Librarya
Mga templo

“Mga Templo,” Mga Hilisgotan ug mga Pangutana (2023)

pamilya nga anaa sa mga nataran sa templo

Giya sa Pagtuon sa Ebanghelyo

Mga templo

Kita mapanalanginan kon mosimba kita diha sa balay sa Ginoo

Paghunahuna mahitungod sa labing matahom ug malinawon nga mga dapit nga inyong naadtoan. Unsay inyong nagustohan mahitungod niini? Unsa ang gipabati niini nganha ninyo? Kon kita mobisita o mosulod sa templo sa Ginoo, mobati usab kita og kalinaw. Apan dili kana ang hinungdan nga kini importante kanato. Ang mga templo dili sama sa bisan unsa nga laing lugar dinhi sa yuta tungod kay mga balay kini sa Ginoo. Sa sulod sa templo makahimo kita og mga pakigsaad aron mas mapaduol ngadto Kaniya ug makapangandam alang sa kinabuhing dayon.

Si Presidente Jeffrey R. Holland miingon: “Atong gihigugma ug gihatagan og bili ang atong gipahinungod nga mga templo ug ang mahinungdanon, makahimaya nga mga ordinansa nga gipahigayon didto. Nagpasalamat kita sa langit nga mas daghan pa niini ang gitukod, nga naghatag nato og mas dakong kahigayonan nga makasulod niini. Ang mga templo sa Ginoo sa pagkatinuod mao ang labing balaan, labing sagrado nga mga istruktura sa gingharian sa Dios.”

Unsa Ang Mga Templo?

Ang templo mao gayod ang balay sa Ginoo. Niining balaan nga mga bilding, ang takos nga mga miyembro sa Simbahan moapil sa sagradong mga ordinansa ug mohimo og mga pakigsaad ngadto sa Ginoo. Pananglitan, ang ordinansa sa pagselyo magtugot kanato nga makauban sa atong pamilya sa kahangtoran kon kita motuman sa atong mga pakigsaad. Diha sa mga templo makadawat usab kita og mga ordinansa alang sa atong mga katigulangan nga namatay na. Ang Ginoo mobisita sa Iyang mga templo, ug usa kini sa labing balaan nga mga dapit dinhi sa yuta.

Kinatibuk-ang pagpasabot sa hilisgotan: Mga Templo

May kalabotan nga mga giya sa pagtuon sa ebanghelyo: Mga Pakigsaad ug mga Ordinansa, Mga Ordinansa sa Pagtuga ug Pagselyo, Pag-apil diha sa Templo ug Buhat sa Family History, Puli nga mga Ordinansa alang sa mga Patay

Seksiyon 1

Ang Dios Nagsugo sa Iyang Katawhan sa Pagtukod og mga Templo

Konstruksiyon sa Tucson Arizona Temple

Ang Dios sa kanunay nagsugo sa Iyang katawhan sa pagtukod og mga templo. Ang mga templo sa Simbahan karon adunay daghang pagkasusama ngadto sa templo sa karaang kasulatan ug makita sa daghang kanasoran sa tibuok kalibotan. Lahi kini sa mga meetinghouse sa Simbahan, kay mao kini ang mga dapit diin kita mohimo og espesyal nga mga pakigsaad ug moapil sa sagrado nga mga ordinansa. Sa sulod sa balaan nga mga templo, ang mga miyembro sa Simbahan makapahigayon usab og mga ordinansa pinaagi sa puli [proxy] alang sa ilang namatay na nga mga katigulangan ug ubang mga indibiduwal nga walay kahigayonan nga madawat kini dinhi niini nga kinabuhi. Unya ang namatay na nga tawo makapili sa pagdawat niini nga mga ordinansa ug makadawat og kaluwasan ug kahimayaan.

Tanang butang diha balay sa Ginoo nagtudlo kanato mahitungod sa Langitnong Amahan, sa atong Manluluwas nga si Jesukristo, ug sa plano sa Dios alang sa kaluwasan. Ang mga templo mao ang mga dapit diin makapaduol kita sa Dios nga Amahan ug sa Iyang Anak. Kini mao ang sagrado nga mga dapit nga gitagana alang sa pagsimba ug panudlo. Diha sa templo, atong mabati ang Espiritu sa Dios ug ang Iyang gugma.

Mga butang nga angayang hunahunaon

  • Ang Templo sa Kirtland mao ang unang templo nga gitukod sa mga Santos sa Ulahing mga Adlaw. Nagkinahanglan kini og daghang sakripisyo, apan ang mga Santos gisaaran usab og daghang panalangin sa paghimo niadto nga mga sakripisyo. Basaha ang mahitungod niini nga mga saad diha sa Doktrina ug mga Pakigsaad 97:8–16. Dayon mahimo ninyong basahon ang mahitungod sa pipila ka espirituwal nga mga kasinatian nga nasinati sa mga Santos didto sa Templo sa Kirtland diha sa Doktrina ug mga Pakigsaad 110 ug diha sa kapitulo 21 sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 (2018), 263–75. Sa unsang paagi nga nabati ninyo ang presensya sa Ginoo diha sa Iyang balaan nga balay? Unsa ang uban pang mga panalangin nga inyong nadawat tungod kay ang templo natukod sa atong panahon? Mahimo usab ninyong pamalandongan kon unsa nga mga sakripisyo ang mahimo ninyong buhaton aron madawat ang mga panalangin gikan sa Ginoo diha sa Iyang balay.

  • Samtang walay duha ka templo nga magkaparehas gayod, ang matag templo adunay sama nga importante nga mga lawak sa pagdawat og mga panudlo, pag-apil sa sagrado nga mga ordinansa, ug paghimo og mga pakigsaad. Makakat-on pa kamo og dugang mahitungod sa katuyoan niini nga mga lawak pinaagi sa pagbasa sa mubo nga artikulo nga “Inside Temples” (ChurchofJesusChrist.org). Unsa ang inyong nakat-onan gikan sa artikulo nga nakapadasig ninyo sa pagsimba diha sa templo o mas kanunay nga paghimo niini?

Kalihokan alang sa pagkat-on uban sa laing mga tawo

  • Kon kamo makahimo, magdungan sa pag-adto sa duol nga templo. Tingali hilom kamo nga manglakaw libot sa mga nataran sa templo. O mahimo kamo nga motan-aw og mga hulagway sa mga templo. Samtang naghimo kamo niini, basaha o kantaha og hinay ang mga pulong sa “Gusto ko nga Makita ang Templo.” Dayon mopakigbahin sa usag usa sa inyong mga hunahuna o mga pagbati mahitungod sa templo. Mahimo usab ninyong hisgotan isip usa ka grupo kon ngano nga ang Ginoo nagsugo kanato sa pagtukod og mga templo sa atong panahon. Sa unsang mga paagi nga ang mga indibiduwal, mga pamilya, ug mga komunidad napanalanginan pinaagi sa pagtukod og daghan pang mga templo?

Pagkat-on pa og dugang

Seksiyon 2

Kita Adunay Akses ngadto sa Espirituwal nga Gahom ug Giya diha sa Balay sa Ginoo

tawo nga nag-ampo

Si Presidente Russell M. Nelson mitudlo: “Ang templo maoy usa ka dapit sa pagpadayag. Didto gipakita ninyo unsaon sa pag-uswag ngadto sa celestial nga kinabuhi. Didto kamo mas mapaduol ngadto sa Manluluwas ug hatagan og mas dakong akses sa Iyang gahom. Didto giyahan kamo sa pagsulbad sa mga problema sa inyong kinabuhi, bisan sa inyong labing makahasol nga mga problema.” Diha sa templo, makakaplag kamo og espirituwal nga tabang ug gahom. Makakaplag kamo og kahupayan ug kalig-on nga magpadayon atol sa mga hagit ug mga pagsulay.

Makapalambo kamo sa inyong abilidad sa pagdawat og espirituwal nga tabang ug giya diha sa balay sa Ginoo samtang kamo nag-andam sa inyong kaugalingon ug nagtinguha nga makabaton og “malinis og mga kamot, ug may usa ka putli nga kasingkasing” (Salmo 24:4). Niining malinawon, sagrado, gipahinungod nga dapit, sa kanunay mas sayon nga mobati nga duol Kaniya ug madungog ang mga pag-aghat sa Iyang Espiritu.

Mga butang nga angayang hunahunaon

  • Tingali kamo adunay importante nga pangutana o lisod nga hagit. Nakahunahuna ba kamo nga mogahin og panahon didto sa templo aron mangayo og giya sa Ginoo? Hunahunaa kon sa unsang paagi nga ang pag-apil sa mga ordinansa sa templo mahimong makatabang ninyo nga makabaton og katin-awan sa inyong pangutana o hagit. Kon kamo walay rekomend sa templo, mahimo kamo nga maglakaw-lakaw libot sa mga nataran sa templo ug mogahin og pipila ka oras sa pag-ampo ug sa pagpamalandong didto. Ikonsiderar ang pagrekord sa bisan unsa nga mga pag-aghat nga inyong nadawat.

Kalihokan alang sa pagkat-on uban sa laing mga tawo

  • Si Presidente Nelson mitudlo: “Akong minahal nga mga kaigsoonan, hinaot nga kamo magpunting sa templo sa mga paagi nga wala pa ninyo mabuhat sukad. Ako mopanalangin kaninyo nga mas mapaduol ngadto sa Dios ug kang Jesukristo matag adlaw.” Aron masabtan kon unsa ang ipasabot sa pagpunting sa templo, mahimo ninyong hisgotan ang mahitungod sa mga instrumento nga makatabang nato nga makapunting sa atong panan-aw. Mahimo kamo nga magpulipuli sa pagtan-aw gamit ang mga antiyohos, mga antipara, o teleskopyo (o sa pagtan-aw sa litrato sa usa niini nga mga aytem). Dayon hisgoti ang mahitungod sa paagi nga inyong mapalambo ang inyong pagpunting sa templo sa mga paagi nga wala ninyo buhata kaniadto. Mahimo usab ninyong pamalandongan ug irekord ang mga panalangin nga inyong nadawat samtang nagpunting kamo sa templo sulod sa sunod nga pipila ka bulan.

Pagkat-on pa og dugang

Seksiyon 3

Ang Ginoo Nagdapit sa Tanan sa Pag-adto sa Templo

Gusto sa Ginoo nga ang tanan moadto sa Iyang balaan nga balay ug mohimo og mga pakigsaad ngadto Kaniya. Apan gusto usab Niya nga kita mangandam una. Siya nasayod nga ang paghimo niana nga mga pakigsaad nga dili kita andam sa tinuoray makahatag og limitasyon sa atong abilidad sa pagtagamtam sa mga panalangin sa templo. Mao nga nagtakda Siya og mga sumbanan sa espirituwal nga kaandam sa pagsulod sa templo—mga sumbanan nga Siya nagdapit sa tanan nga kinahanglang sundon aron ang tanan makadawat sa Iyang mga panalangin.

Aron makasulod sa templo, kinahanglan nga kamo adunay rekomend sa templo, nga inyong madawat human sa usa ka interbiyo sa inyong mga lider sa pagkapari. Ang ilang dinasig nga giya motabang ninyo nga masayod kon unsaon sa pagpangandam aron makadawat sa mga ordinansa sa templo. Ang inyong rekomend usa ka pisikal nga timailhan sa inyong personal nga pagpangandam sa pagsulod sa balay sa Ginoo. Timailhan kini nga kamo naningkamot sa pagsunod sa mga sugo sa Dios. Nagpasabot kini nga kamo, ang Ginoo, ug ang Iyang mga representante “nagrekomendar” kaninyo sa pagsulod ngadto sa balay sa Ginoo.

Dayon sa higayon nga kamo nakadawat na sa pagtuga ug ubang mga ordinansa, ayaw og hunong diha! Pangandam sa pagbalik sa balay sa Ginoo ug pagkat-on pa og dugang. Si Sister Silvia H. Allred mitudlo, “Kitang tanan nakadawat og sama nga panudlo, apan ang atong pagsabot sa kahulugan sa mga ordinansa ug sa mga pakigsaad madugangan sa atong pagbalik og adto sa templo kanunay inubanan sa kinaiya sa pagkat-on ug sa pagpamalandong sa mahangtoron nga mga kamatuoran nga gitudlo.”

Mga butang nga angayang hunahunaon

  • Paghunahuna og usa ka butang nga importante nga kinahanglan ninyong pangandaman, sama sa eksamin sa eskwelahan, interbiyo alang sa trabaho, o leksiyon sa simbahan. Giunsa man ninyo sa pagpangandam? Unsa kaha ang mahitabo kon wala kamo mangandam? Dayon pamalandongi kon ngano nga kinahanglan kita nga mangandam sa pagsulod sa balay sa Ginoo. Mahimo ninyong basahon ang Exodo 40:7–15 ug ikonsiderar kon unsay gihimo ni Aaron ug sa iyang mga anak nga lalaki sa pagpangandam sa pagsulod sa tabernakulo. Mahimo ninyong basahon ang Doktrina ug mga Pakigsaad 97:15–16 ug pamalandongi kon unsay ipasabot niini nganha ninyo nga magbaton og putli nga kasingkasing. Ikonsiderar kon aduna bay mga paagi nga kamo makapaningkamot nga magbaton og mas putli nga kasingkasing ug mas maandam sa espirituwal nga paagi sa pagsimba diha sa balay sa Ginoo.

Kalihokan alang sa pagkat-on kauban ang laing mga tawo

  • Human sa kamatayon ug Pagkabanhaw sa Manluluwas, mibisita Siya sa katawhan sa Amerika. Ang unang lugar nga Siya mipakita mao didto sa templo sa Bountiful. Basaha sa 3 Nephi 11:1–10, ug hisgoti kon ngano nga ang Ginoo mipili sa pagpakita sa katawhan diin Siya mipakita. Si Presidente Russell M. Nelson miingon bahin niini nga pagbisita: “Importante kini nga ang Manluluwas mipili sa pagpakita sa katawhan diha sa templo. Iya kini nga balay. … Ako mosaad nga ang paggahin og mas dako nga oras diha sa templo mopanalangin sa inyong kinabuhi sa mga paagi nga walay laing makahimo.” Hisgoti kon ngano nga ang Ginoo gusto usab nga kita moadto sa templo. Kon nakaadto na kamo sa templo, hunahunaa ang mga panalangin nga inyong nadawat tungod sa pag-adto. Kon kamo walay templo sa duol o sa kasamtangan dili makasimba diha sa templo tungod sa laing mga rason, mahimo kamo nga maghisgot og mga paagi nga ang templo mahimo gihapon nga importante nga bahin sa inyong kinabuhi, sama sa kanunay nga pagpamalandong sa mga panalangin nga atong madawat gumikan sa pagsimba sa templo o sa paghinumdom sa inyong mga pakigsaad sa templo.

  • Makita ninyo ang mga pangutana sa rekomend sa templo diha sa Alang sa Kalig-on sa mga Kabatan-onan: Usa ka Giya alang sa Paghimo og mga Pagpili (2022), mga pahina 36–37. Aron matabangan ang usag usa nga makasabot sa mga sumbanan sa Ginoo sa pagsulod sa templo, matag usa ninyo mahimong mokuha og usa sa mga pangutana nga tun-an. Mahimo ninyong gamiton ang Giya ngadto sa mga Kasulatan ug ubang mga materyal sa Simbahan sa pagkat-on pa og dugang mahitungod sa hilisgotan sa pangutana. Pangutan-a ang inyong kaugalingon, Ngano nga importante man kini nga bahin sa pagpangandam alang sa templo? Dayon mopakigbahin sa usag usa sa unsay inyong nakat-onan.

Pagkat-on pa og dugang