“Ewi Wāween Aō Kōm̧m̧anm̧anļo̧k Aō Katakin?,” EnglishConnect n̄an Rūkaki ro (2023)
“Ewi Wāween Aō Kōm̧m̧anm̧anļo̧k Aō Katakin?,” EnglishConnect n̄an Rūkaki ro
Ewi Wāween Aō Kōm̧m̧anm̧anļo̧k Aō Katakin?
Āinwōt rūkatak ro renaaj em̧m̧anļo̧k iien n̄an iien, kwonaaj barāinwōt eddōkļo̧k ilo lōke im em̧m̧anļo̧k iien n̄an iien. Irooj enaaj jipan̄ eok ilo am̧ jerbal im jipan̄ rūkatak ro ilo kurup eo am̧. Enaaj katakin eok “lain im bar lain, naan in kain̄i im bar naan in kain̄i” (2 Nipai 28:30). Lōke bwe Jemedwōj Ilan̄ enaaj jipan̄ eok ilo am̧ pukot Jetōb im jerbal n̄an em̧m̧anļo̧k.
Wāween ko n̄an Katakin juon Kajin
Itulaļ ej jet iaan wāween ko n̄an katakin kajin Pālle. Ejjab āinwōt kajin ko me rej pedped ioon kōmeļeļe ko kōn kūram̧a (gramma), naan ko, ak kaminene ba wāween ainikien naan ko, kurup in ekōnono ko an EnglishConnect rej pedped ioon aer jipan̄ rūkatak ro kōjerbal kajin eo ilo wāween ko eļap meļeļeer. Ilo am̧ kōjerbali wāween kein, enaaj em̧m̧anļo̧k am̧ maron̄ in jipan̄ rūkatak ro.
Kōnono kajin Pālle
Kōnono kajin Pālle ejipan̄ rūkatak ro eddōkļo̧k im ej juon wāween eo eaorōk n̄an pukot mennin letok ko an lo ko. Kate eok kōnono wōt kajin Pālle im kajjitōk ippān rūkatak ro n̄an kōm̧m̧an āinwōt. Kōjerbal naan ko repidodo im jentōj ko rekadu. Kōraļo̧ke am̧ kōnono im āliji naan im ennaan ko eļan̄n̄e emenin aikuj. Ālkin am̧ kajjitōk juon kajjitōk, leļo̧k eļap iien n̄an rūkatak ro n̄an ļōmņak im uwaak. Kōjerbal naan im jon̄ak ko rūkatak ro rej kōjerbali ilo aer kamminene. Ilo am̧ tōl m̧akūtkūt ko, komaron̄ kajjitōk ippān rikatak ro n̄an lale kōmeļeļe im m̧akūtkūt ko em̧ōj ukōti im kar kōpoojiwaj ilo bok in katakin EnglishConnect eo an rikatak.
Kōm̧m̧an Waanjon̄ak n̄an Makūtkūt ko
Kwaļo̧k n̄an rikatak ro ta eo n̄an kōm̧m̧ane ekkā wōt an lukkuun jipan̄ er jen n̄e kwoj ba ļo̧k ta eo ren kōm̧m̧ane. Kōjerbale waanjon̄ak in ekōnono eo ilo jinoin kajjojo m̧akūtkūt n̄an ejake ta eo rūkatak ro renaaj kōm̧m̧ane ilo aer kamminene. Kwomaron̄ kōm̧m̧ane eddo ko ruo ilo ekōnono in, ak kwomaron̄ kajjitōk ippān rūkatak ro n̄an jipan̄ eok kwaļok wāween.
Rōjan̄ Kōnono
Rūkatak ro renaaj bōk lōke im m̧ōkajļo̧k aer ekkatak ilo aer kamminene kōnono kajin eo. Jab inepata n̄an kajim̧weik aolep bōd, jipan̄ wōt rūkatak ro bōk koņaer ilo ekōnono eo. Kōjerbale ilo jejjet iien eo am̧ bwe kurup eo en joļo̧k aer iien ilo kōnono ippān ro m̧ōttāer.
Rie Kamminene in Āliji
Kamminene ko rej āliji rej kalōk lōke im em̧m̧anļo̧k. Rōjan̄ rūkatak ro n̄an jānij rūkōnono ro m̧ōttāer im bar jinoe kamminene. Ukōt ro m̧ōttāer ej leļo̧k n̄an rūkatak ro eļapļo̧k iien ko rem̧m̧an n̄an aer ron̄jake im ba men ko rekāāl. N̄e rūkatak ro rej kōjerbale ta eo rejeļā ippān armej ro jet, ej jipan̄ er kapenļo̧k ta eo rej ekkatak. Ej barāinwōt kōļapļo̧k aer lōke im kōm̧m̧an jem̧jerā ko.
Kōkajoorļo̧k Rūkatak ro
Rūkatak ro rej aikuj in en̄jake iakwe im kōketak eo am̧. Jipan̄ rūkatak ro anjo̧ jān mijak ilo aer m̧ōņōņō kōn aolep kijejetok ko aer n̄an kōnono kajin Pālle. Etale im bōk koņaam̧ ippān kajjojo kurup im ron̄jake ilo iien eo rūkatak ro rej kaminene ippān doon. Emakijkij nōbar er. Kaminene ippāer im jipan̄ er en̄jake tōprak ko. Kalikkar aolep wāween ko rej ekkatak im eddōkļo̧k ie. Ilo am̧ iakwe im kōketak rūkatak ro, kwoj ejake juon mejatoto in tōmak, jem̧jerā, im eddōkļo̧k.
Kōkōm̧anm̧anļo̧k āinwōt juon Rūkaki Āinwōt Kraist
Āinwōt juon rūkaki in EnglishConnect, ewōr juon am̧ iien em̧m̧an im eaorōk n̄an jerbal in karejar n̄an ro jet. Pedped in katak ko an katakin āinwōt Kraist rej jerbal n̄an eok. Kwomaron̄ in ekkatak im kōjerbale pedped in katak ko jān kein katak eo Katakin ilo Wāween eo an Rilo̧mo̧o̧r (2022). Ium̧win tōl eo an ritōl eo an priesthood, kwomaron̄ etal n̄an kweilo̧k in ko̧o̧njeļ ko an rūkaki. Kwomaron̄ barāinwōt etale jān iien n̄an iien wāween am̧ kōm̧m̧an im kalikkar jikin ko kwomaron̄ in em̧m̧anļo̧k ie jān am̧ kōjerbali “Improving as a Christlike Teacher—A Personal Evaluation” (Katakin ilo Wāween eo an Rilo̧mo̧o̧r, 37). Kile ta ko rem̧m̧an am̧ kōm̧m̧ani. Etale ijjoko kwoj aikuj in kōm̧anm̧anļo̧k im kōm̧m̧an kajjojo karōk ko n̄an kōjerbale ta ko kwoj ekkatak.
Keememej, men eo eaorōktata kwomaron̄ kōm̧m̧ane ej iakwe rūkatak ro im kappukot n̄an tōl kōn Jetōb ilo am̧ ejake tōmak, jem̧jerā, im eddōkļo̧k.