Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

2 Samuela 11–12: He ʻIkai Ke Tau Lava ʻo Fūfuuʻi ʻEtau Ngaahi Angahalá mei he ʻEikí

“2 Samuela 11–12: He ʻIkai Ke Tau Lava ʻo Fūfuuʻi ʻEtau Ngaahi Angahalá mei he ʻEikí,” Fuakava Motuʻá – Tohi Lēsoni ʻa e Faiako Seminelí (2026)

“2 Samuela 11–12: He ʻIkai Ke Tau Lava ʻo Fūfuuʻi ʻEtau Ngaahi Angahalá mei he ʻEikí,” Fuakava Motuʻá – Tohi Lēsoni ʻa e Faiako Seminelí

2 Samuela 11–12; 1 Ngaahi Tuʻi 3; 6–9; 11: Lēsoni 77

2 Samuela 11–12

He ʻIkai Ke Tau Lava ʻo Fūfuuʻi ʻEtau Ngaahi Angahalá mei he ʻEikí

ʻI he kau ʻa Tēvita mo e ʻEikí, naʻá ne ikunaʻi ai ʻa Kolaiate, ikunaʻi ʻa e taú pea hoko ko e tuʻi ʻo ʻIsilelí. Ka neongo ia, ʻi he tulifua holi kovi ʻa Tēvita kia Patisepá, naʻá ne tafoki ai mei he Tamai Hēvaní mo Sīsū Kalaisi pea naʻá ne tō mei hono hakeakiʻí (vakai, Tokāteline mo e Ngaahi Fuakava 132:39). ʻE lava ke tokoni ʻa e lēsoni ko ʻení ke ʻiloʻi ʻe he kau akó he ʻikai ke nau lava ʻo fūfuuʻi ʻenau ngaahi angahalá mei he ʻEikí, ka te nau lava ʻo tafoki kiate Ia ke ikunaʻi ʻa e ʻahiʻahí.

Teuteu ʻa e tokotaha akó: Fakaafeʻi e kau akó ke nau hiki ha lisi ʻo ha niʻihi ʻo e ngaahi loi ʻoku fakaʻaongaʻi ʻe Sētane ke ʻahiʻahiʻi ʻaki kitautolu ke faiangahalá (hangē ko ʻení, ʻe lava ke toe vakaiʻi ʻe he kau akó ʻa e 2 Nīfai 28:6–9, 20–22). Fakaafeʻi leva kinautolu ke fakalaulauloto ki he founga ʻoku tokoniʻi ai kitautolu ʻe he ngaahi moʻoni ʻoku akoʻi ʻi he ongoongolelei ʻo Sīsū Kalaisí ke tau tafoki ki he ʻEikí ʻi he taimi ʻoku tau fehangahangai ai mo e ʻahiʻahí.

Ngaahi ʻEkitivitī Ako ʻOku Ala Fakahokó

Ngaahi fili ʻokú ne fakatafoki kitautolu ki he ʻEikí pe mamaʻo mei he ʻEikí

A illustration showing two stick figures. one waslking away from Christ, the other, walking towards Christ

Fakaʻaliʻali ha fakatātā ʻo e Fakamoʻuí ʻoku ʻi ai ha fanga foʻi ngahau ʻoku huʻu ki he ʻīmisí pea mamaʻo mei ai. Fakaafeʻi e kau akó ke tali e ongo fehuʻi ko ʻení. ʻE lava ke hiki ʻe he kau akó ʻenau ngaahi talí ʻi lalo ʻi he foʻi tao totonu ʻi he palakipoé.

Ko e hā ha ngaahi meʻa ʻoku fakaafeʻi kitautolu ʻe he ʻEikí ke tau fai ke tafoki ai kiate Iá?
Ko e hā ha ngaahi loi ʻe ala fakaʻaongaʻi ʻe Sētane ke fakalotoʻi kitautolu ke tau tafoki mei he ʻEikí?

ʻE lava ke vahevahe ʻe he kau akó ha ngaahi kupuʻi lea kehekehe hangē ko ʻení: “ʻOku ʻikai ko ha fuʻu meʻa lahi ia”; “Te ke lava ʻo fakatomala ʻamui ange”; mo e “ʻOku ʻikai ke u fakamamahiʻi ha taha.” Kapau he ʻikai tala atu ia ʻe he kau akó, tohiʻi ʻa e He ʻikai ʻilo ʻe ha taha ʻi he palakipoé. Ko e palakalafi ko ʻení ko ha fakaafe ia ki he kau akó ke fakakau ʻa e Laumālié ʻi heʻenau fakakaukau ki ha ngaahi meʻa ʻi he taimi ʻoku nau fai ai ha ngaahi fehalaākí.

Fakaʻaongaʻi ha kiʻi taimi ke fakaafeʻi ai ʻa e Laumālie Māʻoniʻoní ke tokoniʻi koe ke ke ʻiloʻi ʻa e ngaahi fakakaukau pe tōʻonga ʻi hoʻo moʻuí ʻokú ne fakatafoki koe ki he pe mei he Tamai Hēvaní mo Sīsū Kalaisí. ʻI hoʻo akó, kumi ha ngaahi ueʻi ʻa e Laumālié ʻe lava ʻo tokoni atu ke ke fili ke tafoki kiate Kinaua.

Ko e ngaahi fili ʻa Tēvita ke tafoki mei he ʻEikí

Fakaafeʻi e kau akó ke fakamanatuʻi e ngaahi talanoa kuo nau akó ʻa ia naʻá ne fakahaaʻi naʻe tataki mo fakahinohinoʻi ʻe he ʻEikí ʻa Tēvita. Te ke lava ʻo vahevahe ange ʻoku fakahaaʻi ʻe he talanoa te nau ako he ʻaho ní ʻa e meʻa naʻe hoko ʻi he taimi naʻe fai ai ʻe Tēvita ha ngaahi fili hokohoko naʻá ne fakatafoki ia mei he Tamai Hēvaní mo Sīsū Kalaisí.

ʻI hono lau ʻe ha tokotaha ako ʻa e veesi takitaha ʻo e potufolofola ko ʻení, ʻe lava ke puke hake ʻe ha niʻihi kehe ʻi he kalasí ʻa e foʻi lea Taʻofi pe ko ha fakaʻilonga ʻi he taimi ʻoku nau sio ai ʻoku fai ʻe Tēvita ha fili naʻá ne fakatafoki ia mei he ʻEikí. ʻI he taimi kotoa pē ʻoku nau tuʻu ai, ʻe lava ke aleaʻi ʻe he kau akó ʻa e fehuʻi ʻi laló.

Lau fakalelei ʻa e 2 Samuela 11:1–5, ʻo kumi e ngaahi fili naʻe fai ʻe Tēvita naʻá ne iku ai ki he feituʻu halá.

Ko e hā ha ngaahi fili naʻá ke maʻu?

Fakaafeʻi e kau akó ke faʻu ha lisi ʻi he palakipoé ʻo e ngaahi fili naʻe fai ʻe Tēvita ʻi he ngaahi veesi ko ʻení pea fakaʻilongaʻi kinautolu ʻi heʻenau folofolá. ʻOku kau ʻi he kōlomu toʻohema ʻo e saati ʻi he lēsoni ko ʻení ha ngaahi sīpinga ʻo e meʻa ʻe ala maʻu ʻe he kau akó.

ʻOku tau fehangahangai kotoa pē mo ha ngaahi ʻahiʻahi ʻoku fiemaʻu ke tau fakaʻehiʻehi mei ai. ʻI hono ʻiloʻi ʻení, naʻe fai ʻe he ʻEikí ha fakapapau mālohi ʻi he 1 Kolinitō 10:13. Lau ʻa e veesi ko ʻení ʻo kumi ʻa e tokoni kuo talaʻofa mai ʻe he ʻEikí kiate kitautolú.

Ko e hā e meʻa naʻá ke ʻiló?

Ko e ʻekitivitī ko ʻení ko ha founga ia ʻe taha ke tokoniʻi ai e kau akó ke nau ʻiloʻi naʻa mo e ngaahi ʻahiʻahi hangē ko ia naʻe fehangahangai mo Tēvitá, kuo ʻomi ʻe he ʻEikí ha ngaahi akonaki ʻe lava ʻo tokoni ke tau fakaʻehiʻehi ai mei he ʻahiʻahí pea hao mei he angahalá. Te ke lava ʻo fakaʻaliʻali e ngaahi fakahinohino ko ʻení ke muimui ki ai ʻa e kau akó ʻi ha fanga kiʻi kulupu iiki pe fakafoʻituitui. Makatuʻunga ʻi he meʻa ʻoku malava ʻe hoʻo kau akó, mahalo te ke fie fakaʻaliʻali ʻa e folofolá ʻi he kōlomu hono uá pea liliu ʻa e sitepu hono uá ke lau ʻe he kau akó ʻa e potufolofolá pe ngaahi potufolofolá kae ʻikai kumi kinautolu.

Fakakakato e ngaahi fakahinohino ko ʻení:

Fili ha taha pe lahi ange ʻo e ngaahi fili naʻe fakahoko ʻe Tēvitá naʻe tohoakiʻi ai ia ke mamaʻo mei he ʻEikí.
Kumi ha potufolofola ʻokú ne fakakau pe fakatātaaʻi ha taha ʻo e ngaahi akonaki ʻa e Fakamoʻuí ʻe lava ʻo tokoni ke tau fakaʻehiʻehi mei he ʻahiʻahí pea hao mei ha fili tatau.
Teuteu ke vahevahe ʻa e meʻa naʻá ke maʻú.

Ko e fili ʻa Tēvitá	Ngaahi Akonaki ʻa e Fakamoʻuí mo ʻEne kau palōfitá
Ko e fili ʻa Tēvitá 2 Samuela 11:1—Naʻe nofo ʻa Tēvita ʻi Selusalema ʻi he taimi naʻe kau atu ai e ngaahi tuʻí ki he malaʻe taú mo ʻenau kau taú.	Ngaahi Akonaki ʻa e Fakamoʻuí mo ʻEne kau palōfitá ʻAlamā 7:22; Tokāteline mo e Ngaahi Fuakava 42:42
Ko e fili ʻa Tēvitá 2 Samuela 11:2—Naʻe mamata ʻa Tēvita ki he kaukau ʻa Patisepá pea hokohoko atu ʻene siofi iá.	Ngaahi Akonaki ʻa e Fakamoʻuí mo ʻEne kau palōfitá Mōsaia 4:30; 3 Nīfai 12:28–29
Ko e fili ʻa Tēvitá 2 Samuela 11:3—Naʻe tulimui ʻa Tēvita ʻiate ia.	Ngaahi Akonaki ʻa e Fakamoʻuí mo ʻEne kau palōfitá Tokāteline mo e Ngaahi Fuakava 63:16
Ko e fili ʻa Tēvitá 2 Samuela 11:4—ʻI hono ʻiloʻi ʻe Tēvita kuo ʻosi mali ʻa Patisepá, naʻá ne fekau ke ʻomi ia ki hono palasí.	Ngaahi Akonaki ʻa e Fakamoʻuí mo ʻEne kau palōfitá Sēnesi 39:9
Ko e fili ʻa Tēvitá 2 Samuela 11:4—Naʻe maumauʻi ʻe Tēvita ʻa e fono ʻo e angamaʻá.	Ngaahi Akonaki ʻa e Fakamoʻuí mo ʻEne kau palōfitá Tokāteline mo e Ngaahi Fuakava 42:23–25

Ko e hā ʻa e meʻa naʻe mahuʻinga kiate koé?
Ko e hā e meʻa naʻá ke ako fekauʻaki mo e ʻEikí mei he ʻekitivitī ako ko ʻení?

Ke fakamatalaʻi fakanounou ʻa e 2 Samuela 11:6–13, te ke lava ʻo fakamatalaʻi ange ko e taimi naʻe ʻilo ai ʻe Tēvita ʻoku feitama ʻa Patisepá, naʻá ne fekau ke fakafoki mai hono husepāniti ko ʻUliá mei he taú. Naʻe fekauʻi ʻe Tēvita ʻa ʻUlia ke mohe mo Patisepa he pō ko iá ke hangē pē ko ha feitama ʻa Patisepa kiate iá.

Lau ʻa e 2 Samuela 11:14–17, 26–27, ʻo kumi e meʻa naʻe fai ʻe Tēvita ʻi he taimi naʻe ʻikai ke ne lava ai ʻo fakapuliki ʻene tono fefiné.

Ko e hā ha ngaahi fakakaukau pe ongo naʻá ke maʻu ʻi hoʻo lau e ngaahi veesi ko ʻení?

Vakai ki he lisi ʻo e ngaahi fili ʻa Tēvita ʻi he palakipoé pea tānaki atu Naʻe feinga ʻa Tēvita ke fūfuuʻi ʻene ngaahi angahalá.

Fakamatalaʻi ange ki he kau akó, ʻi he hili e pekia ʻa ʻUliá, naʻe fekauʻi mai ʻe he ʻEikí ʻEne palōfita ko Nētané ki he Tuʻi ko Tēvitá. ʻI hono lau ʻe he kau akó ʻa e talanoa fakatātā ko ʻení, ʻe lava ke nau fakatātaaʻi ʻa e talanoa ʻi he palakipoé pe ʻi heʻenau tohinoa akó.

Lau ʻa e 2 Samuela 12:1–10, ʻo kumi e meʻa naʻe lea ʻaki ʻe Nētane kia Tēvitá.

Ko e hā e meʻa ʻoku mahuʻinga kiate koe mei he talanoa fakatātā ko ʻení?
Ko e hā ha ngaahi moʻoni ʻe ala ako ʻe ha taha mei he talanoa ʻo Tēvitá?

Makehe mei he ngaahi moʻoni kehe ʻe ala ʻilo ʻe he kau akó, fakamamafaʻi ange he ʻikai ke tau lava ʻo fūfuuʻi ʻetau ngaahi angahalá mei he ʻOtuá.

Te ke lava ʻo fakaafeʻi e kau akó ke nau fakafekauʻaki pe fakafehokotaki ʻa e 2 Samuela 12:7–9 mo e 2 Nīfai 9:20 mo e ʻAlamā 39:8.
ʻOku hoko fēfē nai ʻa e ʻikai ke tau lava ʻo fūfuuʻi ʻetau ngaahi angahalá mei heʻetau Tamai Hēvani ʻofá ko ha tāpuakí?
ʻE tokoni fēfē ʻa e mahino kiate kitautolu e foʻi moʻoni ko ʻení ke tau tafoki ki he Tamai Hēvaní mo Sīsū Kalaisi pea fakatomalá?

Kapau ʻe fiemaʻu, te ke lava ʻo vakai ki he Tokāteline mo e Ngaahi Fuakava 132:39, ʻo vahevahe ange ko hono tamateʻi ʻo ʻUliá ko e feinga fakaʻosi ia ʻa Tēvita ke fūfuuʻi ʻene ngaahi angahalá. ʻI he fili ko ʻení, naʻe mole ai meia Tēvita hono hakeakiʻí. Fakapapauʻi ki he kau akó naʻe kei ʻofa pē ʻa e ʻEikí ʻia Tēvita, ka naʻe ʻi ai ha ngaahi tāpuaki naʻe ʻikai lava ke maʻu ʻe Tēvita ko ha nunuʻa ʻo ʻene ngaahi filí.

Te tau lava ʻo tafoki ki he ʻEikí

Vahevahe ʻa e meʻa kuó ke akó

Ke tokoni ke vahevahe ʻe he kau akó ʻenau mahino ki he ngaahi moʻoni naʻe akoʻí, fakakaukau ke fakaʻaongaʻi ʻa e fakatātā mei he kamataʻanga ʻo e kalasí. Te ke lava ʻo fakaafeʻi e kau akó ke tā ha meʻa faitatau ʻi heʻenau tohinoa akó. Hili iá pea fakaʻaliʻali e fakahinohino ko ʻení ke fakakakato ʻe he kau akó.

Fili ʻi hoʻo tohinoa akó ha taha ʻo e ngaahi fili naʻe fai ʻe Tēvitá pe ko ha ʻahiʻahi ʻe ala fehangahangai mo ha toʻu tupu he ʻahó ni. Fakakaukauloto naʻá ke fai ha faleʻi ki ha taha ʻoku fakakaukau ke fai ʻa e fili ko iá. Fili ha meʻa ʻe ua pe lahi ange mei he lisi ko ʻení ke vahevahe ʻa e meʻa kuó ke akó.

Ko ha fakamatala fakanounou ʻo e meʻa kuó ke ako he ʻahó ni fekauʻaki mo e ʻikai fūfuuʻi ʻo e ngaahi angahalá, ka ke tafoki ki he Tamai Hēvaní mo Sīsū Kalaisi.
Ko ha potufolofola ʻokú ne fakatātaaʻi ʻa e meʻa kuo akoʻi ʻe he Fakamoʻuí mo ʻEne kau palōfitá fekauʻaki mo hono ikunaʻi ʻo e ʻahiʻahi naʻá ke filí.
Ko ha aʻusia kuó ke maʻu pe ko ha taha ʻokú ke ʻilo kuó ne tokoniʻi koe ke ke tafoki ki he Tamai Hēvaní mo Sīsū Kalaisi ʻi hoʻo fehangahangai mo e ʻahiʻahí.
Ko ha fakamoʻoni nounou ki he mālohi ʻo e Fakamoʻuí ke tokoniʻi kitautolu ke tau ikunaʻi ʻa e ʻahiʻahí pea fakatomala ʻi he taimi ʻoku tau faiangahala aí.

Fakakaukau ke fakaʻosi e kalasí ʻaki hoʻo fakamoʻoni ʻoku ʻafioʻi mo ʻofa haohaoa ʻa e Tamai Hēvaní mo Sīsū Kalaisi ʻi he kau akó. Te ke lava ʻo fakapapauʻi ki he kau akó neongo pe ko e hā e ngaahi faingataʻa ʻoku tau fehangahangai mo iá, ʻoku ʻofa ʻa e Tamai Hēvaní mo Sīsū Kalaisi ʻiate kitautolu pea ʻokú Na vēkeveke ke tokoniʻi kitautolu ke tau fakatomala.

Ngaahi Maʻuʻanga Tokoni Kehé

ʻOku vakai fēfē ʻa e Tamai Hēvaní mo Sīsū Kalaisi ki he ngaahi fehalaaki kuó u faí?

Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

15:17

ʻOku tau tafoki mei he ʻOtuá he taimi ʻoku tau faiangahala aí. ʻI he taimi ʻoku tau fakatomala aí, ʻoku tau tafoki ai ki he ʻOtuá.

ʻOku tātātaha ke hoko e fakaafe ke fakatomalá, ko ha leʻo ʻo e tautea, ka ko ha tautapa ia ʻi he angaʻofa ke tafoki pea “foki” ki he ʻOtuá. Ko e taʻalo mai ia ʻa ha Tamai angaʻofa mo Hono ʻAlo Tofu Pē Tahá ke tau toe lelei ange ʻi he tuʻunga ʻoku tau ʻi aí, ke tau aʻu ki ha tuʻunga moʻui māʻolunga ange, ke tau liliu pea ongoʻi ʻa e fiefia he tauhi e ngaahi fekaú. (Fakatomala … Koeʻuhí Ke u Fakamoʻui ʻa Kimoutolu,” Liahona, Nōvema 2009, 40)

Naʻe akonaki ʻa ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

14:11

Siʻoku ngaahi kaungāmeʻa kei talavou ʻofeina, kapau naʻe ʻi heni ʻa e Fakamoʻuí ʻi he taimí ni, ko e hā nai ha meʻa te Ne folofola ʻaki kiate koe?

ʻOku ou tui te Ne kamata ʻaki hono fakahaaʻi ʻEne ʻofa moʻoni ʻiate koé. Mahalo pē te Ne folofola mai ʻaki ia ʻi ha ngaahi lea, ka ʻe tafe mālohi ʻaupito mai foki ia—mei Hono ʻaó pē—ʻo ʻikai ha toe veiveiua, ʻo aʻu ki he tō loloto ki ho lotó, ʻo fakafonu kakato ai ho laumālié!

Ka, koeʻuhí he ʻoku tau vaivai kotoa mo ʻikai ke haohaoa, mahalo ʻe hoko mai ha ngaahi hohaʻa ki ho fakakaukaú pe ʻokú ke taau nai mo ʻEne ʻofá. Mahalo te ke manatuʻi hoʻo ngaahi fehalaākí, ngaahi taimi naʻá ke tukulolo ai ki he ʻahiʻahí, ngaahi meʻa ʻokú ke fakaʻamu ne ʻikai te ke fakahokó—pe fakaʻamu naʻe toe lelei ange hoʻo fakahoko iá.

ʻE ʻafioʻi ia ʻe he Fakamoʻuí, pea ʻoku ou tui te Ne fakafiemālieʻi ʻaki koe ʻa e ngaahi lea kuó Ne fakahoko ʻi he ngaahi folofolá:

“ʻOua ʻe manavahē.”

“ʻOua ʻe tālaʻa.”

“Mou fiefia.”

“ʻOua naʻa mamahi homou lotó.”

ʻOku ʻikai ke u tui te Ne fakatonuhiaʻi hoʻo ngaahi fehalaākí. He ʻikai ke Ne fakasiʻia kinautolu. ʻIkai, te Ne kole atu ke ke fakatomala—ke siʻaki hoʻo ngaahi angahalá, ke liliu, ka Ne lava ʻo fakamolemoleʻi koe. Te Ne fakamanatu atu kiate koe, naʻá Ne toʻo kiate Ia ʻa e ngaahi angahala ko iá ʻi he taʻu ʻe 2,000 kuohilí koeʻuhí ka ke lava ʻo fakatomala. Ko e konga ia e palani ʻo e fiefiá ne meʻaʻofa mai ʻaki ʻe heʻetau Tamai Hēvani ʻofeiná maʻatautolú. (“Ko Sīsū Kalaisi ʻa e Mālohinga ʻo e Toʻu Tupú,” Liahona, Nōvema 2022, 9)

Naʻe pehē ʻe ʻEletā Lini G. Lōpini ʻo e Kau Palesitenisī ʻo e Kau Fitungofulú:

10:16

Ko e fakatomalá ko e meʻaʻofa maʻungofua taha ia ʻa e ʻOtuá ʻokú ne fakaʻatā mo ʻai ke tau lava ai ʻo hiki mei he tōnounou ki he tōnounou kae ʻikai mōlia ai e loto vēkeveké. ʻOku ʻikai ko Haʻane palani talifaki ʻa e fakatomalá telia tokua naʻa tau tōnounou. Ko e fakatomalá ʻa ʻEne palaní, he naʻá Ne ʻafioʻi te tau tōnounou. Ko e ongoongolelei ʻeni ʻo e fakatomala, pea hangē ko e meʻa ʻa Palesiteni Lāsolo M. Nalesoní, “ʻe hoko ia ko ha meʻa ke ako ʻi he moʻuí kotoa.” (“Kae Liunga Fitungofulu Lau ʻe Fitu,” Liahona, ʻEpeleli 2018, 22)

ʻE tokoniʻi fēfē au ʻe he Laumālié ke u fakaʻehiʻehi mei he angahalá?

Naʻe akonaki ʻa Palesiteni Poiti K. Peeka (1924–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

15:54

ʻE tataki mo maluʻi kimoutolu ʻe he meʻafoaki ʻo e Laumālie Māʻoniʻoní, pea aʻu pē ki haʻane fakatonutonu hoʻomou ngaahi angafaí, ʻo kapau te mou loto ki ai. Ko ha leʻo fakalaumālie ia ʻoku hū ki he ʻatamaí ʻo hangē ko ha ongo ʻoku hū ki homou lotó. … ʻOku ʻikai ha ʻamanaki te mou foua e moʻuí taʻe ʻi ai haʻamou fehalaaki, ka he ʻikai te mou fakahoko ha fehalaaki lahi taʻe tomuʻa fakatokanga atu e ngaahi ueʻi ʻa e Laumālié. ʻOku kaungatonu e palomesi ko ʻení ki he kāingalotu kotoa ʻo e Siasí. (“Faleʻi ki he Toʻu Tupú,” Liahona, Nōvema 2011, 17–18)

Ngaahi ʻEkitivitī Fakalahi ki he Akó

Toe hiki e talanoa ʻo Tēvitá

ʻE ala tokoni ke kiʻi mālōlō hili hono ʻiloʻi e ngaahi fili naʻe fai ʻe Tēvita ʻi he 2 Samuela 11:1–5 pea fakakaukau ki he ngaahi tāpuaki naʻe mei maʻu ʻe Tēvita kapau naʻá ne fakakaukau ke tafoki ki he Fakamoʻuí.

Vahevahe ʻa e fakamatala ko ʻeni ʻa ʻEletā ʻAleni D. Haini ʻo e Kau Fitungofulú:

Neongo ko e fakaʻehiʻehi mei he ngaahi angahalá ʻa e sīpinga ʻoku fiemaʻu ʻi he moʻuí, ʻoku ʻikai mahuʻinga ia pe ko e hā e angahala kuó ke faí pe loloto fēfē ʻa hoʻo tō ki he luó, ʻo fakatatau ki he ʻaonga ʻo e Fakalelei ʻa Sīsū Kalaisí. ʻOku ʻikai mahuʻinga ia pe ʻoku tau ongoʻi mā koeʻuhí ko ʻetau ngaahi angahalá, ʻo hangē ko e pehē ʻe he palōfita ko Nīfaí, ʻoku “faingofua ʻaupito ke tau moʻua ki ai”. …

ʻOku ou fakamoʻoni ʻe ʻikai tafoki ʻetau Fakamoʻuí meiate kitautolu kapau te tau loto-fakatōkilalo ke fekumi kiate Ia ka tau lava ʻo fakatomala; ʻe ʻikai loto e Fakamoʻuí ke tau hē; pea he ʻikai ke Ne pehē, “ʻOiauē, ʻikai ko koe ai pē”; pea ʻe ʻikai te Ne liʻaki ʻa kitautolu koeʻuhí ko e ʻikai mahino kiate kitautolu ʻa hono faingataʻa ʻo e fakaʻehiʻehi mei he angahalá. ʻOku mahino kotoa ia kiate Ia, kau ai ʻa e loto-mamahí, maá, mo e ʻita koeʻuhí ko e nunuʻa ʻo e angahalá.

ʻOku moʻoni ʻa e fakatomalá pea ʻoku ʻaonga ia. (“Ko e Manatu Kiate Ia ʻOku Tau Falalaʻiá,” Liahona, Nōvema 2015, 122, 123)

Ko e hā ha ngaahi fili kehekehe naʻe mei fai ʻe Tēvita kapau naʻá ne fakafanongo ki he Laumālié?
Ko e hā ha meʻa te ke ala talaange kia Tēvita ke tokoniʻi ia ke tafoki ki he Fakamoʻuí?

Hili iá, te ke lava ʻo fakaafeʻi e kau akó ke toe hiki e talanoa ʻo Tēvitá, ʻo fakakaukauloto ki he meʻa naʻe mei hoko kapau naʻá ne tafoki ki he Fakamoʻuí.

Tokoni ke ongoʻi ʻe he kau akó ʻa e mālohi ʻo e foki ki he ʻEikí

Kapau ʻe ʻaonga ki he kau akó ha fakamanatu ʻo e fakaafe ʻa e ʻEikí ke tau fakatomalá, te ke lava ʻo huluʻi ha taha ʻo e ongo vitiō ko ʻení:

Ko e ako ʻe ha talavou ʻa e mālohi ʻo e Fakalelei ʻa e Fakamoʻuí ke tokoniʻi ia ʻi he hala fononga ʻo e fakatomalá ʻi he “Let God Guide You: From Weakness to Strength,” taimi 2:51 ki he 5:28.

6:7

Ko e vahevahe ʻe ʻEletā Lenilani ʻa e talanoa ʻo hono ongoʻi ʻa e fiefia ʻoku maʻu ʻi he taimi ʻoku tau fakatomala aí, ʻi he “Repentance: A Joyful Choice” (4:36).

4:36