Pag-apil sa Buhat sa Templo ug sa Family History

Sa iyang pakigpulong sa kinatibuk-ang komperensiya “Mga Gamot ug mga Sanga,” Si Elder Quentin L. Cook miawhag sa mga pamilya sa pagpundok aron makat-on mahitungod sa mga kinabuhi sa mga sakop sa ilang pamilya. Kining mga panagpundok maglakip sa pagpakigbahin sa mga family history, mga istorya, mga litrato, o lakip ang gipanggang mga kabtangan sa mga apohan ug ginikanan. Ang mga sakop sa pamilya kinsa komportable sa teknolohiya, lakip sa kabatan-onan mahimong mo-upload og impormasyon ug mga litrato ngadto sa ilang Family Tree. Ikonsiderar ang pag-organisar niini nga matang sa panagpundok kauban sa inyong pamilya. Unsa nga mga kahanas ang anaa sa matag tawo nga makatabang ninyo sa pagkat-on mahitungod sa inyong gipakigbahin nga familiy history? Pamalandongi kon sa unsa nga paagi nga ang pagdungan sa paghimo sa inyong family history makatabang sa pagkonektar sa mga henerasyon ug makapalig-on sa inyong mga koneksyon uban sa inyong mga minahal. Dayon sugdi ang paghimo og yanong mga lakang sa pagplano og panagpundok sa pamilya sa inyong kaugalingon. Mahimo usab nga inyong dapiton ang mga sakop sa inyong pamilya sa pagtabang ninyo sa proseso.

Ang mga kasulatan puno sa mga ehemplo sa family history. Basaha ang Ether 1 alang sa usa ka ehemplo gikan sa Basahon ni Mormon. Sa unsang paagi nga ang pagmubo ni propeta Moroni sa mga sinulat ni Ether sama sa paghimo og family history? Unsa nga mga kamatuoran ang atong makat-onan gikan niini nga kapitulo tungod kay kini gisulat ug gipreserbar? (tan-awa sa Ether 1:35–37, 40–43). Palandonga kon sa unsang paagi kamo napanalanginan tungod sa “mga family history” nga narekord sa kasulatan. Sa unsang paagi nga ang mga henerasyon nga mosunod ninyo makabenepisyo gikan sa inyong mga istorya ug niadttong inyong katigulangan?

Kon maghunahuna kamo mahitungod sa family history, tingali ang inyong mga hunahuna nga mouna sa pagsiksik ug sa mga rekord sa kasaysayan. Apan ang family history naglakip usab sa pagkat-on mahitungod sa mga sakop sa inyong pamilya ug pagdiskobre og mga koneksyon kauban sa inyong katigulangan. Rebyoha pagdungan ang pakigpulong ni Elder Gerrit W. Gong “Matag Usa Kanato Adunay usa ka Istorya,” ug dayon paghimo og proyekto nga naglakip sa pagkat-on pa og dugang mahitungod sa inyong kaugalingon, sa mga sakop sa inyong pamilya, o sa inyong katigulangan. Mahimo kang magdrowing o magpinta og kahoy nga adunay mga gamot ug mga sanga nga naglakip sa mga ngalan sa imong katigulangan o maghimo og basahon nga anaa ang ilang pipila ka istorya. Dayon hisgoti kon sa unsang paagi nga ang paghimo og family history nagkonektar sa imong pamilya, lakip niadtong nag-una na kanimo.

Si Elder Quentin L. Cook mitudlo, “Kon kita makahibalo sa mga pagsulay ug mga kalisod nga giatubang sa atong mga katigulangan, ang atong gugma ug pagdayeg alang kanila modako.” Mahimo kang magkat-on mahitungod sa usa sa inyong katigulangan ug ang mga pagsulay nga iyang nasinati ug dayon mopakigbahin niana nga istorya ngadto sa grupo. Mahimo usab nga mopakita kamo og litrato o magdala og usa ka butang nga nagrepresentar sa inyong katigulangan. Hisgoti kon sa unsang paagi nga kini nga mga istorya nakahatag ninyo og impresyon ug nakatabang ninyo sa pagpasalamat diin kamo gikan.

Lucas 3:23–38; 1 Nephi 5:14–17; 19:2–5

Dennis B. Neuenschwander, “Bridges and Eternal Keepsakes,” Ensign, May 1999, 83–85

FamilySearch.org

Ikonsiderar sa unsa nga paagi nga ang pagdawat og mga ordinansa alang sa mga patay makatabang nimo nga mobati og mas suod nga koneksyon sa langit. Dayon basaha ang duha ka istorya sa pakigpulong ni Elder Gerrit W. Gong “Malipayon ug Hangtod sa Hangtod” mahitungod sa mga miyembro sa Simbahan kinsa adunay dili kasagaran nga espirituwal nga mga kasinatian pinaagi sa pag-apil sa buhat sa templo ug family history. Pamalandongi kon sa unsang paagi nga ang inyong pag-apil sa buhat sa templo ug family history makahatag og kalinaw, paglaom, o pagkaayo sa inyong kinabuhi ug motabang ninyo nga makat-on pa og dugang mahitungod sa Pag-ula ni Jesukristo.

Sa iyang pakigpulong “Pagpundok sa Pamilya sa Dios,” si Presidente Henry B. Eyring mipamatuod nga ang mga kasingkasing sa mga anak sa Dios gipabalik ngadto sa ilang mga amahan (tan-awa sa Malaquias 4:5–6; 3 Nephi 25:5–6; Joseph Smith—Kasaysayan 1:39). Miingon siya “Daghan sa inyong katigulangan wala makadawat sa [makaluwas] nga mga ordinansa. Apan mihatag og paagi ang Dios nga inyo kining mahimo. Ug nasayod ang Dios nga mobati kamong maganoy sa inyong katigulangan pinaagi sa gugma ug mabatonan ninyo ang teknolohiya nga gikinahanglan sa pag-ila kanila. Nasayod usab Siya nga magpuyo kamo sa panahon nga ang pag-akses sa balaang mga templo, diin mahimo ang mga ordinansa, mas magkadaghan sukad sa kasaysayan. Ug nasayod Siya nga makasalig Siya kaninyo nga matuman kini nga buhat [alang] sa inyong katigulangan.”

Sa unsang paagi nga ang pagsalig sa Dios makapadugang sa inyong tinguha sa pagtabang sa inyong katigulangan nga modawat sa mga panalangin sa templo gikan Kaniya? Sa unsang paagi nga ang Iyang panglantaw makapalig-on sa inyong pagpamatuod nga Siya adunay plano alang sa Iyang mahangtorong pamilya? Pamalandongi kon sa unsang paagi kamo tuyo nga makatabang sa buhat sa Dios, ug dayon mosunod sa bisan unsa nga mga impresyon nga inyong nadawat.

Sa usa ka lubong niadtong Agosto 15, 1840, mitudlo si Joseph Smith nga ang mga lalaki ug mga babaye mahimong bunyagan alang sa mga patay. Kini nga mga balita nakapahinam sa mga Santos nga “hapit sila magsugod dayon sa pagpabunyag alang sa mibiya nga mga minahal diha sa mga suba ug mga sapa duol sa Nauvoo.” Ikonsiderar ang pagbasa pagdungan sa “Letters on Baptism for the Dead” aron makat-on pa og dugang mahitungod kon kanus-a gihatag ang doktrina sa bunyag alang sa mga patay. Dayon hisgoti ngano nga ang buhi ug ang mga patay nagkinahanglan sa usag-usa. Unsa ang buot ipasabot nga “kita kon wala sila dili mahimo nga hingpit; ni sila kon wala kita”? (Doktrina ug mga Pakigsaad 128:18). Sa unsang paagi nga ang buhat sa templo ug family history nag-andam sa mga buhi ug mga patay alang sa kinabuhing dayon? Mahimo usab kamong motan-aw sa bidyo “What Are Baptisms for the Dead?” ug hisgoti ang mahitungod kon sa unsang paagi nga ang pag-apil sa buhat sa templo ug family history makahatag og samang matang sa hingpit nga kalipay alang ninyo sama sa nahatag niini sa unang mga Santos.

Si Elder Dale G. Renlund mitudlo: “Isip mga miyembro sa Simbahan, gihatagan kitag balaang responsibilidad sa pagsiksik sa atong katigulangan ug pagtigom sa mga kasaysayan sa pamilya. … Makapatingala gayod, nga pinaagi sa buhat sa family history ug sa templo, makatabang kita og luwas sa mga patay.” Rebyoha pagdungan kini nga pakigpulong, ug dayon isip usa ka grupo paghimo og usa ka tumong kalabot sa buhat sa templo ug family history. Pananglitan, matag usa ninyo makahukom sa pagdala og family name ngadto sa templo ug mohimo og ordinansa alang niana nga katigulangan. O makaapil kamo sa pag-indeks sa FamilySearch aron sa pagtabang sa uban nga makakita sa mga ngalan sa ilang katigulangan. Sa unsang paagi nga ang pagkahibalo nga ang pagtubos sa mga patay usa ka balaang gitudlo nga responsibilidad makapalawon sa inyong tinguha sa paghimo sa buhat sa templo ug family history? Sa unsang paagi kamo mibati nga gigiyahan sa Espiritu sa inyong mga paningkamot? Hisgoti ang inyong mga kasinatian ngadto sa usag usa, ug ipakigbahin unsa nga mga panalangin ang inyong nadawat pinaagi sa pagtuman niining importante nga responsibilidad.

Doktrina ug mga Pakigsaad 110:13–16; 128:15–19; 137:7–10; 138:29–35, 53–54

Russell M. Nelson ug Wendy W. Nelson, “Ablihi ang Langit pinaagi sa Buhat sa Templo ug Family History,” Liahona, Okt. 2017, 34–39

David A. Bednar, “Ang mga Kasingkasing sa mga Anak Mobati,” Liahona, Nob. 2011, 24–27

“Templo ug Family History” koleksiyon, Librarya sa Ebanghelyo

“Mga Templeo,” ChurchofJesusChrist.org