Jesukristo

Walay nay mas importante pa nga kinahanglan natong makat-onan kaysa kang Jesukristo—kon kinsa Siya, kon unsay Iyang gibuhat alang nato, ug kon unsa ang gusto Niya nga atong mahibaloan ug buhaton. Ang mga kasulatan ug ang mga pagtulun-an sa moderno nga mga propeta ug apostoles makatabang nato sa pag-ila sa Iyang mahinungdanong tahas isip atong Manluluwas ug Manunubos.

Atong nakat-onan diha sa mga kasulatan nga didto sa kinabuhi sa wala pa dinhi sa yuta, si Jesukristo gipili nga mahimong Manluluwas alang sa tanang anak sa Langitnong Amahan (tan-awa sa 1 Pedro 1:19–20; Abraham 3:27). Sukad pa gayod sa sinugdanan, si Jesukristo mao ang labing mahinungdanong binuhat sa pagtuman sa plano sa Dios alang sa kaluwasan ug sa kahimayaan sa Iyang mga anak. Ubos sa mando sa Amahan, si Jesukristo milalang sa mga langit ug sa yuta (tan-awa sa Moises 1:32–33). Atol sa mga panahon sa Daang Tugon, si Jesukristo nailhan nga mao ang halangdong Jehova. Siya ang migiya ug mimando sa karaang mga propeta ug mga tumutuo. Ang Iyang gugma ug kaluoy nakapalig-on nila atol sa ilang mga pagsulay.

Sobra sa 2,000 ka tuig ang milabay, si Jesukristo mianhi sa yuta pinaagi sa milagroso nga pagkatawo. Nagpuyo ug nangalagad Siya taliwala sa katawhan diha sa yuta sa Israel. Naghimo Siya og dagkong mga milagro, sama sa pag-ayo sa masakiton ug pagbuhi sa mga patay (tan-awa sa Mateo 11:4–5). Iyang gitukod ang Iyang Simbahan ug gitudlo ang doktrina sa paghinulsol, kapasayloan sa mga sala, ug kinabuhing dayon ngadto sa tanang mosunod Kaniya. Si Jesukristo nagpuyo og hingpit nga kinabuhi, kanunay nga nagmasulundon sa Iyang Amahan (tan-awa sa 2 Nephi 31:7).

Tungod kay si Jesukristo mianhi sa yuta aron sa pagluwas sa mga anak sa Amahan, Siya andam nga mipas-an sa silot alang sa ilang mga sala. Mga siglo ang milabay, si Isaias nanagna: “Sa pagkamatuod gipas-an niya ang atong kasakitan, ug gipas-an niya ang atong mga kasub-anan. … Gisamaran siya tungod sa atong mga sala, napangos siya tungod sa atong pagkadaotan” (Isaias 53:4–5). Si Jesus misinati og hilabihan nga pag-antos, nga maoy hinungdan sa pag-agas sa Iyang dugo sa matag lungag sa panit (tan-awa sa Lucas 22:44; Doktrina ug mga Pakigsaad 19:15–20). Gidakop Siya ug gisilotan tungod sa bakak nga mga pasangil ug gihukman nga patyon. Sa mapintas nga paagi Siya gilansang sa krus, diin Siya nag-antos ug mihatag sa Iyang kinabuhi alang nato (tan-awa sa Mateo 27:50). Apan ang Iyang kamatayon dili mao ang kataposan. Si Jesukristo mibangon gikan sa lubnganan ug nangalagad ngadto sa Iyang mga sumusunod isip usa ka nabanhaw nga binuhat (tan-awa sa Lucas 24:36–40; 3 Nephi 11:8–15).

Karon, ang mga miyembro sa Simbahan ni Jesukristo nagpaabot sa Iyang gisaad nga pagbalik nganhi sa yuta. Walay nahibalo kon kanus-a kini mahitabo (tan-awa sa Doktrina ug mga Pakigsaad 49:7), apan ang mga kasulatan naghisgot og mga timailhan ug mga panghitabo nga mag-una sa Iyang Ikaduhang Pag-anhi. Ang yuta mausab kon ang Ginoo mobalik, ug Siya mopadayag sa tanang butang ngadto sa mga matarong (tan-awa sa Doktrina ug mga Pakigsaad 101:23–34).

Ang Langitnong Amahan nag-andam og daghang panalangin alang niadtong modawat sa Iyang Anak, si Jesukristo (tan-awa sa Doktrina ug mga Pakigsaad 84:37–38). Si Jesukristo namahayag: “Kon kamo moduol kanako makaangkon kamo og kinabuhing dayon. Tan-awa, ang akong bukton sa kaluoy gitunol nganha kaninyo, ug bisan kinsa nga moduol, siya akong dawaton; ug bulahan kadtong moduol kanako” (3 Nephi 9:14). Kita nagpakita og tinguha sa pagdawat sa imbitasyon sa Ginoo nga moduol ngadto Kaniya kon kita mobutang sa atong pagsalig diha Kaniya, maghinulsol sa atong mga sala, magpabunyag, mosunod sa mga sugo sa Dios, ug modawat sa sagrado nga mga ordinansa sa templo.

Kon kita mapaubsanon nga modangop ngadto ni Jesukristo pinaagi sa hugot nga pagtuo ug paghinulsol, makadawat kita og kapasayloan sa atong mga sala (tan-awa sa Mosiah 4:2–3). Ang Pag-ula ni Jesukristo nakahimo usab niini nga posible nga kita “makagamit sa diosnong gahom—igong gahom sa pag-atubang sa mga palas-anon, mga babag, ug mga tentasyon sa atong panahon.” Ang gugma, kaluoy, ug kapasayloan nga atong madawat gikan ni Jesukristo magdala og malungtarong kausaban sa atong kinabuhi ug maghatag nato og kalig-on sa pagpadayon sa pagbuhat sa kabubut-on sa Dios (tan-awa sa Mosiah 5:2; Helaman 15:7–8).