Librarya
Paglahutay hangtod sa Kataposan

“Paglahutay hangtod sa Kataposan,” Mga Hilisgotan ug Mga Pangutana (2023)

batan-ong babaye sa siyudad

Giya sa Pagtuon sa Ebanghelyo

Paglahutay hangtod sa Kataposan

Magpabilin nga matinud-anon sa atong mga pasalig ngadto sa Dios, bisan unsa pay mahitabo

Hunahunaa nga kamo hapit na modagan sa dakong lumba. Sa inyong pagsugod, puno kamo sa kalagsik ug andam sa paghimo sa buluhaton nga anaa sa unahan. Apan ang lumba layo ug lisod. Ang kakapoy miabot—bisan ang kaluya. Apan mipadayon kamo sa kompetisyon, nagpadayon sa pagdagan hangtod sa kataposan nakatabok kamo sa linya sa pagtapos, mapagarbohon nga nakalahutay kamo hangtod sa kataposan.

Sa dihang gidawat nato ang ebanghelyo ni Jesukristo, nagsugod kita og tibuok kinabuhi nga panaw. Sa ubang mga adlaw tingali kita mobati nga puno sa paglaom ug determinasyon—sa ubang adlaw ang dalan tingali morag taas ug lisod. Apan dili kita moundang. Hinuon, mosalig kita sa saad sa Ginoo nga Siya dili gayod mobiya kanato o motalikod kanato (tan-awa sa Mga Hebreo 13:5), ug mopili kita matag adlaw nga “mopadayon sa unahan uban ang pagkamakanunayon diha kang Kristo” (2 Nephi 31:20).

Unsa ang Paglahutay hangtod sa Kataposan?

Ang paglahutay hangtod sa kataposan nagpasabot nga magpabilin nga matinud-anon sa atong pasalig ngadto sa Dios ug sa Iyang mga sugo sa atong tibuok kinabuhi. Naglakip kini sa paghimo og mga pakigsaad uban Kaniya, maghinulsol matag adlaw, ug pagsalig sa gahom ni Jesukristo sa pagtabang nato nga mabuntog ang mga pagsulay, mga tentasyon, ug oposisyon. Ang tanan nga molahutay hangtod sa kataposan makadawat sa gasa sa kinabuhing dayon ug mobalik sa pagpuyo uban sa Dios (tan-awa sa Mateo 10:22).

May kalabotan nga mga giya sa pagtuon sa ebanghelyo: Kabubut-on, Mga Pakigsaad ug mga Ordinansa, Pagkamortal

Seksiyon 1

Ang Dios Nagsaad Nga Kita Makadawat og Kinabuhing Dayon Kon Kita Molahutay hangtod sa Kataposan

Si Kristo ug ang adunahan nga batan-ong magmamando

Ang gasa nga labing mahinungdanon sa tanang gasa sa Dios mao ang kinabuhing dayon (tan-awa sa Doktrina ug mga Pakigsaad 14:7). Kini nga gasa ihatag niadtong kinsa modawat sa ebanghelyo ug magpabilin nga mapasaligon niini (tan-awa sa 3 Nephi 15:9). Ang paglahutay hangtod sa kataposan mas labaw pa kay sa pagsugakod og usa ka pagsulay o hagit. Usa kini ka inadlaw nga paningkamot nga “moduol ni Kristo ug magmahingpit diha Kaniya” sa tibuok kinabuhi. Si Elder Kevin W. Pearson mipasabot nga ang “paglahutay hangtod sa kataposan usa ka ilhanan sa tinuod nga pagkadisipulo.”

Mga butang nga angayang hunahunaon

  • Nakasinati si Jesukristo sa labing grabe nga pagsulay sa paglahutay hangtod sa kataposan sa dihang nag-antos Siya alang sa atong mga sala atol sa Iyang Pag-ula. Basaha ang Lucas 22:42 ug 3 Nephi 11:11. Unsay inyong nakat-onan sa ehemplo ni Kristo nga makatabang ninyo sa paglahutay hangtod sa kataposan? Unsaon ninyo sa pagsalig sa Iyang Pag-ula samtang maningkamot ka sa paglahutay hangtod sa kataposan ug modawat og kinabuhing dayon? Irekord ang bisan unsa nga mga impresyon nga inyong nadawat, ug dayon buhata kini.

  • Ang paglahutay hangtod sa kataposan tingali kon paminawon morag molungtad og taas nga panahon—taas kaayo, gani, tingali kana mora og imposible. Apan kon hinumdoman ninyo nga ang paglahutay hangtod sa kataposan mahitabo sa hinahinay, tingali dili kaayo lisod. Si Presidente Thomas S. Monson mitudlo: “Pangitaa ang langitnong giya usa ka adlaw matag higayon. Kon kanunay kitang mabalaka sa ugma lisud kana; kon tarungon maayo ra. Matag usa kanato mahimong matinuoron sa usa lang ka adlaw—dayon usa pa ug usa pa gayud—hangtud nga magpakabuhi kita nga gigiyahan sa Espiritu, nga duol sa Ginoo, nga maayo og binuhatan ug kamatarung sa tibuok kinabuhi.” Unsa nga inadlaw nga mga pagpili ang inyong mahimo aron mahimong matinud-anon sa ebanghelyo ni Jesukristo? Sa unsa nga paagi nga kadtong mga pagpili makatabang ninyo sa paglahutay hangtod sa kataposan? Tingali makapili kamo og usa ka Kristohanong hiyas nga gusto ninyong palamboon ug dayon mainampoong modapit sa Ginoo sa pagtabang ninyo nga maangkon kini samtang maningkamot kamo sa pagsunod sa Kaniya matag adlaw.

Mga kalihokan alang sa pagkat-on kauban ang laing mga tawo

  • Ang mga kasulatan nagtudlo nga kita makadawat og kinabuhing dayon pinaagi sa paglahutay hangtod sa kataposan. Apan unsay dagway sa paglahutay hangtod sa kataposan? Basaha pagdungan ang Mga Taga-Roma 2:7; 2 Nephi 31:19–20; ug Doktrina ug mga Pakigsaad 59:23, ug dayon hisgoti unsay inyong nakat-onan gikan niini nga mga bersikulo mahitungod kon unsaon sa paglahutay hangtod sa kataposan. Mahimo usab nga inyong kantahon o basahon ang himno “Padayon mga Santos” (Mga Himno, nu. 42) isip usa ka grupo ug dayon hisgotan ang mahitungod sa bisan unsa nga mga pulong nga makapadasig ninyo sa pagpadayon sa unahan ug modawat sa gasa sa kinabuhing dayon.

  • Sa iyang mensahe “Wala ba Kitay Rason nga Maglipay?” Si Elder Dieter F. Uchtdorf mitudlo nga dili kinahanglan nga molahutay kita sa atong kaugalingon lamang. Miingon siya: “Ang paglahutay hangtod sa kataposan dili kay usa lamang ka matang sa pag-uyon sa malisod nga mga kahimtang sa kinabuhi o “magpabilin lamang diha.’ Ang ato usa ka aktibo nga relihiyon, motabang sa mga anak sa Dios subay sa pig-ot ug higpit nga dalan aron pagpalambo sa ilang hingpit nga potensyal niini nga kinabuhi ug mobalik ngadto Kaniya unya sa umaabot.” Tan-awa pagdungan ang bahin sa mensahe ni Elder Uchtdorf sa bidyo “Endure to the End” (2:05). Dayon ipakigbahin kini nga mga ideya aron sa pagtabang sa usag usa nga magpabilin diha sa dalan nga paingon sa kinabuhing dayon. Mahimo usab nga mopakigbahin kamo sa usag usa og pipila ka kasinatian sa dihang ang usa ka tawo mitabang kaninyo nga matinud-anong milahutay og usa ka pagsulay.

Pagkat-on pa og dugang