Librarya
Mga Ordinansa sa Pagtuga ug sa Pagselyo

“Mga Ordinansa sa Pagtuga ug sa Pagselyo,” Mga Hilisgotan ug mga Pangutana (2023)

babaye naglakaw atubangan sa templo

Giya sa Pagtuon sa Ebanghelyo

Mga Ordinansa sa Pagtuga ug sa Pagselyo

Sa unsang paagi ang Dios mogiya sa Iyang mga anak pauli sa gingharian

Hunahunaa nga anaa kamo sa taas nga panaw. Ang dalan pig-ot ug usahay lisod pangitaon, apan nasayod kamo nga paingon kamo sa saktong direksyon tungod sa pipila ka timailhan subay sa dalan. Sa inyong pag-abot sa matag usa, nagkaduol kamo sa inyong tumong. Sa kataposan, sa kinaulahian sa inyong panaw, molingi kamo ug makita kon sa unsang paagi nga ang mga timailhan nakatabang sa paggiya ninyo ngadto sa inyong padulngan.

Diha sa ebanghelyo, ang mga ordinansa sa pagtuga ug sa pagselyo nahisama sa mga timailhan subay sa pig-ot nga dalan. Kining duha parehong mahinungdanon sa pagtabang ninyo sa inyong panaw sa kinabuhi, nagdala ninyo paduol ngadto sa Langitnong Amahan ug ni Jesukristo. Matag usa mogiya ninyo pauli ngadto Kanila, motabang ninyo nga makasugakod sa mga hagit nga inyong masinati sa yuta ug moandam ninyo alang sa mahangtorong mga panalangin nga gitagana alang ninyo sa kinabuhi sa umaabot.

Unsa ang mga Ordinansa sa Pagtuga ug sa Pagselyo?

Ang mga ordinansa sa pagtuga ug sa pagselyo mahinungdanong mga bahin sa dalan sa pakigsaad nga mogiya nato og balik ngadto sa Dios. Moapil kita sa mga ordinansa sa pagtuga ug sa pagselyo diha sa templo. Atol niini nga mga ordinansa, kita mohimo og mga pakigsaad, o mga saad, ngadto sa Dios. Kon kita magmatinud-anon sa mga pakigsaad nga atong gihimo nga may kalabotan niini nga mga ordinansa, makadawat kita og kinabuhing dayon pinaagi sa Pag-ula ni Jesukristo.

Kinatibuk-ang pagpasabot sa hilisgotan: Pagtuga, Pagselyo

May kalabotan nga mga giya sa pagtuon sa ebanghelyo: Mga Pakigsaad ug mga Ordinansa, Mga Templo, Pag-apil sa Buhat sa Templo ug sa Family History

Seksiyon 1

Atol sa Ordinansa sa Pagtuga, Naghimo Kita og mga Pakigsaad ngadto sa Dios

sulod nga imahe sa templo

Usa sa mga ordinansa nga atong madawat diha sa balay sa Ginoo mao ang pagtuga. Ang pagtuga usa ka gasa gikan sa Dios. Atol niining sagrado nga ordinansa, o seremonya, kita magkat-on mahitungod sa plano sa Dios alang sa kaluwasan ug sa mahinungdanong tahas sa Manluluwas niana nga plano. Kita usab maghimo og mga pakigsaad ngadto sa Dios. Ang Langitnong Amahan mopanalangin nato sa paghimo ug sa pagtuman niini nga mga pakigsaad pinaagi sa paghatag nato og dugang nga paggamit sa Iyang gahom. Ang mga pakigsaad nga atong gihimo isip kabahin sa pagtuga maghatag nato og mga oportunidad nga molambo ug mausab. Pinaagi niini, kita mas mahisama ni Jesukristo ug mobati og kalinaw, kamasaligon, ug hingpit nga kalipay.

Human nato madawat ang atong kaugalingong pagtuga, makaapil kita sa ordinansa sa pagtuga alang sa uban nga namatay na. Didto sa kalibotan sa mga espiritu, kadtong namatay na nga mga tawo makapili sa pagdawat sa ebanghelyo ni Jesukristo ingon man usab sa mga ordinansa nga gipahigayon alang nila ug makadawat sa kaluwasan ug kahimayaan.

Mga butang nga angayang hunahunaon

  • Atol sa pagtuga, makigsaad kita nga mosunod sa lima ka lainlaing mga balaod. Basaha ang mahitungod niini nga mga balaod diha sa seksiyon 27.2 sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw (Librarya sa Ebanghelyo). Kumusta ang inyong pagsunod niini nga mga balaod? Unsa ang inyong mahimo aron mas sundon kini sa hingpit nga paagi? Sa unsang paagi si Jesukristo nagpakita og ehemplo sa pagsunod niini nga mga balaod? Pamalandongi kon sa unsang paagi nga ang pagsunod sa matag usa niini nga mga balaod makatabang ninyo nga mas mahisama Kaniya.

  • Swerte kita nga nagpuyo sa panahon nga ang mga templo natukod sa tibuok kalibotan. Si Elder David A. Bednar mitudlo: “Masabot lang, ang pahibalo sa matag bag-o nga templo usa ka tinubdan sa dakong kalipay ug usa ka rason nga magpasalamat sa Ginoo. Hinuon, ang atong nag-unang tutokan mao ang mga pakigsaad ug mga ordinansa nga makausab sa atong kasingkasing ug makapalawom sa atong debosyon sa Manluluwas ug dili lang sa dapit o kaanindot sa gambalay.” Sa unsang paagi nga kamo nagtuo nga ang mga pakigsaad ug mga ordinansa sa pagtuga makapausab sa kasingkasing? Sa unsang paagi nga makapalawom kini sa inyong debosyon ngadto sa Manluluwas? Pamalandongi kon sa unsang paagi nga ang pagtutok sa mga pakigsaad ug mga ordinansa sa pagtuga sa ingon niini nga paagi makatabang ninyo sa pagpangandam alang sa kahimayaan.

Mga kalihokan alang sa pagkat-on kauban ang laing mga tawo

  • Sa iyang pakigpulong “Nganong Mahinungdanon ang Dalan sa Pakigsaad,” si Elder D. Todd Christofferson mitandi sa pagsunod sa ebanghelyo ni Jesukristo ngadto sa paglikay sa “wala gipwersa nga mga sayop” sa tennis. Basaha ang mahitungod niini nga pagtandi sa iyang mensahe, ug hisgoti kon unsa ang “wala gipwersa nga mga sayop” nga atong malikayan pinaagi sa pagsunod sa lima ka pakigsaad nga atong gihimo atol sa pagtuga (tan-awa sa Kinatibuk-ang Tamdanan nga Basahon, 27.2). Mahimo usab kamo nga motan-aw og bidyo sa nagdula og tennis o gani magdula og tennis aron makita kon unsa ang wala gipwersa nga mga sayop. Dayon hisgoti ang ubang mga panalangin sa pagsunod sa mga pakigsaad nga gipakigbahin ni Elder Christofferson sa iyang mensahe. Sa unsang paagi nga kini nga mga panalangin nakapalig-on sa inyong tinguha sa paglakaw sa dalan sa pakigsaad ug sa pagdawat sa gasa sa pagtuga o sa pagtuman sa mga pakigsaad nga nahimo na ninyo diha sa templo?

  • Kabahin sa pagtuga naglakip sa pagsul-ob sa sagrado nga sinina samtang naghimo kita sa mga pakigsaad ug nagdawat sa mga ordinansa. Ikonsiderar ang paghisgot sa pipila ka ehemplo sa ubang mga okasyon nga nagsul-ob kita sa espesyal nga sinina ug kon ngano nga kana nga sinina importante sa kasinatian. Dayon mahimo ninyong tan-awon ang bidyo nga “Sacred Temple Clothing” (4:12), nga nagpasabot kon sa unsa nagrepresentar ang sinina sa templo ug kon ngano nga ang natugahan nga mga miyembro nagsul-ob og mga garment sa templo sa ilawom sa ilang sinina matag adlaw. Hisgoti kon sa unsang paagi nga ang sagrado nga sinina motabang sa pagpahayag sa atong debosyon ngadto sa Dios ug motabang nato nga mas mapaduol ngadto Kaniya. Mahimo usab ninyong rebyohon ang pakigpulong ni Sister J. Anette Dennis “Himoa ang Ginoong Jesukristo nga Inyong Tigpanalipod” aron sa pagkat-on pa og dugang mahitungod sa garment sa templo. O mahimo kamo nga mosusi og dungan sa “Mga Templo” nga pahina diha sa ChurchofJesusChrist.org aron mangita og makatabang nga mga kapanguhaan mahitungod sa mga templo, lakip na niadtong mopakita ninyo sa sulod sa balay sa Ginoo. Sa unsang paagi nga inyong magamit kini nga mga kapanguhaan sa pagtabang sa uban nga adunay mga pangutana mahitungod sa templo ug sinina sa templo?

Pagkat-on pa og dugang

Seksiyon 2

Ang Ordinansa sa Pagselyo Mobugkos Kanato ngadto sa Pamilya sa Dios ug ngadto sa Atong Yutan-ong mga Pamilya Hangtod sa Kahangtoran

daghang henerasyon sa pamilya diha sa templo

Pipila sa labing mahinungdanong mga panalangin sa Dios alang sa Iyang mga anak maanaa pinaagi sa ordinansa sa pagselyo. Atol niini nga ordinansa, usa ka lalaki ug usa ka babaye mosulod ngadto sa bag-o ug walay kataposan nga pakigsaad sa kaminyoon sa higayon nga sila mohimo og sagrado nga mga pakigsaad ngadto sa usag usa ug ngadto sa Ginoo (tan-awa sa Doktrina ug mga Pakigsaad 131:1–4). Kon ang magtiayon matinud-anon sa ilang mga pakigsaad, mahimo silang mabugkos ngadto sa pamilya sa Dios ug ngadto sa ilang yutan-ong pamilya alang sa kahangtoran. Gisaaran usab sila og talagsaong mga panalangin sa sunod nga kinabuhi.

Ang mga pagselyo mahimong ipahigayon alang niadtong namatay na aron sila, usab, makadawat sa mahangtorong mga panalangin ug hangtod sa kahangtoran mahiusa ngadto sa ilang pamilya ug sa pamilya sa Dios. Sama sa uban pang mga ordinansa sa pagkapari, ang ordinansa sa pagselyo nahimong posible pinaagi sa Pag-ula ni Jesukristo ug maghatag nato og kalinaw ug katuyoan niini nga kinabuhi.

Mga butang nga angayang hunahunaon

  • Sa dihang si Jesukristo mihatag ni Apostol Pedro “sa mga yawe sa gingharian sa langit,” Siya naghatag niya og gahom sa pagselyo—ang gahom sa paghatag sa mga panalangin dinhi sa yuta nga magpadayon didto sa langit (tan-awa sa Mateo 16:19). Basaha ang Doktrina ug mga Pakigsaad 110:13–16; 132:7, 45–46 sa pagkat-on kon sa unsang paagi nga kini nga mga yawe gipahiuli ngadto ni Propeta Joseph Smith sa ulahing mga adlaw. Kini nga mga yawe gihuptan karon sa atong kasamtangan nga propeta, ug mohiusa kini sa mga pamilya sa kahangtoran. Apan ang gahom sa pagselyo “maingon ngadto sa uban og usa ka dili kasagaran nga doktrina” (Doktrina ug mga Pakigsaad 128:9). Ngano nga maingon man niana? Sa unsang paagi nga naghatag ninyo kini og paglaom nga masayod nga ang mga relasyon sa pamilya nga naselyo dinhi sa yuta naselyo usab didto sa langit?

  • Si Presidente Russell M. Nelson mitudlo: “Ang pakigsaad sa kaminyoon nga gihimo diha sa templo direktang nabugkos ngadto [sa] pakigsaad kang Abraham. Sa templo ang magtiayon gipaila ngadto sa tanang panalangin nga gitagana alang sa matinud-anong kaliwatan ni Abraham, Isaac, ug Jacob.” Basaha ang mahitungod sa pipila niini nga mga panalangin diha sa Doktrina ug mga Pakigsaad 76:50–60; 132:19. Sa unsang paagi nga kamo mahimong “makiangayon ug matarong” (Doktrina ug mga Pakigsaad 76:53) sa inyong mga pakigsaad ngadto sa Dios aron kamo ug ang inyong mga minahal makadawat sa Iyang labing mahinungdanon nga mga saad? Isulat ang bisan unsa nga mga hunahuna nga inyong madawat, ug dayon lihoka kini.

  • Ang ordinansa sa pagselyo madawat didto sa balaang altar sa templo. Sa inyong hunahuna sa unsa kaha nagrepresentar ang altar? Kini nga mga kasulatana makagiya sa inyong hunahuna: Genesis 8:20; 26:23–25; 1 Nephi 2:7; Moises 5:5–9. Unsa kaha ang simbolo sa altar alang nimo mahitungod sa ordinansa sa pagselyo ug sa mga relasyon sa pamilya?

Mga kalihokan alang sa pagkat-on kauban ang laing mga tawo

  • Kasagaran, ang mga selyo gigamit alang sa legal nga mga dokumento, mga diploma, o importante nga mga sulat sa pagpakita nga lehitimo kini. Tingali mahimo kamong motan-aw sa mga hulagway sa pipila niining lainlaing mga matang sa mga selyo o maghimo og inyong kaugalingong selyo. Dayon rebyoha og dungan ang pikigpulong nga “Ang Gahom sa Pagselyo” ni Elder D. Todd Christofferson. Unsa ang mga kalainan tali sa yutan-ong selyo ug gahom sa Dios sa pagselyo? Unsa ang mga panalangin nga maanaa pinaagi sa Iyang gahom sa pagselyo? Kon kamo nakadawat na og ordinansa sa pagselyo diha sa balay sa Ginoo alang sa inyong kaugalingon o alang sa katigulangan, ikonsiderar ang pagpakigbahin sa inyong kasinatian. Sa unsang paagi nga kamo nasayod nga ang Ginoo miila sa inyong ordinansa sa pagselyo isip “lehitimo” o balido?

  • Usahay, ang lisod o dili maayo nga mga sitwasyon sa pamilya ang nakapalisod nga mangandoy nga makauban ang atong mga pamilya sa kahangtoran. O tingali ang usa ka sakop sa pamilya wala motuman sa iyang mga pakigsaad sa kaminyoon, mao nga nagduhaduha kita kon ang atong pamilya mohangtod ba sa kahangtoran. Mahitungod niana nga mga sitwasyon, si Elder David A. Bednar mitudlo: “Kaninyo kinsa nakasinati og kagul-anan sa diborsyo sa inyong pamilya o mibati sa kasakit sa gilapas nga pagsalig, palihug hinumdomi nga kini magsugod pag-usab diha kaninyo! Usa ka sumpay sa kadena sa inyong mga henerasyon tingali naputol, apan ang ubang matarong nga mga sumpay ug ang nahabilin sa kadena importante gihapon sa kahangtoran. Makadugang kamo og kalig-on sa inyong kadena ug tingali gani makatabang sa pagpahiuli sa naputol nga mga sumpay. Kana nga buhat matuman sa tagsa-tagsa.” Basaha og dungan ang mga pulong ni Elder Bednar ug dayon paghimo og kadena nga papel. Dayon mahimo ninyong sulatan ang usa sa mga sumpay og butang nga inyong buhaton aron mahimong lig-on nga sumpay diha sa inyong pamilya pinaagi sa gahom sa Manluluwas sa pagselyo.

Pagkat-on pa og dugang