Ang Simbahan ni Jesukristo sa mga Santos sa Ulahing mga Adlaw

Mahimo ninyong tan-awon ang bidyo nga “Living Apostles Testify of Jesus Christ” aron maminaw sa gamhanan nga mga pagpamatuod sa mga sakop sa Korum sa Napulog Duha ka Apostoles bahin sa Manluluwas ug sa Iyang misyon. Sa unsang paagi nga ang mga pagpamatuod sa apostoles ug sa mga propeta ug sa ubang mga lider sa Simbahan nakatabang ninyo nga masayod nga kini ang gipahiuli nga Simbahan sa Dios? Nganong importante man nga ang Simbahan ni Jesukristo pagadumalaon sa apostoles ug mga propeta karon? Unsa ang inyong gibuhat o unsa ang inyong buhaton aron masayod mismo sa inyong kaugalingon nga ang atong mga lider sa Simbahan gitawag sa Dios ug kini mao ang Iyang gipahiuli nga Simbahan dinhi sa yuta karon?

Si Presidente Dallin H. Oaks mitudlo: “Unsa ang buot ipasabot nga Ang Simbahan ni Jesukristo sa mga Santos sa Ulahing mga Adlaw mao lamang ang tinuod nga Simbahan? Tulo ka ilhanan [feature]—(1) kahingpitan sa doktrina, (2) gahom sa [pagkapari], ug (3) pagpamatuod ni Jesukristo—mopasabot ngano ang Dios mideklarar ug nganong kita isip Iyang mga sulugoon mihupot nga kini lamang ang tinuod ug buhi nga Simbahan sa ibabaw sa tibuok yuta.” Hisgoti kining tulo ka ilhanan ug kon ngano nga mahinungdanon kini nga bahin sa tinuod nga Simbahan sa Dios. Mopakigbahin og mga kasinatian nga nakatabang ninyo aron mahibalo nga Ang Simbahan ni Jesukristo sa mga Santos sa Ulahing mga Adlaw mao lamang ang tinuod ug buhi nga Simbahan sa Manluluwas. Hisgoti kon sa unsa nga paagi nga kana nga kahibalo nakapanalangin sa inyong kinabuhi.

Ang mga Artikulo sa Hugot nga Pagtuo 1:6

“Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan,” Librarya sa Ebanghelyo

“Ang Pagsugod sa Simbahan ni Kristo,” kapitulo 8 diha sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 (2018), 85–101

Basaha ug pamalandongi ang Juan 15:16. Unsa ang ipasabot niini nganha ninyo nga ang Dios mipili ninyo aron sa pagtabang nga matuman ang Iyang buhat sa Iyang Simbahan? Sa unsang paagi nga kamo mibati og kalipay sa pagtabang Kaniya sa Iyang buhat sa kaluwasan ug kahimayaan? Sa unsang paagi nga kamo napanalanginan samtang mipatalinghog kamo niini nga mga pagbati? Irekord ang inyong mga hunahuna diha sa inyong journal, ug ikonsiderar kon aduna bay usa ka butang nga inyong gikonsiderar nga buhaton nga may kalabotan sa buhat sa Dios nga wala pa ninyo mabuhat. Dayon paghimo og tumong sa pagbuhat niini.

Si Elder John C. Pingree Jr. mipahinumdom nato nga ang buhat sa Dios “wala itagana sa pipila lang apan alang natong tanan—bisan pa sa gender, kaliwat, nasyonalidad, gidak-on sa kinitaaan, sosyal nga kahimtang, o calling sa Simbahan. Matag usa nato adunay makahuluganong tahas nga buhaton sa pagpadayon sa buhat sa Dios (tan-awa sa Moises 1:39).” Siya mipadayon: “Ang pipila nato mangutana kon ang Langitnong Amahan makagamit ba kanato sa paghimog importante nga mga kontribusyon. Apan hinumdomi, gigamit Niya kanunay ang ordinaryo nga mga tawo sa pagbuhat sa dili ordinaryo nga mga butang (tan-awa sa 1 Mga Taga-Corinto 1:27–28; D&P 35:13; 124:1).” Mahimo ninyong hisgotan ang pipila sa dili ordinaryo nga mga butang nga inyong nakita nga gibuhat sa ordinaryo nga mga miyembro sa Simbahan sa pagtabang sa buhat sa Dios sa kaluwasan ug kahimayaan. Tingali maghimo kamo og usa ka tumong sa pagbuhat og usa ka butang nga manag-uban karong semanaha sa pagpalambo sa buhat sa Dios. Mahimo dayon ninyong hisgotan kon unsay inyong nakat-onan gikan sa kasinatian o unsa ang inyong gibati samtang nagserbisyo kamo.

Mateo 5:13–16; Mga Taga-Efeso 4:11–15; Mosiah 18:27–29; Moroni 6:4–9

Dallin H. Oaks, “Ang Panginahanglan alang sa usa ka Simbahan,” Liahona, Nob. 2021, 24–26

“How the Church Is Organized” (bidyo), Gospel Library

Si Elder Gerrit W. Gong miobserbar: “[Ang Ginoo] mihangyo nato nga himoon ang Iyang [Simbahan] nga dapit sa grasya ug luna, diin ang matag usa makapundok, nga adunay luna ang tanan. Isip mga disipulo ni Jesukristo, ang tanan managsama, nga walay ubos nga klase nga mga grupo. Ang tanan giabi-abi sa pagtambong sa mga panagtigom alang sa sakramento, sa ubang mga miting sa Dominggo, ug sosyal nga mga kalihokan. Kita mosimba nga may balaang pagtahod sa atong Manluluwas, mahunahunaon ug mokonsiderar sa usag-usa. Kita motan-aw ug moila sa matag tawo. Kita mopahiyom, motupad niadtong nag-inusara, makig-ilaila, lakip na sa bag-ong mga kinabig, bag-ong mibalik og simba nga kaigsoonan, mga batan-ong babaye ug mga batan-ong lalaki, matag minahal nga bata sa Primary. Maghunahuna sa atong kaugalingon nga anaa sa ilang dapit, kita moabi-abi sa mga higala, mga bisita, mga bag-ong mibalhin, mga indibidwal nga nagkapuliki sa pag-atiman sa daghan kaayong buluhaton.” Unsa ang pipila ka paagi nga kamo makaduol ug makatabang sa uban nga masayod nga sila gihangop sa atong mga miting ug nahisakop sa Simbahan ni Jesukristo? Kinsa ang mahimo ninyong tabangan? Ikonsiderar ang paghimo og tumong sa pagbuhat og usa ka butang aron ipakita sa uban nga kamo nagpakabana kanila ug sila nahisakop sa inyong ward o branch.

Gusto ni Jesukristo nga ang tanan moduol ngadto Kaniya ug sa Iyang Simbahan, ug kita makatabang pinaagi sa paghimo og yano, sinsero nga mga pagdapit niadtong anaa sa atong palibot. Si Elder Gary E. Stevenson mipakigbahin: “Adunay daghan kaayong mga pagdapit nga mahimo natong ipaabot sa uban. Kita [makaimbitar] sa uban sa ‘pagduol ug pagtan-aw’ sa usa ka tulumanon sa sakramento, usa ka kalihokan sa ward, usa ka online nga video nga nagpasabot sa ebanghelyo ni Jesukristo. Ang ‘pagduol ug pagtan-aw’ mahimong mao ang usa ka imbitasyon sa pagbasa sa Basahon ni Mormon o pagbisita sa usa ka bag-o nga templo atol sa open house niini sa dili pa kini ipahinungod. Usahay, ang pagdapit mao ang usa ka butang nga atong ipaabot ngadto sa kahiladman—usa ka pagdapit sa atong kaugalingon, maghatag kanato og kaigmat ug panglantaw sa mga oportunidad nga naglibot kanato aron lihokon. Sa atong digital nga panahon, ang mga miyembro sagad mopakigbahin og mga mensahe pinaagi sa social media. Adunay mga gatosan, kon dili mga liboan, nga mga makadasig nga mga butang nga tingali inyong makita nga takos nga ipaambit.” Hisgoti ang pipila ka pagdapit nga mahimo ninyong buhaton karong semanaha, ug dayon magpundok ug moreport og balik sa inyong mga kasinatian.

Hangyoa ang usa ka tawo diha sa grupo sa pagdrowing og yano nga hulagway sa usa ka lawas, ug hisgoti kon sa unsang paagi nga ang lainlaing bahin (sama sa mga kamot, mga tiil, mga mata, ug mga dunggan) importante. Dayon basaha og dungan ang 1 Mga Taga-Corinto 12:12–18 ug hisgoti kon unsay inyong nakat-onan. Sa unsang paagi nga magamit nato kini nga mga bersikulo ngadto sa atong pagkamiyembro sa Simbahan? Si Presidente Boyd K. Packer mitudlo: “Nagkinahanglan kita sa bag-ong mga kinabig ug kadtong nagagikan sa mga pioneer. Kinahanglan natong pangitaon kadtong nahisalaag ug tabangan sila nga makabalik ngadto sa panon. Nagkinahanglan kita sa kaalam ug panabot ug espirituhanong kalig-on sa tanan. Ang kada miyembro sa Simbahan isip indibiduwal usa ka importante kaayo nga elemento sa lawas sa Simbahan.” Mahimo kamo nga magsulat og usa ka butang nga inyong buhaton karong semanaha sa pagtabang sa usa ka tawo sa inyong ward o branch nga masayod kon unsa sila ka importante. Mahimo dayon kamo nga moreport og balik sa unsay inyong nahimo.

1 Mga Taga-Corinto 12:12–27; Moises 1:39

D. Todd Christofferson, “Ang Doktrina sa Pagkasakop,” Liahona, Nob. 2022, 53–56

D. Todd Christofferson, “Nganong Anaa ang Simbahan,” Liahona, Nob. 2015, 108–11

Mga Hilisgotan ug mga Pangutana, “Diversity and Unity in The Church of Jesus Christ of Latter-day Saints [Panaglahi ug Panaghiusa diha sa Ang Simbahan ni Jesukristo sa mga Santos sa Ulahing mga Adlaw],” Gospel Library

“Unity in Diversity” (video collection [koleksiyon sa bidyo])