Սեմինարիա
Բ Թագավորների 11–12. Մենք չենք կարող թաքցնել մեր մեղքերը Տիրոջից

«Բ Թագավորների 11–12. Մենք չենք կարող թաքցնել մեր մեղքերը Տիրոջից», Հին Կտակարան․ Սեմինարիայի ուսուցչի ձեռնարկ (2026)

«Բ Թագավորների 11–12. Մենք չենք կարող թաքցնել մեր մեղքերը Տիրոջից», Հին Կտակարան․ Սեմինարիայի ուսուցչի ձեռնարկ

Բ Թագավորների 11–12, Գ Թագավորների 3, 6–9, 11․ Դաս 77

Բ Թագավորների 11–12

Մենք չենք կարող թաքցնել մեր մեղքերը Տիրոջից

Portrait of Christ

Տիրոջ կողքին լինելով՝ Դավիթը հաղթեց Գողիաթին, հաղթանակ տարավ ճակատամարտում և դարձավ Իսրայելի թագավոր։ Այնուամենայնիվ, Բերսաբեի նկատմամբ իր ցանկասիրական ձգտման պատճառով Դավիթը հեռացավ Երկնային Հորից և Հիսուս Քրիստոսից և զրկվեց իր վեհացումից (տես Վարդապետություն և Ուխտեր 132.39)։ Այս դասը կօգնի ուսանողներին հասկանալ, որ իրենք չեն կարող թաքցնել իրենց մեղքերը Տիրոջից, բայց կարող են դիմել Նրան՝ հաղթահարելու գայթակղությունը:

Ուսանողի նախապատրաստում. ուսանողներին առաջարկեք գրել որոշ ստեր, որոնք սատանան օգտագործում է՝ փորձելով գայթակղել մեզ մեղք գործել (օրինակ, ուսանողները կարող են վերհիշել 2 Նեփի 28․6–9, 20–22 հատվածները)։ Ապա առաջարկեք նրանց խորհել, թե ինչպես են Հիսուս Քրիստոսի ավետարանում ուսուցանված ճշմարտություններն օգնում մեզ դառնալ դեպի Տերը՝ գայթակղությանը բախվելիս:

Հնարավոր ուսումնական վարժություններ

Որոշումներ, որոնք մեզ դարձնում են դեպի Տերը կամ հեռացնում նրանից

A illustration showing two stick figures. one waslking away from Christ, the other, walking towards Christ

Ցուցադրեք Փրկչի նկարը՝ դեպի նկարն ուղղված և նկարից հեռացող սլաքներով: Ուսանողներին առաջարկեք պատասխանել հետևյալ հարցերին։ Ուսանողները կարող են գրատախտակին գրել իրենց պատասխանները համապատասխան սլաքների տակ:

  • Ի՞նչ է Տերը մեզ հրավիրում անել՝ դեպի Ինքը դառնալու համար:

  • Ի՞նչ ստեր կարող է օգտագործել սատանան՝ համոզելու մեզ հեռանալ Տիրոջից:

Ուսանողները կարող են կիսվել մի շարք արտահայտություններով, օրինակ՝ «Դա մեծ խնդիր չէ», «Դուք կարող եք ավելի ուշ ապաշխարել», և «Ես ոչ մեկին չեմ վիրավորում»: Եթե ​​ուսանողները չնշեն Ոչ ոք չի իմանա արտահայտությունը, գրեք այն գրատախտակին։ Հետևյալ պարբերությունն առաջարկում է ուսանողներին ներգրավել Հոգուն՝ սխալներ գործելու ժամանակ իրենց մտքերի շուրջ խորհելիս:

Մի քանի րոպե տրամադրեք, որպեսզի հրավիրեք Սուրբ Հոգուն՝ օգնելու ձեզ ճանաչել ձեր կյանքում եղած մտքերը կամ գործողությունները, որոնք ձեզ ուղորդում են դառնալ դեպի Երկնային Հայրը և Հիսուս Քրիստոսը կամ հեռանալ Նրանցից: Ուսումնասիրելիս փնտրեք Հոգու տպավորությունները, որոնք կարող են օգնել ձեզ ընտրել դառնալ դեպի Նրանք:

Դավթի որոշումները՝ հեռանալ Տիրոջից

Ուսանողներին առաջարկեք հիշել իրենց ուսումնասիրած պատմությունները, որոնք ցույց տվեցին, որ Տերը առաջնորդում և ուղղորդում էր Դավթին: Կարող եք կիսվել, որ պատմությունը, որը նրանք կուսումնասիրեն այսօր, ցույց է տալիս, թե ինչ տեղի ունեցավ, երբ Դավիթը մի քանի որոշում կայացրեց, որոնց պատճառով նա հեռացավ Երկնային Հորից և Հիսուս Քրիստոսից:

Երբ ուսանողներից մեկը կարդա հետևյալ հատվածի յուրաքանչյուր մասը, դասարանի մյուս անդամները կարող են արտասանել Կանգառ բառը կամ ցուցադրել ժեստ, երբ տեսնեն, որ Դավիթը որոշում է կայացնում, որի պատճառով նա կարող է հեռանալ Տիրոջից: Ամեն անգամ կանգ առնելիս ուսանողները կարող են քննարկել ստորև ներկայացված հարցը:

Ուշադիր կարդացեք Բ Թագավորների 11․1–5 հատվածները՝ փնտրելով Դավթի կայացրած այն որոշումները, որոնք նրան սխալ ուղղությամբ տարան:

  • Ի՞նչ որոշումներ նշեցիք:

Ուսանողներին առաջարկեք գրատախտակին գրել այս հատվածներում ներկայացված Դավթի կայացրած որոշումները և նշել դրանք իրենց սուրբ գրություններում: Այս դասին ներկայացված աղյուսակի ձախ սյունակը ներառում է օրինակներ, թե ինչ կարող են գտնել ուսանողները:

Մենք բոլորս բախվում ենք գայթակղությունների, որոնց պետք է դիմակայել: Իմանալով դա՝ Տերը զորեղ հավաստիացում է տվել Ա Կորնթացիներին 10․13 հատվածում։ Կարդացեք այդ հատվածը՝ փնտրելով այն օգնությունը, որը Տերը խոստացել է մեզ:

  • Ի՞նչ բացահայտեցիք:

Հետևյալ վարժությունն այն եղանակներից մեկն է, որով կարող եք օգնել ուսանողներին տեսնել, որ նույնիսկ այն գայթակղությունների դեպքում, որոնց բախվել էր Դավիթը, Տերը տվել է ուսմունքներ, որոնք կարող են օգնել մեզ խուսափել գայթակղությունից և մեղքից: Կարող եք ուսանողներին ցուցադրել հետևյալ հրահանգները՝ փոքր խմբերով կամ անհատապես կատարելու համար: Ըստ ձեր ուսանողների կարողությունների, կարող եք ցուցադրել սուրբ գրությունները երկրորդ սյունակում և հարմարեցնել երկրորդ քայլն այնպես, որ ուսանողները կարողանան կարդալ սուրբ գրությունը կամ սուրբ գրությունները՝ դրանք գտնելու փոխարեն:

Կատարեք հետևյալ հրահանգները.

  1. Ընտրեք Դավթի կայացրած որոշումներից մեկը կամ մի քանիսը, որոնց պատճառով նա հեռացավ Տիրոջից:

  2. Գտեք սուրբ գրություն, որը ներառում կամ պատկերում է Փրկչի այն ուսմունքը, որը կարող է օգնել մեզ խուսափել գայթակղությունից և նմանատիպ ընտրությունից:

  3. Պատրաստ եղեք կիսվելու ձեր գտածով։

Դավթի որոշումը

Փրկչի և Նրա մարգարեների ուսմունքները

Դավթի որոշումը

Բ Թագավորների 11․1․ Դավիթը մնաց Երուսաղեմում, երբ թագավորներն իրենց բանակով գնացին մարտի դաշտ։

Փրկչի և Նրա մարգարեների ուսմունքները

Ալմա 7.22, Վարդապետություն և Ուխտեր 42.42

Դավթի որոշումը

Բ Թագավորների 11․2․ Դավիթը տեսավ, թե ինչպես է Բերսաբեն լվացվում և շարունակեց նայել նրան։

Փրկչի և Նրա մարգարեների ուսմունքները

Մոսիա 4․30, 3 Նեփի 12․28–29

Դավթի որոշումը

Բ Թագավորների 11․3․ Դավիթը հետապնդեց նրան։

Փրկչի և Նրա մարգարեների ուսմունքները

Վարդապետություն և Ուխտեր 63․16

Դավթի որոշումը

Բ Թագավորների 11․4․ Իմանալով, որ Բերսաբեն ամուսնացած է՝ Դավիթը հրամայեց նրան բերել իր պալատ։

Փրկչի և Նրա մարգարեների ուսմունքները

Ծնունդ 39.9

Դավթի որոշումը

Բ Թագավորների 11․4․ Դավիթը խախտեց մաքրաբարոյության օրենքը:

Փրկչի և Նրա մարգարեների ուսմունքները

Վարդապետություն և Ուխտեր 42․23–25

  • Ի՞նչն էր առանձնահատուկ ձեզ համար:

  • Ի՞նչ սովորեցիք Տիրոջ մասին այս ուսումնական վարժությունից:

Ամփոփելով Բ Թագավորների 11․6–13 հատվածները՝ կարող եք բացատրել, որ Բերսաբեի հղիության մասին իմանալով, Դավիթը նրա ամուսնուն՝ Ուրիային, պատերազմից կանչեց տուն: Դավիթը հրամայեց Ուրիային գիշերն անցկացնել Բերսաբեի հետ, որպեսզի տպավորություն ստեղծվի, թե Ուրիան է պատասխանատու նրա հղիության համար։

Կարդացեք Բ Թագավորների 11․14–17, 26–27 հատվածները՝ փնտրելով, թե ինչ արեց Դավիթը, երբ իր շնությունը թաքցնելու նրա ծրագիրն անհաջողության մատնվեց:

  • Ի՞նչ մտքեր կամ զգացումներ ունեցաք այս հատվածները կարդալիս:

Դիտեք գրատախտակի վրա գրված Դավթի որոշումները և դրանց ավելացրեք, որ Դավիթը փորձել է թաքցնել իր մեղքերը։

Բացատրեք ուսանողներին, որ Ուրիայի մահից հետո Տերը ուղարկեց Իր Նաթան մարգարեին Դավիթ թագավորի մոտ: Հետևյալ առակը կարդալիս ուսանողները կարող են պատկերել այդ պատմությունը գրատախտակին կամ իրենց օրագրերում:

Կարդացեք Բ Թագավորների 12․1–10 հատվածները՝ փնտրելով, թե Նաթանն ինչ ասաց Դավթին:

  • Այդ առակի մեջ ի՞նչն է առավել տպավորիչ ձեզ համար։

  • Ի՞նչ ճշմարտություններ կարող է մարդը սովորել Դավթի պատմությունից։

    Ի հավելումն այլ ճշմարտությունների, որոնք ուսանողները կարող են բացահայտել, շեշտեք, որ մենք չենք կարող թաքցնել մեր մեղքերն Աստծուց:

    Կարող եք ուսանողներին առաջարկել խաչաձև հղում կատարել կամ կապել Բ Թագավորների 12․7–9 հատվածները 2 Նեփի 9․20 և Ալմա 39․8 հատվածների հետ։

  • Ինչո՞ւ է օրհնություն հանդիսանում այն փաստը, որ մենք չենք կարող թաքցնել մեր մեղքերը մեր սիրող Երկնային Հորից:

  • Այդ ճշմարտության ըմբռնումը ինչպե՞ս կարող է օգնել մեզ դառնալ դեպի Երկնային Հայրը և Հիսուս Քրիստոսը և ապաշխարել:

Անհրաժեշտության դեպքում կարող եք առաջարկել ուսանողներին ծանոթանալ Վարդապետություն և Ուխտեր 132.39 հատվածին՝ ասելով, որ Ուրիայի սպանությունը իր մեղքերը թաքցնելու Դավթի վերջին փորձն էր: Այս որոշումով Դավիթը զրկվեց իր վեհացումից։ Հավաստիացրեք ուսանողներին, որ Տերը դեռ սիրում էր Դավթին, բայց կային օրհնություններ, որոնք Դավիթը չէր կարող ստանալ իր կայացրած որոշումների պատճառով:

Մենք կարող ենք կրկին դառնալ դեպի Տերը

Ուսանողներին առաջարկեք հանգիստ խորհել այն մասին, թե ինչ սովորեցին և զգացին Դավթի պատմությունից: Օգնեք ուսանողներին հասկանալ, որ քանի որ Երկնային Հայրը և Հիսուս Քրիստոսը մեզ կատարելապես ճանաչում են, Նրանք հասկանում են, թե ինչ հանգամանքներում և ինչու ենք մենք կատարել մեր ընտրությունները և, թե ինչպես օգնել մեզ վերադառնալ Իրենց մոտ:

Ուսանողներից մի քանիսը կարող են հուսահատվել իրենց թույլ տված սխալներից: Որպեսզի օգնեք նրանց կենտրոնանալ Տիրոջ՝ ներելու ցանկության վրա, կարող եք ցուցադրել «Փրկիչն ուզում է ներել» (5:50) կամ «Ես մնում եմ զարմացած» (5:15) տեսանյութը։ Երկու տեսանյութն էլ հասանելի են ChurchofJesusChrist.org. կայքում։

5:50
5:16

Կիսվեք ձեր սովորածով

Որպեսզի օգնեք ուսանողներին կիսվել ուսուցանվող ճշմարտությունների վերաբերյալ իրենց հասկացողությամբ, կարող եք օգտագործել դասի սկզբում ներկայացված նկարը: Կարող եք առաջարկել ուսանողներին այդ նկարը նկարել իրենց օրագրերում: Ապա ցուցադրեք հետևյալ հրահանգները, որպեսզի ուսանողները կատարեն դրանք։

Ձեր օրագրում ընտրեք Դավթի կայացրած որոշումներից մեկը կամ որևէ գայթակղություն, որին կարող է բախվել դեռահասն այսօր: Պատկերացրեք, որ խորհուրդ եք տալիս մի մարդու, որը մտածում է այդ որոշումը կայացնելու մասին: Հետևյալ ցանկից ընտրեք առնվազն երկու տարբերակ՝ ձեր սովորածով կիսվելու համար:

  1. Ամփոփ ներկայացրեք մեղքերը չթաքցնելու և փոխարենը Երկնային Հորը և Հիսուս Քրիստոսին դիմելու մասին այսօրվա ձեր սովորածը:

  2. Սուրբգրային հատված, որը ցույց է տալիս, թե Փրկիչը և Նրա մարգարեներն ինչ են ուսուցանել ձեր ընտրած գայթակղությունը հաղթահարելու մասին:

  3. Ձեր կամ ձեզ ծանոթ մարդկանց փորձառությունը, որն օգնել է ձեզ դիմել Երկնային Հորը և Հիսուս Քրիստոսին՝ գայթակղության բախվելիս։

  4. Համառոտ վկայություն Փրկչի զորության մասին, որն օգնում է մեզ հաղթահարել գայթակղությունը և ապաշխարել, երբ մեղք ենք գործում:

Կարող եք ավարտել դասը ձեր վկայությամբ այն մասին, որ Երկնային Հայրը և Հիսուս Քրիստոսը կատարելապես գիտեն և սիրում են ուսանողներին: Հավաստիացրեք ուսանողներին, որ անկախ նրանից, թե ինչ դժվարությունների ենք հանդիպում, Երկնային Հայրը և Հիսուս Քրիստոսը սիրում են մեզ և ցանկանում են օգնել մեզ ապաշխարել: