Ikaduhang Pag-anhi ni Jesukristo

Kon si Jesukristo mobalik, ang tanang pagkadaotan sa yuta matapos. Ngano nga kana nga panahon makalilisang alang sa pipila ka tawo? (Mahimo nimong basahon ug pamalandongan ang Doktrina ug mga Pakigsaad 29:17.) Ngano nga ang Ikaduhang Pag-anhi sa Manluluwas dili makahahadlok nga panahon alang sa matarong? (Mahimong ninyong basahon ug pamalandongan ang 1 Nephi 22:17, 22.)

Kon si Jesus moanhi pag-usab isip Ginoo sa mga ginoo, daghang importante nga mga panghitabo ang mahitabo. Mahimo ninyong tun-an ang usa og daghan sa mosunod nga mga tudling ug mopakigbahin unsay inyong nakat-onan mahitungod niining umaabot nga mga panghitabo: Mateo 25:31–46; Doktrina ug mga Pakigsaad 29:9–11; 63:53–54; 76:50–54, 63; 88:96–98; 101:24–25; 133:19, 25; ug Mga Artikulo sa Hugot nga Pagtuo 1:10. Unsa ang gitudlo niini nga mga panghitabo kanato mahitungod ni Jesukristo?

Tan-awa ang usa ka litrato sa batang Jesus ug itandi ngadto sa usa ka litrato sa Iyang Ikaduhang Pag-anhi. Mahimo ninyong basahon o kantahon ang “Jesus, Kanhi Kabos” aron sa pagtabang ninyo nga maghisgot sa pipila sa mga kalainan tali sa duha ka litrato. Unsa ang matabang niini nga mga litrato ug niini nga kanta kanato aron makasabot mahitungod ni Jesukristo?

Tan-awa ang “The Second Coming of Jesus Christ [Ang Ikaduhang Pag-anhi ni Jesukristo]” (3:02), ug hisgoti ang mga butang nga gihisgotan sa bidyo nga motimaan sa pagbalik sa Manluluwas. Unsa nga mga pulong ang gigamit sa bidyo sa paghulagway ni Jesukristo sa dihang Siya moanhi pag-usab? Unsa ang gitudlo niini nga mga pulong kanato mahitungod Kaniya? Mahimo usab nga inyong kantahon o basahon ang mga pulong sa usa ka kanta o himno mahitungod sa Ikaduhang Pag-anhi, sama sa “Manunubos sa Israel” o “Kon Siya Moanhi Pag-usab,” ug hisgotan ang mahitungod kon unsay gitudlo niini bahin sa Manluluwas ug sa Iyang pagbalik sa yuta.

Malaquias 3:1; Lucas 21:25–28; Mga Buhat 1:9–11; Doktrina ug mga Pakigsaad 36:8

Neil L. Andersen, “Paanhia ang Imong Gingharian,” Liahona, Mayo 2015, 119–22

Usa ka paagi nga kita makaandam alang sa pagbalik sa Manluluwas mao ang pagpaningkamot nga maanaa sa mga dapit diin ang Iyang Espiritu magauban kanato. Ang Ginoo mitudlo sa unang mga Santos, “Busa, barog kamo sa balaan nga mga dapit, ug ayaw pagbalhin, hangtod ang adlaw sa Ginoo moabot; kay tan-awa, kini moabot sa labing madali, nag-ingon ang Ginoo” (Doktrina ug mga Pakigsaad 87:8). Ngano sa inyong hunahuna nga ang pagkaanaa diha sa balaan nga mga dapit usa ka maayong paagi sa pagpangandam alang sa pagbalik sa Manluluwas? Si Presidente Oaks mipasabot: “Unsa kadtong ‘balaan nga mga dapit’? Segurado gayod nga naglakip kini sa templo ug matinud-anong pagtuman sa mga pakigsaad niini. Sigurado gayod nga naglakip kini sa panimalay diin ang mga anak gimahal ug ang mga ginikanan gitahod. Segurado gayod nga ang balaan nga mga dapit naglakip sa atong mga katungdanan nga gisangon sa atoa sa awtoridad sa pagkapari, lakip sa mga misyon ug mga balaang tawag nga matinud-anong gituman diha sa mga branch, mga ward, ug mga stake.” Hunahuna kon unsa kamo ka bulahan samtang inyong igahin ang inyong panahon nga naghimo sa mga kalihokan nga nakasentro ni Kristo diha sa balaan nga mga dapit. Sa unsa nga paagi nga kini nga mga kalihokan nag-andam ninyo alang sa pagbalik sa Ginoo?

Basaha ang Joseph Smith—Mateo 1, mangita sa mga panagna sa mga panghitabo nga mag-una sa Ikaduhang Pag-anhi. Sa unsa nga paagi nga ang pagkahibalo mahitungod niining mga panghitabo makatabang ninyo nga makaandam alang niini? Unsaon ninyo nga makatabang sa pamilya o mga higala nga maandam alang sa Ikaduhang Pag-anhi ug sa mahagitong mga panghitabo nga mopaingon ngadto niini? Unsaon ninyo sa pag-andam sa inyong kasingkasing alang sa kinabuhi human sa Ikaduhang Pag-anhi, diin wala nay panagbingkil, walay kakabos, ug walay daotan? Unsa nga mga hiyas nga inyong gibati nga importante nga inyong mabatonan kon mobalik na ang Manluluwas? Unsaon ninyo sa pagpalambo niana nga mga hiyas? Isulat ug buhata ang mga impresyon nga inyong madawat.

Hunahunaa ang ngalan sa gipahiuli nga Simbahan sa Ginoo. Unsa ang kahulugan niini nganha kanimo nga mahimong usa ka “Santos sa Ulahing mga Adlaw”? Unsaon ninyo nga mas magamit pa ang ngalan sa Simbahan sa inyong matag adlaw nga panagsultihanay aron ang uban makahibalo sa inyong pagtuo sa Manluluwas ug sa inyong hugot nga pagtuo ug paglaom sa Iyang pagbalik?

Ang Manluluwas mipakigbahin sa sambingay sa napulo ka birhen aron sa pagtudlo nato sa kaimportante nga makaandam sa tanang higayon sa Iyang pagbalik (tan-awa sa Mateo 25:1–13; Doktrina ug mga Pakigsaad 45:56–57). Naghisgot sa lana nga gihulagway niini nga sambingay, si Elder David A. Bednar mitudlo: “Kining bililhong lana makuha usa ka tulo kada higayon—‘pagtulun-an human sa usa ka pagtulun-an [ug] lagda human sa usa ka lagda’ (2 Nephi 28:30), nga mapailubon ug makanunayon. Walay minubo [shortcut]; walay kinalit nga pagpangandam nga posible.” Ikonsiderar ang pagtubil sa usa ka sudlanan og usa ka tulo sa lana sa higayon samtang kamo mag-istorya bahin sa mga butang nga mahimo natong buhaton isip mga indibidwal, sa atong mga pamilya, ug sa atong mga ward sa pagpangandam alang sa Ikaduhang Pag-anhi ni Jesukristo.

Isip mga miyembro sa Ang Simbahan ni Jesukristo sa mga Santos sa Ulahing mga Adlaw, kita adunay talagsaon ug balaanon nga hinatag nga tahas sa pagtabang sa pagpundok “og katawhan nga andam nga modawat Kaniya sa Iyang pag-anhi.” Rebyoha ang artikulo ni Presidente Nelson “Ang Umaabot sa Simbahan: Pag-andam sa Kalibotan alang sa Ikaduhang Pag-anhi sa Manluluwas.” Dayon hisgoti kon unsay buot ipasabot sa pag-andam sa kalibotan sa pagdawat sa atong Manluluwas. Ngano sa inyong hunahuna nga ang Manluluwas misangon sa mga Santos sa Ulahing mga Adlaw sa pag-andam sa kalibotan alang sa Iyang pag-anhi? Unsaon man nato sa paghimo niana?

Ang pipila ka tawo basin mobati og kabalaka o kahadlok kon sila maghunahuna mahitungod sa mga panghitabo nga mahitabo sa dili pa ang Ikaduhang Pag-anhi sa Manluluwas. Mahimon basahon ninyo pagdungan ang mosunod nga pamahayag: “Ang labing maayo nga paagi nga kita makaandam alang sa pag-anhi sa Manluluwas mao ang pagdawat sa mga pagtulun-an sa ebanghelyo ug paghimo niini nga kabahin sa atong mga kinabuhi. Kinahanglan nga magpuyo kita sa matag adlaw sa labing maayo kutob sa atong mahimo, ingon gayod sa gitudlo ni Jesus sa dihang Siya dinhi pa sa yuta. Makapangayo kita sa propeta alang sa giya ug mosunod sa iyang tambag. Makapuyo kita nga takos nga makabaton sa giya sa Espiritu Santo kanato. Niana kita makapaabot ngadto sa pag-anhi sa Manluluwas uban sa kalipay ug dili uban sa kahadlok.” Dayon hisgoti sa unsang paagi nga kini nga mga sugyot makatabang nato nga mas mosunod sa ebanghelyo aron kita mobati og kalinaw ug kakalma kon kita maghunahuna mahitungod sa mga panghitabo nga maglibot sa pagbalik sa Manluluwas.

Russell M. Nelson, “Ang Basahon ni Mormon, ang Pagpundok sa Israel, ug ang Ikaduhang Pag-anhi,” Liahona, Hulyo 2014, 26–31

D. Todd Christofferson, “Pagpangandam alang sa Pagbalik sa Ginoo,” Liahona, Mayo 2019, 81–84

Amy A. Wright, “Paglahutay sa Adlaw diha ni Kristo,” Liahona, Nob. 2023, 9–12