Faataitaiga

E manao se aufono a le siteki e saunia ni vaega o le EnglishConnect e mafai e tagata o le siteki ma le alalafaga ona auai i soo se taimi. Latou te faamoemoe o le a tuuina atu e vaega o le EnglishConnect i tagata o le Ekalesia ni avanoa e auauna atu ai. Latou te faamoemoe foi o le a tuuina atu e nei vaega i tagata o le nuu ni avanoa e aoao atili ai e uiga ia Iesu Keriso ma lagonaina le alofa o tagata o le Ekalesia.

Latou te filifilia se fale e sili ona latalata i le toatele o tagata e ono auai. Latou te filifili e feiloai o se vaega i afiafi o Aso Lua mai le 7:00 i le 8:30 p.m. Latou te valaauina ni faiaoga se toafa, lua mo le EnglishConnect 1 ma le lua mo le EnglishConnect 2. Latou te talosagaina se tasi o faiaoga e avea ma taitai faamaopoopo o le polokalama atoa ma tuu atu i lena faiaoga le valaauga o le tagata tomai faapitoa o le uelefea ma le ola tutoatasi i le Punaoa mo Taitai ma Failautusi. Faatasi ai ma lenei valaauga, e mafai e le taitai faamaopoopo ona lesitala ia vaega i le QuickReg.

Ona faasalalau lea e le aufono a le siteki ia vaega e ala i le tufaina atu o pepa i le lotu, tuu i luga o tulaga o ala o faasalalauga faaagafesootai, ma fai atu i faifeautalai e valaaulia tagata latou te feiloai i ai. I le amataga, e faasino e le siteki ia tagata aoao e auai i se vaega o le EnglishConnect 3 mo lo latou eria pe a latou sauni e o ese mai le EnglishConnect 2. I le aluga o taimi, ua lava tagata auai o le siteki e lagolagoina se vaega o le EnglishConnect 3 i le fale lava e tasi o le Ekalesia e pei o a latou vaega o le EnglishConnect 1 ma le 2. Latou te galulue ma a latou fesootaiga i le BYU–Pathway i Lalolagi Atoa e valaau atu i faifeautalai PathwayConnect e vaaia le vaega o le EnglishConnect 3.

E manao se aufono a le uarota e tuuina atu i tagata o le uarota ma le nuu se avanoa e aoao ai le Igilisi. Sa latou taumafai muamua e fai se vaega o le EnglishConnect, ae o le toatele o tagata auai na faigata ona tautino atu e auai i le 25 vaiaso. Ua latou filifili e ofo atu ni vaega e na o le lua iunite e aofia ai.

Ua fuafua taitai e feiloai ia vaega i Aso Lua ma Aso Faraile mai le 7:30 i le 9:00 p.m. Latou te valaauina ni faiaoga se toafa, lua mo le EnglishConnect 1 ma le lua mo le EnglishConnect 2. Latou te lesitalaina vaega i luga o le QuickReg ma faailoa atu i vaega e ala i le tuuina o se faasilasilaga i fafo o le fale o le Ekalesia. Latou te faia foi ni pepa e mafai ai e tagata o le ekalesia ona tufa atu i a latou uo pe faasoa atu i luga o ala o faasalalauga faaagafesootai.

I le faaiuga o le masina, e faaiu ai e taitai ia vaega i le QuickReg ma fai se fuafuaga e kava ai iunite e lua e sosoo ai i le lumanai.

E manao se aufono a le siteki e fesoasoani i le autalavou ia maua avanoa faaleaoaoga ma galuega pe a uma ona latou faamaeaina le polokalama a le autalavou ma pe a foi mai i le fale mai a latou misiona. E faamoemoe foi taitai o le aoaoina o le Igilisi i le EnglishConnect o le a fesoasoani i le autalavou e aoao ai pe faapefea ona faipaaga ma le Atua e ausia ni sini aogā. Latou te filifili e amata vaega o le EnglishConnect mo le autalavou i la latou siteki.

E nonofo mamao ese le autalavou mai le tasi ma le isi, o lea e filifili ai taitai e fono faatekinolosi vaega i Aso Lua mai le 8:00 i le 9:00 i le afiafi. Latou te valaauina se faifeautalai ua maea le misiona ma se talavou e iloa se Igilisi e faiaoga i le vaega. E faamautinoa e taitai o loo latou mulimuli i aiaiga faavae a le Ekalesia mo le puipuia o le autalavou. Mo se faataitaiga, latou te faamautinoaina o loo i ai ni tagata matutua se toalua ua maea le aoaoga o le puipuiga a le autalavou i fonotaga faatekinolosi taitasi ma ua tofu le autalavou ma se fomu o le maliega a matuaua sainia.

E faatulaga foi e taitai se vaega a faiaoga-po o se taitai e mataituina le vaega o le WhatsApp ina ia mafai ai e le autalavou ona faataitai a latou Igilisi i aso taitasi. O le vaega o le WhatsApp e fesoasoani e faaaofia ai le autalavou e le mafai ona auai i fonotaga o le Aso Lua.

E galulue taitai ma o latou pule o le uelefea i le eria ma le pule o le ola tutoatasi e amata se vaega a le autalavou EnglishConnect 3 i la latou eria mo i latou e i ai tomai i le gagana Peretania i tua atu o le EnglishConnect 2.

E mananao taitai misiona e faaaoga le EnglishConnect e faasoa atu ai le talalelei a Iesu Keriso. Latou te silafia e sili atu le faatinoina o vaega EnglishConnect pe a latou faafoe e tagata o le ekalesia ma lagolagoina e faifeautalai. I le fono ai ma peresitene o siteki i le misiona, latou te filifili ai o le a amata e le misiona ni vaega o le EnglishConnect ma galulue e tuuina atu i latou i siteki.

E filifili faifeautalai i taimi o fonotaga mo vaega e galulue lelei mo a latou fuafuaga o le talaiga ma faateleina le avanoa i tagata i le alalafaga. A o amata e faifeautalai o ni faiaoga EnglishConnect, latou te galulue foi ma taitai perisitua e saili tagata o le ekalesia i le lotoifale e suitulaga ia i latou, o nisi atonu sa avea muamua ma tagata aoao o le EnglishConnect 1 ma le 2. I le aluga o taimi, e suia faifeautalai i se matafaioi lagolago. E faaauau pea ona lagolagoina e faifeautalai ia vaega e ala i le auai soo, faasino atu tagata aoao fou, ma uunaia tagata aoao e saili le fesoasoani a le Atua e aoao le Igilisi.