Pisikal at Emosyonal na Kalusugan

Ang misyon ay maaaring maging kapwa masaya at puno ng hamon. Ang mga pamantayan sa bahaging ito at sa Pag-adjust sa Buhay-Missionary ay tutulong sa iyo na maihanda ang iyong isipan at katawan para mas mahusay na mapaglingkuran ang Panginoon. Regular na rebyuhin ang mga pamantayang ito sa buong misyon mo.

Ang iyong kalusugan at kaligtasan ay mahalaga. Panatihilin ang iyong kalusugan upang ikaw ay makapaglingkod nang buong puso, kakayahan, pag-iisip, at lakas (tingnan sa Doktrina at mga Tipan 4:2).

Ikaw at ang iyong pamilya ang responsable para sa iyong mga pangangailangang medikal. Kung minsan kailangan mong magpunta sa isang health care professional sa oras ng iyong paglilingkod bilang missionary. Sa ganitong mga sitwasyon, maaga pa lamang ay makipag-ugnayan na sa iyong mga service missionary adviser tungkol dito.

Ang pag-eehersisyo ay tutulong sa iyo na manatiling malusog at tanggalin ang stress. Gawing bahagi ng iyong pang-araw-araw na gawain ang pag-eehersisyo kung angkop sa iyong sitwasyon.

Maaaring napakaraming hinihingi ang gawaing misyonero. Normal lamang na makadama ng stress paminsan-minsan. Maaari mong ihanda ang iyong katawan at isipan na mas makayanan ang stress sa pamamagitan ng suporta ng pamilya.

Maaari mo ring matugunan ang stress sa pamamagitan ng regular na pagkain ng masusustansyang pagkain, regular na pag-eehersisyo, regular na pagtulog, pagpapahinga, at paggawa ng espirituwal na mga aktibidad. Maaaring kabilang sa gayong mga aktibidad ang pagdarasal, pagninilay, pag-aaral, at regular na pagsisimba.

Sa buong misyon mo, gamitin ang Pag-adjust sa Buhay-Missionary para matulungan kang matugunan ang stress. Kung nadarama mong nahihirapan ka sa pagtugon sa stress, o kung mayroon kang mental o emotional health emergency, kontakin ang iyong mga magulang o tagapag-alaga, bishop, o mga service missionary adviser.

Kung niresetahan ka ng gamot para sa iyong kondisyon o sakit, sundin ang reseta at mga tagubilin ng iyong doktor.

Bigyang-pansin ang iyong pisikal at emosyonal na kalusugan. Siguruhin na makukuha mo ang anumang kinakailangang suporta mula sa iyong mga magulang o tagapag-alaga para sa anumang pangangailangang medikal (tulad ng mga gamot na iniinom mo, mga allergy na mayroon ka, o mga aktibidad na dapat mong iwasan). Maaari mo ring ibahagi ang ilang partikular na impormasyong medikal sa iyong mga service missionary adviser o mga operations supervisor kung kinakailangan.

Kung mayroon kang health emergency, kumilos nang may mabuting pagpapasiya para mailigtas ka o magamot kaagad. Tumawag sa mga lokal na emergency service (tulad ng 911 sa Estados Unidos) maliban kung binigyan ka ng iba pang tagubilin. Kontakin ang iyong mga magulang o tagapag-alaga at mga service missionary adviser sa lalong madaling panahon.

Kung kailangan mo ng pangangalagang medikal na hindi naman emergency, kontakin kaagad ang iyong magulang o tagapag-alaga. Sasabihin nila sa iyo kung ano ang gagawin. Sikaping i-iskedyul nang maaga ang mga kailangang pangangalaga na hindi emergency para hindi ito makasagabal sa iyong paglilingkod o iskedyul.

Maraming posibleng panganib ang maiiwasan sa pamamagitan ng matalinong pagpapasiya at pagsunod sa mga pamantayan ng missionary sa hanbuk na ito. Gayunman, maaari ka pa ring maharap sa mapanganib na mga sitwasyon kahit na nag-iingat ka. Kung may problema, i-report ito kaagad sa iyong mga service missionary adviser.

Umalis kaagad kapag hindi ka na komportable sa isang lugar, tao, o sitwasyon. Palaging makinig sa mga espirituwal na pahiwatig.

Tumulong sa pangangalaga sa tahanan ng inyong pamilya at gawin ang iyong mga gawaing-bahay. Panatilihing maayos at malinis ang iyong kwarto. Panatilihing nasa maayos na kondisyon ang iyong mga personal na gamit, kabilang na ang mga electronic device.

Hindi ka dapat magpalipas ng gabi o tumira sa bahay ng mga teaching missionary.

Palaging sundin ang lokal na mga patakaran, batas, at mga tuntunin sa trapiko habang nagbibiyahe.

Ang pampublikong transportasyon ay karaniwang mas mura kaysa sa pagmamaneho. Kung mayroong pampublikong transportasyon, isaalang-alang ang paggamit nito sa pagpunta at pauwi sa iyong mga service assignment.

Maging matalino sa pagpapasiya, magkaroon ng kamalayan sa iyong paligid, at maging pamilyar sa inyong lugar. Sundin ang pangkalahatang mga pamantayan para sa kaligtasan na nasa hanbuk na ito.

Kung ikaw ay nasangkot sa isang aksidente habang nagmamaneho papunta o mula sa iyong missionary assignment, mga miting, o mga kumperensya, tumawag sa pulis o sa emergency services kung kinakailangan. Kontakin ang iyong pamilya sa lalong madaling panahon. Pagkatapos ay kontakin ang iyong mga service missionary adviser.

Kung ikaw ay nasangkot sa isang aksidente sa iyong service assignment, kausapin ang iyong service location supervisor. Ang taong iyon ang tatawag sa pulis o emergency services kung kinakailangan. Kontakin ang iyong pamilya at mga service missionary adviser sa lalong madaling panahon.

Ikaw ay hinihikayat na maging matalino sa pagba-budget at paggamit ng iyong personal na pondo. Ang perang gamit mo sa iyong misyon ay kumakatawan sa mga sakripisyong ginawa mo, ng iyong pamilya, at ng ibang tao.

Ipamuhay ang mga alituntunin ng pagbabayad ng ikapu at mga handog at pag-iipon ng pera.

Huwag manghingi ng pondo para sa iyong pansariling pinansiyal na suporta o para sa mga organisasyong pinaglilingkuran mo.

Bilang awtorisadong kinatawan ni Jesucristo at ng Kanyang ipinanumbalik na Simbahan, ang iyong kaanyuan kadalasan ang unang mensaheng natatanggap ng iba. Mag-suot ng damit na naaangkop sa iyong mga service assignment at naaayon sa iyong sagradong tungkulin.

Sa buong misyon mo, tiyakin na ang iyong kaanyuan at pag-uugali ay sumusuporta sa iyong sinasabi at ginagawa. Ang mga ito ay hindi dapat makagambala sa iyong layunin bilang missionary. Ang iyong pananamit at kaanyuan ay dapat kakitaan ng kababaang-loob, paggalang, at pananampalataya.

Ang paraan kung paano mo inaayos ang iyong sarili bilang missionary ay nakaiimpluwensya sa iniisip ng mga tao tungkol sa iyo at sa Simbahan ng Panginoon. Makatutulong din ito na maprotektahan ka laban sa panganib.

Ang angkop na pananamit at pag-aayos ng sarili ay isang mahalagang kasanayan sa buhay na makakatulong din sa iyo pagkatapos ng misyon mo. Kapag dumadalo sa mga zone conference, interbyu, at sumasama sa mga teaching visit, sundin ang mga pamantayan sa pananamit at pag-aayos ng sarili na matatagpuan sa Pananamit at Kaanyuan. Ang website na ito ay nagbibigay ng mga halimbawa ng angkop at propesyonal na damit para sa iyong misyon. Maaaring baguhin ng iyong mga mission leader at ng Area Presidency ang mga patnubay na ito para makatugon sa mga lokal na sitwasyon.