Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻEkesōtosi 7–11: Ko Hono ʻIloʻi e Mālohi ʻo e ʻEikí

“ʻEkesōtosi 7–11: Ko Hono ʻIloʻi e Mālohi ʻo e ʻEikí,” Fuakava Motuʻá – Tohi Lēsoni ʻa e Faiako Seminelí (2026)

“ʻEkesōtosi 7–11: Ko Hono ʻIloʻi e Mālohi ʻo e ʻEikí,” Fuakava Motuʻá – Tohi Lēsoni ʻa e Faiako Seminelí

ʻEkesōtosi 7–13: Lēsoni 41

ʻEkesōtosi 7–11

Ko Hono ʻIloʻi e Mālohi ʻo e ʻEikí

A black-and-white drawing by Paul Gustave Doré of Moses and his brother, Aaron, standing in Pharaoh’s court next to a serpent.

ʻE ala faingataʻa ke fakatokangaʻi e mālohi ʻo e ʻEikí ʻi heʻetau moʻuí. Naʻe fili ʻe he ʻEikí ʻa Mōsese mo ʻĒlone ke na fakahaaʻi Hono mālohí ʻi he ʻao ʻo Feló. Naʻe fakataʻeʻaongaʻi ʻe Felo e mālohi ʻo e ʻEikí. Naʻe fakatupu ʻe he meʻá ni ha ngaahi fakaʻaliʻali lahi ange ʻo e mālohi ʻo e ʻEikí ʻi he ngaahi mahaki fakaʻauha naʻe hoko ki ʻIsipité. Ko e taumuʻa ʻo e lēsoni ko ʻení ke tokoni ke mahino ki he kau akó e founga ke ʻiloʻi ai e mālohi ʻo e ʻEikí mo tui kiate Iá.

Teuteu ʻa e tokotaha akó: Fakaafeʻi e kau akó ke fekumi ki ha fakamoʻoni ʻo e mālohi ʻo e ʻEikí ʻi heʻenau moʻuí ʻi he vahaʻa ʻo e taimí ni mo e kalasi hokó.

Ngaahi ʻEkitivitī Ako ʻOku Ala Fakahokó

Ko e mālohi ʻo e ʻOtuá ʻokú ne ʻākilotoa kitautolú

Fakakaukau ke kamata e kalasí ʻaki hano fai e ngaahi fehuʻi ko ʻení pe tuku ke aleaʻi fakakulupu kinautolu ʻe he kau akó.

ʻI hoʻo ʻalu ki he seminelí he ʻaho ní, ko e hā ha ngaahi meʻa naʻá ke mamata, fakatokangaʻi, pe sio ki ai?
ʻI he meʻafua ʻo e 1–5 (1 ʻoku ʻikai fuʻu lahi, 5 lahi ʻaupito), te ke fakafuofuaʻi fēfē hoʻo ʻilo ki ho ʻātakaí he ʻaho ní?
Ko e hā ha ngaahi ʻuhinga ʻoku faʻa lahi pe siʻisiʻi ai ʻetau tokangá?

Fakamatalaʻi ange ʻe lava ke tau fakalaulauloto ʻi he founga tatau ki he founga ʻoku tau tokanga ai ki he meʻa kuo fai pe lolotonga fai ʻe he ʻEikí maʻatautolú. ʻE lava ke ke fehuʻi ange ʻeni:
Ko e hā ha fakamoʻoni ʻe ala fakatokangaʻi ai ʻe ha taha ʻa e mālohi ʻo e ʻOtuá ʻi ha ʻaho angamaheni?

Ko e founga ʻe taha ke fakaafeʻi ai ʻa e Laumālie Māʻoniʻoní ke akoʻi fakafoʻituitui ʻa e kau akó ko hono fakaʻatā ʻa e kau akó ke nau vakaiʻi fakataautaha ʻa ʻenau ongo ki heʻenau tauhi ha ngaahi tefitoʻi moʻoni pau ʻo e ongoongoleleí. Te ke lava ʻo tokoni ke nau fai ʻeni ʻaki haʻo fakaʻaliʻali ʻeni:

Fakafuofuaʻi koe ʻi he meʻafua ʻo e 1–5 (1 māʻulalo tahá, 5 māʻolunga tahá) ʻi he founga ʻoku fakamatalaʻi lelei ai koe ʻe he ngaahi meʻá ni:

ʻOku ou ongoʻi loto-falala ʻi heʻeku malava ko ia ke fakatokangaʻi e mālohi pe ivi tākiekina ʻo e ʻOtuá ʻi heʻeku moʻuí.

ʻI hoʻo ako he ʻaho ní, fakaafeʻi ʻa e Laumālie Māʻoniʻoní ke ne tokoniʻi koe ke fakatupulaki hoʻo malava ke fakatokangaʻi ʻa e mālohi mo e ivi tākiekina ʻo e ʻOtuá ʻi hoʻo moʻuí.

Tui ki he ʻEikí

ʻI he ʻEkesōtosi 6–7, naʻe talaʻofa ʻe he ʻEikí kia Mōsese te Ne ʻomi e kakai ʻIsilelí mei he nofo pōpulá. Naʻá Ne pehē te Ne fakahā Hono mālohí kia Felo mo e kau ʻIsipité pea he ʻikai haʻanau toe fili ka ke fakatauʻatāinaʻi ʻa e kau ʻIsilelí.

Lau ʻa e ʻEkesōtosi 6:7; 7:5, ʻo kumi e meʻa ʻe fakapapauʻi ʻe he ʻEikí ʻe ʻilo ʻe he kau ʻIsilelí mo e kau ʻIsipité fakatouʻosi. Mahalo ʻe fie fakaʻilongaʻi ʻe he kau akó ʻa e meʻa ʻoku nau maʻú.

Ko e hā ʻe ʻilo ʻe he kau ʻIsilelí mo e kau ʻIsipité koeʻuhí ko e ngaahi fakahaaʻi ʻo e mālohi ʻo e ʻEikí?
Ko e hā ʻe lava ke tau ako fekauʻaki mo e ʻEikí mei he ngaahi meʻa ne fakahaaʻi ko ʻení?

Tokoni ke ʻiloʻi ʻe he kau akó ha foʻi moʻoni tatau mo ia ʻoku pehē, ʻoku ʻomi ʻe he ʻEikí ha ngaahi faingamālie ke tau tui ai kiate Ia mo fakatokangaʻi Hono mālohí ʻi heʻetau moʻuí.

Ko e ngaahi mahaki fakaʻauhá

ʻE lava ke ʻoange ʻe he ʻekitivitī ko ʻení ki he kau akó ʻa e faingamālie ke nau ako ai ha niʻihi ʻo e ngaahi mahaki fakaʻauha ʻi ʻIsipité. Te ne lava foki ʻo tokoniʻi kinautolu ke nau vakai ki he ngaahi tali kehekehe ki he ngaahi fakahā ʻo e mālohi ʻo e ʻOtuá. Tokanga ke ʻoua naʻa fakamoleki ha fuʻu taimi lahi ʻi he konga ko ʻení ke mole mei he toenga ʻo e lēsoní.

Fakakaukau ke fakaʻaliʻali ange ʻa e saati mo e ongo fehuʻi ko ʻení.

ʻI he ʻEkesōtosi 7–11, naʻe fakahā ʻe he ʻEikí Hono mālohí ʻi ha ngaahi mahaki fakaʻauha lahi. Sio ki he saati ko ʻení pea fili ha mahaki fakaʻauha ʻe ua pe tolu ke ako, ʻo kumi e tali ki he ngaahi fehuʻi ʻoku hoko maí.

ʻOku pehē ʻe ha ngaahi veesi ʻe niʻihi naʻe fakafefeka ʻe he ʻEikí ʻa e loto ʻo Feló. ʻOku ʻomi ʻe he Liliu ʻa Siosefa Sāmitá ha fakamahino mahuʻinga naʻe fakafefeka ʻe Felo hono lotó.

Ngaahi mahaki fakaʻauhá	Ngaahi veesi ke akó
Ngaahi mahaki fakaʻauhá 1. Liliu ʻa e vaí ko e toto	Ngaahi veesi ke akó ʻEkesōtosi 7:19–25
Ngaahi mahaki fakaʻauhá 2. Haʻu ʻa e fanga potó ki he fonuá	Ngaahi veesi ke akó ʻEkesōtosi 8:5–15 (Fakatokangaʻi ange: ʻOku ʻuhinga ʻa e “Fiefiemālié” ki he mālōlō pe nonga)
Ngaahi mahaki fakaʻauhá 3. Fanga kutu	Ngaahi veesi ke akó ʻEkesōtosi 8:16–19
Ngaahi mahaki fakaʻauhá 4. Fuifui Lango	Ngaahi veesi ke akó ʻEkesōtosi 8:20–25, 29–32
Ngaahi mahaki fakaʻauhá 5. Mate ʻa e fanga pulú	Ngaahi veesi ke akó ʻEkesōtosi 9:1–7
Ngaahi mahaki fakaʻauhá 6. Hangatāmaki	Ngaahi veesi ke akó ʻEkesōtosi 9:8–12
Ngaahi mahaki fakaʻauhá 7. ʻUha maka mo e afi mei he langí	Ngaahi veesi ke akó ʻEkesōtosi 9:22–29, 33–35
Ngaahi mahaki fakaʻauhá 8. Fanga Heʻé	Ngaahi veesi ke akó ʻEkesōtosi 10:12–20
Ngaahi mahaki fakaʻauhá 9. Fakapoʻulí	Ngaahi veesi ke akó ʻEkesōtosi 10:21–27

Ko e hā ha ngaahi founga naʻe fakahaaʻi ai e mālohi ʻo e ʻEikí?
ʻOkú ke pehē ko e hā naʻe tui pe ʻikai tui ai e niʻihi fakafoʻituituí ki he ʻEikí mo Hono mālohí?

Hili ha taimi feʻunga, fakakaukau ke fakaafe‘i e kau akó ke vahevahe e ngaahi meʻa ʻoku nau maʻú ʻi ha ngaahi hoa pe kulupu iiki.

ʻE ala tokoni ke fakamahinoʻi ha niʻihi ʻo e ngahai meʻá ni. Mahalo naʻe fakatokangaʻi ʻe he kau akó naʻe lava ʻe he kau fiemana ʻa Feló, ʻo fakafou ʻi he kākaá pe mālohi ʻo e filí, ʻo toe fakahoko ha konga ʻo e ongo ʻuluaki mahaki fakaʻauhá. Ka neongo ia, naʻe ʻikai ke nau lava ʻo ʻomi pe taʻofi kakato ʻa e ngaahi mahaki fakaʻauhá. ʻIkai ngata aí, naʻe faingataʻaʻia ʻa e kau ʻIsilelí ʻi ha ngaahi mahaki fakaʻauha ʻe niʻihi ka naʻe maluʻi kinautolu mei he mahaki fakaʻauha hono faá, nimá, mo e fitú.

Kapau ʻe ʻaonga, te ke lava ʻo poupouʻi e kau akó ke nau fakaʻilongaʻi mo ha toe ngaahi kupuʻi lea ʻi he ʻEkesōtosi 8:10, 22; 10:2 ʻa ia naʻe fakamoʻoniʻi ai ʻe he ʻEikí ʻe ʻiloʻi ʻe he kakaí ko Ia ʻa e ʻEikí.
ʻOkú ke pehē ko e hā naʻe fiemaʻu ai ʻe he ʻEikí ke ako e kau ʻIsipité mo e kau ʻIsilelí fekauʻaki mo Iá?
Ko e hā ha ngaahi ʻuhinga ʻoku tui ai ʻa e kakaí he taimi ʻe niʻihi ki he ʻOtuá mo Hono mālohí pea nau veiveiua kumui ange?

Ko e mālohi ʻo e ʻEikí ʻi heʻetau moʻuí

ʻE ala tokoni ke vahevahe mo e kau akó ʻoku fakahaaʻi e mālohi ʻo e ʻEikí ʻi ha ngaahi founga lahi he ʻahó ni. ʻE lava ke tokoni ʻeni ki he kau akó ke nau fakakaukau ki he founga kuo nau mamata pe aʻusia ai e mālohi ko iá.

Fakakaukauloto ʻoku ʻi ai haʻo kaungāmeʻa ʻoku ʻikai ke ne loto-falala kuó ne aʻusia ha meʻa mo e Tamai Hēvaní pe ongoʻi Hono mālohí. ʻI he hoko atu hoʻo akó, fakakaukau ki he meʻa te ke lea ʻaki ki he tokotaha ko ʻení.

ʻE ala tokoni ke ʻoange ha taimi ki he kau akó ke nau fakalaulauloto pe hiki ʻenau ngaahi fakakaukaú ʻi he fehuʻi ko ʻení kimuʻa pea nau vahevahe mo e kalasí.

Ko e hā ha ngaahi founga kuó ke tui ai ki he mālohi ʻo e ʻEikí? Pe ko e hā ha ngaahi meʻa ʻe lava ʻo tokoni atu ke ke tui ai?
Ko e hā ha ngaahi sīpinga mei he folofolá pe hisitōlia ʻo e Siasí naʻe fakahā ai ki he kakaí ʻa e mālohi ʻo e ʻEikí?

ʻE lava ke vahevahe ʻe he kau akó ha ngaahi sīpinga hangē ko e ongoʻi fiemālie pe nonga mei he lotú pe ko ha tāpuaki lakanga fakataulaʻeiki, aʻusia ʻo e fakamolemolé, ongoʻi ha fakahinohino fakataautaha mei he Laumālie Māʻoniʻoní, mo e alā meʻa pehē.

Tokoni ke mahino ki he kau akó ko e ngaahi aʻusia ko ia ʻi he mālohi ʻo e ʻEikí ʻoku meimei ke tupu ia mei hono fakahaaʻi ʻo e ngaahi tōʻonga fakakaukau pe ngāue faivelengá.

Naʻe akoʻi ʻe Palesiteni Lāsolo M. Nalesoni ʻa e ngaahi meʻá ni fekauʻaki mo e meʻa te tau lava ʻo fai ke fakaafeʻi ai ha ngaahi aʻusia mo e Tamai Hēvaní:

Mahino ka ʻikai ha ngaahi ʻausia mo e ʻOtuá, ʻe lava ke veiveiua ha taha pe ʻoku ʻi ai ha ʻOtua. Ko ia, fokotuʻu koe ʻi he tuʻunga ke kamata ai haʻo ngaahi aʻusia pea mo Ia. Ke ke loto-fakatōkilalo. Lotua ke ke maʻu ha mata ke mamata ki he ivi tākiekina ʻo e ʻOtuá ʻi hoʻo moʻuí pea mo e māmani ʻokú ke ʻi aí. Kole ke Ne fakahā atu pe ʻokú Ne moʻui—pe ʻokú Ne ʻafioʻi koe. Fehuʻi ange pe ko e hā ʻEne ongoʻi fekauʻaki mo koé. Hili ia peá ke fakafanongo. (“Haʻu, ʻo Muimui ʻIate Au,” Liahona, Mē 2019, 90)

Ko e hā ʻe lava ke fai ʻe ha taha ke kamata mamata ai ki he toʻukupu mo e mālohi ʻo e ʻOtuá ʻi heʻenau moʻuí?

Te ke lava ʻo fakaafeʻi e kau akó ke nau fakatātaaʻi e founga te nau lava ai ʻo tali e tūkunga ʻi ʻolungá. ʻAi ke nau faleʻi honau kaungāmeʻa ʻoku ʻikai falala kuó ne maʻu ha aʻusia mo e ʻEikí pe ongoʻi Hono mālohí.

Fakakaukau ke fai hoʻo fakamoʻoni ki he Tamai Hēvaní mo Sīsū Kalaisi pea mo e mahuʻinga ʻo hono fakatokangaʻi Hona mālohí ʻi heʻetau moʻuí.

Ngaahi Maʻuʻanga Tokoni Kehé

Ko e hā naʻe fakatupu ai ʻe he ʻEikí ʻa e ngaahi mahaki fakaʻauha ko iá?

Naʻe feau ʻe he ngaahi mahaki fakaʻauhá ha ngaahi taumuʻa lahi. Naʻa kau ai hono fakahaaʻi kia Felo, ʻIsipite, mo e kau ʻIsilelí ʻoku mālohi lahi ange ʻa Sīsū Kalaisi (Sihova) ʻi he ngaahi ʻotua ʻIsipite loí. Naʻe maʻu ʻe ʻIsipite ha ngaahi ʻotua loi lahi, kau ai ʻa felo tonu. “ʻOku fokotuʻu mai ʻe he kau fakatonulea ʻe [niʻihi] ha fakataipe fekauʻaki ʻi he vā ʻo e mahaki fakaʻauha takitaha pea mo ha ʻotua ʻIsipite, ʻo pehē ai naʻe fakataumuʻa takitaha ia ke fakahaaʻi e tuʻunga maʻolunga ange ʻo Sihova ʻi ha ʻotua pau. ʻOku faingataʻa ke fakapapauʻi e fakamatala ko ʻení ʻi he tūkunga kotoa. … [Ka neongo ia,] ʻoku ʻikai ha fakaʻaloʻalongaua ia naʻe fakataumuʻa fakalūkufua e ngaahi mahaki fakaʻauhá ke fakahā ai e mālohi ʻo Sihová ʻi he ngaahi ʻotua ʻIsipité, ʻa ia naʻe kau ai ʻa Felo tonu” (Richard Neitzel Holzapfel, Dana M. Pike, and David Rolph Seely, Jehovah and the World of the Old Testament: An Illustrated Reference for Latter-day Saints [2009], 90).

Ko e hā naʻe lava ai ʻe he kau fiemaná ʻo faʻifaʻitakiʻi ha niʻihi ʻo e ngaahi mana ʻa e ʻOtuá?

Naʻe akoʻi ʻe Palesiteni Tālini H. ʻOakesi:

Ko e tēvoló e tamai ʻa e ngaahi loí pea ʻoku holi maʻu pē ke taʻofi e ngāue ʻa e ʻOtuá ʻi heʻene ngaahi founga olopotó. (“Ongo Founga ʻo e Fetuʻutakí,” Liahona, Nōvema 2010, 84)

Naʻe akonaki ʻa Palesiteni Siosefa Filitingi Sāmita (1876–1972) ʻo pehē:

ʻOku totonu ke manatuʻi ʻoku maʻu ʻe Sētane ha ʻilo lahi pea te ne lava ai ʻo fakaʻaongaʻi ha mafai pea aʻu ki haʻane lava ʻo puleʻi ʻa e ngaahi ʻelemēnití, ʻi he taimi ʻoku ʻikai toe kau atu ai ha mālohi maʻongoʻonga angé. (Answers to Gospel Questions, comp. Joseph Fielding Smith Jr. [1957], 1:178)

Fakatokangaʻi ange ʻi he hili ʻa e mahaki fakaʻauha hono uá, naʻe ʻikai toe lava ʻe he kau fiemaná ʻo fakatupu fakatatau e ngaahi mahaki fakaʻauhá (vakai, ʻEkesōtosi 8:18) pea nau talaange kia Felo, “Ko e louhiʻi nima ʻeni ʻo e ʻOtuá” (ʻEkesōtosi 8:19).

Te u lava fēfē ʻo maʻu ha ngaahi aʻusia mo e Tamai Hēvaní?

Naʻe akonaki ʻa Palesiteni Lāsolo M. Nalesoni ʻo pehē:

Lilingi atu ho lotó ki he ʻOtuá. Fehuʻi ange kiate Ia pe ʻoku moʻoni e ngaahi meʻá ni. Tuku ha taimi ke ako ai ʻEne folofolá. Ako fakamātoato! … Ngāueʻi he taimí ni—ʻaki haʻo ako fakamātoato mo e lotu tāumaʻu—ke ʻilo e ngaahi moʻoni taʻengatá ni pea talangofua ki ai.

Kapau ʻoku ʻikai ke ke fakapapauʻi pe ʻokú ke tui ki he ʻOtuá, kamata ai.

(“Haʻu, ʻo Muimui ʻIate Au,” Liahona, Mē 2019, 90)

Ngaahi ʻEkitivitī Fakalahi ki he Akó

Founga ʻe taha ke kamata ʻaki ʻa e lēsoní

Ko e founga ʻe taha ke kamata ʻaki e kalasí ko hono fakaafeʻi e kau akó ke nau fai ʻa e kiʻi sivi moʻoni-pe-hala ko ʻení:

Naʻe loto-falala ʻa Mōsese ki he ngaahi meʻa naʻá ne malavá pea fiefia ʻi hono fatongia ke fakatauʻatāinaʻi e fānau ʻo ʻIsilelí mei he nofo pōpulá. (Hala. Vakai, ʻEkesōtosi 3:11.)
Hili e kole ʻe Mōsese mo ʻĒlone kia Felo ke tukuange e fānau ʻo ʻIsilelí, naʻe ʻikai fie fanongo ʻa e kau ʻIsilelí kia Mōsese mo muimui ki heʻene takí. (Moʻoni. Vakai, ʻEkesōtosi 5:19–21.)
Naʻe lava ʻe he kau fiemana ʻo ʻIsipité ʻo fakahoko tatau ha niʻihi ʻo e ngaahi mahaki fakaʻauha mo e ngaahi mana ʻa Mōsesé. (Moʻoni. Vakai, ʻEkesōtosi 7:11–12, 22; 8:7, 18)
Naʻe pehē ʻe Felo naʻá ne loto fiemālie ke tukuange e fānau ʻo ʻIsilelí ke nau tauʻatāina koeʻuhí naʻá ne fakaʻapaʻapaʻi e mālohi ʻo e ʻEikí. (Hala. Vakai, ʻEkesōtosi 5:1–2.)

Ngaahi ʻuhinga ʻoku ʻikai ke tau faʻa fakatokangaʻi ai e mālohi ʻo e ʻEikí

Mahalo ʻe ʻaonga ki he kau akó ha toe fealeaʻaki fekauʻaki mo e ʻuhinga ʻoku ʻikai ke tau faʻa fakatokangaʻi ai e mālohi ʻo e ʻEikí. Ke tokoni ʻi he meʻá ni, te nau lava ʻo lau ʻa e ngaahi potufolofola ko ʻení mo kumi ha ngaahi faingataʻa naʻá ne fakafaingataʻaʻiaʻi e fānau ʻa ʻIsilelí mo Feló ke nau fakatokangaʻi ʻa e ivi tākiekina mo e mālohi ʻo e ʻEikí:

ʻEkesōtosi 6:9 (Ko e fānau ʻo ʻIsilelí ʻi he hili hono fakalahi ʻe Felo ʻenau ngaahi mafasiá)

ʻEkesōtosi 8:32; 9:6–7, 11–12, 34–35; 10:20, 27 (Felo ʻi he hili hono toʻo ha niʻihi ʻo e ngaahi mahaki fakaʻauhá)

Te ke lava foki ʻo lau ʻa e Hilamani 16:13–23, ʻo kumi ʻa e meʻa naʻá ne ʻai ʻa e kakaí ke fakafefeka honau lotó ki he ngaahi mana kuo nau mamata aí.

Te mou lava ʻo aleaʻi ʻa e ʻuhinga ʻe lava ke hoko ai ʻa e ngaahi faingataʻá pe loto-fefeká ko ha meʻa ke ne fakafeʻātungiaʻi hono ʻiloʻi e ivi tākiekina pe mālohi ʻo e ʻEikí.