Doktrina e Besëlidhje 5

Jozef Smithin e urdhëruan mos t’ia tregonte botës fletët e arta (shih te Doktrina e Besëlidhje 5:3). Lexo te Doktrina e Besëlidhje 5:6–10, duke kërkuar atë që iu lejua Jozefit të tregonte.

Nëse dëshiron, mund të shenjosh një frazë që Zoti e përsërit në vargjet 5, 6 dhe 7.

• Si mendon, pse Zoti është më i shqetësuar që ne të besojmë dhe t’ua vëmë veshin fjalëve të Tij në Librin e Mormonit sesa që ne ta dimë se fletët ekzistuan?

Duke iu referuar Librit të Mormonit, Presidenti Gordon B. Hinkli (1910–2008) dha mësim:

“Prova për vërtetësinë e tij, për vlefshmërinë e tij në një botë që priret të kërkojë prova, nuk qëndron në arkeologji ose antropologji, megjithëse këto mund të jenë të dobishme për disa njerëz. Nuk qëndron në studimin e fjalëve ose analizave historike, megjithëse këto mund të shërbejnë si vërtetuese. … Të provuarit e së vërtetës së tij qëndron në leximin e tij. Ai është një libër i Perëndisë.” (Gordon B. Hinckley, “Four Cornerstones of Faith”, Ensign, shkurt 2004, f. 6)

Shpenzo disa minuta për të përsiatur përvojën tënde të studimit dhe marrjes së mësimeve nga Libri i Mormonit. Mendo rreth mënyrës se si ka ndikuar studimi yt në jetën tënde. Mund të dëshirosh t’i shënosh disa nga mendimet e tua në ditarin tënd.

Lexo te Doktrina e Besëlidhje 5:11–15 duke kërkuar se kujt do t’i lejonte Zoti përfundimisht që t’i shihte fletët.

• Çfarë pe në këto vargje që mund t’i bëjnë të fuqishme dëshmitë e Tre Dëshmitarëve?

Më vonë, Martin Harrisi, Oliver Kaudëri dhe Dejvid Uitmeri do t’i shihnin fletët e arta dhe të dëshmonin për vërtetësinë e tyre. Do të mësosh më shumë rreth kësaj ngjarjeje kur të studiosh seksionin Doktrina e Besëlidhje 17.

Duke iu referuar Tre Dëshmitarëve, Presidenti Dallin H. Ouks, i Presidencës së Parë, dha mësim:

“Dëshmia e tyre qëndron e pakundërshtuar nga cilido dëshmitar tjetër. Dikush mund ta mohojë atë, por si i shpjegon ai tre burrat me karakter të mirë, të bashkuar e këmbëngulës në këtë dëshmi të botuar, deri në fund të jetës së tyre, përballë talljes së madhe dhe dëmeve të tjera vetjake? Ashtu si vetë Libri i Mormonit, nuk ka asnjë shpjegim më të mirë sesa ai që jepet në vetë dëshminë, në shpalljen solemne të burrave të mirë e të ndershëm, të cilët treguan atë që panë.” (Dallin H. Oaks, “The Witness: Martin Harris”, Liahona, maj 1999, f. 36)

Merr parasysh të lexosh pjesën “Dëshmia e Tre Dëshmitarëve” në fillim të Librit të Mormonit ose të bësh një listë të njerëzve që të kanë dëshmuar ty se Libri i Mormonit është i vërtetë. Mendo për mënyrën se si dëshmia e tyre e ka forcuar tënden.

Lexo te Doktrina e Besëlidhje 5:16 dhe Moroni 10:4–5. Përcakto se si Perëndia ua zbulon vërtetësinë e Librit të Mormonit fëmijëve të Tij.

• Cilat janë disa mënyra në të cilat Shpirti mund t’i dëshmojë dikujt për vërtetësinë e Librit të Mormonit?

Glen L. Pejsi, i cili shërbeu si Peshkop Kryesues, tha:

“Nuk ka asnjë mënyrë tjetër për të marrë një dëshmi përveçse nëpërmjet dëshmisë së Frymës së Shenjtë. Nuk mund të mbështetesh tek asgjë tjetër. … Ne kemi shembuj të panumërt nga shkrimet e shenjta të faktit se sa i kotë mund të jetë një manifestim fizik pa marrjen shoqëruese të dëshmisë së Frymës së Shenjtë. Kthimi në besim nuk vjen prej manifestimeve fizike nga qielli.” (Glenn L. Pace, “The Elusive Balance”, New Era, mars 1989, f. 49)

Bëj një listë me arsyet pse mendon se një dëshmi nga Fryma e Shenjtë, një anëtar i Kreut‑Perëndi, është më e rëndësishme sesa prova fizike që diçka është e vërtetë. Merr parasysh të përfshish çdo dëshmi që ndien se ke marrë nëpërmjet Frymës së Shenjtë që Libri i Mormonit është i vërtetë.