Librarya
Pamilya

“Pamilya,” Mga Hilisgotan ug mga Pangutana (2023)

pamilya nga nagluhod nga nag-ampo

Giya sa Pagtuon sa Ebanghelyo

Pamilya

Ang gilalang sa Dios alang sa atong labing dakong kalipay

Sa wala pa kita natawo, nagpuyo kita uban sa atong Langitnong Amahan. Ang pamilya sentro sa plano sa atong Langitnong Amahan alang sa atong mahangturong padulngan ug kalipay. Anha sa pamilya makaplagan nato ang pipila sa atong labing dakong hingpit nga kalipay niini nga kinabuhi ug sa mga kahangtoran. Ug ang pagkasakop diha sa mga pamilya makatabang nato nga makat-on sa pipila sa labing importante nga mga leksiyon sa kinabuhi—mga leksiyon sama sa pagserbisyo sa Dios ug sa uban.

Mapanalanginan kita samtang ipahinungod nato ang atong panahon sa pagpalig-on sa mga relasyon uban sa atong mga pamilya. Ang atong mga kabtangan ug mga titulo sa trabaho dili mosunod nato ngadto sa sunod nga kinabuhi, apan kon kita mohimo sa atong labing maayo sa pagsunod sa Dios ug pagtuman sa atong mga pakigsaad uban Kaniya, kita adunay potensiyal nga makauban sa atong mga pamilya sa kahangtoran. Si Elder L. Tom Perry mitudlo, “Sa usa ka masamok ug walay kaseguroan nga kalibotan, mas importante kay sa masukad sa paghimo sa atong mga pamilya nga sentro sa atong mga kinabuhi ug ang labing importante sa atong mga prayoridad.” Bisan tuod walay pamilya nga perpekto, makakat-on kita ug makalambo kon buhaton nato ang labing maayo sa paghigugma sa atong mga pamilya ug magdungan sa paglambo aron mahimong mas sama sa Dios.

Unsa ang Pamilya?

Dinhi sa yuta, adunay daghang matang sa mga pamilya. Ang usa ka pamilya mao ang mga ginikanan ug ilang anak o mga anak. Apan ang usa ka pamilya mahimong usa usab ka magtiayon, usa ka single nga ginikanan nga adunay mga anak, o grupo sa mga anak. Ang kabanay naglakip sa mga apohan, mga apo, mga iyaan, mga uyoan, mga ig-agaw, mga pag-umangkong babaye ug lalaki, ug daghan pa. Usahay atong ikonsiderar ang atong suod nga mga higala nga sama sa pamilya bisan og kita walay labot kanila. Sa kinatibuk-ang pagsabot, kitang tanan pamilya sa Dios.

Kinatibuk-ang pagpasabot sa hilisgotan: Pamilya

May kalabotan nga mga giya sa pagtuon sa ebanghelyo: Walay Kataposan nga Pakigsaad, Kinabuhing Dayon, Kaminyoon, Pag-apil sa Buhat sa Templo ug Family History Work, Pagtuga sa Templo ug Pagselyo sa Templo

Seksiyon 1

Ang Pamilya Importante sa Plano sa Dios sa Kalipay

pamilya nagpundok diha sa panimalay

Ang pamilya sentro sa plano sa Dios alang sa atong mahangturong kapalaran. Nagpuyo kita uban sa atong langitnong mga ginikanan sa wala pa kita moanhi sa yuta, ug ang atong mga pamilya dinhi nagsunod sa hinatag sa Dios nga sundanan.

Usa sa rason nga mianhi kita sa yuta pinaagi sa mga pamilya aron ang mga ginikanan makatudlo sa ilang mga anak sa ebanghelyo ug motabang kanila nga makabaton og malipayon ug makahuluganong mga kinabuhi. Nagtabang kini nga matuman ang plano sa Langitnong Amahan sa paghatag nato og mga oportunidad nga makat-on ug molambo ug mahimong mas sama Kaniya.

Mga butang nga angayang hunahunaon

  • Basaha ug pamalandongi ang Moises 5:12. Ikonsiderar ang importante nga mga kamatuoran ug mga leksiyon nga tingali gitudlo niini nga mga ginikanan ngadto sa ilang mga anak. Si Sister Tamara W. Runia mitudlo nga ang “mga pamilya kay hinatag sa Dios nga laboratoryo diin atong gisusi ang mga butang, busa ang mga sayop nga lakang ug sayop nga pagkalkula dili lang posible, apan malagmit naa. Ug dili ba kini makapainteres kon, human sa atong kinabuhi, atong makita nga kadtong mga relasyon, bisan kadtong mahagiton nga mga higayon, mao ang mga butang nga nakatabang kanato nga mahimong mas sama sa atong Manluluwas? … Ang mga relasyon sa pamilya usa ka gamhanan nga paagi sa pagtudlo nato sa mga leksiyon nga atong gianhi nga makat-onan.” Ngano sa inyong hunahuna nga ang mga pamilya importante sa plano sa Dios? Sa unsang paagi nga ang inyong mga kasinatian sa inyong pamilya nakatabang ninyo sa paglambo ug nahimong mas sama sa Langitnong Amahan ug ni Jesukristo? Sa unsang paagi nga ang paghunahuna sa inyong pamilya nga sama sa usa ka “laboratoryo” makaapekto sa paagi sa inyong pagtan-aw sa mga pagkadili hingpit sa inyong pamilya?

Kalihokan alang sa pagkat-on uban sa laing mga tawo

  • Si Presidente Gordon B. Hinckley mihatag niini nga tambag: “Giorden sa Ginoo nga kinahanglan nga kita magminyo, aron kita magpuyo diha sa gugma ug kalinaw ug kahusay, aron kita makabaton og mga anak ug moamuma kanila sa Iyang balaan nga mga paagi. … Kon ang tanan nasulti ug nahimo na, mao kini unsa ang mahitungod sa ebanghelyo. Ang pamilya usa ka gilalang sa Dios. Mao kini ang sukaranan nga gilalang. Ang paagi sa pagpalig-on sa nasod mao ang pagpalig-on sa mga panimalay sa katawhan.” Hisgoti ngano nga gipadala kita sa Dios sa yuta pinagi sa mga pamilya ug sa unsa nga paagi kana nagtabang sa pagtuman sa Iyang plano. Sa unsa nga paagi nga ang pagpalig-on sa atong mga panimalay makatabang sa pagpalig-on sa atong mga komunidad? Sa paghulagway niini nga ideya, mahimong magdula kamo og dula nga magkinahanglan og pagtambayayong. Pananglitan, makaporma mo og higot pinaagi sa tawo (pagporma og sirkulo ug ang tanan mogunit og duha ka lainlaing mga kamot sa mga tawo) ug magtambayayong sa pagbadbad nga dili mobuhi sa gigunitan nga mga kamot. O mahimo iorganisar ninyo ang inyong mga kaugalingon pinaagi sa paghimo og usa ka linya base sa pipila ka ilhanan nga dili mosulti (sama sa kahan-ayan sa inyong petsa sa pagkatawo, kolor sa mata, o gitas-on). Dayon hisgotan ang mahitungod kon sa unsang paagi nga ang pagtambayayong isip usa ka pamilya nagtabang sa pagtuman sa mga katuyoan sa Langitnong Amahan alang sa Iyang mga anak.

Pagkat-on pa og dugang

Seksiyon 2

Ang Dios Mihatag sa mga Ginikanan og Importante nga mga Responsibilidad

pamilya nga nagbasa sa mga kasulatan

Ang Langitnong Amahan mihatag sa mga ginikanan og responsibilidad alang sa Iyang minahal nga espiritu nga mga anak samtang ania sila dinhi sa yuta. Gimandoan Niya ang mga ginikanan sa pag-amuma sa ilang mga anak “diha sa kahayag ug kamatuoran” (Doktrina ug mga Pakigsaad 93:40). Ang mga propeta misulti usab, “Ang mga ginikanan adunay sagrado nga katungdanan sa pag-amuma sa ilang mga anak sa paghigugma ug pagkamatarong, sa pagsangkap alang sa ilang pisikal ug espirituhanon nga mga panginahanglan.” Kon ang mga pamilya dili makahimo sa paghatag sa tanan nga gikinahanglan, ang Simbahan moabot ug motabang (tan-awa sa Doktrina ug mga Pakigsaad 52:40; 83:1–6; 136:8).

Samtang ang mahigugmaong mga ginikanan mopadako sa ilang mga anak, sila aduna sa labing maayong oportunidad sa pagsangkap ug pag-amuma niadtong mga anak sa pisikal, espirituwal, ug sa emosyonal nga paagi. Ang mga ginikanan ug mga anak mapanalanginan kon ang mga ginikanan motudlo sa ebanghelyo ni Jesukristo diha sa panimalay (tan-awa sa Doktrina ug mga Pakigsaad 68:25–28). Usahay ang mga ginikanan dili dungan nga makahimo sa pagpadako sa ilang mga anak; sa maong mga sitwasyon, ang Ginoo mopanalangin nila kon ilang buhaton ang ilang labing maayo sa pagtuman sa ilang mga pakigsaad ug mosunod sa Iyang kabubut-on.

Mga butang nga angayang hunahunaon

  • Basaha ang mosunod nga mga asoy sa mga ginikanan nga mitudlo sa ilang mga anak: Mosiah 1:2–8; Helaman 5:4–12. (Mahimo usab ninyong basahon ang Deuteronomio 6:4–7; 11:19–21; Isaias 54:13; 2 Nephi 25:26 alang sa dugang pagsabot mahitungod sa pagkaginikanan.) Unsa nga mga baroganan sa ebanghelyo ang gitudlo niini sa mga ginikanan? Ngano nga kini nga mga baroganan importante nga makat-onan sa mga bata karon? Unsaon ninyo sa pagtabang ang inyong mga anak o ubang mga minahal nga makat-on ug mosunod niadto nga mga kamatuoran? Mahimo usab nga maghunahuna kamo og ubang mga ginikanan nga maayo og ehemplo nga inyong nailhan. Unsay inyong nakat-onan gikan kanila mahitungod kon sa unsang paagi nga ang matarong nga mga ginikanan motudlo sa mga anak sa Dios?

  • Si Presidente Russell M. Nelson mitambag: “Ayaw sulayi pagkontrolar ang inyong mga anak. Hinoon, paminawa sila, tabangi sila nga makakat-on sa ebanghelyo, dasiga sila, ug giyahi sila ngadto sa kinabuhing dayon. Kamo mga tinugyanan sa Dios sa pag-amuma sa mga anak nga gisalig Niya nganha kaninyo. Tugoti nga ang Iyang balaanong impluwensya magpabilin sa inyong mga kasingkasing samtang kamo nagtudlo ug nag-agni.” Unsaon ninyo sa pagtahod ang pagsalig sa Dios diha ninyo pinaagi sa makugihong pagtudlo sa inyong mga anak sa ebanghelyo? Unsaon nimo sa pagtahod ang kabubut-on sa inyong mga anak samtang giyahan ninyo sila ngadto sa kinabuhing dayon? Ikonsiderar unsaon ninyo nga ang Iyang impluwesnya mogiya ninyo matag adlaw sa inyong mga paningkamot.

Kalihokan alang sa pagkat-on kauban ang laing mga tawo

  • Basaha pagdungan ang Moises 3:21–24. Dayon basaha kini nga hunahuna ni Neil L. Andersen: “Sukad sa sinugdanan, ang Dios mipasiugda sa kaminyoon tali sa usa ka lalaki ug usa ka babaye—si Adan ug si Eva. Gitakda niya ang mga katuyoan sa kaminyoon nga mas molabaw pa sa personal nga katagbawan ug katumanan sa mga hamtong ngadto, sa mas importante, sa pagpatunhay og maayo nga kahimtang alang sa mga anak nga matawo, mapadako, ug maamuma. Ang mga pamilya mao ang bahandi sa langit.” Mahimong gamiton ninyo ang kahon sa bahandi o motan-aw sa giuban nga imahe samtang maghisgot ka sa tudling sa kasulatan ug sa pamahayag ni Elder Andersen. Mahimo ninyong isulat ang usa ka butang nga makatabang sa paghimo og maayo nga kahimtang alang sa mga bata nga makat-on ug molambo sa ebanghelyo.

  • Tan-awa ang giuban nga imahe ug hisgoti ngano nga ang pundasyon sa usa ka panimalay importante kaayo. Si Elder Tad R. Callister mitudlo: “Isip mga ginikanan, kinahanglang kita ang nag-unang mga magtutudlo sa ebanghelyo ug mga ehemplo sa atong mga anak—dili ang bishop, Sunday School, Young Women o Young Men, apan ang mga ginikanan. Isip ilang nag-unang mga magtutudlo sa ebanghelyo, makatudlo kita nila sa gahom ug katinuod sa Pag-ula—sa ilang pagkatawo ug balaanong padulngan—ug ang paghimo niini naghatag nila og lig-ong pundasyon nga katukoran. Human sa tanan, ang panimalay mao ang labing nindot nga dapit alang sa pagtudlo sa ebanghelyo ni Jesukristo.” Mahimo ninyong hisgotan ang mahitungod sa kaimportante sa mga oportunidad sa nakaplano nga pagtudlo sa ebanghelyo, apan hisgoti usab kon sa unsang paagi nga ang pagtudlo sa atong mga anak sa kasagaran mahitabo sa natural nga paagi samtang maghimo kita sa atong inadlaw nga mga kalihokan. Ipakigbahin ang mga kasinatian nga inyong nasinati sa dili pormal nga mga higayon sa pagtudlo ug unsay inyong nakat-onan gikan niini nga mga kasinatian. Sa unsa nga paagi nga kining regular, natural nga mga panasultihanay makatabang sa pagseguro nga ang kabataan ug kabatan-onan adunay solido nga pundasyon sa ebanghelyo aron sa pagpalig-on sa ilang mga pagpamatuod? Irekord ang inyong mga ideya, ug buhata ang bisan unsa nga mga impresyon nga inyong nadawat.

Pagkat-on pa og dugang

Seksiyon 3

Ang Dios Naghatag Kanato og Paagi sa Paghiusa sa mga Pamilya alang sa Kahangtoran

usa ka pamilya naglakaw sa gawas sa templo

Usa sa labing dako nga mga panalangin sa ebanghelyo ni Jesukristo mao nga kon kita magpabilin nga matinud-anon sa mga pakigsaad nga atong gihimo, ang atong mga relasyon sa pamilya makapadayon human niini nga kinabuhi—bisan alang sa kahangtoran. Si Presidente Dallin H. Oaks mitudlo: “Ang gipahiuli nga ebanghelyo nagseguro nato nga ang Pagkabanhaw mahimong maglakip sa oportunidad nga makauban ang atong mga sakop sa pamilya—bana, asawa, mga anak, ug ginikanan. Kini usa ka gamhanan nga pagdasig alang kanato sa pagtuman sa atong responsibilidad sa pamilya sa mortalidad. Kini makatabang kanato nga magpuyo sa gugma niini nga kinabuhi sa pagpaabot sa malipayon nga mga panaghiusa ug mga pakig-uban sa sunod.”

Kon tumanon nato ang mga sugo sa Ginoo ug ang atong mga pamilya naselyo diha sa Iyang balaan nga templo, misaad Siya nga makabaton kita og kinabuhing dayon kauban sa atong mga pamilya. Madawat nato kining kataposan nga panalangin bisan kon kita sa kasamtangan wala maminyo o walay mga anak o ang mga sakop sa atong pamilya walay oportunidad sa pagdawat sa ebanghelyo atol sa ilang panahon sa kinabuhi. Walay mga panalangin sa Dios nga ihikaw gikan niadtong kinsa takos niini.

Mga butang nga angayang hunahunaon

  • Si Presidente Nelson misaad: “Ubos sa dakong plano sa Dios sa kalipay, ang mga pamilya mabugkos diha sa mga templo ug maandam nga makabalik og puyo diha sa Iyang presensya sa kahangtoran. Kana ang mahangtorong dayon! Nagtuman kini sa lawom nga mga tinguha sa tawo—ang sagad nga pangandoy sa walay kataposang pakig-uban sa minahal nga mga sakop sa pamilya.” Ikonsiderar ang hingpit nga kalipay nga inyong maangkon sa “walay kataposang pakig-uban” sa inyong pamilya. Hain na kamo sa dalan aron makab-ot kini nga tumong? Unsa ang sunod nga lakang sa inyong pamilya niana nga dalan? Kon kamo adunay lisod nga sitwasyon sa pamilya diin ang “walay kataposang pakig-uban” sa usa ka tawo maingon og dili kaayo maayo sa pagkakaron, unsaon ninyo sa pagdapit sa gahom sa Manluluwas sa pagtabang aron maalim ang mga relasyon sa pamilya?

Kalihokan alang sa pagkat-on uban sa laing mga tawo

  • Mahimong tan-awon ninyo pagdungan ang bidyo nga “Families Can Be Together Forever” (3:10). Istoryahi ang tambag ni Presidente Henry B. Eyring mahitungod sa gugma diha sa pamilya. Unsa ang gipahinumdom kanato sa kataposang mga pulong ni Presidente Eyring diha sa bidyo? Dayon basaha kining pagtulun-an ni Presidente Nelson: “Kini nga kinabuhi mao ang panahon sa pagpangandam alang sa kaluwasan ug kahimayaan. Sa mahangturong plano sa Dios, ang kaluwasan usa ka butang nga may kalabotan sa indibidwal; ang kahimayaan usa ka butang nga may kalabotan sa pamilya.” Mahimo kamong mag-andam og makalingaw nga butang, sama sa paghimo o pag-andam og paborito nga pagkaon. Dayon mahimo kang maghisgot nganong ang pag-andam sa espirituwal nga paagi importante sa pagdawat og kahimayaan ug magkauban sa kahangtoran isip usa ka pamilya.

Pagkat-on pa og dugang