Akoako Fakataukei Fakatokāteline 3

• Ko e hā ha ngaahi ʻuhinga ʻoku lelei ai ke maheni mo e kakai ʻi he kalasi ko ʻení?

• Ko e hā ha ngaahi lelei ʻo hono maʻu ha ngaahi kaungāmeʻá?

Lau ʻa e fakamatala ko ʻeni ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá:

“ʻOku lava ke maʻu ha mālohi lahi mei hono ako maʻuloto ʻo e folofolá. Ko hono ako maʻuloto ʻo ha potufolofolá ko hano kamata ia ʻo ha feohi fakakaungāmeʻa foʻou.” (“Ko e Mālohi ʻo e Folofolá,” Liahona, Nōvema 2011, 6)

• ʻOkú ke pehē ko e hā ha founga ʻe lava ke hangē ai ha kupuʻi lea pe potufolofola kuo ako maʻuloto ko ha kaungāmeʻá?

Naʻe hoko atu ʻa ʻEletā Sikoti ʻo pehē:

ʻOku hangē ia hano toki ʻiloʻi ha taha foʻou ʻe lava ke tokoni ʻi he taimi ʻo e faingataʻá, ʻokú ne ueʻi mo fakafiemālieʻi kita, pea hoko ko ha maʻuʻanga poupou ki ha liliu ʻoku fiemaʻu. (Richard G. Scott, “Ko e Mālohi ʻo e Folofolá,” Liahona, Nōvema 2011, 6)

• Ko e fē ha taimi kuo hangē ai ha potufolofola pe kupuʻi lea kuo ako maʻuloto ko ha kaungāmeʻa kiate koe ʻi ha taha ʻo e ngaahi founga ko ʻení?

• Ko e hā ha ngaahi meʻa te ke fai pe lava ʻo fai ʻe ala tokoni ke ke ako maʻuloto ai e ngaahi kupuʻi lea fakafolofola mahuʻingá pe potufolofolá?

Muimui ki he faleʻi ʻa ʻEletā Sikoti ke “kamata … ha [ngaahi] feohi fakakaungāmeʻa foʻou” ʻaki hono ako maʻuloto e ngaahi potufolofola mo e ngaahi kupuʻi lea mahuʻinga ki ha ngaahi potufolofola fakataukei fakatokāteline lahi. Te ke lava foki ʻo ako maʻuloto ha potufolofola kakato.

Fili ha taha ʻo e ngaahi kupuʻi lea pe potufolofola naʻá ke ako maʻulotó, pea tali ʻa e fehuʻi ko ʻení:

• ʻE tatau fēfē nai ʻa e kupuʻi lea pe potufolofola ko ʻení mo ha kaungāmeʻa kiate koe? (ʻE tokoni fēfē ia ʻi ha taimi ʻo e faingataʻá, ʻomi ha ueʻi fakalaumālie pe fakafiemālie, pe hoko ko ha maʻuʻanga tokoni ki he liliu ʻoku fiemaʻú?)

• “ʻOku ou fanongo ki he talanoa ʻa e toʻu tupu kehé fekauʻaki mo hono fevahevaheʻaki ʻi heʻenau telefoní ha ngaahi tā taʻetaau, taʻefeʻunga, pe naʻa mo fakahāhaaʻi ʻo e sino ʻo kinautolú pe niʻihi kehé. ʻOku ou lava ʻo tala ʻoku ʻikai ke nau tui ko ha fuʻu meʻa lahi ia. Mahalo ko ha konga angamaheni pē ia ʻo e ngaahi vā fetuʻutakí, pe ko haʻanau vaʻinga pē.”

• “ʻOku hangē ʻoku angamaheni pē ke mamata mo fanongo ki he ngaahi meʻa fakasekisualé. ʻOku ʻi ai ha ngaahi lea fakasekisuale ʻi he ngaahi tūkuhuá, ngaahi ʻata ʻi he heleʻuhilá, ngaahi vitiō ʻi he ʻinitanetí, mo e ngaahi meʻa peheé. ʻOku kehe ʻa e meʻa ʻoku pehē ʻe he kau taki ʻo e Siasí ʻoku tāú mei he meʻa ʻoku pehē ʻe he kakai tokolahi ʻoku angamahení. ʻOku ou tui ʻoku kehe ʻa e taimí he kuongá ni pea ʻoku ʻikai ko ha meʻa lahi ia ʻo hangē ko e angamaheni kimuʻá.”

• “Kuó u fanongo ki ha ngaahi lēsoni kimuʻa fekauʻaki mo e fono ʻo e angamaʻá, ka ʻoku hangē kuo fakahoko ʻe ha toʻu tupu tokolahi ʻi he feituʻu ʻoku ou nofo aí ʻa e feohi fakasekisualé pe ʻikai palani ke tatali kae ʻoua kuo nau mali. ʻOku mahino kiate au ʻa e ʻuhinga ʻoku talamai ai ʻe he kau taki ʻo e Siasí ʻoku tau haohaoa fakasekisualé, pea ʻoku lahi ha ngaahi meʻa lelei ai, ka ʻoku ou fifili he taimi ʻe niʻihi pe ʻoku ʻaonga nai ia.”

  Fakaafeʻi e kau akó ke fakakaukauloto ʻoku ʻi heni ʻa e tokotaha ʻoku lea ʻi he tūkungá. Fakamatalaʻi ange ko ha taha ʻeni ʻoku loto-fakamātoato. Fakamanatu ki he kau akó ʻoku totonu ke tau feinga ke tauhi ki he kakai kotoa pē ʻi he ʻofa mo e fakaʻapaʻapa tatau ʻo hangē ko ia ʻoku fai ʻe he Tamai Hēvaní mo Sīsū Kalaisí.

• Ko e hā ha ngaahi fakakaukau fekauʻaki mo e fono ʻo e angamaʻá naʻá ke fakatokangaʻi ʻi he tūkunga ko ʻení?

  Fakamatalaʻi ange ʻe teuteu ʻa e kalasí ke tokoni ki he tokotaha ko ʻení. ʻI hono aleaʻi ʻe he kau akó e fehuʻi ko ʻení, fakapapauʻi ange kiate kinautolu ʻoku ʻikai ha tali hala.

• Kapau naʻá ke feinga ke tokoniʻi ʻa e tokotahá ni, ko e hā ha tefitoʻi moʻoni ki hono maʻu ʻo e ʻilo fakalaumālié te ke ʻuluaki tokanga ki aí? Ko e hā hono ʻuhingá?

Teuteu ha founga ke fakaʻaongaʻi ai ʻa e tefitoʻi moʻoni ko ʻeni ki hono maʻu ʻo e ʻilo fakalaumālié ke tokoni ki he tokotaha ko ʻení. ʻE lava ke kau heni ha:

• Fehuʻi te ke lava ʻo fai ki he tokotaha ko ʻení.

• Ngaahi folofolá, kau ai e ngaahi potufolofola fakataukei fakatokāteliné, pe ngaahi fakamatala mei he kau taki ʻo e Siasí ʻe ala tokoni.

• Ko hoʻo ngaahi fakakaukaú, ongó, pe fakamoʻoní.

Vakaiʻi e Ngaahi Fakakaukaú mo e Ngaahi Fehuʻí ʻaki ha Fakakaukau ʻoku Taʻengatá

• ʻE tokoni fēfē ʻa e mahino kau ki he ngaahi ongo ʻa e ʻOtuá fekauʻaki mo e maʻa fakasekisualé ki he tokotaha ʻi he tūkungá? (vakai, Sēnesi 39:9; 1 Kolinitō 6:18–19; Sēkope 2:28).

• ʻOkú ke pehē ko e hā ha ngaahi fili ʻe lava ke tataki ʻe he tōʻonga fakakaukau ʻa e tokotaha ko ʻení ia ke ne faí?

Fekumi ki ha Mahino Lahi Ange ʻo Fakafou ʻi he Ngaahi Maʻuʻanga Tokoni Kuo Fokotuʻu Fakalangí

• ʻE tokoni fēfē ʻa e Sēnesi 39:9 mo e sīpinga ʻa Siosefa ʻo ʻIsipité ʻi he tūkunga ko ʻení?

• Ko e hā ha ngaahi potufolofola pe ngaahi fakamatala kehe mei he kau taki ʻo e Siasí ʻe ala tokoni? (Hangē ko ʻení, ʻAlamā 38:12; ʻAlamā 39:9; Tokāteline mo e Ngaahi Fuakava 42:23; ko e konga “ʻOku toputapu ho sinó” ʻi he Ki Hono Fakamālohia ʻo e Toʻu Tupú; ko e konga “Ko e Ngaahi Tāpuaki ʻo e Angamaʻá” ʻi he lea konifelenisi lahi ʻa ʻEletā Tēvita A. Petinā “ʻOku Mau Tui ki he Angamaʻá,” [Liahona, Mē 2013, 43–44])

Ngāue ʻi he Tuí

• ʻI he tūkunga ko ʻení, ʻokú ke pehē ko e hā e meʻa ʻe hoko ʻi he ngāue ʻi he tui ki he Fakamoʻui ko Sīsū Kalaisí?

• Kapau naʻá ke fehangahangai mo ha tūkunga tatau, ko e hā te ke lava ʻo fai ke fakaafeʻi e tokoni mo e mālohi ʻo e Fakamoʻuí ki hoʻo moʻuí?

Hiki ʻi hoʻo tohinoa akó ʻa e meʻa naʻá ke ako mei he aʻusia ko ʻení ʻa ia ʻokú ke fie manatuʻí. ʻE lava ke kau heni ʻa e founga ʻe lava ke tokoniʻi ai koe ʻe he founga hono fakaʻaongaʻi ʻo e ngaahi tefitoʻi moʻoni ki hono maʻu ʻo e ʻilo fakalaumālié ki ha faʻahinga fehuʻi pe hohaʻa pē ʻokú ke maʻu.