Librarya
Gugmang putli

“Gugma nga Putli,” Mga Hilisgotan ug mga Pangutana (2023)

Kristo uban sa mga bata

Giya sa Pagtuon sa Ebanghelyo

Gugmang putli

Ang pagbaton sa tiunay nga gugma ni Kristo

Kitang tanan mahigawad o maguol matag karon ug unya—tingali kanunay. Tingali dili kita makatan-aw sa mata sa atong mga silingan o kauban sa trabaho. O usahay mawad-an kita og pasensya sa atong mga anak o kapikas. Tingali atong makita ang atong kaugalingon nga hinawayon ug naghukom sa uban. Dayag lang, walay usa nga perpekto, ug normal ra nga mobati niini nga paagi usahay. Apan naghunahuna ba kamo unsaon nga kamo mahimong mas mahigugmaon ug mapailobon niadtong anaa sa inyong palibot?

Ang tubag yano: malukmay ang inyong kasingkasing pinaagi sa gugma nga putli, nga usa ka gasa gikan sa Dios. Ang pagpalambo og gugma nga putli mao ang pagkahimong sama ni Jesukristo, ug kana usa ka tibuok kinabuhi nga paningkamot. Apan ang inyong Langitnong Amahan ug ang inyong Manluluwas, nga si Jesukristo, motabang ninyo kon matinud-anon kamong maningkamot nga mahimong sama Kanila.

Unsa ang Gugma nga Putli?

Ang gugmang putli mao ang tiunay nga gugma ni Kristo (tan-awa sa Moroni 7:47). Mao kini ang labing taas ug labing lig-on nga matang sa gugma. Ang gugma nga putli modasig nato sa paserbisyo sa Dios ug sa uban inubanan sa atong tibuok kasingkasing, gahom, hunahuna, ug kusog (tan-awa sa Doktrina ug mga Pakigsaad 59:5).

Kinatibuk-ang pagpasabot sa hilisgotan: Gugma nga putli

May kalabotan nga mga giya sa pagtuon sa ebanghelyo: Jesukristo, Hugot nga Pagtuo, Paglaom, Mga Gasa sa Espiritu, Pagserbisyo

Seksiyon 1

Ang Gugma nga Putli Mao ang Tiunay nga Gugma sa Langitnong Amahan ug ni Jesukristo alang sa Tanang Tawo

Gipapahawa ni Kristo ang mga yawa gikan sa usa ka tawo

Ang Langitnong Amahan ug si Jesukristo hingpit gayod nga nahigugma kanato. Si propeta Mormon mitudlo nga “ang gugma nga putli mao ang tiunay nga gugma ni Kristo” (Moroni 7:47). Panahon sa Iyang kinabuhi, si Jesukristo mipakita og gugma ug kaluoy ngadto sa gigutom, sa makasasala, sa gitakboyan, ug sa masakiton. Nangalagad Siya ngadto sa kabos ug ngadto sa adunahan, ngadto sa mga higala ug ngadto sa mga dumuduong. Gipasaylo Niya ang Iyang mga tig-akusar ug kadtong milansang Niya sa krus (tan-awa sa Lucas 23:34). Si Jesukristo mao ang hingpit nga ehemplo sa hingpit nga gugma.

Mga butang nga angayang hunahunaon

  • Ang hingpit nga gugma ni Kristo miimpluwensya sa matag usa sa Iyang mga aksiyon. Ikonsiderar kini nga mga ehemplo: Mateo 26:39; Lucas 7:22; 1 Nephi 19:9. Sa unsa nga paagi nga ang matag usa niini nga mga tudling nagpakita sa gugma ni Kristo alang nato? Mahimo ninyong itandi kini nga mga ehemplo sa gugma sa Manluluwas ngadto sa paghulagway ni Pablo sa gugma nga putli diha sa 1 Mga Taga-Corinto 13. Giunsa sa Manluluwas pagpakita niining matanga sa gugma nganha kaninyo?

  • Si Propeta Joseph Smith mitudlo, “Ang gugma mao ang usa sa pinakahalangdong kinaiya sa Dios.” Ikonsiderar sa pagsulat sa inyong journal ang mga pulong Nasayod ko nga ang Dios nahigugma nako tungod kay … Sa tibuok semana pagsulat og mga paagi nga imong makompleto kini nga kapahayag. Mahimo ninyong basahon o paminawon ang usa ka kanta sama sa “Ang Dios Gugma” o “Gihigugma Ako sa Langitnong Amahan” alang sa mga ideya.

Mga kalihokan alang sa pagkat-on og dungan

  • Ikonsiderar kini nga pagtulun-an ni Elder Jeffrey R. Holland: “Ang unang dako nga sugo sa tanang kahangtoran mao ang paghigugma sa Dios sa tibuok natong kasingkasing, gahom, hunahuna, ug kusog—mao kana ang una ug dakong sugo. Apan ang unang dako nga kamatuoran sa tanang kahangtoran mao nga ang Dios nahigugma kanato sa tibuok Niyang kasingkasing, gahom, hunahuna, ug kusog.” Hisgoti kon sa unsa nga paagi nga ang pagkahibalo sa dakong gugma sa Dios alang ninyo makapausab sa unsang paagi kamo mobati, maghunahuna, ug molihok.

  • Ang pagtan-aw sa bidyo “Charity: An Example of the Believers” (4:50) makapadasig og usa ka panaghisgotan mahitungod sa unsa nga paagi nga ang Kristohanong gugma mousab og mga kinabuhi. Giunsa sa mga batan-ong babaye niini nga bidyo sa pagpakita og Kristohanong gugma ngadto sa bag-ong cheerleader? Sa unsang paagi nga kini nga gugma nakaapekto kaniya? Sa unsa nga paagi kini nakaapekto sa ubang mga batan-ong babaye? Hunahunaa ang mga tawo sa inyong palibot nga tingali magkinahanglan nga mobati sa gugma sa Manluluwas. Hisgoti ang mga paagi nga kamo mahimong mopakigbahin sa gugma ni Kristo sa usa o duha kanila.

Pagkat-on pa og dugang

Seksiyon 2

Ang Gugma nga Putli Mao ang Labing Mahinungdanon nga Hiyas Nga Mahimong Maangkon sa mga Sumusunod ni Jesukristo

mga babaye nga nangalagad

Ang gugma nga putli dili butang nga atong buhaton o butang nga atong ihatag. Usa kini ka kahimtang sa atong kasingkasing ug usa ka paagi sa pagpakabuhi. Mao kini kon kinsa kita mamahimo ug unsa ang atong bation, ug mogiya nato sa paghimo og mahigugmaong aksyon (tan-awa sa Moroni 7:45–47).

Kon wala ang gugma nga putli, kita walay kapuslanan; uban niini, kita aduna sa tanan (tan-awa sa Ether 12:34; Moroni 7:44). Ang tanang ubang butang molabay, apan ang gugma nga putli molahutay sa kahangtoran ug dili gayod mapakyas (tan-awa sa Moroni 7:46–47). Nan unsaon man nato sa pag-angkon niini nga gasa? Ang propeta nga si Mormon miingon, “Pag-ampo ngadto sa Amahan uban sa tibuok kusog sa kasingkasing, nga kamo mapuno niini nga gugma … nga kon si [Jesukristo] moabot, kita mahimong sama kaniya,” (Moroni 7:48).

Makat-on kita sa pagbansay og gugma nga putli sa atong mga relasyon—sa atong mga pamilya, sa atong mga kongregasyon sa simbahan, sa atong mga komunidad, ug sa tanan nga atong mahimamat. Kon maningkamot kita sa pagdawat sa uban kon kinsa sila ug motan-aw nila sama sa pagtan-aw sa Langitnong Amahan ug ni Jesukristo, kita makasugod sa paghigugma sa mga tawo nga Ilang gihigugma.

Mga butang nga angayang hunahunaon

  • Basaha ang 1 Mga Taga-Corinto 13:1–7, hunahunaon ang inyong kaugalingon dinhi niini nga mga bersikulo. Dayon basaha ang bersikulo 8. Unsa ang gipasabot niini nganha kaninyo nga ang “gugma nga putli dili mapakyas”? Ikonsiderar kon aduna bay bisan unsa nga mga hiyas ang nalista sa mga bersikulo 4–7 nga inyong magamit sa pagtabang ninyo nga mahimong mas maayo nga ehemplo sa gugma nga putli.

  • Samtang ang gugma nga putli usa ka gasa gikan sa Dios, sama sa bisan unsa nga gasa, kinahanglan nga dawaton nato kini. Unsay atong makat-onan gikan sa Moroni 7:48; 8:26 kon unsaon sa pagdawat sa gasa sa gugma nga putli?

  • Si Presidente Russell M. Nelson mitudlo niining importante nga mga kamaturoan mahitungod sa gugma nga putli: “Ang gugma nga putli mao ang tambal sa panagbingkil. Ang gugma nga putli mao ang espirituhanon nga gasa nga makatabang nato sa pagsalikway sa kinaiyanhon nga tawo, kinsa hakog, mapanalipdon sa kaugalingon, mapagarbohon, ug masinahon. Ang gugma nga putli mao ang nag-unang kinaiya sa tinuod nga sumusunod ni Jesukristo. Ang gugma nga putli naghulagway sa usa ka tigpasiugda og kalinaw.” Samtang mamalandong kamo sa mga pulong ni Presidente Nelson, unsa ang gidasig sa Espiritu nga inyong buhaton? Ikonsiderar ang pagbutang sa pamahayag ni Presidente Nelson sa dapit nga inyong makita kanunay isip usa ka tigpahinumdom nga mopakita og gugma nga putli alang sa uban.

Kalihokan alang sa pagkat-on kauban ang laing mga tawo

  • Unsaon nato sa pag-ila sa usa ka sumusunod ni Jesukristo? Ang Manluluwas mitudlo, “Ang tanang tawo makaila nga kamo mga tinun-an ko pinaagi niini, kon kamo maghigugmaay ang usa sa usa” (Juan 13:35). Isip usa ka grupo, paghunahuna mahitungod sa mga tawo nga inyong gidayeg nga tinuod nga mga ehemplo sa gugma nga putli. Sa unsa nga paagi nakita ninyo sila nga nagpakita og tiunay nga gugma ni Kristo? Ikonsiderar ang pagpadala og text o pagsulat ngadto sa usa niini nga mga tawo ug pagpakigbahin unsa ang nakapadayeg ninyo kaniya.

  • Paghisgot og pipila ka importante nga mga pagpili nga inyong gihimo matag adlaw. Dayon basaha ang “Higugmaa ang Dios, higugmaa ang inyong silingan” diha sa Alang sa Kalig-on sa Kabatan-onan: Uga ka Giya sa Paghimo og mga Pagpili ([2022], 10–15). Hisgoti sa unsa nga paagi nga ang gasa sa gugma nga putli makagiya samtang maghimo kamo sa matag usa niadto nga mga pagpili.

  • Ikonsiderar kini nga tambag ni Presidente Dieter F. Uchtdorf: “Bisan unsa nga mga problema ang giatubang [ninyo] o sa inyong pamilya, bisan unsay inyong buhaton aron masulbad kini, ang sinugdanan ug ang kataposan sa solusyon mao ang gugma nga putli, ang tiunay nga gugma ni Kristo.” Pagtinabangay sa paghimo og lista sa pipila ka problema o mga hagit nga giatubang sa mga indibidwal o sa mga pamilya karon, sama sa panagbingkil o kasina. Dayon mahimo ninyong basahon ang Moroni 7:45 ug hisgotan ang mahitungod kon sa unsa nga paagi nga ang mga hiyas sa gugma nga putli nga gihulagway niini nga bersikulo makatabang sa pagsulbad sa mga problema nga anaa sa inyong lista. Dayon makahimo mo og yanong plano sa paggamit sa gugma nga putli aron sa pagtabang sa pagsulbad sa usa sa mga problema. Ilakip ang Dios sa inyong plano, ug pangayo og tabang gikan sa uban kon angay.

Pagkat-on pa og dugang

Mubo nga mga Sulat

  1. Mga Pagtulun-an sa mga Presidente sa Simbahan: Joseph Smith (2011), 517.

  2. Mga Himno, nu. 49.

  3. Songbook sa mga Bata, 16.

  4. Jeffrey R. Holland, “Ugma ang Ginoo Mobuhat og Katingalahan diha Kaninyo,” Liahona, Mayo 2016, 127.

  5. Si Presidente Dallin H. Oaks nakabantay nga “ang rason nga ang gugmang putli dili gayod mapakyas ug ang rason nganong ang gugmang putli mas labaw pa kay sa labing mahinungdanong mga buhat sa kamaayo [nga gipahayag ni Apostol Pablo [sa 1 Mga Taga-Corinto 13] mao nga ang gugma nga putli, ‘ang tiunay nga gugma ni Kristo’ (Moro. 7:47), dili usa ka buhat apan usa ka kondisyon o kahimtang sa pagkatawo. Ang gugma nga putli makab-ot pinaagi sa sunod-sunod nga mga buhat agig sangpotanan sa pagkakabig. Ang gugma nga putli usa ka butang nga ang usa ka tawo mamahimo” (“The Challenge to Become,” Ensign, Nob. 2000, 34).

  6. Russell M. Nelson, “Gikinahanglan ang mga Tigpasiugda og Kalinaw,” Liahona, Mayo 2023, 100.

  7. Dieter F. Uchtdorf, “Ang Pagdayeg Niadtong Miluwas,” Liahona, Mayo 2016, 80.