« ១០. កូរ៉ុមបព្វជិតភាពអើរ៉ុន » ជម្រើសចេញមកពីក្បួនខ្នាតទូទៅ ( ឆ្នាំ២០២៣ ) ។
« ១០. កូរ៉ុមបព្វជិតភាពអើរ៉ុន » ជម្រើសចេញមកពីក្បួនខ្នាតទូទៅ
១០.
កូរ៉ុមបព្វជិតភាពអើរ៉ុន
១០.១
គោលបំណង និងអង្គការ
១០.១.១
គោលបំណង
គោលបំណងរបស់កូរ៉ុមគឺដើម្បីជួយអ្នកកាន់បព្វជិតភាព ឲ្យធ្វើការរួមគ្នាដើម្បីចូលរួមក្នុងកិច្ចការនៃសេចក្តីសង្រ្គោះ និងភាពតម្កើងឡើង ។
១០.១.២
បាវចនាកូរ៉ុមបព្វជិតភាពអើរ៉ុន
« ខ្ញុំជាបុត្រាសំណព្វរបស់ព្រះ ហើយទ្រង់មានការងារឲ្យខ្ញុំធ្វើ ។
« ឲ្យអស់ពីចិត្ត អស់ពីពលំ អស់ពីគំនិត ហើយអស់ពីកម្លាំង ខ្ញុំនឹងស្រឡាញ់ព្រះ រក្សាសេចក្តីសញ្ញារបស់ខ្ញុំ និងប្រើបព្វជិតភាពរបស់ទ្រង់ដើម្បីបម្រើអ្នកដទៃ ដោយចាប់ផ្តើមពីនៅក្នុងគេហដ្ឋានរបស់ខ្ញុំ ។
« កាលណាខ្ញុំព្យាយាមបម្រើ អនុវត្តសេចក្តីជំនឿ ប្រែចិត្ត ហើយកែលម្អជារៀងរាល់ថ្ងៃ ខ្ញុំនឹងសមដើម្បីទទួលពរជ័យនៃព្រះវិហារបរិសុទ្ធ និងអំណរដ៏ឋិតថេរនៃដំណឹងល្អ ។
ខ្ញុំនឹងរៀបចំខ្លួនដើម្បីធ្វើជាអ្នកផ្សព្វផ្សាយសាសនាដ៏ឧស្សាហ៍ព្យាយាម ធ្វើជាស្វាមីដែលមានភក្តីភាព និងធ្វើជាឪពុកពេញដោយក្តីស្រឡាញ់ តាមរយៈការធ្វើជាសិស្សពិតនៃព្រះយេស៊ូវគ្រីស្ទ ។
ខ្ញុំនឹងជួយរៀបចំពិភពលោកសម្រាប់ការយាងត្រឡប់មកវិញរបស់ព្រះអង្គសង្រ្គោះ តាមរយៈការអញ្ជើញមនុស្សទាំងអស់ឲ្យមករកព្រះគ្រីស្ទ និងទទួលពរជ័យទាំងឡាយនៃដង្វាយធួនរបស់ទ្រង់ » ។
១០.១.៣
កូរ៉ុម
១០.១.៣.១
កូរ៉ុមឌីកុន
ក្រុមយុវជនចូលរួមជាមួយកូរ៉ុមឌីកុននៅដើមខែមករា នៃឆ្នាំដែលពួកគេឈានចូលដល់អាយុ ១២ ឆ្នាំ ។ នៅពេលនេះ ពួកគេក៏មានសិទ្ធិត្រូវបានតែងតាំងជាឌីកុនផងដែរ ប្រសិនបើពួកគេបានរៀបចំខ្លួន និងមានភាពស័ក្តិសម ។
ករណីយកិច្ចរបស់ឌីកុនត្រូវបានពិពណ៌នានៅក្នុង គោលលទ្ធិ និងសេចក្តីសញ្ញា ២០:៥៧–៥៩; ៨៤:១១១ ។ ករណីយកិច្ចដទៃទៀតរួមមានការចែកសាក្រាម៉ង់ និងការជួយប៊ីស្សពនៅក្នុង « ការចាត់ចែងគ្រប់អស់ទាំងការណ៍ខាងសាច់ឈាម » ( គោលលទ្ធិ និងសេចក្ដីសញ្ញា ១០៧:៦៨ ) ។
១០.១.៣.២
កូរ៉ុមគ្រូ
ក្រុមយុវជនចូលរួមជាមួយកូរ៉ុមគ្រូចាប់ផ្តើមពីខែ មករា នៃឆ្នាំ ដែលពួកគេឈានចូលដល់អាយុ ១៤ ឆ្នាំ ។ នៅពេលនេះ ពួកគេក៏មានសិទ្ធិត្រូវបានតែងតាំងជាគ្រូផងដែរ ប្រសិនបើពួកគេបានរៀបចំខ្លួន និងមានភាពស័ក្តិសម ។
គ្រូមានករណីយកិច្ចដូចគ្នានឹងឌីកុនដែរ ។ ពួកគេក៏រៀបចំសាក្រាម៉ង់ និងបម្រើជាបងប្អូនប្រុសដែលផ្ដល់ការងារបម្រើផងដែរ ។ ករណីយកិច្ចបន្ថែមត្រូវបានពិពណ៌នានៅក្នុង គោលលទ្ធិ និងសេចក្តីសញ្ញា ២០:៥៣–៥៩; ៨៤:១១១ ។
១០.១.៣.៣
កូរ៉ុមសង្ឃ
ក្រុមយុវជនចូលរួមជាមួយកូរ៉ុមសង្ឃចាប់ផ្តើមពីខែមករានៃឆ្នាំ ដែលពួកគេឈានចូលដល់អាយុ១៦ឆ្នាំ ។ នៅពេលនេះ ពួកគេក៏មានសិទ្ធិត្រូវបានតែងតាំងជាសង្ឃផងដែរ ប្រសិនបើពួកគេបានរៀបចំខ្លួន និងមានភាពស័ក្តិសម ។
សង្ឃមានករណីយកិច្ចដូចគ្នានឹងឌីកុន និងគ្រូផងដែរ ។ ករណីយកិច្ចបន្ថែមត្រូវបានពិពណ៌នានៅក្នុង គោលលទ្ធិ និងសេចក្តីសញ្ញា ២០:៤៦–៥២, ៧៣–៧៩ ។
១០.១.៤
កូនសោទាំងឡាយនៃបព្វជិតភាព
សម្រាប់ព័ត៌មានបន្ថែមអំពីកូនសោទាំងនេះ សូមមើល ៣.៤.១ ។
១០.១.៥
ការសម្របសម្រួលកូរ៉ុមទៅនឹងសេចក្តីត្រូវការក្នុងមូលដ្ឋាន
នៅក្នុងវួដ ឬសាខាដែលមានចំនួនយុវជនតិច នោះកូរ៉ុមបព្វជិតភាពអើរ៉ុនអាចជួបជាមួយគ្នាដើម្បីរៀន និងធ្វើសកម្មភាពនានា ។
១០.២
ការចូលរួមនៅក្នុងកិច្ចការនៃសេចក្តីសង្រ្គោះ និងភាពតម្កើងឡើងរបស់ព្រះ
១០.២.១
ការរស់នៅតាមដំណឹងល្អរបស់ព្រះយេស៊ូវគ្រីស្ទ
១០.២.១.២
ការរៀនសូត្រដំណឹងល្អ
ការប្រជុំកូរ៉ុមធ្វើឡើងនៅថ្ងៃអាទិត្យទីពីរ និងទីបួននៃខែ ។ វាមានរយៈពេល ៥០ នាទី ។ សមាជិកម្នាក់នៃគណៈប្រធានកូរ៉ុម ( ឬជំនួយការម្នាក់របស់ប៊ីស្សពនៅក្នុងកូរ៉ុមសង្ឃ ) ដឹកនាំកម្មវិធី ។ គាត់ដឹកនាំកូរ៉ុមឲ្យសូត្របាវចនា ហើយប្រឹក្សាជាមួយគ្នាអំពីការចាត់តាំង ករណីយកិច្ច និងកិច្ចការផ្សេងៗទៀត ។
បន្ទាប់មក សមាជិកកូរ៉ុម ឬថ្នាក់ដឹកនាំមជ្ឈិមវ័យម្នាក់ដឹកនាំការបង្រៀនដំណឹងល្អ ។
១០.២.១.៣
ការបម្រើ និងសកម្មភាពនានា
ការបម្រើ និងសកម្មភាពនានាគួរតែស្ថាបនាទីបន្ទាល់ ពង្រឹងក្រុមគ្រួសារ បង្កើតឲ្យមានសាមគ្គីភាពនៅក្នុងកូរ៉ុម និងផ្តល់ឱកាសដើម្បីផ្តល់ពរជ័យដល់មនុស្សដទៃ ។
ការបម្រើ និងសកម្មភាពមួយចំនួនគួរតែរួមបញ្ចូលទាំងក្រុមយុវជន និងក្រុមយុវនារី ជាពិសេសយុវវ័យដែលមានវ័យច្រើនជាងគេ ។
សកម្មភាពប្រចាំឆ្នាំ ។ បន្ថែមលើការធ្វើសកម្មភាពនានាជាប្រចាំរបស់យុវវ័យ នោះក្រុមយុវជនក៏អាចចូលរួមក្នុងសកម្មភាពដូចខាងក្រោមនេះរាល់ឆ្នាំផងដែរ ៖
-
ការបោះជំរំកូរ៉ុមបព្វជិតភាពអើរ៉ុន ( សូមមើល សេចក្តីណែនាំពីការបោះជំរំរបស់កូរ៉ុមបព្វជិតភាពអើរ៉ុន ) ។
-
សន្និសីទយុវវ័យវួដ ឬស្តេក ឬសន្និសីទដើម្បីកម្លាំងនៃយុវជន ( FSY ) ។
១០.២.១.៤
ការអភិវឌ្ឍផ្ទាល់ខ្លួន
នៅក្នុងការខិតខំរបស់ពួកគេដើម្បីប្រែក្លាយកាន់តែដូចជាព្រះអង្គសង្រ្គោះ នោះយុវវ័យត្រូវបានអញ្ជើញឲ្យដាក់គោលដៅដើម្បីរីកចម្រើនខាងវិញ្ញាណ ខាងសង្គម ខាងរាងកាយ និងខាងបញ្ញា ( សូមមើល លូកា ២:៥២ ) ។
សម្រាប់ព័ត៌មានបន្ថែម សូមមើលគេហទំព័រ ChildrenandYouth.ChurchofJesusChrist.org ។
១០.២.២
ការមើលថែដល់អ្នកខ្វះខាត
អ្នកកាន់បព្វជិតភាពអើរ៉ុនជួយប៊ីស្សពនៅក្នុងការ « ចាត់ចែងគ្រប់អស់ទាំងការណ៍ខាងសាច់ឈាម » ( គោលលទ្ធិ និងសេចក្ដីសញ្ញា ១០៧:៦៨ ) ។ ក្រុមយុវជនគួរតែមានឱកាសបម្រើមនុស្សដទៃទាំងនៅក្នុង និងជាមួយក្រុមគ្រួសាររបស់ពួកគេជាប្រចាំ នៅអំឡុងពេលធ្វើសកម្មភាពយុវវ័យ និងដោយខ្លួនពួកគេផ្ទាល់ ។
១០.២.២.១
ការផ្ដល់ការងារបម្រើ
អ្នកកាន់បព្វជិតភាពអើរ៉ុនទទួលការងារបម្រើដែលចាត់តាំងនៅដើមខែ មករា នៃឆ្នាំដែលពួកគេឈានចូលដល់អាយុ ១៤ ឆ្នាំ ។ សម្រាប់ព័ត៌មានបន្ថែម សូមមើល ជំពូកទី ២១ ។
១០.២.៣
ការអញ្ជើញមនុស្សទាំងអស់ឲ្យទទួលយកដំណឹងល្អ
អ្នកកាន់បព្វជិតភាពអើរ៉ុនមានករណីយកិច្ចដើម្បី « អញ្ជើញមនុស្សទាំងអស់ឲ្យមករកព្រះគ្រីស្ទ » ( គោលលទ្ធិ និងសេចក្ដីសញ្ញា ២០:៥៩ ) ។
ឪពុកម្តាយ និងថ្នាក់ដឹកនាំលើកទឹកចិត្តក្រុមយុវជនឲ្យរៀបចំខ្លួនបម្រើបេសកកម្មពេញម៉ោង និងចែកចាយដំណឹងល្អពេញមួយជីវិតរបស់ពួកគេ ។
១០.២.៤
ការបង្រួបបង្រួមក្រុមគ្រួសារសម្រាប់ភាពអស់កល្បជានិច្ច
អ្នកកាន់បព្វជិតភាពអើរ៉ុនអាចជួយក្រុមគ្រួសារឲ្យមានសាមគ្គីភាពរហូតអស់កល្បជានិច្ចតាមរបៀបជាច្រើន ។
-
គោរពឪពុកម្តាយរបស់ពួកគេ និងធ្វើជាគំរូនៃការរស់នៅដូចជាព្រះគ្រីស្ទនៅក្នុងផ្ទះរបស់ពួកគេ ។
-
រៀបចំខ្លួនដើម្បីទទួលពិធីបរិសុទ្ធនៅព្រះវិហារបរិសុទ្ធ រួមទាំងការរៀបអាពាហ៍ពិពាហ៍នៅដ៏អស់កល្បជានិច្ចផងដែរ ។
-
ស្វែងរកបុព្វការីជនដែលត្រូវការពិធីបរិសុទ្ធនៅព្រះវិហារបរិសុទ្ធ ( សូមមើលគេហទំព័រ FamilySearch.org ) ។
-
ចូលរួមនៅក្នុងពិធីបុណ្យជ្រមុជទឹក និងពិធីបញ្ជាក់សម្រាប់មរណជនឲ្យបានញឹកញាប់ តាមដែលកាលៈទេសៈអនុញ្ញាត ។
១០.៣
គណៈប៊ីស្សព
ការទទួលខុសត្រូវដ៏សំខាន់បំផុតរបស់ប៊ីស្សពគឺ ត្រូវមើលថែដល់ ជំនាន់ដែលកំពុងពេញវ័យ នៅក្នុងវួដរបស់គាត់ ។ គាត់រៀនស្គាល់ឈ្មោះរបស់ពួកគេ ហើយយល់ពីកាលៈទេសៈនៅផ្ទះរបស់ពួកគេ ។ គាត់ចូលរួមសកម្មភាពរបស់ពួកគេ និងការប្រជុំជាប្រចាំនៅថ្ងៃអាទិត្យ ។
ប៊ីស្សពគឺជាប្រធាននៃកូរ៉ុមសង្ឃ ។
ទីប្រឹក្សាទីមួយនៅក្នុងគណៈប៊ីស្សពមានទំនួលខុសត្រូវចំពោះកូរ៉ុមគ្រូ ។ ទីប្រឹក្សាទីពីរមានទំនួលខុសត្រូវចំពោះកូរ៉ុមឌីកុន ។
គណៈប៊ីស្សពមានទំនួលខុសត្រូវបន្ថែមដូចខាងក្រោមសម្រាប់កូរ៉ុមបព្វជិតភាពអើរ៉ុន ៖
-
ជួបជាមួយយុវជនម្នាក់ៗ យ៉ាងហោចណាស់ពីរដងក្នុងមួយឆ្នាំ ( សូមមើល ៣១.៣.១ ) ។
-
ជួយក្រុមយុវជនឲ្យរៀបចំខ្លួនដើម្បីទទួលបព្វជិតភាពម៉ិលគីស្សាដែក ។
-
មើលការខុសត្រូវលើកំណត់ត្រា របាយការណ៍ និងហិរញ្ញវត្ថុរបស់កូរ៉ុមបព្វជិតភាពអើរ៉ុន ។
ពួកអ្នកប្រឹក្សាយោបល់ និងអ្នកជំនាញក្នុងកូរ៉ុមជួយសម្រាលទំនួលខុសត្រូវទាំងនេះតាមដែលបានស្នើសុំ ។
១០.៤
ថ្នាក់ដឹកនាំកូរ៉ុមយុវវ័យ
១០.៤.១
ការហៅ ការគាំទ្រ និងការញែកចេញ
ប៊ីស្សពហៅសង្ឃម្នាក់ ឬពីរនាក់ឲ្យបម្រើជាជំនួយការរបស់គាត់នៅក្នុងការដឹកនាំកូរ៉ុមសង្ឃ ។
សមាជិកនៃគណៈប៊ីស្សពហៅប្រធានកូរ៉ុមឌីកុន និងប្រធានកូរ៉ុមគ្រូ ។ នៅពេលមានអ្នកកាន់បព្វជិតភាពអើរ៉ុនគ្រប់គ្រាន់ដើម្បីបម្រើ នោះយុវជនទាំងនេះធ្វើការពិចារណាប្រកបដោយការអធិស្ឋានពីសមាជិកកូរ៉ុមដែលត្រូវផ្តល់អនុសាសន៍ឲ្យធ្វើជាទីប្រឹក្សា និងជាលេខា ។
បន្ទាប់ពីផ្តល់ការហៅបម្រើទាំងនេះហើយ សមាជិកមួយរូបនៃគណៈប៊ីស្សពឧទ្ទេសនាមថ្នាក់ដឹកនាំកូរ៉ុមយុវវ័យទាំងនោះសម្រាប់ការគាំទ្រនៅក្នុងការប្រជុំកូរ៉ុមរបស់ពួកគេ ។ ប៊ីស្សពធ្វើពិធីញែកចេញដល់ជំនួយការរបស់គាត់ និងប្រធានកូរ៉ុមឌីកុន និងប្រធានកូរ៉ុមគ្រូ ។ គាត់ប្រគល់កូនសោទាំងឡាយនៃបព្វជិតភាពដល់ប្រធានកូរ៉ុមទាំងឡាយ ។ គាត់អាចចាត់ឲ្យទីប្រឹក្សារបស់គាត់ធ្វើពិធីញែកចេញដល់សមាជិកផ្សេងទៀតក្នុងគណៈប្រធាន និងលេខាបាន ។
១០.៤.២
ការទទួលខុសត្រូវ
-
ដឹកនាំកិច្ចខិតខំរបស់កូរ៉ុមឲ្យចូលរួមនៅក្នុងកិច្ចការនៃសេចក្តីសង្រ្គោះ និងភាពតម្កើងឡើងរបស់ព្រះ ( សូមមើល ជំពូកទី ១ ) ។
-
រៀនស្គាល់ និងបម្រើសមាជិកកូរ៉ុមម្នាក់ៗ ដោយរួមទាំងអ្នកដែលមិនបានចូលរួមនៅក្នុងការប្រជុំកូរ៉ុមផងដែរ ។
-
បម្រើនៅក្នុងក្រុមប្រឹក្សាយុវវ័យវួដ ( សូមមើល ១០.៤.៤ ) ។
-
បង្រៀនសមាជិកកូរ៉ុមពីភារកិច្ចបព្វជិតភាពរបស់ពួកគេ ( សូមមើល គោលលទ្ធិ និងសេចក្ដីសញ្ញា ១០៧:៨៥–៨៨ ) ។
-
ដាក់ផែនការ និងដឹកនាំការប្រជុំកូរ៉ុម ( សូមមើល ១០.២.១.២ ) ។
-
ដាក់ផែនការ និងអនុវត្តការបម្រើ និងសកម្មភាពនានានៅក្នុងកូរ៉ុម ( សូមមើល ១០.២.១.៣ ) ។
១០.៤.៣
ការប្រជុំគណៈប្រធានកូរ៉ុម
គណៈប្រធានកូរ៉ុមបព្វជិតភាពអើរ៉ុនជួបគ្នាជាទៀងទាត់ ។ ប្រធានកូរ៉ុមដឹកនាំការប្រជុំទាំងនេះ ។ យ៉ាងហោចណាស់ត្រូវមានមជ្ឈិមវ័យពីរនាក់ចូលរួម—គឺសមាជិកមួយរូបនៃគណៈប៊ីស្សព អ្នកប្រឹក្សាយោបល់ម្នាក់ ឬអ្នកជំនាញម្នាក់ ។
១០.៤.៤
ក្រុមប្រឹក្សាយុវវ័យវួដ
សូមមើល ២៩.២.៦ សម្រាប់ព័ត៌មានបន្ថែមទៀតស្ដីពីក្រុមប្រឹក្សាយុវវ័យវួដ ។
១០.៨
គោលការណ៍ណែនាំ និងគោលនយោបាយបនែ្ថម
១០.៨.១
ការការពារយុវវ័យ
នៅពេលមជ្ឈិមវ័យប្រាស្រ័យទាក់ទងជាមួយយុវវ័យនៅក្នុងបរិវេណសាសនាចក្រ យ៉ាងហោចណាស់គួរមានមជ្ឈិមវ័យពីររូបដែលមានការទទួលខុសត្រូវ មានវត្តមាននៅទីនោះ ។
មជ្ឈិមវ័យទាំងអស់ដែលធ្វើការជាមួយយុវវ័យត្រូវតែបំពេញវគ្គបណ្តុះបណ្តាលការការពារកុមារ និងយុវវ័យក្នុងរយៈពេលមួយខែក្រោយពីត្រូវបានគាំទ្រចំពោះការហៅ ( ProtectingChildren.ChurchofJesusChrist.org ) ។