Ewi Wāween Aō Pojak n̄an juon Iien Ekōnono an Kurup?

Kurup in ekōnono eo eaorōk n̄an katak eo an EngishConnect. Ilo kurup in ekōnono eo, rūkatak ro ewōr aer iien em̧m̧an n̄an kamminene ekōnono ko eļap tokjāer. Ilo aer kweilo̧k, rūkatak ro remaron̄ bōk lōke, ekkatak jān Jetōb, im rie doon.

Kōnono kajin Pālle ej jipan̄ rūkatak ro eddōkļo̧k im ej juon wāween eo eaorōk n̄an pukot mennin letok ko an lo ko. Kwomaron̄ tōl kurup in ekōnono eo n̄an kōjerbal kajin Pālle eo epidodo. Eļan̄n̄e emenin aikuj, rūkatak ro remaron̄ lale ukook ko ilo bok in katakin ko an EnglishConnect ilo kajin ko aer make. Ukook eo ej letok jibadbad ko, pedped in ekkatak ko, naan ko, im kōmeļeļe ko.

M̧okta jān an kurup in kōnono eo kweilo̧k, etale kajjojo jekjōn ilo bok in katakin eo an rūkatak ro an EnglishConnect. Itulaļ rej jet bun̄tōn ko n̄an jipan̄ eok pojak.

1. Jar im kappukot jipan̄ eo an Anij.

2. Ļōmņak kōn wāween am̧ naaj ejaake tōmak, jem̧jerā, im eddōkļo̧k ilo kurup eo.

   1. Ewi wāween aō maron̄ karuwainenetok Jetōb?

   2. Ewi wāween aō maron̄ jipan̄ rūkatak ro kappukot im kile jipan̄ eo an Irooj?

   3. Ewi wāween aō maron̄ jipan̄ rūkatak ro iakwe im rie doon?

   4. Ewi wāween aō maron̄ jipan̄ rūkatak ro kōnono kajin Pālle im eddōkļo̧k?

3. Katak pedped eo an ekkatak.

   1. Ewi wāween aō en̄jake pedped in?

   2. Ewi wāween aō maron̄ jipan̄ rūkatak ro kōjerbale pedped in?

   3. Ewi wāween aō maron̄ kōjerbale pedped in ilo aō katakin?

4. Etale naan ko im jon̄ak ko.

   1. Imaron̄ ke lōke ilo aō kōjerbale naan ko im jon̄ak ko ilo juon iien ekōnono?

5. Riiti kein m̧akūtkūt ko 1–3.

   1. Ewi wāween aō naaj kōmeļeļeiki kajjojo m̧akūtkūt?

   2. Ewi wāween aō naaj leiaia ippān rūkatak ro n̄an kamminene?

   3. Ewi wāween aō naaj rie rūkatak ro ilo aer kamminene?

6. Etale “Evaluate” jekjōn eo.

   1. Ewi wāween aō jipan̄ rūkatak ro en̄jake aer tōprak?

   2. Ewi wāween aō naaj jipan̄ rūkatak ro kōjerbal “Personal Study Tracker” ilo bok in katakin eo an rūkatak eo?

7. Etale “Act in Faith to Practice English Daily” jekjōņ eo.

   1. Ewi wāween aō rōjan̄ rūkatak ro n̄an kōm̧m̧an “Personal Study” jekjōn eo m̧okta jān an kurup eo kweilo̧k im n̄an kamminene kajin Pālle aolep iien?

   2. Ewi wāween aō rōjan̄ rūkatak ro n̄an pedped wōt ioon Irooj?

Etale jekjōn eo “Group Resources” ilo bok in katakin eo. (Kein ekkatak kein rej barāinwōt ekkejelļo̧k ippān bok in katakin ko an rūkatak ro an EnglishConnect.) Karōk wāween am̧ naaj kōjerbale kein jipan̄ kein. Jekjōn eo “Conversation Group Phrases” ej koba in naan ko repidodo me remaron̄ in jipan̄ kurup eo ekōnono ippān doon ilo kajin Pālle. “Praying in English” ekitbuuj jon̄ak ko repidodo n̄an jipan̄ rūkatak ro jar ilo kajin Pālle. Kwomaron̄ karuwaineneik ro rej bōk koņaer n̄an lale jekjōn in n̄an pojak n̄an jar in kōppeļļo̧k ak jar in ikkilōk.

Kein katakin ko jet im waanjon̄ak ko remaron̄ loi ilo Gospel Library im ilo englishconnect.org/teacher.

Ro Mōttad jān Tōmak ko Jet

Juon jibadbad kōn ekkatak pedped ioon tōmak ej juon iaan men ko me rej kōm̧m̧an bwe EnglishConnect en jenolo̧k. Kwomaron̄ kobaiki armej ro jān pedped in tōmak ko aer roktak ilo am̧ jipan̄ er kejōkļo̧kjeņ kōn wāween an pedped eo an ekkatak maron̄ in jerbal n̄an er. Kwomaron̄ kōjerbale “Principles of Learning Glossary” ilo bok in katakin ko an rūkatak ro an EnglishConnect n̄an jipan̄ er meļeļe tōōm̧ ko an gospel in. Āinwōt tōl jān Jetōb, ļōmņak in karuwaineneik er n̄an kwaļo̧k ta eo rej ekkatak ilo am̧ katakin pedped in ekkatak eo. Kwaļo̧k kautiej n̄an tōmak ko jet aolep iien ilo am̧ kwaļo̧k tōmak eo am̧ bwe Anij en maron̄ jipan̄ er ekkatak kajin Pālle.

Kwomaron̄ loe ļōmņak ko jet ilo kadkad eo an Kwaļo̧k Gospel eo Aō bok in katakin eo; lale jākjen eo “Kōjerbal Kwaļo̧k Gospel eo Aō by Church Members.”

Jerbal ippān Jodikdik ro

EnglishConnect emaron̄ kōjeraam̧m̧an mour ko an jodikdik ro. Stake ko, ward ko, im mijen ko remaron̄ ejaaki kurup ko baj n̄an jodikdik ro. Eļan̄n̄e jodikdik ro im kurup in rūtto rej koba ippān doon, ļōmņak in kakuruprupi jodikdik ro ippān doon n̄an m̧akūtkūt in kamminene ko.

Keememej im ļoore Kakien ko an Kabun̄ in n̄an kōjparok jodikdik ro. Ajri ro reddik (iiō ko aer 18, ak laļļo̧k im rej jokwe ilo m̧weo) aikuj kar wōr juon aer peba in mālim jain jān ro jineer im jemāer m̧okta jān deļo̧n̄e kurup eo. Boom̧ kein rej pād ilo elōn̄ kajin ko ilo online ilo englishconnect.org/resources/leader. Ilo kakobaba, kooj ko an EnglishConnect rej aikuj ļoore kakien ko an Kabun̄ in bwe aikuj pād ruo rūtto ro rekeke aolep iien kweilo̧k ko an kurup. Kwoj aikuj ļoore kakien kein men̄e kurup eo ej kweilo̧k ilo online.