Manwal ng Guro ng Seminary para sa Lumang Tipan

Mga Nilalaman
Pahina ng Pamagat
Pambungad sa Manwal ng Guro
Mga Lesson sa Lumang Tipan
- Halina’t Basahin ang Lumang Tipan
- Moises 1; Abraham 3
- Genesis 1–2; Moises 2–3; Abraham 4–5
- Genesis 3–4; Moises 4–5
- Genesis 5; Moises 6
- Moises 7
- Genesis 6–11; Moises 8
- Genesis 12–17; Abraham 1–2
- Genesis 18–23
- Genesis 24–33
- Genesis 37–41
- Genesis 42–50
- Exodo 1–6
- Pasko ng Pagkabuhay
- Exodo 7–13
- Exodo 14–18
- Exodo 19–20; 24; 31–34
- Exodo 35–40; Levitico 1; 4; 16; 19
- Mga Bilang 11–14; 20–24; 27
- Deuteronomio 6–8; 15; 18; 29–30; 34
- Josue 1–8; 23–24
- Mga Hukom 2–4; 6–8; 13–16
- Ruth; 1 Samuel 1–7
- 1 Samuel 8–10; 13; 15–16
- 1 Samuel 17–18; 24–26; 2 Samuel 5–7
- 2 Samuel 11–12; 1 Mga Hari 3; 6–9; 11
- 1 Mga Hari 12–13; 17–22
- 2 Mga Hari 2–7
- 2 Mga Hari 16–25
- 2 Cronica 14–20; 26; 30
- Ezra 1; 3–7; Nehemias 2; 4–6; 8
- Esther
- Job 1–3; 12–14; 19; 21–24; 38–40; 42
- Mga Awit 1–2; 8; 19–33; 40; 46
- Mga Awit 49–51; 61–66; 69–72; 77–78; 85–86
- Mga Awit 102–103; 110; 116–119; 127–128; 135–139; 146–150
- Mga Kawikaan 1–4; 15–16; 22; 31; Eclesiastes 1–3; 11–12
- Isaias 1–12
- Isaias 13–14; 22; 24–30; 35
- Isaias 40–49
- Isaias 50–57
- Isaias 58–66
- Jeremias 1–3; 7; 16–18; 20
- Jeremias 31–33; 36–38; Mga Panaghoy 1; 3
- Ezekiel 1–3; 33–34; 36–37; 47
- Daniel 1–7
- Oseas; Joel
- Amos; Obadias; Jonas
- Mikas; Nahum; Habakuk; Sefanias
- Hagai 1–2; Zacarias 1–4; 7–14
- Malakias
Mga Lesson sa Paghahanda sa Buhay
- Doctrinal Mastery: Paghahanap ng mga Sagot sa Aking mga Tanong
- Mga Kasanayan sa Pag-aaral ng Banal na Kasulatan
- Para sa Lakas ng mga Kabataan: Paggawa ng mga Pagpili
- Pagkakaroon ng Pag-asa sa Sariling Kakayahan o Self-Reliance
- Pisikal at Emosyonal na Kalusugan
- Paghahanda para sa Edukasyon at Trabaho sa Hinaharap
- Pagtatagumpay sa Paaralan
- Paghahanda ng Missionary
- Paghahanda para sa Templo
- Mga Turo ng mga Lider ng Simbahan
Apendiks

2 Cronica 17–20: Paghahanap ng mga Alituntunin sa mga Banal na Kasulatan

“2 Cronica 17–20: Paghahanap ng mga Alituntunin sa mga Banal na Kasulatan,” Manwal ng Titser ng Seminary para sa Lumang Tipan (2026)

“2 Cronica 17–20: Paghahanap ng mga Alituntunin sa mga Banal na Kasulatan,” Manwal ng Titser ng Seminary para sa Lumang Tipan

2 Cronica 14–20; 26; 30: Lesson 91

2 Cronica 17–20

Paghahanap ng mga Alituntunin sa mga Banal na Kasulatan

Napapaisip ba kayo kung ano ang maaari ninyong gawin upang mapalapit kay Jesucristo? Ang hari sa Lumang Tipan na si Jehoshafat ay nagpakita ng magandang halimbawa ng kung paano ito gawin. Ang kanyang mga tao ay napalayo sa Diyos at sumamba sa mga diyus-diyusan. Pinili ni Jehoshafat na sundin si Jehova at tinulungan niya ang kanyang mga tao na gawin din ito. Ang lesson na ito ay makatutulong sa mga estudyante na matutuhang tumukoy ng mga alituntunin ng ebanghelyo mula sa mga banal na kasulatan.

Paghahanda ng estudyante: Maaari mong anyayahan ang mga estudyante na pag-isipan ang natututuhan nila sa kanilang personal na pag-aaral ng mga banal na kasulatan at pag-aaral nito na kasama ang pamilya. Maaari silang pumasok sa klase na handang magbahagi ng isang alituntuning nahanap nila at kung paano ito nakatutulong sa kanila.

Mga Posibleng Aktibidad sa Pag-aaral

Mga angkla ng kaligtasan

Ipakita ang sumusunod na larawan ng isang taong nagra-rock climbing.

Kung aakyat kayo sa isang matarik na dalisdis, anong kagamitan ang kakailanganin ninyo?
Bakit kailangan ang kagamitang ito?
Kung ihahambing natin ang ating buhay sa pag-akyat sa matarik na dalisdis, ano ang ibinigay sa inyo ng Panginoon upang matulungan kayong ligtas na magtagumpay?

Maaaring magbahagi ng iba’t ibang sagot ang mga estudyante. Kapag ginawa nila ito, pasalamatan sila sa kanilang mga sagot, at itanong kung bakit makatutulong ang mga bagay na ito. Ang sumusunod na sagot ang pagtutuunan sa lesson na ito.

Itinuro ni Elder Richard G. Scott (1928–2015) ng Korum ng Labindalawang Apostol:

Kayo at ako ay makatitiyak na makakamit natin ang mga matwid na layunin sa buhay sa pamamagitan ng pag-unawa at palaging pagsunod sa mga wastong alituntunin na nakaugat sa inihayag na katotohanan.

Ang mga alituntunin ay mga angkla ng kaligtasan. Ang mga ito ay tulad ng mga bakal na angkla na ginagamit ng isang mountaineer upang mapagtagumpayan ang pag-akyat sa tila imposibleng maakyat na matatarik na dalisdis. Tutulungan kayo ng mga ito na magkaroon ng tiwala sa mga bago at hindi pamilyar na sitwasyon. Magbibigay ang mga ito sa inyo ng proteksyon sa mga unos ng buhay. (“The Power of Correct Principles,” Ensign, Mayo 1993, 32)

Ang isa sa mga paraan kung paano tayo mapagmahal na binigyan ng Ama sa Langit ng mga totoong alituntunin ay sa pamamagitan ng mga banal na kasulatan. Sa pag-aaral natin ng mga banal na kasulatan, hinahangad nating matukoy ang mga alituntunin o pahayag na ito ng katotohanan na makatutulong sa ating buhay.

Maaaring makatulong na pagnilayin ang mga estudyante tungkol sa kanilang kakayahan ngayon na matukoy ang mga alituntunin sa mga banal na kasulatan. Narito ang isang paraan upang magawa ito.

Pag-isipan sandali ang mga sumusunod na tanong:

Gaano kalaki ang kumpiyansa ko sa kakayahan kong tumukoy ng mga alituntunin?
Gaano ko kahusay na nauunawaan kung paano ako matutulungan ng mga alituntunin sa aking buhay?

Habang pinag-aaralan ninyo ang lesson na ito tungkol sa buhay ni Jehoshafat, humingi ng tulong sa Espiritu Santo upang matukoy ang mga totoong alituntuning makatutulong sa inyo.

Mga alituntunin mula sa buhay ni Jehoshafat

Kasunod ng pagkamatay ng kanyang ama, si Jehoshafat ay naging hari ng Juda. Ang Israel at ang Juda ay kapwa lumayo sa Panginoong Jesucristo. Sumamba sila sa mga diyus-diyusan.

Basahin ang 2 Cronica 17:3–4; 19:4, at tingnan kung ano ang matututuhan ninyo tungkol kay Jehoshafat. (Tandaan: Ang mga Baal ay tumutukoy sa mga huwad na diyos.)

Ano ang hinahangaan ninyo kay Jehoshafat?

Nang naging hari si Jehoshafat, ang kanyang mga tao ay matagal nang tumalikod sa katotohanan. Maraming pagsisikap ang ginawa ni Jehoshafat sa buong kaharian niya upang matulungan ang kanyang mga tao na sundin si Jehova (Jesucristo). Sa panahong ito, ang mga kaaway ni Jehoshafat ay sumalakay upang makidigma sa kanyang mga tao. Ang nangyari sa mga sitwasyong ito ay naglalarawan ng iba’t ibang alituntunin.

Maaari mong ipaliwanag ang sumusunod na kasanayan sa pag-aaral upang matukoy ang mga alituntunin.

Ang isang paraan ng pagtukoy sa isang alituntunin ay hanapin kung paano nauugnay ang dalawang bagay. Halimbawa: dahil sa A, nangyayari ang B. O dahil ginagawa ng isang tao ang A, ipinapangako o ibinibigay ng Panginoon ang B.

Basahin ang mga sumusunod na talata bilang isang klase upang mabigyan ng pagkakataon ang mga estudyante na magpraktis na gamitin ang kasanayan.

Basahin ang 2 Cronica 17:6 at 19:3, at alamin ang mga alituntunin sa buhay ni Josaphat. (Tandaan: ang matataas na dako at mga poste ay mga lugar kung saan sinasamba ang mga huwad na diyos.)

Ang ilang alituntunin na maaaring matukoy ng mga estudyante ay:

Kapag itinuon natin ang ating buhay sa Diyos, mas madali nating maaalis ang kasamaan sa ating buhay (tingnan sa 2 Cronica 17:6).
Kapag inaalis natin ang kasamaan sa ating buhay, mas handa tayong hanapin ang Diyos (tingnan sa 2 Cronica 19:3).

Bakit nakatutulong ang mga alituntuning ito?

Matapos matukoy ang mga alituntunin mula sa mga naunang talata bilang klase, anyayahan ang mga estudyante na magsanay na tumukoy ng mga alituntunin sa maliliit na grupo o nang mag-isa. Ipagamit sa kanila ang mga sumusunod na talata.

Basahin ang 2 Cronica 20:1–9, 14–17, 20–22, at alamin ang mga karagdagang totoong alituntunin.

Ang ilang alituntunin na maaaring matukoy ng mga estudyante ay:

Kapag nag-aayuno at nananalangin tayo para sa kaligtasan, sasamahan tayo ng Panginoon sa ating mga hamon (tingnan sa 2 Cronica 20:1–4, 14–17).
Kapag hinahanap natin ang Panginoon sa Kanyang templo, diringgin at tutulungan Niya tayo (tingnan sa 2 Cronica 20:9).
Kapag naniniwala tayo sa Panginoon at sa kanyang mga propeta, uunlad tayo (tingnan sa 2 Cronica 20:20).
Kapag sinasamba natin ang Panginoon sa pamamagitan ng musika, pagpapalain Niya tayo (tingnan sa 2 Cronica 20:21–22).

Kung nahihirapan ang mga estudyante na tukuyin ang mga alituntunin, maaari mong isulat ang ilan o ang lahat ng alituntunin sa itaas ng pisara. Sabihin sa mga estudyante na tukuyin kung alin sa mga talatang pinag-aralan ang nagtuturo ng bawat alituntunin.

Pag-unawa sa mga alituntunin

Para sa sumusunod na aktibidad, maaaring gamitin ng mga estudyante ang alinman sa mga alituntunin sa itaas, o maaari nilang gamitin ang isang alituntunin na natutuhan nila kamakailan sa kanilang personal na pag-aaral o pag-aaral na kasama ang pamilya.

Pumili ng isang alituntunin na gusto mong mas matutuhan pa. Maghanda ng dalawang minutong mensahe tungkol sa katotohanang ito na kasama ang sumusunod:

Isang talata o mga talatang nabasa mo sa 2 Cronica tungkol sa alituntuning ito, at kung bakit mo ito pinili
Iba pang banal na kasulatan o salita ng mga propeta na tumutulong sa iyo na maunawaan ang alituntuning ito
Isang pagkakataon na ipinakita ng Tagapagligtas o ng ibang tao sa mga banal na kasulatan o kasaysayan ng Simbahan ang alituntuning ito
Mga paraan na nadarama mo na ang alituntuning ito mula sa Panginoon ay makatutulong o makapagpapanatili sa ating kaligtasan
Isang karanasan nang ikaw o ang isang kakilala mo ay kumilos ayon sa alituntuning ito, at ang anumang pagpapala mula sa Panginoon na dumating dahil dito

Maaaring ibahagi ng mga estudyante ang kanilang mga mensahe sa isang kapartner o sa maliit na grupo. O maaari mong anyayahan ang ilang handang estudyante na nag-aral ng magkakaibang alituntunin na ibahagi sa klase ang kanilang mga mensahe. Sa pagitan ng mensahe ng bawat estudyante, maaari mong anyayahan ang klase na magbahagi ng anumang komento o tanong nila tungkol sa alituntuning ibinahagi ng estudyante.

Tiyaking maglaan ng sapat na oras para makapaghanda at maibahagi ng mga estudyante ang kanilang dalawang minutong mensahe.
Mula sa natutuhan ninyo ngayon, bakit kapaki-pakinabang na sikaping mahanap ang mga alituntuning ibinigay sa atin ng Panginoon sa banal na kasulatan?
Paano ninyo magagamit ang natutuhan ninyo ngayon sa inyong pag-aaral na kasama ang pamilya at sa inyong personal na pag-aaral?

Karagdagang Resources

Ano ang alituntunin?

Itinuro ni Elder David A. Bednar ng Korum ng Labindalawang Apostol:

Sa madaling salita, ang isang alituntunin ng ebanghelyo ay isang gabay na nakabatay sa doktrina para sa matwid na paggamit ng kalayaang pumili. Ang mga alituntunin ay nagmumula sa mas malawak na mga katotohanan ng ebanghelyo at nagbibigay ng patnubay at mga pamantayan habang patuloy tayo sa paglakad sa landas ng tipan. (“Ang mga Alituntunin ng Aking Ebanghelyo,” Liahona, Mayo 2021, 123)

Ipinaliwanag ni Elder Richard G. Scott (1928–2015) ng Korum ng Labindalawang Apostol:

Ang mga alituntunin ay dalisay na katotohanan, na nilayong magamit sa iba’t ibang sitwasyon. Nagagawa ng isang totoong alituntunin na linawin ang mga desisyon kahit sa pinakamagulo at pinakamahirap na mga sitwasyon. Mahalagang sikaping buuin ang katotohanang nalalaman natin sa mga simpleng pahayag na ito ng alituntunin. (“Acquiring Spiritual Knowledge,” Ensign, Nob. 1993, 86)

Bakit kailangan ninyong tutukuyin at ipamuhay ang mga alituntunin?

Itinuro ni Elder David A. Bednar ng Korum ng Labindalawang Apostol:

Ang pag-alam, pag-unawa, at pamumuhay sa mga alituntunin ng ebanghelyo ay nagpapalakas sa ating pananampalataya sa Tagapagligtas, nagpapalalim ng ating katapatan sa Kanya, at nag-aanyaya ng maraming pagpapala at espirituwal na kaloob sa ating buhay. Ang mga alituntunin ng kabutihan ay tumutulong din sa atin na huwag magtuon sa pansariling kagustuhan at makasariling hangarin sa pamamagitan ng paglalaan ng mahalagang pananaw ng kawalang-hanggan habang pinagdaraanan natin ang iba’t ibang kalagayan, hamon, desisyon, at karanasan ng mortalidad. (“Ang mga Alituntunin ng Aking Ebanghelyo,” Liahona, Mayo 2021, 123–24)

Mga Karagdagang Aktibidad sa Pag-aaral

Alternatibong simula

Sabihin sa mga estudyante na ibahagi kung paano sila magpaplano at magtatagumpay sa paglalakbay sa karagatan. Ano ang kakailanganin nilang malaman?

Ibahagi ang sumusunod mula kay Elder Richard G. Scott (1928–2015) ng Korum ng Labindalawang Apostol:

Noon pa man ay nakikinabang na ang mga tao sa pagsunod sa mga totoong alituntunin. Tumawid sa malawak na dagat ang mga walang takot na taga-Polysnesia gamit ang mga sasakyang pandagat na madalas nagkakaroon ng sira upang marating ang mga destinasyon na libu-libong milya ang layo. Napagtagumpayan ang paglalakbay na iyon hindi dahil nagkataon kundi sa pagsunod sa mga totoong alituntunin ng celestial navigation [paglalakbay sa pamamagitan ng pag-oobserba sa mga posisyon ng araw, buwan, mga bituin at iba pa sa kalangitan]. Naghanda sila nang mabuti at hindi sila nagpadaig sa mga tukso na lumihis sa kanilang landas o ipagpaliban ang kanilang paglalakbay. Sa gayon ding paraan, kayo at ako ay makatitiyak na makakamit natin ang mga matwid na layunin sa buhay sa pamamagitan ng pag-unawa at palaging pagsunod sa mga wastong alituntunin na nakaugat sa inihayag na katotohanan. (“The Power of Correct Principles,” Ensign, Mayo 1993, 32)

Ang natitirang bahagi ng kuwento

Kung sa palagay mo ay makikinabang ang mga estudyante na malaman pa ang kuwento tungkol kay Jehoshafat at sa kanyang mga tao, maaari mong ibuod o basahin ang sumusunod na talata:

Si Jehoshafat at ang mga tao ng Juda ay nakipagdigma sa mga Ammonita, Moabita, at mga tao ng Bundok ng Seir, na tinatawag ding lupain ng Edom. Sa kanilang pakikidigma, kumakanta sila ng mga papuri sa Diyos. Pagkatapos ay pinagpala sila ng Diyos sa pamamagitan ng pagdudulot ng pagkalito sa kanilang mga kaaway, na naglaban-laban at nagpatayan. Kasunod nito ay kinuha ng mga tao ni Jehoshafat ang mahahalagang kayamanan mula sa kanilang mga napatay na kaaway.

Pagkatapos ay maaari mong ipabasa sa mga estudyante ang 2 Cronica 20:26–30, at alamin kung paano pa pinagpala ang Juda dahil sa kanilang katapatan.

Patuloy na katapatan sa pagdaan ng panahon

Maaari mong ipaliwanag na si Jehoshafat at ang kanyang mga tao ay mga halimbawa rin ng paggawa ng maraming matwid na gawain sa pagdaan ng panahon.

Itinuro ni Pangulong Dallin H. Oaks ang sumusunod, na binibigyang-diin ang kahalagahan ng patuloy nating pagsisikap sa pagdaan ng panahon:

Tinuruan tayo ng maraming maliliit at mga karaniwang bagay sa ebanghelyo ni Jesucristo. Kailangan nating mapaalalahanan na kapag pinagsama-sama sa pagdaan ng panahon ang tila maliliit na bagay na ito ay magsasakatuparan ng mga dakilang bagay. …

Wala ni isa sa mga kanais-nais na maliliit at mga karaniwang bagay na ito ang mag-aangat sa atin sa mas dakilang mga bagay kung hindi natin ito palagi at patuloy na gagawin. (“Maliliit at mga Karaniwang Bagay,” Liahona, Mayo 2018, 89, 91)

Paano ninyo nakita na ipinamuhay ni Jehoshafat ang alituntuning ito?
Sa palagay ninyo, bakit mahalaga ang patuloy na katapatan sa pagdaan ng panahon para maging mas katulad natin si Jesucristo?