Հիսուս Քրիստոսի Վերջին Օրերի Սրբերի Եկեղեցի

Կարող եք դիտել «Կենդանի առաքյալները վկայում են Հիսուս Քրիստոսի մասին» տեսանյութը, որպեսզի լսեք Փրկչի և Նրա առաքելության մասին զորեղ վկայություններ Տասներկու Առաքյալների Քվորումի անդամների կողմից։ Ինչպե՞ս են առաքյալների, մարգարեների և եկեղեցու այլ ղեկավարների վկայություններն օգնում ձեզ իմանալ, որ սա Աստծո վերականգնված եկեղեցին է։ Ինչո՞ւ է կարևոր, որ Հիսուս Քրիստոսի եկեղեցին այսօր առաջնորդվում է առաքյալների և մարգարեների կողմից։ Ի՞նչ եք արել կամ ի՞նչ կարող եք անել, որպեսզի ինքներդ իմանաք, որ մեր եկեղեցու ղեկավարները կանչված են Աստծո կողմից և որ սա է Նրա վերականգնված եկեղեցին երկրի վրա այսօր:

Նախագահ Դալլին Հ. Օուքսն ուսուցանել է․ «Ի՞նչ է նշանակում, որ Հիսուս Քրիստոսի Վերջին Օրերի Սրբերի Եկեղեցին միակ ճշմարիտ եկեղեցին է։ Երեք հատկանիշներ՝ (1) վարդապետության լրիվությունը, (2) քահանայության զորությունը, և (3) վկայությունը Հիսուս Քրիստոսի մասին, բացատրում են, թե Աստված ինչու է հռչակել և ինչու մենք, որպես Նրա ծառաներ, պնդում ենք, որ սա միակ ճշմարիտ և կենդանի եկեղեցին է երկրի վրա»: Քննարկեք այս երեք հատկանիշները և թե ինչու են դրանք Աստծո ճշմարիտ եկեղեցու կարևոր մասը կազմում։ Կիսվեք փորձառություններով, որոնք օգնել են ձեզ հասկանալ, որ Հիսուս Քրիստոսի Վերջին Օրերի Սրբերի Եկեղեցին Փրկչի ճշմարիտ և կենդանի եկեղեցին է։ Խոսեք այն մասին, թե ինչպես է այդ գիտելիքն օրհնել ձեր կյանքը։

Հավատո Հանգանակը 1․6

Հիսուս Քրիստոսի ավետարանի լրիվության վերականգնումը. Երկուհարյուրամյա հռչակագիր աշխարհին, Ավետարանի գրադարան

«Քրիստոսի եկեղեցու բարձրացումը», գլուխ 8 Սրբեր. Հիսուս Քրիստոսի Եկեղեցու պատմությունը վերջին օրերում, հատ. 1, Ճշմարտության դրոշը, 1815–1846 (2018), 76–86

Կարդացեք և խորհեք Հովհաննես 15.16։ Ի՞նչ է նշանակում ձեզ համար, որ Աստված ընտրել է ձեզ, որպեսզի օգնեք իրականացնել Իր աշխատանքն Իր եկեղեցում: Ինչպե՞ս եք տպավորվել, երբ օգնել եք Նրան փրկության և վեհացման գործում։ Ինչպե՞ս եք օրհնվել, երբ հետևել եք այս տպավորություններին: Գրի առեք ձեր մտքերը ձեր օրագրում և մտածեք, թե արդյոք կա մի բան, որը պլանավորում էիք անել՝ կապված Աստծո աշխատանքի հետ, որը դեռ չեք արել: Այնուհետև նպատակ դրեք դա անելու համար:

Երեց Ջոն Ք. Փինգրի Կրտսերը հիշեցրել է մեզ, որ Աստծո աշխատանքը «[չի] պահվում մի քանի արտոնյալ մարդկանց համար, [այն] բոլորիս համար [է]՝ անկախ սեռից, ռասայից, ազգությունից, եկամտից, սոցիալական կարգավիճակից կամ եկեղեցում ունեցած կոչումից: Մեզանից յուրաքանչյուրը իմաստալից դեր ունի Աստծո աշխատանքն առաջ մղելու գործում (տես Մովսես 1.39)»: Նա շարունակել է․ «Մեզանից շատերը հարցնում են, արդյո՞ք Երկնային Հայրը կարող է օգտագործել մեզ կարևոր ներդրումներ կատարելու համար: Բայց հիշեք, նա միշտ օգտագործել է սովորական մարդկանց՝ կատարելու արտասովոր գործեր (տես Ա Կորնթացիներին 1․27-28, ՎևՈւ& 35․13, 124․1)։ Կարող եք խոսել մի քանի արտասովոր բաների մասին, որոնք տեսել եք եկեղեցու սովորական անդամներին անելիս՝ օգնելու Աստծո փրկության և վեհացման գործում։ Գուցե նպատակ դնեք այս շաբաթ միասին ինչ-որ բան անել՝ Աստծո գործն առաջ տանելու համար։ Այնուհետև կարող եք խոսել այն մասին, թե ինչ եք սովորել այդ փորձառությունից կամ ինչ եք զգացել ծառայելիս։

Մատթեոս 5.13-16, Եփեսացիներին 4.11-15, Մոսիա 18.27-29, Մորոնի 6.4-9

Դալլին Հ. Օուքս, «Եկեղեցի հաճախելու պատճառները», Լիահոնա, նոյ․ 2021, 24-26

«How the Church Is Organized» (տեսանյութ), Ավետարանի գրադարան

Երեց Գերիթ Վ . Գոնգը նկատել է․ «[Տերը] խնդրում է մեզ Իր [Եկեղեցին] դարձնել շնորհի և տարածքի մի վայր, որտեղ բոլորը կարող են հավաքվել և տեղ կլինի բոլորի համար: Որպես Հիսուս Քրիստոսի աշակերտներ, բոլորը հավասար են՝ առանց երկրորդ կարգի խմբերի: Բոլորը հրավիրվում են մասնակցել հաղորդության ժողովին, ինչպես նաև այլ կիրակնօրյա ժողովներին ու հասարակական միջոցառումներին: Մենք ակնածալից երկրպագում ենք մեր Փրկչին, լինելով խորամիտ և ուշադիր միմյանց հանդեպ: Մենք տեսնում ենք և ընդունում ենք յուրաքանչյուր մարդու: Մենք ժպտում ենք, նստում նրանց կողքին, ովքեր մենակ են նստած, իմանում ենք նրանց անունները, այդ թվում՝ նորադարձների, վերադարձած եղբայրների և քույրերի, երիտասարդ աղջիկների և երիտասարդ տղաների անունները, Երեխաների միության յուրաքանչյուր սիրելի երեխայի անունը: Մեզ պատկերացնելով նրանց փոխարեն՝ մենք սիրով ընդունում ենք ընկերների, այցելուների, նոր տեղափոխվածների, զբաղված անհատների, որոնք ներգրավված են չափազանց շատ ուղղություններում»: Որո՞նք են այն ուղիները, որոնցով դուք կարող եք օգնել ուրիշներին իմանալ, որ նրանք ողջունվում են մեր ժողովների ժամանակ և պատկանում են Հիսուս Քրիստոսի եկեղեցուն։ Ո՞ւմ կարող եք օգնության հասնել։ Նպատակ դրեք անել ինչ-որ բան, ցույց տալու ուրիշներին, որ դուք հոգ եք տանում նրանց մասին, և որ նրանք պատկանում են ձեր ծխին կամ ճյուղին։

Հիսուս Քրիստոսը ցանկանում է, որ բոլորը գան Նրա մոտ և Նրա եկեղեցի, և մենք կարող ենք օգնել՝ պարզ, անկեղծ հրավերներ ուղղելով մեզ շրջապատողներին։ Երեց Գարի Ի. Սթիվենսոնը կիսվել է. «Հարյուրավոր հրավերներ կան, որոնք կարող ենք ուղղել ուրիշներին: Մենք կարող ենք հրավիրել ուրիշներին «գալ և տեսնել» հաղորդության արարողություն, ծխի միջոցառում, առցանց տեսահոլովակ, որը բացատրում է Հիսուս Քրիստոսի ավետարանը: «Եկեք և տեսեք» առաջարկը կարող է հրավիրել կարդալ Մորմոնի Գիրքը կամ այցելել մի նոր տաճար բաց դռների օրը՝ նախքան նվիրագործումը: Երբեմն հրավերը մի բան է, որը մենք ուղղում ենք ներս՝ հրավեր ինքներս մեզ, որը մեզ տալիս է մեզ շրջապատող հնարավորությունների գիտակցում և գործելու տեսլական: Մեր թվայնացված դարում անդամները հաճախ կիսվում են ուղերձներով սոցիալական ցանցերի միջոցով: Կան հարյուրավոր, եթե ոչ հազարավոր վեհացնող բաներ, որոնցով գուցե արժե կիսվել»։ Քննարկեք մի քանի հրավերներ, որոնք կարող եք անել այս շաբաթ, ապա միասին հավաքվեք և զեկուցեք ձեր փորձառությունները:

Խնդրեք խմբում գտնվող որևէ մեկին մարմնի պարզ նկար նկարել։ Խոսեք այն մասին, թե ինչպես են բոլոր մասերը (օրինակ՝ ձեռքերը, ոտքերը, աչքերը և ականջները) կարևոր։ Այնուհետև միասին կարդացեք Ա Կորնթացիներին 12.12-18 հատվածները և քննարկեք ձեր սովորածը: Ինչպե՞ս կարող ենք վերագրել այս հատվածները եկեղեցու անդամությանը: Նախագահ Բոյդ Ք. Փաքերն ուսուցանել է․ «Մենք կարիք ունենք և նորադարձների, և նրանց, ովքեր ռահվիրաների սերունդներից են գալիս: Մենք պետք է փնտրենք նրանց, ովքեր շեղվել են, և պետք է օգնենք նրանց վերադառնալ հոտ: Մենք կարիք ունենք յուրաքանչյուրի իմաստության և հոգևոր ամրության: Այս Եկեղեցու յուրաքանչյուր անդամ որպես անհատ կենսական տարր է հանդիսանում Եկեղեցու կառուցվածքի մեջ»: Կարող եք գրել մի բան, որը կանեք այս շաբաթ, որպեսզի օգնեք ինչ-որ մեկին ձեր ծխում կամ ճյուղում իմանալ, թե որքան կարևոր է նա: Այնուհետև կարող եք զեկուցել, թե ինչ եք արել։

Ա Կորնթացիներին 12.12-27, Մովսես 1․39

Տես Դ. Թոդ Քրիստոֆերսոն, «Պատկանելության վարդապետությունը», Լիահոնա, նոյ․ 2022, 53-56

Տես Դ. Թոդ Քրիստոֆերսոն, «Ինչո՞ւ Եկեղեցին», Լիահոնա, նոյ․ 2015, 108-11

Թեմաներ և հարցեր, «Բազմազանություն և միասնություն Հիսուս Քրիստոսի Վերջին Օրերի Սրբերի Եկեղեցում», Ավետարանի գրադարան

«Unity in Diversity» (տեսադարան)