Testamenta Taloha: Boky torolalana ho an’ny mpampianatra seminera

Votoatiny
Pejin-dohateny
Teny fanolorana ny Boky torolalana ho an’ny mpampianatra
Lesona momba ny Testamenta Taloha
- Tonga soa ato amin’ny Testamenta Taloha
- Mosesy 1; Abrahama 3
- Genesisy 1–2; Mosesy 2–3; Abrahama 4–5
- Genesisy 3–4; Mosesy 4–5
- Genesisy 5; Mosesy 6
- Mosesy 7
- Genesisy 6–11; Mosesy 8
- Genesisy 12–17; Abrahama 1–2
- Genesisy 18–23
- Genesisy 24–33
- Genesisy 37–41
- Genesisy 42–50
- Eksodosy 1–6
- Paska
- Eksodosy 7–13
- Eksodosy 14–18
- Eksodosy 19–20; 24; 31–34
- Eksodosy 35–40; Levitikosy 1; 4; 16; 19
- Nomery 11–14; 20–24; 27
- Deoteronomia 6–8; 15; 18; 29–30; 34
- Josoa 1–8; 23–24
- Mpitsara 2–4; 6–8; 13–16
- Rota; 1 Samoela 1–7
- 1 Samoela 8–10; 13; 15–16
- 1 Samoela 17–18; 24–26; 2 Samoela 5–7
- 2 Samoela 11–12; 1 Mpanjaka 3; 6–9; 11
- 1 Mpanjaka 12–13; 17–22
- 2 Mpanjaka 2–7
- 2 Mpanjaka 16–25
- 2 Tantara 14–20, 26, 30
- Ezra 1; 3–7; Nehemia 2, 4–6, 8
- Estera
- Joba 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Ohabolana 1–4; 15–16; 22; 31; Mpitoriteny 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Jeremia 1–3; 7; 16–18; 20
- Jeremia 31–33; 36–38; Fitomaniana 1; 3
- Ezekiela 1–3; 33–34; 36–37; 47
- Daniela 1–7
- Hosea; Joela
- Amosa; Obadia; Jona
- Mika; Nahoma; Habakoka; Zefania
- Hagay 1–2; Zakaria 1–4; 10–14
- Malakia
Lesona Fiomanana hiatrika ny fiainana
- Fifehezana fotopampianarana: Mitady ny valin’ireo fanontaniako
- Fahaiza-manao momba ny fandalinana soratra masina
- Ho zatovo mahery!: Fanaovana safidy
- Manorina fizakan-tena
- Fahasalamana ara-batana sy ara-pihetseham-po
- Fiomanana amin’ny fianarana sy asa hatao any aoriana
- Mahomby any an-tsekoly
- Fiomanana ho misiônera
- Fiomanana ho any amin’ny tempoly
- Fampianaran’ireo mpitarika ao amin’ny Fiangonana
Tovana

Deoteronomia 6:1–6: Mitia an’ Andriamanitra amin’ny fonao rehetra

“Deoteronomia 6:1–6: Mitia an’ Andriamanitra amin’ny fonao rehetra”, Testamenta Taloha: Boky torolalana ho an’ny mpampianatra seminera (2026)

“Deoteronomia 6:1–6: Mitia an’ Andriamanitra amin’ny fonao rehetra”, Testamenta Taloha: Boky torolalana ho an’ny mpampianatra seminera

Deoteronomia 6–8; 15; 18; 29–30; 34: Lesona 58

Deoteronomia 6:1–6

Mitia an’ Andriamanitra amin’ny fonao rehetra

Rehefa avy nitarika ny Isiraelita nandritra ny 40 taona tany an-tany foana i Mosesy dia nizara ny toroheviny farany tamin’izy ireo izy talohan’ny nandidian’ny Tompo an’i Josoa hitarika azy ireo ho any amin’ny tany nampanantenaina. Ampahany iray manan-danja tamin’ny hafatr’i Mosesy ny hoe “tiava an’i Jehovah Andriamanitrao amin’ny fonao rehetra” (Deoteronomia 6:5). Ity lesona ity dia afaka manampy ny mpianatra hahatakatra ny fomba ahafahan’izy ireo maneho ny fitiavany an’ Andriamanitra.

Fanomanana ny mpianatra: Asao ny mpianatra hangataka ray aman-dreny, na mpiantoka, na mpitarika ao amin’ny Fiangonana mba hizara ny sasantsasany amin’ireo fomba tsy am-bava tian’izy ireo indrindra mba hanehoana fa tia olona izy ireo. Mety hanampy ny milaza amin’ny mpianatra fa hifantoka amin’ny fomba ahafahantsika maneho ny fitiavantsika an’ Andriamanitra ny lesona.

Sahanasa fianarana azo atao

Maneho fitiavana

Hevero ny hampiasa ity sahanasa manaraka ity mba hanampiana ny mpianatra hifampidinika fomba isan-karazany ahafahan’izy ireo maneho fitiavana.

Soraty ao anatin’ny diary fandalinanao ny anaran’ny olona iray ao amin’ny fianakavianao izay tianao.
Tanisao ao anatin’ny 60 segondra eo ambanin’ny anarany ireo fomba miavaka maro mba hanehoana ny fitiavanao azy araka izay azonao atao.

Mangataha mpianatra terem-panahy vitsivitsy hizara ny anarana nosoratan’izy ireo sy ny hevitra sasany nananan’izy ireo tamin’ny fanehoana fitiavana.

Rehefa vitan’ny mpianatra ny mizara izany dia asao izy ireo hamaky ny Deoteronomia 6:5 ary hizara ny zavatra nianarany. (Mety hizara fahamarinana toy izao amin’ny teniny manokana ny mpianatra: Mandidy antsika hitia Azy amin’ny fontsika sy ny fanahintsika rehetra ary ny herintsika rehetra Andriamanitra.) Azonao atao ny manoro hevitra ny mpianatra mba hampifandrohy na hampifandray io andininy io amin’ilay andalan-tsoratra masina fifehezana fotopampianarana Matio 22:36–39, izay nanamafisan’i Jesoa Kristy ny maha-zava-dehibe izany.

Hevero ny hanoratra ny hoe Ray any An-danitra sy i Jesoa Kristy eo afovoan’ny solaitrabe. Omeo roa minitra ny mpianatra mba ho eny amin’ny solaitrabe ary hitanisa fomba samihafa ahafahantsika maneho ny fitiavantsika Azy Ireo.

Avy eo dia amporisiho ny mpianatra hizara hoe inona amin’ireo hevitr’ireo mpiara-mianatra aminy no manan-danja amin’izy ireo sy ny anton’izany.

Saintsaino ireto fanontaniana manaraka ireto.

Inona ireo zavatra tsapanao marina momba ny Ray any An-danitra sy i Jesoa Kristy? Nahoana no mahatsapa izany ianao?
Inona avy ireo fomba sasantsasany hanehoanao Azy Ireo ny zavatra tsapanao?

Rehefa mandalina ny bokin’ny Deoteronomia ianao amin’ity herinandro ity dia mifantoha amin’ireo fahatsapana avy amin’ny Fanahy Masina. Ny fitaomany dia afaka mampiorom-paka ny fitiavanao ny Ray any An-danitra sy i Jesoa Kristy, ary mampianatra anao ireo fomba ahafahanao maneho izany fitiavana izany amin’Izy Ireo.

Tia antsika amin’ny fony rehetra Andriamanitra.

Mba hanampiana ny mpianatra hianatra avy amin’ny ohatr’ Andriamanitra dia azo asaina izy ireo mba hampifandrohy na hampifandray ny Deoteronomia 6:5 amin’ny 1 Jaona 4:19. Rehefa avy mamaky ny andininy 19 ianao dia azonao atao ny mangataka ny mpianatra hizara ireo fomba nanehoan’ Andriamanitra ny fitiavany ny olon-drehetra na ho azy ireo manokana.

Ity teny nambara manaraka ity dia afaka manampy ny mpianatra hisaintsaina ny ohatra tonga lafatra nasehon’ Andriamanitra amin’ny fitiavana antsika amin’ny fony manontolo. Hevero ny hampiseho izany sy hanasa mpianatra iray hamaky mafy izany. Tohizo avy eo ny fampisehoana izany rehefa mifanakalo hevitra momba ny valin-teniny amin’ireo fanontaniana etsy ambany ny mpianatra.

Ny Filoha Jeffrey R. Holland ao amin’ny Kôlejin’ny Apôstôly Roambinifolo dia nanampy antsika hahatakatra kokoa ny tena toetran’ Andriamanitra.

19:25

Ny didy lehibe voalohany mifandray amin’ny mandrakizay dia ny mitia an’ Andriamanitra amin’ny fontsika rehetra sy ny herintsika rehetra sy ny saintsika rehetra ary ny tanjatsika rehetra—izany no ilay didy lehibe voalohany. Saingy ny fahamarinana lehibe voalohany mifandray amin’ny mandrakizay dia ny hoe, tia antsikaamin’ny fony rehetra sy ny heriny rehetra sy ny sainy rehetra ary ny tanjany rehetra Andriamanitra. Io fitiavana io no vato iorenan’ny mandrakizay ary tokony ho vato iorenan’ny fiainantsika isan’andro. Mazava ho azy fa amin’ny alalan’io toky miredareda ao am-pontsika io ihany no ahafahantsika manana fahatokiana hanohy ny fiezahana hivoatra, hanohy hikatsaka ny famelana ny fahotantsika ary hanohy hanolotra izany hatsaran-toetra izany amin’ny mpifanolobodirindrina amintsika. (“Rahampitso dia hanao fahagagana eo aminareo ny Tompo”, Liahona, mey 2016, 127)

Inona no ianaranao avy amin’ny teny nambaran’ny Filoha Holland izay afaka manosika antsika haneho ny fitiavantsika an’ Andriamanitra?
Inona avy ireo dingana sasantsasany azon’ny olona atao izay mitarika any amin’ny fitiavana an’ Andriamanitra “[amin’ny] heriny rehetra” raha toa ka tsy mahatsapa ho ampy tanjaka hanao izany izy ireo?

Ny fankatoavana dia fanehoana fitiavana

Mba hanomezana ny mpianatra sahan-kevitra fohy momba ny bokin’ny Deoteronomia dia hevero ny hampiseho ny sarin’i Mosesy hatrany am-piandohan’ny lesona rehefa mamintina na manasa mpianatra iray hamaky mafy ity andiam-pehezan-teny manaraka ity ianao.

Nanome toromarika ny Isiraelita mba hanangana toby eo amin’ny sisin-tanin’ny tany nampanantenaina i Mosesy rehefa avy nanompo tamin’ny maha-mpaminanin’ Andriamanitra azy nandritra ny 40 taona. Tsy ho ela dia hitarika azy ireo hamakivaky ny sisin-tany i Josoa (jereo ny Deoteronomia 31:23). Nanana fahafahana ny nijery ny tany nampanantenaina avy eny an-tendrombohitra iray i Mosesy talohan’ny nanovan’ny Tompo ny tarehiny, na nakany an’i Mosesy ho any Aminy nefa tsy nandalo fahafatesana i Mosesy (jereo ny Deoteronomia 34:1–6; Almà 45:18–19). Ny bokin’ny Deoteronomia dia mirakitra ny torohevitra farany nomen’i Mosesy ny vahoaka, anisan’izany ny torohevitra nentanim-panahy momba ny fitiavana an’ Andriamanitra sy ny fankatoavana ny didiny.

Vakio ireto andalan-tsoratra masina manaraka ireto, ka tadiavo ireo fitoviana misy eo amin’ny zavatra nampianarin’i Mosesy ny vahoakany sy ny zavatra nampianarin’i Jesoa an’ireo mpianany mikasika ny fomba hanehoana ny fitiavantsika an’ Andriamanitra.

Deoteronomia 6:1–6; 30:16

Jaona 14:15, 21–24

Inona no zavatra nianaranao momba ny fanehoana ny fitiavantsika an’ Andriamanitra?

Raha toa ka efa nisy mpianatra iray nanoratra ny hoe “mitandrina ny didy” teny amin’ny solaitrabe teo aloha ho toy ny fomba iray hanehoana ny fitiavantsika an’ Andriamanitra, dia hevero ny hiresaka izany. Raha tsy nanao izany izy ireo dia soraty eny amin’ny solaitrabe izany.
Nahoana araka ny eritreritrao no fomba manan-danja hanehoana amin’ny Ray any An-danitra sy i Jesoa Kristy ny fitiavantsika Azy Ireo ny fitandremana ny didy?

Mitia an’ Andriamanitra eo amin’ny fiainantsika isan’andro

Misafidiana iray amin’ireto toerana mahazatra ireto: any am-piasana, any an-tsekoly, any amin’ny kilasin’ny seminera, any am-piangonana, any an-trano, any amin’ny fanazaran-tena, miaraka amin’ny namana, ao amin’ny tambajotran-tserasera. Ahoana no hamalianao ireto fanontaniana manaraka ireto avy amin’ny zavatra iainanao rehefa mieritreritra io toerana io?

Tamin’ny fomba ahoana no nahitanao olona iray naneho ny fitiavany an’ Andriamanitra tao amin’io toerana io?
Inona avy ireo fomba tsara atao hanehoana ny fitiavanao an’ Andriamanitra ao amin’io toerana io?
Moa ve misy zavatra izay mety hahatonga ny fanehoana fitiavana an’ Andriamanitra ho sarotra ao amin’io toerana io? Raha eny dia ahoana no ahafahantsika mandresy izany?

Fehin-kevitra

Ho famaranana dia azonao atao ny maneho ny fitiavanao ny Ray any An-danitra sy i Jesoa Kristy.

Ankoatra ny fijoroana ho vavolombelona anananao dia azonao atao ihany koa ny mizara ity teny nambara manaraka ity sy manasa ireo mpianatra haneho ny fahatsapana ananany momba ny Ray any An-danitra sy i Jesoa Kristy ao amin’ny diary fandalinan’izy ireo. Amporisiho izy ireo hanao zavatra araka izay fahatsapana mety ho azony avy amin’ny Fanahy nandritra ny lesona.

Ny Loholona K. Brett Nattress ao amin’ny Fitopololahy dia nametraka fanontaniana manan-danja vitsivitsy mba hosaintsainintsika manokana.

Mijoro ho vavolombelona aho fa mahatsiaro antsika mandrakariva ny Raintsika any An-danitra ary tia antsika tanteraka Izy. Izao no fanontaniako: Moa ve isika mahatsiaro Azy? Ary moa ve isika tia Azy? (“Moa ve aho tena voavela heloka?”, Liahona, mey 2023, 68–69)

Loharanom-pitaovana fanampiny

Nanampy ny Mpamonjy hiaritra ny sorona fanavotana nataony tamin’ny fomba ahoana ny fitiavany an’ Andriamanitra?

Nampianatra ny Loholona D. Todd Christofferson ao amin’ny Kôlejin’ny Apôstôly Roambinifolo hoe:

Raha tia an’ Andriamanitra amin’ny fontsika, ny fanahintsika, ny saintsika ary ny herintsika manontolo isika, dia ny hanatanteraka ny faniriany no hifantohantsika eo amin’ny fiainana. Tsy misy olona, mazava ho azy, nahavita izany feno kokoa sy lavorary kokoa noho i Jesoa Kristy ilay ohatra ho antsika, izay niteny indray mandeha hoe: “Tsy nandao Ahy ho irery [ny Ray], satria Izaho manao izay sitrany mandrakariva.” Ny laharam-pahamehany ambony indrindra dia ny nanome sy manome voninahitra ny Ray.

Izany laharam-pahamehana ambony indrindra izany, izany fahatokiana lehibe indrindra izany, dia namela an’i Jesoa nanohy nanatanteraka ny Sorompanavotany, mba hisotro ny ngidin’ilay kapoaka faran’izay mangidy indrindra hatramin’ny farany. …

Rehefa nihantona teo amin’ny hazofijaliana i Kristy, dia niara-nihantona tamin’izany ny tanjona hiafarantsika, ny tsy fahafatesantsika, ary ny fiainantsika mandrakizay, fa ny zavatra nampahomby izany mba ho tombontsoantsika tamin’ny famaritana raha toa ka hisy dikany na tsia ny fisiantsika dia noho i Jesoa Kristy tia ny Rainy tamin’ny fony, ny fanahiny, ny sainy, ary ny heriny rehetra. (“The First Commandment First” [Brigham Young University devotional, Mar. 22, 2022])

“Ny didy manao ahoana moa no lehibe?” (Matio 22:36)

Nanazava izao ny Filoha Dallin H. Oaks ao amin’ny Fiadidiana Voalohany:

Rehefa nanontaniana i Jesoa hoe inona no didy lehibe indrindra, dia nanome anankiroa Izy. Ny voalohany dia ny mitia an’ Andriamanitra, izay asehontsika amin’ny alalan’ny fitandremana ny didiny. Ny faharoa dia ny mitia ny namantsika. Tsy maintsy manao azy roa ireo isika, ary tsy mora izany. Maro amintsika no manana fironana tsy dia hiraharaha loatra ny fitiavana ny namantsika ary manantitrantitra diso tafahoatra ny fitandremana ny lalàna (didy). Azo antoka fa izany no fironana ananako noho ny fiofanana momba ny lalàna nataoko. Sady raha ny marina dia ny fitiavana an’ Andriamanitra sy ny fanehoana ny fitiavantsika an’ Andriamanitra amin’ny alalan’ny fitandremana ny didiny no didy lehibe voalohany. Ary marina fa mora amintsika ny mitsara ny tenantsika sy ny hafa raha toa isika ka mitandrina ny didy na tsia. Kanefa manan-danja ihany koa ho antsika tsirairay avy ny mitandrina ny didy faharoa, izay “tahaka azy ihany”, dia ny mitia ny namantsika tahaka ny nitiavan’i Jesoa antsika. (“Mijoroa amin’ny fahamarinana” [fampaherezam-panahy maneran-tany ho an’ny tanora, 21 mey 2023], Médiathèque de l’Évangile)

Inona no azontsika atao mba hampahalalina ny fitiavantsika an’ Andriamanitra?

Sahanasa fianarana fanampiny

Fomba hafa entina manomboka mba hanampiana ny mpianatra hahatakatra ny sahan-kevitry ny Deoteronomia

Azonao atao ny manomboka ny lesona amin’ny alalan’ny fanampiana ny mpianatra hampifandray ny tenany amin’i Mosesy amin’ny fanomezany ny toroheviny farany ho an’ireo olona tiany. Izany ihany koa dia hanampy ny mpianatra hisaintsaina ny zavatra manan-danja indrindra amin’izy ireo.

Azonao atao izany amin’ny alalan’ny fampisehoana ireto toromarika manaraka ireto sy ny fanomezana ny mpianatra roa na telo minitra hisaintsainana na hanoratana ny eritreriny. Avy eo dia manasà mpianatra vitsivitsy hizara hevitra izay tsy mahakasika loatra ny tena manokana.

Alaovy sary an-tsaina hoe handeha hanalavitra ireo olona akaikin’ny fonao ianao mandritra ny fotoana maharitra na mety ho mandrakizay. Afaka mamela torohevitra fohy ho azy ireo ianao alohan’ny handehananao.

Inona no torohevitra hozarainao amin’izy ireo? (Azonao atao ny mampiditra ny zavatra antenainao fa hataon’izy ireo na tsy hataon’izy ireo amin’ny ho avy, ny zavatra antenainao fa ho ataon’izy ireo ho laharam-pahamehana eo amin’ny fiainany, na ny zavatra tsapanao momba an’i Jesoa Kristy sy ny filazantsarany.)

Avy eo dia ampio ny mpianatra hahatakatra ny sahan-kevitry ny bokin’ny Deoteronomia amin’ny alalan’ny fizarana ny andiam-pehezan-teny araka ny sahan-kevitra ao amin’ny lesona izay hita eo ambanin’ny lohateny hoe “Ny fankatoavana dia fanehoana fitiavana”.

Matio 22:36–39: “Ny didy lehibe”

Mba hampahafantarana ny mpianatra ny Deoteronomia 6:5 amin’ny fomba izay manampy azy ireo hahatakatra ny maha-zava-dehibe izany dia angataho izy ireo hizara vetivety amin’ny namana iray ny zavatra izay heverin’izy ireo fa lehibe indrindra amin’ireto sokajy manaraka ireto (na sokajy hafa azonao safidiana).

Sarimihetsika

Toerana fialan-tsasatra

Tsindrin-tsakafo

Fihirana

Asao ny mpianatra avy eo hamaky ny Matio 22:36–39, ka hitady ny fomba namalian’i Jesoa Kristy fanontaniana mitovy amin’izany.

Anontanio ny mpianatra raha fantatr’izy ireo hoe aiza no ahafahantsika mahita ny didy lehibe voalohany noresahan’i Jesoa. Asao izy ireo hanisy marika ny Deoteronomia 6:5 sy hampifandray na hampifandrohy izany amin’ny Matio 22:36–39.