Մովսես 4.5–32, 5․1–15, Մաս 2

Պատկերացրեք, որ դուք ինքնաթիռից դուրս եք ընկել, հազարավոր ֆուտ բարձրությունից, առանց պարաշյուտի կամ որևէ այլ սարքավորման:

• Ի՞նչ կարող եք անել, որպեսզի փորձեք դանդաղեցնել ձեր անկումը:

• Ողջ մնալու ի՞նչ հույս ունեք:

Եվ հակառակը, պատկերացրեք, որ ձեր ինքնաթիռից դուրս ընկնելուց առաջ ձեր ընկերը կարողացել է պարաշյուտ հագցնել ձեզ վրա։

• Այս պարագայում ինչպե՞ս կվերաբերվեիք ձեր անկմանը:

• Ի՞նչ կզգայիք ձեր ընկերոջ հանդեպ:

  Որպեսզի օգնեք ուսանողներին նախորդ քննարկումը կապել այն բանի հետ, թե մենք ինչու ունենք Հիսուս Քրիստոսի Քավության կարիքը, առջարկեք նրանց քննարկել հետևյալ հարցերը դասընկերոջ հետ: Եթե նախորդ դասի ընթացքում ուսանողները ստեղծել են բրոշյուրներ Անկման հետևանքների մասին, կարող եք նախ առաջարկել նրանց համառոտ վերանայել այդ բրոշյուրները: Եթե ուսանողները բրոշյուրներ չեն ստեղծել, կարող եք փոխել վարժությունները, որոնք վերաբերում են դրանց:

• Ինչպե՞ս կարող ենք այս համաբանությունը համեմատել Ադամի ու Եվայի Անկման և Հիսուս Քրիստոսի Քավության դերի հետ Երկնային Հոր ծրագրում:

• Որո՞նք են Անկման այն հետևանքներ, որոնց հաղթահարման համար մենք ունենք Հիսուս Քրիստոսի օգնության կարիքը:

  Անհրաժեշտության դեպքում ուսանողներին հիշեցրեք, որ Անկման հետևանքով մենք բոլորս ունենում ենք հոգևոր մահ: Սա նշանակում է, որ մենք ծնվում ենք Աստծո ներկայությունից հեռու մի աշխարհում և մեղք ենք գործում, որը նաև հոգևորապես է հեռացնում մեզ Նրանից: Անկման հետևանքով մենք նաև բախվում ենք դժվարությունների, հիվանդությունների, թուլությունների և, ի վերջո, ֆիզիկական մահվան:

  Ուսանողներին առաջարկեք խորհել հետևյալի շուրջ.

• Հետևյալ արտահայտություններից ո՞րն է ճիշտ ձեզ համար:

  1. Ես չգիտեմ, թե ինչու ունեմ Փրկչի կարիքը:

  2. Ես հասկանում եմ, թե ինչու ունեմ Փրկչի կարիքը, սակայն չեմ կարծում, որ կարող եմ դա բացատրել մեկ ուրիշի:

  3. Ես կարող եմ մեկ ուրիշի բացատրել, թե ինչու մենք ունենք Փրկչի կարիքը:

  4. Ես սեր և երախտագիտություն եմ զգում Հիսուս Քրիստոսի հանդեպ և այն ամենի, ինչ Նա արել է ինձ համար:

Անկման հետևանքով Ադամն ու Եվան ստիպված էին հեռանալ Եդեմի պարտեզից: Տերը շարունակեց օրհնել նրանց՝ տրամադրելով հագուստ (տես Մովսես 4.27) և տալով պատվիրաններ, որոնք օգնեցին նրանց հաղթահարել Անկումը:

Կարդացեք Մովսես 5.5–9 հատվածները՝ փնտրելով, թե ինչ է պատվիրել Աստված:

• Ի՞նչ իմացան Ադամն ու Եվան հրեշտակից և Սուրբ Հոգուց:

  Ուսանողները կարող են բացահայտել, որ Հիսուս Քրիստոսի Քավությամբ մենք կարող ենք փրկագնվել Անկումից։ Կարող եք առաջարկել ուսանողներին նշել հատվածներ 7 և 9-ում այն բառերը կամ արտահայտությունները, որոնք ուսուցանում են այս ճշմարտությունը։ Կարող եք բացատրել, որ փրկագնվել նշանակում է փրկվել կամ ազատվել։

  Որպեսզի օգնեք ուսանողներին խորացնել իրենց հասկացողությունն այդ ճշմարտության վերաբերյալ, ցուցադրեք հետևյալ հրահանգները և ուսանողներին տրամադրեք ստորև ներկայացված աշխատաթերթը: Կարող եք ուսանողներին բաժանել երեք հոգանոց խմբերի և առաջարկել խմբի ուսանողներին ուսումնասիրել աշխատաթերթի տարբեր հատվածներ: Այնուհետև ուսանողները կարող են կիսվել խմբերի հետ իրենց սովորածով և միասին ստեղծել իրենց բրոշյուրների հաջորդ էջը: (Նշում․ Դաս 21․ «Գնահատեք ձեր գիտելիքները 1»․ ուսանողներին առաջարկվում է այս վարժությունը կատարելու ընթացքում օգտվել իրենց ստեղծած բրոշյուրներից, ինչը կօգնի նրանց բացատրել անկման հետևանքները:)

1. Ձեր բրոշյուրի աջ (դատարկ) էջը վերնագրեք՝ «Հիսուս Քրիստոսի Քավությունը»:

2. Ուսումնասիրեք աշխատաթերթի նյութը, որպեսզի իմանաք, թե ինչպես է Հիսուս Քրիստոսի Քավությունը փրկագնում մեզ Անկման հետևանքներից: Հնարավոր է՝ ձեր բրոշյուրի նախորդ էջում թվարկել եք Անկման հետևանքները:

3. Ձեր բրոշյուրի նոր էջում գրեք մեկ կամ երկու նախադասություն՝ ամփոփելով այն, ինչ սովորել եք աշխատաթերթի յուրաքանչյուր հատվածից: Օգնություն խնդրեք Սուրբ Հոգուց՝ հասկանալու, թե այս ուսմունքներն ինչպես են առնչվում ձեզ:

Բացել PDF-ը

Նախագահ Ռասսել Մ. Նելսոնն ուսուցանել է․

Երբ մենք զգանք, որ Փրկչի Քավությունը գործում է մեր կյանքում, մենք կլցվենք ուրախությամբ: («Ուրախություն և հոգևոր գոյատևում», Լիահոնա, նոյեմբեր 2016, 84)

Կարդացեք Մովսես 5.10–11 հատվածները՝ փնտրելով, թե Ադամն ու Եվան ինչ հետևություն արեցին Անկման և Փրկչի Քավության արդյունքներից:

• Նրանց խոսքերում ի՞նչն է առավել տպավորիչ ձեզ համար։