Proklamata mbi Familjen, Pjesa 2

Klara dhe dy shoqet e saj po diskutojnë të ardhmen e tyre dhe atë që duan nga jeta. Meqë tema është për familjen, Klara thotë se është e emocionuar që do të martohet dhe do të bëhet me fëmijë kur të jetë më e madhe. Një nga shoqet e saj thotë: “Unë dua të martohem, por as bëhet fjalë që të përpiqem të rrit fëmijë në këtë botë të çmendur.” Shoqja tjetër thotë: “Nuk do ta kisha problem të bëhesha me fëmijë një ditë, por nuk mendoj se dua të martohem.” Pasi i dëgjon mendimet e shoqeve të saj, Klara pyet veten përse ndjenjat e saj rreth bërjes së fëmijëve duken kaq të ndryshme.

• Pse mund të ndihen shoqet e Klarës në këtë mënyrë?

  Kërkojuni disa dysheve të nxënësve të tregojnë disa nga përgjigjet e tyre. Gjithashtu, mund t’i ftoni të tregojnë shqetësimet ose pyetjet shtesë që kanë rreth fëmijëve dhe prindërimit. Siguroni kopje të materialit “Familja: Një Proklamatë Drejtuar Botës” që t’i përdorin nxënësit. Ftojeni secilën dyshe të studiojë paragrafët 4–6, duke kërkuar fjalët ose frazat që shpallin doktrinën e Zotit lidhur me fëmijët dhe prindërimin. Inkurajojini nxënësit të shenjojnë fjalët ose frazat kuptimplota ndërsa studiojnë. Nëse është e nevojshme, vini në dukje se fraza “shumëzohuni, mbushni tokën”, i referohet bërjes së fëmijëve dhe fraza “fuqitë e shenjta të krijimit të jetës” u referohet marrëdhënieve seksuale. Merreni parasysh të bëni pyetje si vijueset.

• Çfarë të vërtetash rreth fëmijëve dhe prindërve zbulove?

• Pse mendon se Zoti dëshiron që burrat dhe gratë të kenë fëmijë nëse e kanë mundësinë?

• Cilat janë disa arsye përse një çift i martuar mund të mos dojë të ketë fëmijë?

• “Urdhërimi i Perëndisë për fëmijët e Tij që të shumohen dhe ta mbushin tokën, mbetet i vlefshëm.”

• “Fuqitë e shenjta të krijimit të jetës duhet të përdoren vetëm midis burrit dhe gruas, ligjërisht të martuar si bashkëshort e bashkëshorte.”

• “Prindërit kanë një detyrë të shenjtë për të rritur fëmijët e tyre me dashuri dhe drejtësi.”

  Inkurajojini nxënësit të përdorin burime si Udhëzuesi për Shkrimet e Shenjta për të gjetur informacion shtesë rreth thënieve të tyre për të vërtetën. Nëse kanë nevojë për udhërrëfim, sugjeroni terma kërkimi si “shumëzohuni, mbushni tokën”, “fuqitë e krijimit të jetës”, ose “prindër të drejtë”. Ftojini të kërkojnë thënie nga udhëheqësit e Kishës, fragmente të shkrimeve të shenjta ose artikuj të revistave të Kishës që e thellojnë kuptueshmërinë e tyre.

  Kur nxënësit të kenë mbaruar së përgatituri, inkurajojini t’ia tregojnë atë që mësuan grupit të tyre. Merreni parasysh të bëni disa nga pyetjet në vijim.

• Çfarë mësove rreth këtyre pohimeve të së vërtetës që e ndien se është e rëndësishme?

• Pse duhet besim te Jezu Krishti për t’i jetuar këto të vërteta në botën e sotme?

• Çfarë shembujsh ke parë të mënyrës se si të jetuarit e këtyre të vërtetave mund të çojë në më shumë dashuri, ndërkohë që shpërfillja e këtyre të vërtetave mund të çojë në dhembje ose keqardhje?

• Çfarë mund të bësh tani për t’u përgatitur t’i jetosh këto të vërteta me besnikëri në të ardhmen?

Presidenti Dallin H. Ouks, i Presidencës së Parë, shpjegoi rëndësinë e fëmijëve në planin e Perëndisë.

14:47

“Doktrina e përjetshme … jep një këndvështrim të dallueshëm lidhur me fëmijët. Nëpërmjet këtij këndvështrimi ne e shohim lindjen dhe rritjen e fëmijëve si pjesë të planit hyjnor. Është një detyrë e gëzueshme dhe e shenjtë për ata të cilëve u është dhënë fuqia për të marrë pjesë në të. Si rrjedhim, ne urdhërohemi të japim mësim dhe të mbrojmë parime e praktika që sigurojnë kushtet më të mira për zhvillimin dhe lumturinë e fëmijëve sipas planit të Perëndisë.” (Dallin H. Ouks, “Dashuria Hyjnore në Planin e Atit”, Liahona, maj 2022, f. 102)

• Si i ke parë fëmijët ta bekojnë familjen tënde ose persona të tjerë që ti i njeh?

• Si mund të të ndihmojë sjellja e fëmijëve në jetë dhe rritja e tyre me dashuri që të bëhesh më shumë si prindërit tanë qiellorë?

Vlerëso kuptueshmërinë tënde për thëniet vijuese duke u përgjigjur në ditarin tënd të studimit me frazat shumë dakord, dakord, disi dakord, ose jo i sigurt. Shkruaj shkurtimisht përse e përzgjodhe secilën përgjigje.

• E kuptoj përse urdhërimi i Perëndisë për t’u shumuar dhe mbushur tokën mbetet në fuqi sot.

• E kuptoj përse fuqitë e shenjta të krijimit të jetës duhet të përdoren vetëm ndërmjet një gruaje dhe burri që janë ligjërisht të martuar.

• E kuptoj përse prindërit duhet t’i rritin fëmijët e tyre me dashuri dhe drejtësi.