Մովսես 4.1–4

Նախկինում Երիտասարդ տղամարդկանց գերագույն նախագահությունից եղբայր Մ.Ջոզեֆ Բրոուն կիսվել է իր դստեր մասին հետևյալ պատմությամբ.

9:51

Երիտասարդներ, Աստված ձեզանից ակնկալում է դժվար բաներ անել: Մի 14-ամյա աղջիկ մասնակցում էր բասկետբոլի մրցումներին: Նա երազում էր խաղալ ավագ դպրոցի բասկետբոլի թիմում իր ավագ քրոջ նման: Այնուհետև նա իմացավ, որ իր ծնողներին կանչել են նախագահելու Գվատեմալայի միսիաներից մեկը:

Երբ նրա ընտանիքը ժամանեց նոր վայր, աղջիկը պարզեց, որ իր դասերից մի քանիսն իսպաներեն լեզվով են լինելու, որին նա դեռևս չէր տիրապետում: Եվ այդ դպրոցում չկար աղջիկների որևէ սպորտային թիմ: Նա ապրում էր մի շենքի 14-րդ հարկում, որն ուժեղացված անվտանգության համակարգ ուներ: Եվ այդ ամենից բացի՝ նա չէր կարող մենակ դուրս գալ տնից՝ անվտանգության նկատառումներից ելնելով:

Ծնողներն ամիսներ շարունակ լսում էին նրա հեկեկոցը քնելուց առաջ: («Բարձրացրու գլուխդ և ուրախացիր», Լիահոնա, նոյ. 2018, 14)

• Ի՞նչն ամենից դժվար կլիներ ձեզ համար, եթե դուք լինեիք այս երիտասարդ աղջկա իրավիճակում։

Խորհեք հետևյալ հարցերի շուրջ.

• Աստված ձեզանից ի՞նչ դժվար բան է պահանջել կամ կարող է պահանջել, որ դուք անեք:

• Որքանո՞վ եք պատրաստ անել այդ դժվարին բանը: Ինչո՞ւ։

• Ի՞նչ եք ուզում իմանալ կամ զգալ այս դասի ընթացքում, որը կօգնի ձեզ ավելի պատրաստակամ լինել անելու այն, ինչ Աստված է խնդրում:

Նախաերկրային կյանքում մենք ապրում էինք մեր Երկնային Հոր հետ: Այնտեղ մեզ ուսուցանում էին Նրա ծրագիրը, որը կօգնի մեզ նմանվել Նրան: Մովսես 4.1–4 հատվածները պարունակում են Երկնային խորհրդի պատմությունը, որտեղ Հիսուս Քրիստոսն ընտրվեց որպես մեր Փրկիչը: Այս հատվածներում մենք տեսնում ենք Հիսուս Քրիստոսի և սատանայի էությունը, երբ նրանցից յուրաքանչյուրը տարբեր եղանակներով է արձագանքում Երկնային Հոր կամքին:

Կարդացեք Մովսես 4.1–4 հատվածները՝ փնտրելով, թե ինչ կարող եք սովորել Հիսուս Քրիստոսի և սատանայի շարժառիթների և վերաբերմունքի մասին:

• Այս հատվածներն ի՞նչ են ուսուցանում ձեզ Հիսուս Քրիստոսի և Նրա Հոր միջև փոխհարաբերությունների մասին:

Կարդացեք հետևյալ պատմությունները՝ փնտրելով Երկնային Հորը հնազանդվելու Հիսուս Քրիստոսի մշտական ցանկությունը, նույնիսկ երբ դա անելը դժվար էր:

1. Ղուկաս 2.49 (12 տարեկանում)

2. Հովհաննես 8.28–29 (չափահաս տարիքում)

3. Մատթեոս 26.36–39 (Գեթսեմանիի այգում)

4. 3 Նեփի 11.10–11 (որպես հարություն առած էակ)

   Ուսանողների հետ քննարկեք, թե իրենք ինչ են սովորում Հիսուս Քրիստոսի մասին այս օրինակներից: Այնուհետև առաջարկեք նրանց կիսվել Փրկչի կյանքից այլ օրինակներով, երբ Նա խոնարհաբար հնազանդվել է Իր Հոր կամքին:

   Ուսանողներին առաջարկեք հիշել այն դժվար գործն իրենց կյանքում, որի մասին իրենք մտածում էին դասի սկզբում: Որպեսզի օգնեք նրանց իրենց կյանքի հետ կապել այն, ինչ սովորում են Հիսուս Քրիստոսի մասին, տվեք հետևյալ հարցերը.

• Ի՞նչ է ասել կամ արել Հիսուս Քրիստոսը, որը կարող է ոգեշնչել մարդուն հնազանդվել Երկնային Հորը, նույնիսկ, երբ դա դժվար է անել:

• Ո՞ւմ գիտեք, որ կարող է Երկնային Հոր կամքին հնազանդվելու լավ օրինակ հանդիսանալ: Ի՞նչ եք սովորել նրա օրինակից:

• Ի՞նչն է ձեզ ոգեշնչում հնազանդվել Երկնային Հոր կամքին, նույնիսկ այն ժամանակ, երբ դա դժվար է անել։

Եղբայր Բրոուն շարունակեց.

9:51

Մեր միսիայի ավարտին ես հարցրի իմ դստերը, թե արդյոք մտադրություն ունի միսիայում ծառայելու: Նա պատասխանեց. «Ոչ, հայրիկ, ես արդեն ծառայել եմ»:

Ինձ բավարարեց այդ պատասխանը: Սակայն վեց ամիս անց, Հոգին ինձ արթնացրեց գիշերվա կեսին այս մտքով. «Ես կանչել եմ քո դստերը միսիա ծառայելու»:

Իմ արձագանքն էր՝ «Երկնային Հայր, նա շատ բան է տվել»: Հոգին արագորեն շտկեց ինձ և ես հասկացա, որ նրա միսիոներական ծառայությունն անհրաժեշտ է Տիրոջը:

Շատ չանցած, դստերս հետ միասին գնացինք ճաշելու: Սեղանի շուրջ ես նրան ասացի. «Գանզի, դու գիտե՞ս, թե մենք ինչու ենք այստեղ»:

Նա ասաց. «Այո, հայրիկ: Դու գիտես, ես պետք է միսիա ծառայեմ: Ես չեմ ուզում գնալ, բայց գնում եմ»:

Քանի որ նա ենթարկեց իր կամքը Երկնային Հորը, նա ծառայեց Նրան իր ողջ սրտով, զորությամբ, մտքով և ուժով։ Նա սովորեցրեց իր հորը, թե ինչպես է պետք անել դժվար բանը: («Բարձրացրու գլուխդ և ուրախացիր», Լիահոնա, նոյ. 2018, 14)

• Մտածեք այն հատվածների շուրջ, որոնք այսօր կարդացել եք Հիսուս Քրիստոսի մասին: Այս երիտասարդ աղջիկն ինչպե՞ս հետևեց Նրա օրինակին:

Ձեր օրագրում գրեք հետևյալ երկու հարցերի պատասխանները՝ ուշադրություն դարձնելով Հոգու մտքերին կամ տպավորություններին.

• Ի՞նչ իմացաք այսօր Հիսուս Քրիստոսի մասին, որը կօգնի ձեզ հնազանդվել Երկնային Հորը, նույնիսկ, երբ Նա խնդրում է, որ դժվար բաներ անեք:

• Այսօրվա ձեր սովորածի կամ զգացածի արդյունքում ի՞նչ անելու ցանկություն առաջացավ ձեր մեջ։