Manwal ng Guro ng Seminary para sa Lumang Tipan

Mga Nilalaman
Pahina ng Pamagat
Pambungad sa Manwal ng Guro
Mga Lesson sa Lumang Tipan
- Halina’t Basahin ang Lumang Tipan
- Moises 1; Abraham 3
- Genesis 1–2; Moises 2–3; Abraham 4–5
- Genesis 3–4; Moises 4–5
- Genesis 5; Moises 6
- Moises 7
- Genesis 6–11; Moises 8
- Genesis 12–17; Abraham 1–2
- Genesis 18–23
- Genesis 24–33
- Genesis 37–41
- Genesis 42–50
- Exodo 1–6
- Pasko ng Pagkabuhay
- Exodo 7–13
- Exodo 14–18
- Exodo 19–20; 24; 31–34
- Exodo 35–40; Levitico 1; 4; 16; 19
- Mga Bilang 11–14; 20–24; 27
- Deuteronomio 6–8; 15; 18; 29–30; 34
- Josue 1–8; 23–24
- Mga Hukom 2–4; 6–8; 13–16
- Ruth; 1 Samuel 1–7
- 1 Samuel 8–10; 13; 15–16
- 1 Samuel 17–18; 24–26; 2 Samuel 5–7
- 2 Samuel 11–12; 1 Mga Hari 3; 6–9; 11
- 1 Mga Hari 12–13; 17–22
- 2 Mga Hari 2–7
- 2 Mga Hari 16–25
- 2 Cronica 14–20; 26; 30
- Ezra 1; 3–7; Nehemias 2; 4–6; 8
- Esther
- Job 1–3; 12–14; 19; 21–24; 38–40; 42
- Mga Awit 1–2; 8; 19–33; 40; 46
- Mga Awit 49–51; 61–66; 69–72; 77–78; 85–86
- Mga Awit 102–103; 110; 116–119; 127–128; 135–139; 146–150
- Mga Kawikaan 1–4; 15–16; 22; 31; Eclesiastes 1–3; 11–12
- Isaias 1–12
- Isaias 13–14; 22; 24–30; 35
- Isaias 40–49
- Isaias 50–57
- Isaias 58–66
- Jeremias 1–3; 7; 16–18; 20
- Jeremias 31–33; 36–38; Mga Panaghoy 1; 3
- Ezekiel 1–3; 33–34; 36–37; 47
- Daniel 1–7
- Oseas; Joel
- Amos; Obadias; Jonas
- Mikas; Nahum; Habakuk; Sefanias
- Hagai 1–2; Zacarias 1–4; 7–14
- Malakias
Mga Lesson sa Paghahanda sa Buhay
- Doctrinal Mastery: Paghahanap ng mga Sagot sa Aking mga Tanong
- Mga Kasanayan sa Pag-aaral ng Banal na Kasulatan
- Para sa Lakas ng mga Kabataan: Paggawa ng mga Pagpili
- Pagkakaroon ng Pag-asa sa Sariling Kakayahan o Self-Reliance
- Pisikal at Emosyonal na Kalusugan
- Paghahanda para sa Edukasyon at Trabaho sa Hinaharap
- Pagtatagumpay sa Paaralan
- Paghahanda ng Missionary
- Paghahanda para sa Templo
- Mga Turo ng mga Lider ng Simbahan
Apendiks

Josue 1: Hindi Tayo Iiwan o Pababayaan ng Panginoon

“Josue 1: Hindi Tayo Iiwan o Pababayaan ng Panginoon,” Manwal ng Titser ng Seminary para sa Lumang Tipan (2026)

“Josue 1: Hindi Tayo Iiwan o Pababayaan ng Panginoon,” Manwal ng Titser ng Seminary para sa Lumang Tipan

Josue 1–8; 23–24: Lesson 61

Josue 1

Hindi Tayo Iiwan o Pababayaan ng Panginoon

Bilang piniling propeta ng Panginoon, si Josue ay inorden ni Moises na akayin ang Israel patungo sa lupang pangako. Bagama’t tila nakakatakot ang gawaing ito, iniutos ng Tagapagligtas kay Josue na maging matatag at matapang, nang may pangakong hindi Niya iiwan o pababayaan ang Kanyang propeta (tingnan sa Josue 1:5–6). Ang lesson na ito ay makatutulong na dagdagan ang kumpiyansa ng mga estudyante na matutulungan sila ng Panginoon na maging matatag at matapang kapag nahaharap sila sa mga hamon.

Paghahanda ng estudyante: Sabihin sa mga estudyante na mag-isip ng mga sitwasyon kung saan maaaring kailanganin ng isang kabataan na magpakita ng tapang. Maaaring magtanong ang mga estudyante sa kapamilya o kaibigan tungkol sa mga karanasan nila na nangailangan ng tapang.

Mga Posibleng Aktibidad sa Pag-aaral

Tapang kapag nahaharap sa mga hamon

Upang simulan ang klase, maaari mong isulat sa pisara ang salitang Tapang. Habang sinasagot ng mga estudyante ang mga sumusunod na tanong, anyayahan sila na isulat ang kanilang sagot sa pisara.

Paano naging halimbawa ng tapang si Jesucristo?
Ano ang ilang sitwasyon na maaaring kaharapin ng isang tinedyer na mangangailangan ng tapang?

Sa inyong study journal, isulat ang ilan sa mga hamong kinakaharap ninyo ngayon o maaaring harapin sa hinaharap na nangangailangan ng tapang.

Ang self–assessment ay makatutulong sa mga estudyante na masuri ang kanilang kasalukuyang sitwasyon at makapagbibigay ng pagkakataon upang matugunan ng Espiritu Santo ang kanilang mga indibiduwal na pangangailangan sa buong lesson. Ang isang paraan upang magawa ito ay anyayahan ang mga estudyante na sagutin ang mga sumusunod na pahiwatig sa kanilang study journal.

Kapag may ipinagagawa sa akin na isang bagay na tila mahirap, kadalasan ay nakakaramdam ako ng .
Sa scale na 1 (mababa) hanggang 5 (mataas), gaano kalaki ang kumpiyansa kong tutulungan ako ng Ama sa Langit at ni Jesucristo na harapin ang aking mga hamon nang may tapang? Bakit?

Habang nag-aaral kayo ngayon, bigyang-pansin ang mga impresyon mula sa Espiritu Santo na makatutulong sa inyo na maging matapang at madagdagan ang kumpiyansa ninyo na kasama ninyo ang Panginoon.

Inorden si Josue na akayin ang mga anak ni Israel

Maaari kang magpakita ng larawan ni Moises na inoorden si Josue, tulad ng larawan mula sa simula ng lesson na ito (tingnan sa Deuteronomio 34:9).

Bagama’t kasama ni Moises ang mga anak ni Israel mula nang mailigtas sila mula sa Ehipto, tinawag ng Panginoon si Josue upang akayin sila patungo sa lupang pangako.

Ano ang ilan sa mga hamon na maaaring harapin ni Josue bilang propeta ng Panginoon at lider ng militar ng Israel?

Tulungan ang mga estudyante na maunawaan na mapupunta kay Josue ang responsibilidad sa espirituwal na pamumuno sa Israel. Si Josue din ang komandante ng militar at siya ang mamumuno sa Israel upang lupigin ang lupain ng mga Cananeo na hinog na sa kasamaan (tingnan sa 1 Nephi 17:31–40). Ipinangako ng Panginoon ang lupaing ito kay Abraham at sa kanyang mabubuting inapo (tingnan sa Josue 1:1–4).

Basahin ang Josue 1:5–9, at markahan ang mga paulit-ulit na pangako at tagubilin mula sa Panginoon na maaaring makatulong kay Josue na magtuon sa Kanya kapag nahaharap sa mga hamon.

Ano ang makabuluhan para sa inyo mula sa mga talatang ito?
Paano ninyo ibubuod ang isang katotohanan upang matulungan ang isang taong dumaranas ng mga hamon?

Habang ibinabahagi ng mga estudyante ang mga katotohanang natukoy nila, tulungan sila na malaman na kapag alam natin na kasama natin ang Panginoon, maaari tayong maging matatag at matapang. Maaari mong gamitin ang ilan o ang lahat ng sumusunod na tanong upang matulungan ang mga estudyante na maunawaan ang katotohanang ito. Maaaring makipagtulungan ang mga estudyante sa isang kapartner o sa maliit na grupo at pagkatapos ay ibahagi sa klase ang tinalakay nila.

Isipin ang mahihirap na sitwasyong nakalista sa pisara at sa inyong journal.

Ano ang maaaring mangyari kung matatag at matapang ang isang tao kapag nahaharap sa mga ganitong hamon?
Ano ang alam ninyo tungkol sa Panginoon na makatutulong sa isang tao na maging matatag at matapang? Paano ninyo ito nalaman?

Basahin ang Doktrina at mga Tipan 84:88, at alamin ang mga paraan kung paano natin nakakasama ang Panginoon.

Mga paraan upang anyayahan ang tulong ng Panginoon

Ang mga sumusunod na aktibidad ay makatutulong sa mga estudyante na malaman ang mga paraan kung paano anyayahan ang tulong ng Panginoon kapag kailangan nilang maging matatag at matapang. Sabihin sa mga estudyante na pumili ng isa sa mga aktibidad. Pagkatapos ng angkop na oras, maaaring ibahagi ng mga estudyante ang natutuhan nila sa mga taong pinili ang ibang aktibidad.

Maaari mong ibigay ang isa sa mga pahayag na makukuha sa Karagdagang Resources na mapag-aaralan ng mga estudyante sa bawat aktibidad.

Aktibidad A: Pagsunod sa batas ng Diyos

Basahin ang Josue 1:7 at ang isa o mahigit pa sa mga sumusunod na banal na kasulatan: Juan 15:10; 1 Nephi 3:7; Mosias 2:41; Doktrina at mga Tipan 93:20.

Anong koneksyon ang nakikita mo sa pagsunod sa mga kautusan ng Diyos at sa pagiging matatag at matapang?
Ano ang ilang paraan na mapagpapala tayo ng Ama sa Langit at ni Jesucristo dahil sa ating pagsunod?

Aktibidad B: Pagbubulay-bulay sa salita ng Diyos

Basahin ang Josue 1:8 at ang isa o mahigit pa sa mga sumusunod na banal na kasulatan: 2 Timoteo 3:15–17; 2 Nephi 31:20; 32:3.

Ano ang tumutulong sa iyo para mapagbulay-bulayan mo ang mga banal na kasulatan?
Sa palagay mo, paano makatutulong ang pagbubulay-bulay sa mga salita ng Diyos upang madama mong malapit ka sa Kanya?

Two people sitting at a table. Text boxes representing communication.

Pag-alaala na kasama natin ang Panginoon

Ano ang ilang paraan na nadama ninyo na kasama ninyo ang Panginoon sa panahong nahaharap kayo sa mga hamon o pagsubok?

Bigyan ng pagkakataon ang mga estudyante na pagnilayan ang natutuhan at nadama nila ngayon. Maaari nilang anyayahan ang Espiritu na tulungan sila na makita kung paano pinalakas ng kanilang mga pagsisikap ang kanilang kumpiyansa na makakasama nila ang Panginoon.

Sa inyong study journal, isipin ang mga hamong kinakaharap ninyo ngayon o maaari ninyong harapin sa hinaharap.

Ano ang natutuhan o nadama ninyo tungkol sa Ama sa Langit at kay Jesucristo na makatutulong sa inyo na maging matatag at matapang kapag nahaharap sa mga hamon?
Mula sa natutuhan o nadama ninyo tungkol sa Ama sa Langit at kay Jesucristo, ano ang gusto ninyong maalala sa susunod na mag-alinlangan kayo sa kakayahan ninyong harapin ang isang mahirap na sitwasyon?

Maaari mong ibahagi ang iyong patotoo na tutuparin ng Panginoon ang Kanyang pangako na makakasama natin Siya sa tuwina at hindi Niya tayo iiwan o pababayaan kailanman, tulad ng ipinangako Niya kay Josue.

Karagdagang Resources

Ano ang nauunawaan natin tungkol sa kamatayan ni Moises? (Deuteronomio 34:5–7; Josue 1:1–2)

Bagama’t tinutukoy sa ilang talata sa Lumang Tipan ang kamatayan ni Moises, alam natin mula sa banal na kasulatan ng pagpapanumbalik na hindi nakatikim ng kamatayan si Moises (tingnan sa Alma 45:19) kundi nagbagong-kalagayan. Ang mga taong nagbagong-kalagayan ay hindi nakararanas ng sakit o kamatayan sa kanilang natitirang panahon sa mundo. Pagkatapos, sila ay mabubuhay na mag-uli sa isang iglap sa pagiging walang kamatayan (tingnan sa 3 Nephi 28:8). Ang mga nilalang na nagbagong-kalagayan ay may mga ginagampanang partikular na tungkulin na nangangailangan ng pisikal na katawan. Si Moises ay nagpakita sa Bundok ng Pagbabagong-anyo bago ang Pagkabuhay na Mag-uli ni Jesus (Marcos 9:2–4). Kung espiritu lamang si Moises, hindi niya maibibigay ang mga susi ng priesthood sa mga mortal na sina Pedro, Santiago, at Juan sa bundok (tingnan sa “Moises” sa Gabay sa mga Banal na Kasulatan).

Paano naging halimbawa ni Cristo si Josue?

Bilang temporal at espirituwal na lider ng mga Israelita, si Josue ay isa ring halimbawa at kahalintulad ni Jesucristo. Ang pangalang Jesus ay “salitang Griyego ng pangalang Josue o Jesua, ‘ang Diyos ay tumutulong’ o ‘Tagapagligtas’” (Bible Dictionary, “Jesus”). Si Josue/Jesua/Jesus ang siyang aakay sa Israel patungo sa lupang pangako.

Paano madaragdagan ang ating kumpiyansa sa Panginoon sa pamamagitan ng pagsunod?

Ipinaliwanag ni Brother M. Joseph Brough ng Young Men General Presidency:

Sa aming pamilya, may kasabihan kami na naging mahalagang bahagi ng aming mission. Matagal-tagal nang itinuturo ni Pangulong Russell M. Nelson ang konseptong ito. Ganito ang pagkakasabi niya: “Ang pagsunod ay nagdudulot ng tagumpay; ang pagsunod nang may kahustuhan ay nagdudulot ng mga himala.” (R. Scott Lloyd, “Elder Nelson Delivers Spiritual Thanksgiving Feast to MTCs,” newsroom.ChurchofJesusChrist.org)

Hindi ko ganap na nauunawaan kung ano ang ibig sabihin ng pagsunod nang may kahustuhan, pero ito ang pagkakaunawa ko. Hindi ibig sabihin nito na tayo ay perpektong sumusunod ngayon mismo sa lahat ng bagay, bagamat maaari tayong maging perpekto sa pagsunod sa marami sa mga kautusan ng Panginoon. Kung kaya, ang pagsisisi ay tiyak na mahalagang bahagi ng pagsunod nang may kahustuhan. Ang pagsunod nang may kahustuhan ay nangangailangan ng katapatan sa lahat ng mga babala at mga pahiwatig at mga kautusan na ibinibigay sa atin ng Ama sa Langit. (“Isang Marahan at Banayad na Tinig sa Gitna ng Malalaking Desisyon,” Liahona, Dis. 2018, 44)

Paano madaragdagan ng pag-aaral ng banal na kasulatan ang ating kumpiyansa sa Panginoon?

Sinabi ni Pangulong Russell M. Nelson:

Kapag iniisip ko ang Aklat ni Mormon, naiisip ko ang salitang kapangyarihan. Ang mga katotohanan ng Aklat ni Mormon ay may kapangyarihan na pagalingin, panatagin, ipanumbalik, tulungan, palakasin, aluin, at pasayahin ang ating kaluluwa. …

Ipinangangako ko na sa mapanalanging pag-aaral ng Aklat ni Mormon araw-araw, makagagawa kayo ng mas maiinam na desisyon—sa araw-araw. Ipinangangako ko na habang pinagninilayan ninyo ang inyong pinag-aaralan, ang mga durungawan ng langit ay mabubuksan, at tatanggap kayo ng mga sagot sa inyong sariling mga tanong at patnubay sa inyong buhay. Ipinangangako ko na sa araw-araw ninyong dibdibang pag-aaral ng Aklat ni Mormon, mapoprotektahan kayo laban sa mga kasamaan ngayon. (“Ang Aklat ni Mormon: Ano Kaya ang Buhay Ninyo Kung Wala Ito?” Liahona, Nob. 2017, 62–63)

Mga Karagdagang Aktibidad sa Pag-aaral

Magsanay na “pagbulay-bulayan” ang mga salita ni Cristo

Kung makikinabang ang mga estudyante sa pagkakataong magsanay na pagbulay-bulayan o pagnilayan ang isang banal na kasulatan, maaari mong ibahagi ang sumusunod na pahayag ni Elder D. Todd Christofferson ng Korum ng Labindalawang Apostol:

11:21

Kapag sinabi kong “pag-aralan,” higit pa ito sa pagbabasa. Kung minsa’y magandang basahin ang isang aklat sa banal na kasulatan sa takdang haba ng panahon para maunawaan ang buong mensahe nito, ngunit sa pagbabalik-loob, mas mahalaga dapat ang oras ninyo sa pagbabasa ng mga banal na kasulatan kaysa sa dami ng nabasa ninyo sa oras na iyon. Kung minsa’y nawawari kong nagbabasa kayo ng ilang talata, tumitigil sandali para pag-isipan ito, at muling binabasa ang talata, at habang pinag-iisipan ang kahulugan nito, ay nagdarasal kayong maunawaan ito, nag-iisip ng mga tanong, naghihintay ng espirituwal na mga paramdam, at isinusulat ang damdamin at kabatirang dumarating para mas matandaan ito at matuto pa kayo. Sa ganitong pag-aaral, maaaring ilang kabanata o talata lang ang mabasa ninyo sa kalahating oras, pero bibigyan ninyo ng puwang sa inyong puso ang salita ng Diyos, at kakausapin Niya kayo. (“Kapag Ikaw ay Nagbalik-loob,” Liahona, Mayo 2004, 11)

Sabihin sa mga estudyante na pumili ng scripture passage na pagsasanayang pagbulay-bulayan. Ihanda ang silid, at alisin ang mga nakagagambala hangga’t maaari.

Maaaring gumawa ang mga estudyante ng listahan ng mga bagay na magagawa nila batay sa pahayag ni Elder Christofferson. Kung kailangan nila ng karagdagang tulong, maaari mong ibigay ang ilan sa mga sumusunod:

Basahin at muling basahin ang passage na pinili ninyo nang may hangaring matuto mula rito sa halip na matapos lamang ito.
Pagnilayan ang binabasa ninyo, ang kahulugan ng mga salita, at kung paano ito naaangkop sa inyo. Pag-isipan itong mabuti nang paulit-ulit.
Sikaping aktibong paganahin ang inyong isipan, saliksikin at isipin ang tungkol sa banal na kasulatan, mga salita at parirala, at kung paano kayo matutulungan ng mensahe ng talata.
Isulat ang anumang maiisip o madarama habang nagsasanay kayo.

Matapos ang ilang oras, taos-pusong pasalamatan ang mga estudyante sa kanilang kahandaang makibahagi sa aktibidad. Maaari mong ipaalala sa kanila na ang Panginoon ang bahala kung paano at kailan Niya tayo pagpapalain para sa mga pagsisikap nating pagbulay-bulayan ang Kanyang salita. Sabihin sa kanila na patuloy na maghanap ng mga pagkakataong maisagawa ang kasanayang ito bilang bahagi ng kanilang regular na pag-aaral ng ebanghelyo.

Mga halimbawa ng tapang at kumpiyansa sa Panginoon

Kung makikinabang ang mga estudyante mula sa isang halimbawa ng pagpapalakas ng Panginoon sa ating tapang at tiwala, maaari mong ipanood ang video na “Dare to Stand Alone” (4:20). Ipinapakita sa video na ito ang kuwento ni Pangulong Monson, na nagkaroon ng kumpiyansa sa Panginoon nang madama niya na mag-isa siyang naninindigan.

4:20

Maaaring gamitin ang video na “Your Great Adventure: Overcoming Life’s Obstacles” mula sa time code na 5:48 hanggang 8:19 upang ilarawan kung paano dinagdagan ng Panginoon ang tapang at kumpiyansa ng isang binata na harapin ang mga hamon ng buhay.

9:44