តើនៅពេលណាដែលអ្នកមានអារម្មណ៍ថា ព្រះបានគង់នៅជាមួយអ្នក ឬបានពង្រឹងអ្នក ?
សារលិខិតនៃការលួងលោម
សូមផ្តល់ពេលវេលាដល់សិស្សដើម្បីរៀបចំសារលួងលោមខ្លីៗរបស់ពួកគេ ។ ពួកគេអាចធ្វើដូចនេះតែរៀងៗខ្លួន ឬជាមួយនឹងដៃគូម្នាក់ ។
សូមជ្រើសរើសបណ្ដុំនៃខគម្ពីរមួយខាងក្រោម ។ បង្កើតសារខ្លីៗមួយដែលអាចលួងលោមអ្នកដែលភ័យខ្លាច ។ អនុវត្តតាមជំហានទាំងបីដើម្បីធ្វើការណ៍នេះ ។
អេសាយ ៤០:៩–១១
អេសាយ ៤០:២៨–៣១
អេសាយ ៤១:១៧–២០
អេសាយ ៤២:៥–៧
អេសាយ ៤៣:១–២
អេសាយ ៤៣:២៥–២៦
នៅពេលសិស្សរួចរាល់ហើយ សូមអញ្ជើញពួកគេឲ្យចែកចាយសារលិខិតនៃការលួងលោមរបស់ពួកគេជាក្រុម ឬជាមួយសិស្សក្នុងថ្នាក់ ។ ប្រសិនបើសិស្សចែកចាយទំនុកតម្កើងជាផ្នែកនៃសាររបស់ពួកគេ នោះអ្នកអាចអញ្ជើញពួកគេឲ្យជ្រើសរើសខគម្ពីរដែលគាំទ្រអ្វីដែលពួកគេបានចែកចាយ ។ សូមច្រៀងឃ្លានោះជាមួយគ្នាជាថ្នាក់ ។ អ្នកអាចធ្វើវាឡើងវិញបាន អាស្រ័យលើពេលវេលាដែលអ្នកមាន ។
សេចក្ដីបញ្ចប់
សូមទុកពេលឲ្យសិស្សជញ្ជឹងគិតពីអ្វីដែលពួកគេបានរៀនអំពីព្រះ ដែលអាចនាំមកនូវការលួងលោមដល់ពួកគេ ។ សូមរំឭកពួកគេថា ការយល់ដឹងទាំងនេះអាចត្រូវបានបំផុសគំនិតដោយព្រះវិញ្ញាណបរិសុទ្ធ ដែលបង្រៀន និងថ្លែងទីបន្ទាល់អំពីព្រះវរបិតាសួគ៌ និងព្រះយេស៊ូវគ្រីស្ទ ។ សូមអញ្ជើញសិស្សឲ្យកត់ត្រាគំនិតរបស់ពួកគេនៅក្នុងសៀវភៅកំណត់ហេតុការសិក្សារបស់ពួកគេ ។