Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

1 Ngaahi Tuʻi 3: ʻOku Tāpuakiʻi Kitautolu ʻe he ʻEikí ke Fakahoko ʻEne Ngāué

“1 Ngaahi Tuʻi 3: ʻOku Tāpuakiʻi Kitautolu ʻe he ʻEikí ke Fakahoko ʻEne Ngāué,” Fuakava Motuʻá – Tohi Lēsoni ʻa e Faiako Seminelí (2026)

“1 Ngaahi Tuʻi 3: ʻOku Tāpuakiʻi Kitautolu ʻe he ʻEikí ke Fakahoko ʻEne Ngāué,” Fuakava Motuʻá – Tohi Lēsoni ʻa e Faiako Seminelí

2 Samuela 11–12; 1 Ngaahi Tuʻi 3; 6–9; 11: Lēsoni 78

1 Ngaahi Tuʻi 3

ʻOku Tāpuakiʻi Kitautolu ʻe he ʻEikí ke Fakahoko ʻEne Ngāué

Norway: Youth Social Media 2020: Savannah Andrewsen

Kuó ke fakakaukau nai ki he founga ʻoku tokoniʻi ai koe ʻe he ngaahi tāpuaki ʻokú ke maʻu mei he Tamai Hēvaní ke ke fakahoko ʻEne ngāué? Hili e pekia ʻa Tēvitá, naʻe fili ʻe he ʻEikí ʻa ʻene tamai ko Solomoné ke hoko ko e tuʻi foʻou ʻo ʻIsilelí. ʻI he fakaʻamu ʻa Solomone ke fakalāngilangiʻi ʻa e ʻEikí, naʻá ne fekumi ʻi he loto-fakatōkilalo ki ha ngaahi tāpuaki te ne fakatupulaki ʻene malava ke tauhi angatonu ki he ʻEikí mo e kakai ʻIsilelí. ʻE lava ke tokoni ʻa e lēsoni ko ʻení ke mahino ki he kau akó ʻe tāpuekina kitautolu ʻe he ʻEikí ʻaki ʻa e ivi malava ke fakahoko ʻEne ngāué.

Teuteu ʻa e tokotaha akó: Fakaafeʻi e kau akó ke nau hiki ha meʻa ʻoku nau feinga ke fai ke kau ʻi he ngāue ʻa e Tamai Hēvaní mo Sīsū Kalaisí. Fakaafeʻi e kau akó ke nau fehuʻi ʻi he faʻa lotu ki he Tamai Hēvaní pe ko e hā ha ngaahi tāpuaki ʻoku nau fiemaʻu ke tokoni kiate Ia ʻi hono fakahoko ʻEne ngāué

Ngaahi ʻEkitivitī Ako ʻOku Ala Fakahokó

Ko hono ʻiloʻi ʻi he loto-fakatōkilalo ʻetau ngaahi vaivaí

Ke kamata e kalasí, tā ha fakatātā hangē ko ʻení ʻi he palakipoé. ‘E lava ke tā fakatatau ‘e he kau akó ʻa e tā fakatātaá ‘i heʻenau tohinoa akó. Fakaafeʻi leva ʻa e kau akó ke aleaʻi ʻa e ongo fehuʻi ko ʻení:

Ko e hā ha ngaahi founga kuo fakaafeʻi ai kitautolu ʻe he Fakamoʻuí ke tau kau ki Heʻene ngāué?
Ko e hā ha ngaahi founga ʻe ala ongoʻi taʻefeʻunga ai ha toʻu tupu ke ngāue maʻá e ʻEikí?

Fakakaukau ke fakaafeʻi e kau akó ke nau lisi, ʻi he vahaʻa ʻo e ngaahi ʻatá, ha ngaahi founga ʻe ala ongoʻi taʻefeʻunga ai ha toʻu tupu. Mahalo ʻe ʻiloʻi ʻe he kau akó ha ngaahi hohaʻa, hangē ko e loto-tailiilí, maá, ongoʻi lōmekiná pe ʻikai feʻungá. Fakaafeʻi leva e kau akó ke fakalaulauloto ki he ongo fehuʻi ko ʻení.

Fakakaukau ki ha niʻihi ʻo e ngaahi fakaafe kuo ʻoatu ʻe he ʻEikí ke ke kau ai ʻi Heʻene ngāué.

Ko e hā ha ngaahi meʻa ʻokú ke hohaʻa ki ai fekauʻaki mo hoʻo malava ke fakahoko ʻEne ngaahi fakaafé?
ʻOkú ke ongoʻi loto-falala fēfē ki he ivi malava ʻo e ʻEikí ke tokoniʻi koe ke ke ikunaʻi ʻa e ngaahi meʻa ʻokú ke hohaʻa ki aí?

ʻI hoʻo ako he ʻaho ní, fakaafeʻi ʻa e Laumālie Māʻoniʻoní ke tokoni atu ke mahino kiate koe ʻa e founga ʻe tokoniʻi ai koe ʻe he ʻEikí ke fakahoko ʻEne ngāué.

Ko e hōifua ʻa e Tuʻi ko Solomoné ke pule ʻi he māʻoniʻoni

Vahevahe mo e kau akó ko e taimi naʻe pekia ai ʻa e Tuʻi ko Tēvitá, naʻe fili hono foha ko Solomoné ʻe he ʻEikí ke pule ko e tuʻi ʻo ʻIsileli (vakai, 1 Ngaahi Tuʻi 1:11–13). Naʻe ʻofa ʻa Solomone ki he ʻEikí peá ne fakaʻamu ke ne hoko ko ha tuʻi angatonu (vakai, 1 Ngaahi Tuʻi 3:3). Te ke lava ʻo liliu e fakahingoa ʻo e fakatātā faingofua ʻi he palakipoé kia Solomone pea liliu e tafaʻaki ʻe tahá ki he Hoko ko ha tuʻi angatonu.

Ko e hā nai ha founga ʻe ala fiemaʻu ke fakafōtunga ai ha tuʻi angatonu?
Naʻe mei ongoʻi fēfē nai ʻa Solomone ʻi heʻene fetongi ʻene tamaí ko e tuʻí?

Fakakaukau ke fakaʻaliʻali e ngaahi potufolofola mo e ongo fehuʻi ko ʻení. Te ke lava ʻo vahevahe e kau akó ki ha ngaahi hoa. ʻAi ke lau ʻe ha hoa ʻe taha ʻa e 1 Ngaahi Tuʻi 3:5–9 pea lau ʻe he hoa ʻe tahá ʻa e 1 Ngaahi Tuʻi 3:10–14, pea fevahevaheʻaki leva ʻenau ngaahi talí.

Lau ʻa e 1 Ngaahi Tuʻi 3:5–9, ʻo kumi e ngaahi tāpuaki naʻe kole ʻe Solomone ki he ʻEikí.

Ko e hā ha meʻa naʻá ke mālieʻia ai ʻi he kole ʻa Solomoné? Ko e hā e ngaahi ʻulungaanga faka-Kalaisi ʻoku fakahaaʻi ʻe Solomoné?

Lau ʻa e 1 Ngaahi Tuʻi 3:10–14, ʻo kumi ʻa e ngaahi tāpuaki naʻe talaʻofa ʻe he ʻEikí kia Solomoné.

ʻE fakatupulaki fēfē ʻe ha “loto-poto mo faʻa fakakaukau” (veesi 12) mo ha “koloa mo e ongoongo” (veesi 13) ʻa e malava ʻa Solomone ke tauhi māʻoniʻoni ki he ʻEikí?
Ko e hā e meʻa naʻe fiemaʻu ʻe he ʻEikí meia Solomone ke feʻunga ai mo e ngaahi tāpuaki ko ʻení? (veesi 14).

Fakamatalaʻi fakanounou e aʻusia ʻa Solomone mo e ʻEikí ko ha fakamatala ʻo e moʻoní.

ʻE lava ke ʻiloʻi ʻe he kau akó ha foʻi moʻoni hangē ko e: ʻI heʻetau ʻiloʻi ʻi he loto-fakatōkilalo hotau vaivaí pea fekumi ki he tokoni ʻa e ʻEikí ke tāpuekina e niʻihi kehé, te Ne fakatupulaki ʻetau malava ke fakahoko ʻEne ngāué. ʻE ala tokoni ke hiki ʻa e moʻoni ko ʻení ʻi he palakipoé pea fakaafeʻi e kau akó ke fakaʻilongaʻi e ngaahi kupuʻi lea ʻoku nau akoʻi e foʻi moʻoni ko ʻení.

Lau ʻa e fakamatala ko ʻeni meia Palesiteni Tōmasi S. Monisoni (1927–2018), ʻo kumi ʻa e talaʻofa naʻe fai kiate kinautolu kotoa pē ʻoku loto-fiemālie ke kau ʻi he ngāue ʻa e ʻEikí.

Mahalo pē ʻoku natula mā hamou niʻihi pe fakakaukau ʻoku ʻikai ke mou feʻunga ke tali [ki he ʻEikí]. Manatuʻi ʻoku ʻikai ko haʻata ngāue ʻeni ʻataua. Ko e ngāue ia ʻa e ʻEikí, pea ko e taimi ʻoku tau fai ai e ngāue ʻa e ʻEikí, ʻoku ʻi ai leva ʻetau totonu ki he tokoni ʻa e ʻEikí. Manatuʻi ʻe fakafeʻungaʻi ʻe he ʻEikí ho tuʻá ke ne mafeia e kavenga ʻe hilifaki ki aí. (“Ke Ako, ke Fakahoko, ke Aʻusia,” Liahona, Nōvema 2008, 62)

ʻE tokoni fēfē nai e ngaahi akonaki ʻa Palesiteni Monisoní ki ha taha naʻe hohaʻa fekauʻaki mo ʻene malava ke ngāue maʻá e ʻEikí?

Te ke lava ʻo tā ha hala fakakavakava ʻi he vahaʻa ʻo e ongo tafaʻaki takitaha ʻo e fakatātā ʻi he palakipoé pea fakahingoa ia Ko e Ttokoni ʻa e ʻEikí. Fakaafeʻi e kau akó ke nau tā ha meʻa tatau ʻi heʻenau tohinoa akó.

ʻOku fakatupulaki ʻe he ʻEikí ʻetau malava ke tauhi kiate Iá

Hili e ʻekitivitī akó, fakaafeʻi e kau akó ke nau tali e fakaafe ko ʻení.

Vakai ki he fakatātā ʻi hoʻo tohinoa akó mei he kamataʻanga ʻo e kalasí. Hiki ʻi he faʻa lotu ha vaivai ʻe taha pe ua ʻokú ke ongoʻi te ne lava ʻo taʻofi koe mei haʻo tauhi lelei ange ki he Tamai Hēvaní mo Sīsū Kalaisi. Fakaafeʻi ʻa e Laumālie Māʻoniʻoní ke tokoni atu ke ke ʻiloʻi ʻa e ngaahi tāpuaki te ke lava ʻo fekumi ki ai mei he ʻEikí ʻa ia ʻe lava ʻo tokoni atu ke ke ikunaʻi ʻa e ngaahi vaivai ko ʻení.

Fakahaaʻi ʻa e mahinó

ʻOange ha faingamālie maʻá e kau akó ke vahevahe ʻa e meʻa kuo nau akó. ʻE lava ke fakaafeʻi ʻe he meʻá ni ʻa e Laumālie Māʻoniʻoní ke Ne fakamoʻoniʻi ʻoku moʻoni ʻa e meʻa ʻoku nau vahevahé. Ko e ʻekitivitī ko ʻení ko ha founga ia ʻe taha ke tokoni ki he kau akó ke nau fakahoko ʻeni.

Fakakaukauloto ʻoku vahevahe ʻe ha kaungāmeʻa ʻene loto-hohaʻa fekauʻaki mo hono maʻu ha uiuiʻi foʻou ʻi ho uōtí pe koló. Mei he meʻa naʻá ke ako he ʻaho ní, ko e hā ha meʻa te ke vahevahe ʻe lava ʻo tokoni ki ho kaungāmeʻá?

Te ke lava ʻo fakaafeʻi ha niʻihi ʻe loto-fiemālie ke vahevahe mo e kalasí. Fakakaukau ke poupouʻi e kau akó ke nau ō mo ʻenau laʻipepa tufá ki ʻapi pea vahevahe e meʻa ne nau akó mo ha mēmipa ʻo e fāmilí pe kaungāmeʻa. Te ke lava ʻo fakamoʻoni ki he mālohi mo e finangalo lelei ʻa e ʻEikí ke tāpuakiʻi kitautolu ʻaki ʻa e meʻa ʻoku fiemaʻu ke tau ngāue faivelenga ai mo Ia ʻi he ngāue maʻongoʻongá ni.

Ngaahi Maʻuʻanga Tokoni Kehé

Ko e hā ha ngaahi tāpuaki te u lava ʻo fekumi ki ai mei he ʻEikí ke tokoniʻi au ke u kau ʻi Heʻene ngāué?

Naʻe fakamatalaʻi ‘e ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

14:11

ʻOku maʻu ha kakai mohu talēnti mei he ngaahi meʻafoaki faka-ʻOtuá.

ʻOku fakamahino ʻe he ongoongoleleí, ʻoku fakakoloa ʻaki ʻe he ʻOtuá ʻEne fānaú ha ngaahi meʻafoaki fakalaumālie lahi, ʻo nau hoko ai ko ha kakai kuo mohu foaki fakalaumālie. ʻOku foaki ki he kāingalotu tauhi fuakava ʻo e Siasí ha ngaahi meʻafoaki ʻo e Laumālié, ʻo kau ai ʻa e meʻafoaki ʻo ha fakamoʻoni kia Sīsū Kalaisi ko hotau Fakamoʻui, ko e meʻafoaki ʻo e Laumālie Māʻoniʻoní, ko e meʻafoaki ʻo e tui ke fakamoʻui pea moʻui, ko e meʻafoaki ʻo e ʻiloʻiló, ko e meʻafoaki ʻo hono maʻu ʻo e ngaahi maná, pea mo e meʻafoaki ʻo e potó mo e ʻiló. ʻOku fakaafeʻi kitautolu ʻe he ʻEikí ke tau fekumi fakamātoato ki he ngaahi meʻafoaki lelei tahá, ʻa ia ko e ngaahi meʻafoaki fakalaumālié. ʻOkú Ne foaki mai ʻa e ngaahi meʻafoaki fakalaumālié ke tāpuekina kitautolu pea fakaʻaongaʻi ia ke tāpuekina ai mo e niʻihi kehé. (“Ngaahi Ueʻi ʻa e Laumālié,” Liahona, Nōvema 2023, 42)

Fēfē kapau te u ongoʻi loto-foʻi fekauʻaki mo hoku ivi malavá?

Naʻe fakamanatu mai ʻe Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí, ʻo pehē:

17:56

ʻOku tau loto-foʻi he taimi ʻe niʻihi koeʻuhí he ʻoku ʻikai ke tau “lahi ange” ʻi ha meʻa—ʻo anga fakalaumālie ange, fakaʻapaʻapa, poto, moʻui lelei, koloaʻia, anga fakakaumeʻa, pe malava lahi ange ke fai ha meʻa. Ko hono moʻoní, ʻoku ʻikai hano kovi ia ʻo e loto ke fakalakalaká. Naʻe fakatupu kitautolu ʻe he ʻOtuá ke tau tupulaki mo fakalakalaka. Kae manatuʻi, ʻoku lava ke tokoni hotau ngaahi vaivaí ke tau loto-fakatōkilalo mo tafoki kia Kalaisi, ʻa ia te Ne lava ke “liliu ʻa e ngaahi meʻa vaivaí ke mālohí.” Ka ʻoku hanga ʻe Sētane ia he tafaʻaki ʻe tahá, ʻo fakaʻaongaʻi hotau ngaahi vaivaí ʻo aʻu ki ha tuʻunga ʻoku tau loto-foʻi ai ke toe fai ha feinga.

Kuó u ako ʻi he moʻuí ʻoku ʻikai fiemaʻu ia ke tau “mahulu ange” ʻi ha faʻahinga meʻa ka tau toki kamata ke aʻusia e tuʻunga naʻe fakataumuʻa mai ʻe he ʻOtuá maʻatautolú.

ʻE tali pē koe ʻe he ʻOtuá ʻi ho tuʻunga he taimi ní mo Ne kamata ke ngāue mo koe. Ko e meʻa pē ʻokú ke fiemaʻú ko ha loto fie ngāue, loto ke tui, pea ke ke falala ki he ʻEikí. (“ʻOku ʻAonga ʻAupito!,” Liahona, ʻOkatopa 2015, 22)

Ngaahi ʻEkitivitī Fakalahi ki he Akó

Kole ki he ʻEikí ha tokoni ke ikunaʻi e ngaahi faingataʻá

Mahalo ʻe ʻaonga ki he kau akó hono ako e ngaahi talanoa kehe ʻo e kakai naʻa nau kole ʻi he loto-fakatōkilalo ki he ʻEikí pea maʻu ʻEne tokoní ke fakahoko ʻEne ngāué.

ʻE lava ke maʻu ʻe he kau akó ha ngaahi talanoa ʻiate kinautolu pē, pe te ke ʻoange ha ngaahi sīpinga ke nau fili mei ai, hangē ko ʻení:

ʻĪnoke: Mōsese 6:27–39

Mōsese: ʻEkesōtosi 3:4–7, 10–14; 4:10–16

Kitione: Kau Fakamaau 6:11–16

ʻEma Sāmita: Kau Māʻoniʻoní, vol. 1, 104–105

Palesiteni Russell M. Nelson: “Sweet Power of Prayer,” Liahona, Mē 2003, 8

ʻI he ako ʻa e kau akó, ʻe lava ke nau aleaʻi ha niʻihi ʻo e ngaahi fehuʻi ko ʻení:

Ko e hā e meʻa naʻe kole ʻe he ʻEikí ki he tokotahá ni ke ne faí?
Ko e hā ha ngaahi vaivai naʻe fakatokangaʻi ʻe he tokotahá ni ʻiate iá?
Naʻá ne kole tokoni fēfē ki he ʻEikí?
Naʻe tāpuakiʻi fēfē ia ʻe he ʻEikí? Naʻá ne ngāue fēfē nai ʻi he tui ke feʻunga mo e ngaahi tāpuaki ʻa e ʻEikí?

ʻE lava ke teuteu ʻe he kau akó ha lipooti nounou fekauʻaki mo e tokotaha naʻa nau filí, ʻo vahevahe ʻa e talanoá mo e meʻa ne nau akó mo ha kiʻi kulupu tokosiʻi pe mo e kalasí. Te ke lava ʻo fakaafeʻi e kau akó ke nau tā ha fakatātā ʻo e tokotahá pe ko e talanoá ke fakaʻaliʻali ʻi heʻenau vahevahé.

1 Ngaahi Tuʻi 3:16–28. Ko e fakahaaʻi ʻe Solomone hono loto-mahinó

Ki ha sīpinga ʻo e founga naʻe fakaʻaongaʻi ai ʻe Solomone ʻa e ngaahi tāpuaki naʻe foaki ange ʻe he ʻEikí, te ke lava ʻo fakaafeʻi e kau akó ke lau ʻa e 1 Ngaahi Tuʻi 3:16–28. ʻI heʻenau ako e talanoa ʻo Solomone mo e ongo fefiné, te ke lava ʻo fai ha ngaahi fehuʻi alēlea hangē ko ʻení:

Naʻe fakahaaʻi fēfē ʻe Solomone ʻa e meʻafoaki ʻo e poto mo e loto-mahino ʻo e ʻEikí?
ʻE tokoniʻi fēfē koe ʻe he ngaahi meʻafoaki ʻo e mahinó mo e faʻa ʻiloʻiló ke ke kau ʻi he ngāue ʻa e ʻEikí?

Hili iá, ʻe lava ke vakai ʻa e kau akó ki he 1 Ngaahi Tuʻi 4:29–34 ke ʻiloʻi ʻa e founga naʻe tāpuekina ai ʻe he ngaahi meʻafoaki ʻa e ʻEikí kia Solomoné ʻa hono kakaí.