Librarya
Ikapulo

“Ikapulo,” Mga Hilisgotan ug mga Pangutana (2023)

babaye nga nagtunol sa ikapulo ngadto sa iyang bishop

Giya sa Pagtuon sa Ebanghelyo

Ikapulo

Paghatag sa ikapulo sa atong kinitaan sa pagtabang sa pagtukod sa gingharian sa Dios dinhi sa yuta

Gamay ra kadto. Kon itandi sa mga bahandi nga gihatag sa uban ngadto sa panudlanan, ang duha ka diyot sa biyuda gamay ra kaayo nga kontribusyon. Apan ang bili sa iyang sakripisyo dako kaayo. Ang Manluluwas mitudlo, “Kining kabos nga babayeng biyuda nakahulog og labaw pa kay sa tanan kanila nga nanagpanghulog ngadto sa panudlanan” (Marcos 12:43). Ngano nga ang sakripisyo sa biyuda bililhon man kaayo? Tungod kay “siya gikan sa iyang kapit-os mihatag sa tanan nga diha kaniya, sa tanan nga iyang kabuhian” (Marcos 12:44).

Karon, dili literal nga atong ihatag ang tanan nga anaa nato kon kita mobayad sa ikapulo sa pagtabang sa pagtukod sa gingharian sa Dios. Nangayo lamang Siya sa 10 porsiyento sa atong kinitaan. Apan daghan kaayo kita og makat-onan gikan sa sakripisyo sa biyuda. Dili igsapayan sa gidak-on sa atong 10 porsiyento, kita makahimo sa ikapulo nga usa ka butang sa hugot nga pagtuo ug ipahinungod ang unsay anaa nato alang sa Ginoo bisan kon dili kini sayon nga sakripisyo nga himoon.

Unsa Ang Ikapulo?

Ang ikapulo mao ang pagpahinungod sa ikanapulo nga bahin sa atong kinitaan ngadto sa Ginoo pinaagi sa Iyang Simbahan. Ang paghatag niini nga halad ngadto sa Dios mao ang usa ka paagi nga atong “unahon ang Ginoo sa atong kinabuhi, ibabaw sa atong kaugalingong mga kagustohan ug interes.” Ang ikapulo makatabang sa pagtukod sa gingharian sa Dios dinhi sa yuta. Gamiton kini sa daghang katuyoan, lakip na sa pagtukod ug pagmentinar sa mga templo ug mga meetinghouse, pagsuporta sa misyonaryo nga buhat, ug pagpasiugda sa mga institusyon sa edukasyon nga gipadagan sa Simbahan. Ang Ginoo nagsugo sa mga Santos sa Ulahing mga Adlaw sa pagsunod sa balaod sa ikapulo, bisan unsa pa ang ilang kasamtangang kahimtang sa ekonomiya. Kon kita mopahayag sa atong hugot nga pagtuo sa Dios niini nga paagi, Siya nagsaad nga mopanalangin nato sa hilabihan (tan-awa sa Malaquias 3:10).

Kinatibuk-ang pagpasabot sa hilisgotan: Ikapulo

May kalabotan nga mga giya sa pagtuon sa ebanghelyo: Mga Sugo, Fasting [Pagpuasa], Hugot nga Pagtuo diha ni Jesukristo, Pagkamasulundon

Seksiyon 1

Ang Ikapulo usa ka Karaan nga Sugo nga Gipahiuli sa Atong Panahon

bata nga nagbayad sa ikapulo

Ang balaod sa ikapulo gisunod sa karaang panahon sa katawhan sa Dios ug gipahiuli pinaagi ni Propeta Joseph Smith (tan-awa sa Genesis 14:18–20; 3 Nephi 24:8–12; Doktrina ug mga Pakigsaad 119:3–4). Kini nga balaod nagkinahanglan nga ang mga Santos mohatag sa ikanapulo nga bahin sa ilang tinuig nga kinitaan ngadto sa Ginoo sa pagtukod sa gingharian sa Dios dinhi sa yuta ug sa pagtabang sa pagsangkap sa mga panginahanglan sa Iyang mga anak.

Bisan kon ang ikapulo usa ka temporal nga balaod, usa usab kini ka espirituwal nga balaod. Ang paghalad o pagpahinungod, sa porsiyon sa atong kinitaan ngadto sa Ginoo mao ang usa ka paagi nga Siya atong unahon sa atong kinabuhi. Ang pag-una sa Iyang buhat kaysa atong personal nga mga tinguha makatabang nato nga mas mahimong mas balaan ug mas mapaduol ngadto Kaniya.

Mga butang nga angayang hunahunaon

  • Ikonsiderar ang pagbasa sa Genesis 14:18–20; 28:20–22 samtang namalandong kon ngano nga ang katawhan sa Dios gihangyo sa pagsunod sa balaod sa ikapulo sukad pa sa karaang mga panahon. Dayon basaha ang personal nga istorya gikan sa mensahe ni Presidente Russell M. Nelson “Paghunahuna og Celestial!” mahitungod sa usa ka higayon sa dihang iyang gipili nga unahon ang Ginoo pinaagi sa pagbayad og hingpit nga ikapulo bisan wala pa siyay igong kinitaan. Siya mitudlo, “Ang pagbayad sa ikapulo nagkinahanglan og hugot nga pagtuo, ug kini usab naglig-on sa hugot nga pagtuo diha sa Dios ug sa Iyang Pinalanggang Anak.” Sa unsang paagi nga ang pagsunod sa balaod sa ikapulo nagkinahanglan nga kamo adunay hugot nga pagtuo sa Langitnong Amahan ug ni Jesukristo? Sa unsang paagi nga makapalambo kini sa inyong pagtuo diha Kanila?

Mga kalihokan alang sa pagkat-on og dungan

  • Basaha ang Levitico 27:30–32 ug 2 Cronicas 31:5–6 sa pagkat-on kon giunsa pagsunod ang balaod sa ikapulo sa karaang panahon. Sa inyong hunahuna ngano nga ang mga ikapulo balaan man ngadto sa Ginoo? Basaha ang Doktrina ug mga Pakigsaad 97:10–12 sa pagdiskobre kon sa unsang paagi nga ang ikapulo nakatabang sa nahaunang mga Santos nga matuman ang buhat sa Ginoo. Sa unsang paagi nga sila napanalanginan tungod sa pagsunod niini nga balaod? Hisgoti kon sa unsang paagi nga ang pagbayad sa ikapulo makatabang sa pagpalig-on sa atong kaugalingong tinguha sa pagtukod sa gingharian sa Dios.

  • Hisgoti kon sa unsang paagi nga ang ikapulo parehong temporal nga balaod ug espirituwal nga balaod. Dayon basaha og dungan ang Marcos 12:41–44, ug hisgoti kon sa unsang paagi nga ang pagbayad sa ikapulo usa ka butang sa hugot nga pagtuo. Mahimo ninyong tan-awon og dungan ang bidyo nga “The Widow’s Mite” (1:57) o “Jesus Teaches about the Widow’s Mites” (1:14). Unsa ang ipasabot sa paghatag sa tanan ninyo sa espirituhanong paagi samtang naghatag kamo sa ikapulo ngadto sa Ginoo? Sa unsang paagi nga ang paghatag Kaniya sa tanan ninyo makapalig-on sa pagtuo ug makapausab ninyo sa espirituhanong paagi?

Pagkat-on pa og dugang

Seksiyon 2

Ang Ginoo Nagsaad og mga Panalangin Niadtong Nagtuman sa Balaod sa Ikapulo

babaye nga nagpahiyom

Makadawat kita og daghang panalangin sa Ginoo kon atong sundon ang balaod sa ikapulo. Si Elder Neil L. Andersen misulti: “Ang mga bintana sa langit maabli sa daghang paagi. Ang uban temporal, apan daghan ang espirituwal. Ang uban lisod sabton ug dili mamatikdan. Mosalig sa tukmang panahon sa Ginoo; ang mga panalangin moabot sa kanunay.” Kon kita mabinantayon ug moila sa klaro ug wala damha nga mga panalangin gumikan sa pagbayad sa ikapulo, kita mobati og kamapasalamaton ug paghigugma sulod sa atong mga kasingkasing ug mas mopaduol ngadto ni Jesukristo.

Mga butang nga angayang hunahunaon

  • Diha sa Malaquias 3:8–12, kita gisaaran og daghang panalangin alang sa pagsunod sa balaod sa ikapulo. Unsaon nga kamo mas makahibalo niini nga mga panalangin sa inyong kinabuhi karon? Rebyoha ang mensahe ni Elder David A. Bednar “Ang mga Tamboanan sa Langit,” ug dayon hunahunaa ang pipila ka paagi nga kamo napanalanginan o mapanalanginan pinaagi sa pagbayad sa ikapulo. Tingali mahimo kamo nga magsulat og lista sa mga panalangin nga gihatag sa Ginoo ninyo ug mamalandong kon hain niini ang resulta sa pagsunod sa balaod sa ikapulo. Sa unsang paagi nga ang kahibalo nga kamo napanalanginan sa pagsunod sa balaod sa ikapulo nakapalig-on sa inyong tinguha nga mobayad og hingpit nga ikapulo ug moduol ngadto kang Kristo?

  • Kon kita mopakita og hugot nga pagtuo ug mobayad sa ikapulo, makalaom kita sa mga panalangin gikan sa Ginoo. Sa iyang pakigpulong “Like a Watered Garden [Sama sa Gibisbisan nga Tanaman],” si Presidente Jeffrey R. Holland mipasabot kon sa unsang paagi nga si Mary Fielding Smith mipadayon sa pagbayad sa ikapulo human nga ang iyang bana nga si Hyrum Smith gipatay. Ikonsiderar ang pagbasa niini nga istorya diha sa mensahe ni Presidente Holland. Unsa ang inyong nakat-onan gikan sa ehemplo ni Mary? Unsa nga mga panalangin ang mahimo ninyong madawat kon kamo mosugod o mopadayon sa pagsunod sa balaod sa ikapulo?

Kalihokan alang sa pagkat-on uban sa laing mga tawo

  • Ang Ginoo misaad nato nga kon atong sundon ang balaod sa ikapulo, Siya “moabli … sa mga bintana sa langit, ug mobubo … og usa ka panalangin” ngari nato (Malaquias 3:10). Unsa ang ipasabot nga ang mga bintana sa langit moabli kon kita magmasulundon niini nga balaod? Basaha og dungan kini nga mga pulong ni Elder Bednar: “Ang hayag moagi sa mga tamboanan pasulod sa building. Sa samang paagi, ang espirituhanong kahayag ug panglantaw ibu-bu pinaagi sa mga tamboanan sa langit ug madawat sa atong kinabuhi kon kita mosunod sa balaod sa ikapulo.” Tingali mahimo ninyong salipdan og kadali ang kahayag nga mosulod sa lawak gikan sa bintana o laing nag-abli sa dili pa pasudlon og balik ang kahayag. Hisgoti ang kalainan nga mahimo sa kahayag ug kon sa unsang paagi nga ang ikapulo magdala kaninyo og kahayag o espirituwal nga lamdag. Mahimo usab kamo nga mopakigbahin sa usag usa kon sa unsang paagi nga kamo nakasinati og espirituwal nga lamdag sa inyong kaugalingong kinabuhi sa inyong pagsunod sa balaod sa ikapulo.

Pagkat-on pa og dugang

  • Robert D. Hales, “Tithing: A Test of Faith with Eternal Blessings,” Liahona, Nov. 2002, 26–29

  • Sheldon F. Child, “Ang Pinakamaayo nga Puhunan,” Liahona, Mayo 2008, 79–81

  • Yoshihiko Kikuchi, “Makapangawat ba Diay ang Tawo sa Dios?,” Liahona, Mayo 2007, 97–98

  • Valeri V. Cordón, “Ang Pinulongan sa Ebanghelyo,” Liahona, Mayo 2017, 55–57

Seksiyon 3

Ang mga Pundo sa Ikapulo Iya sa Ginoo ug Gamiton sa Iyang mga Sulugoon

ang Korum sa Napulog Duha ka Apostoles

Ang ikapulo gamiton sa pagpanalangin sa mga anak sa Dios sa temporal ug usab sa espirituwal nga paagi samtang ang kahingpitan sa ebanghelyo ni Jesukristo gisangyaw sa tibuok kalibotan. Mahimo kining posible kon ang mga miyembro modonar sa ikapulo ngadto sa Simbahan. Usa ka konseho nga gilangkoban sa Unang Kapangulohan, sa Korum sa Napulog Duha ka Apostoles, ug sa Tigdumalang Bishopric ang motino kon unsaon nga magamit sa labing maayo kining sagrado nga mga pundo (tan-awa sa Doktrina ug mga Pakigsaad 120:1).

Si Elder Neil L. Andersen mitudlo: “Kining sagrado nga mga pundo dili iya sa mga lider sa Simbahan. Iya kini sa Ginoo. Ang Iyang mga sulugoon nahibalo gayod sa sagrado nga matang sa ilang pagkatinugyanan.” Ang mga lider sa Simbahan magtinguha sa kabubut-on sa Ginoo ug mohimo sa mga desisyon kalabot sa ikapulo sumala sa direksyon nga ilang nadawat gikan sa Ginoo.

Mga butang nga angayang hunahunaon

  • Ang pinili nga mga sulugoon sa Ginoo mao ang mga tinugyanan sa mga donasyon sa ikapulo. Si Bishop Gérald Caussé mipasabot, “Diha sa mga termino sa ebanghelyo, ang pulong nga pagkatinugyanan naghatag og sagradong espirituwal ug temporal nga responsibilidad sa pag-amuma sa usa ka butang nga gipanag-iya sa Dios diin kita adunay tulubagon.” Sa unsang paagi nga ang pagkatinugyanan sa ikapulo usa ka espirituwal ug temporal nga responsibilidad sa mga sulugoon sa Ginoo? Basaha ang Doktrina ug mga Pakigsaad 104:11–17. Unsa ang inyong nakat-onan gikan niini nga mga bersikulo mahitungod sa tinguha sa Ginoo sa “paghatag sa [Akong] mga Santos” pinaagi sa pagkatinugyanan?

Kalihokan alang sa pagkat-on uban sa laing mga tawo

  • Daghan sa mga panalangin nga atong natagamtam sa Simbahan nagagikan sa mga donasyon sa ikapulo nga gigamit sa pagtukod sa gingharian sa Dios sa tibuok kalibotan. Si Presidente Jeffrey R. Holland mitudlo nga ang “mga templo, mga chapel, mga seminary, ug sosyal nga mga kalihokan” ang tanan nahimong posible tungod sa ikapulo nga gihatag gikan sa mga miyembro ug kini nga “mga panalangin dili moabot sa laing paagi.” Mag-istoryahanay sa usag usa mahitungod sa mga panalangin nga anaa tungod sa ikapulo. Sa unsang paagi nga kini nga mga panalangin makatabang sa paghatag og mahangtorong panglantaw ug makapaduol kanato ngadto sa Dios? Sa unsang paagi nga makapalig-on kini sa atong pasalig sa pagbayad og hingpit ug matinuoron nga ikapulo?

Pagkat-on pa og dugang