Mga Gasa sa Espiritu

Si Apostol Pablo mitudlo nga sama nga ang matag kabahin sa lawas adunay importante nga katuyoan, ang matag espirituhanon nga gasa gikinahanglan ngadto sa “lawas ni Kristo,” o ang lawas sa Simbahan (1 Mga Taga-Corinto 12:27). Ikonsiderar ang pagbasa sa 1 Mga Taga-Corinto 12:12–30 ug dayon mamalandong kon sa unsa nga paagi nga ang atong espirituhanon nga mga gasa magkatambayayong alang sa pagpanalangin sa tanan. Sa unsa nga paagi inyong nakita ang espirituhanon nga mga gasa sa uban nga nagtambayayong, sama sa mga parte sa lawas nga nagtambayayong? Sa unsang paagi kamo napanalanginan tungod sa espirituhanon nga mga gasa sa lain? Mahimo usab nga inyong pamalandongan ang inyong espirituhanon nga mga gasa ug sa unsang paagi kini makatabang sa pagpalig-on sa gingharian sa Dios. Buhata ang bisan unsang pag-aghat nga inyong madawat.

Kon kita moambit sa sakramento, gisaaran kita nga makabaton kita kanunay sa Espiritu Santo nga magauban kanato—ug pinaagi sa gahom sa Espiritu Santo nga madawat nato ang espirituhanon nga mga gasa. Ikonsiderar ang pagbasa sa mga pag-ampo sa sakramento (tan-awa sa Doktrina ug mga Pakigsaad 20:77, 79) ug mamalandong kon sa unsang paagi nga ang paghimo ug pagtuman sa inyong mga pakigsaad makatabang ninyo nga maandam sa pagdawat og espirituhanon nga mga gasa.

Nalig-on ba ang inyong pagpamatuod pinaagi sa ubang tawo? Tingali makahinumdom ka og piho nga panghitabo dihang ang hugot nga pagtuo sa usa ka tawo nakapalig-on sa inyoha. O tingali mabati ninyo ang mga kaayohan sa pagpamatuod sa higala o sakop sa pamilya kada adlaw. Sa Doktrina ug mga Pakigsaad 46:13–14, makat-onan nato nga ang pagtuo sa pagpamatuod sa usa ka tawo ni Jesukristo usa ka espirituhanon nga gasa. Mahimo ninyong tan-awon kini nga bidyo ni Presidente Dieter F. Uchtdorf nga naghulagway giunsa niya pagdawat kana nga gasa isip usa ka batan-ong lalaki pinaagi sa mga ehemplo, gugma, ug pagserbisyo sa iyang mga higala. Dayon pakigbahin sa usag usa og susama nga mga kasinatian nga inyong nasinati uban niini nga espirituhanon nga gasa. Sa unsang paagi nga napanalanginan ang inyong kinabuhi pinaagi sa matinud-anong mga ehemplo niadtong anaa sa inyong palibot?

Mga Taga-Roma 12:4–8; Moroni 10:24–25

Dallin H. Oaks, “Spiritual Gifts,” Ensign, Sept. 1986, 68–72

“Mga Gasa sa Espiritu,” Mga Pagtulun-an sa mga Presidente sa Simbahan: Joseph Smith (2011), 135–46

Ang pagdiskobre sa espirituhanon nga mga gasa magkinahanglan og hugot nga pagtuo, apan ang Ginoo makagiya ninyo sa proseso. Tingali mahimo ninyong basahon ang Doktrina ug mga Pakigsaad 112:10 ug mamalandong kon sa unsa nga paagi nga ang Dios makatabang ninyo sa pagdiskobre sa inyong espirituwal nga mga gasa. Dayon hangyoa ang Dios diha sa inyong mga pag-ampo sa pagtabang ninyo nga makat-on mahitungod sa espirituhanon nga mga gasa nga Iyang gihatag kaninyo. Mahimo usab ninyong hangyoon ang mga sakop sa pamilya, mga higala ug ma mentor sa pagtabang ninyo nga makaila sa espirituhanon nga mga gasa nga gipanalangin kaninyo. Sa inyong pagdiskobre sa inyong espirituhanon nga mga gasa irekord kini aron ikaw makahinumdom niini ug makat-on pa og dugang mahitungod niini.

Sa atong pagdiskobre sa atong mga espirituhanon nga mga gasa, ang Ginoo makalihok pinaagi kanato sa pagpanalangin niadtong anaa sa atong palibot. Sa iyang pakigpulong ““Ako Adunay Buhat alang Kanimo”,” si Elder John C. Pingree Jr. mipakigbahin og usa ka istorya mahitungod sa usa ka babaye nga gihatagan og espirituhanon nga gasa sa pagtagad sa uban. Miingon siya, “nakaplagan niya ang kalipay sa pagtagad niadtong kanunay nga makalimtan, ug ang Dios mitrabaho pinaagi kaniya sa pagpanalangin og daghan.” Rebyoha ang seksiyon nga giulohan og “Diskobrehi ug Palamboa ang Espirituhanong mga Gasa” sa mensahe ni Elder Pingree. Unsa nga espirituhanong mga gasa ang anaa ninyo nga makatabang ninyo sa pagtuman sa buhat sa Dios alang ninyo? Aduna bay espirituhanong mga gasa nga inyong madiskobrehan nga makatabang ninyo sa inyong personal nga pangalagad? Isulat ang bisan unsa nga mga impresyon nga inyong madawat, ug dayon buhata kini.

Ang uban sa atong espirituhanong mga gasa tingali dili klaro ngari nato sama sa uban. Pananglitan, ang pipila ka indibidwal adunay “gasa nga mohatag og paghukom; sa gasa sa pagduol sa Dios alang sa giya; sa gasa sa pagkahimong disipulo; sa gasa sa pag-atiman sa uban; sa gasa nga makahimo sa pagpamalandong; sa gasa sa paghalad og pag-ampo; [ug] sa gasa sa paghatag og gamhanan nga pagpamatuod.” Unsa ang pipila sa espirituhanong mga gasa ang inyong nakita sa uban sa inyong grupo? Isulat unsay mosulod sa hunahuna, ug dayon hisgoti sa unsa nga paagi kini nga mga gasa usa ka panalangin sa tanan. Mahimo usab ninyong timan-an ang espirituhanong mga gasa nga namatikdan sa inyong grupo ug ikonsiderar unsaon ninyo nga mapalambo kini.

Si Elder Joseph B. Wirthlin mitudlo: “Ako mag-aghat kaninyo sa pagsusi sa inyong kinabuhi. Tinoa kon asa kamo ug unsay angay ninyong buhaton nga mahimong tawo sama sa inyong gusto. Paghimo og makadasig, dungganon, ug matarong nga mga tumong nga modasig sa inyong imahinasyon ug momugna og kahinam sa inyong kasingkasing. Dayon itumong ang inyong panan-aw niini. Lihok kanunay sa pagtuman niini.” Unsaon ninyo sa paggamit niini nga tambag sa pagtinguha ug sa pagpalambo og espirituhanong mga gasa? Sa unsang paagi nga kining mga gasa motabang ninyo nga mahimong mas sama ni Jesukristo? Tingali mahimo ninyong isulat ang usa ka espirituhanong gasa nga inyong gilaoman nga mapalambo ug usa ka ideya kon unsaon ninyo sa pagsugod sa paghimo niini. Samtang kamo magtinguha sa pag-angkon ug sa paggamit niana nga gasa, subaya kon sa unsang paagi kini nagpanalangin kaninyo sa inyong inadlaw-adlaw nga kinabuhi ug sa unsang paagi kini mipanalangin sa uban. Mahimo usab nga mohalad kamo o0g pag-ampo sa pasalamat sa pagpasalamat alang sa espirituhanong mga gasa nga gihatag kanimo (tan-awa sa Doktrina ug mga Pakigsaad 46:32).

Ang pagkahimong mas sama ni Kristo pinaagi sa espirituhanong mga gasa nagkinahanglan og pagbansay. Si Elder Juan Pablo Villar miingon: “Adunay posibilidad nga hatagan kita sa [Langitnong Amahan] og mga kahigayonan sa pagpalambo niana nga [espirituhanong] mga gasa kaysa ihatag lang kini kanato nga walay espirituhanon ug pisikal nga paningkamot. Kon ang Iyang Espiritu anaa kanato, makat-on kita sa pag-ila niana nga mga kahigayonan ug dayon buhaton kini.” Tan-awa ang bidyo “Faith and the Goal” (4:40), ug hisgoti ang mahitungod sa paningkamot nga himoon sa pagpabarog og pisikal nga tolda. Dayon hisgoti ang paningkamot nga gikinahanglan sa pagpalambo og espirituhanong mga gasa. Unsa nga mga oportunidad ang inyong mapahimuslan sa pagbansay sa inyong espirituhanong mga gasa? Sa unsa nga paagi nga ang pagpaningkamot sa inyong espirituhanong mga gasa motabang niini nga mahimong kabahin kaninyo?

Tingali adunay mga panahon nga mahinumdom kita sa paggamit sa atong espirituhanong mga gasa ug sa ubang mga higayon makalimot. Mahitabo kana—walay usa nga perpekto. Unsay labing importante mao nga dapiton nato ang Ginoo ngadto sa proseso. Ikonsiderar ang pagkanta sa himno “Dugang Kabalaan Hatagi Ako.” Matikdi kon sa unsang paagi nga ang mga pulong nangamuyo nga mahimong mas sama sa Manluluwas. Unsaon ninyo sa pagpangayo sa giya sa Dios sa paggamit sa inyong espirituhanong mga gasa aron kamo mahimong mas sama Kaniya? Mahimo usab ninyong isulat ang espirituhanong mga gasa nga nahisgotan sa himno ug mopili sa pagkat-on pa og dugang mahitungod niini diha sa Giya ngadto sa mga Kasulatan. Hisgoti unsay inyong nakaplagan mahitungod niini nga mga gasa ug sa inyong mga ideya alang sa pagpalambo niini.

Mateo 25:14–30; Mga Hebreo 11:1–35; Doktrina ug mga Pakigsaad 93:12–13

Henry B. Eyring, “Gifts of the Spirit for Hard Times,” Ensign, June 2007, 18–24

Gary E. Stevenson, “Mga Pag-aghat sa Espiritu,” Liahona, Nob. 2023, 42–45

George Q. Cannon, “Pagtinguha sa Espirituhanong mga Gasa,” Liahona, Abr. 2016, 80