Doktrina e Besëlidhje 3

• Çfarë lloj presioni ndiejnë adoleshentët në jetën e tyre?

• Sa nga këto lloje presioni vijnë nga përpjekja për t’iu bërë qejfin të tjerëve?

Ndalu një minutë për të reflektuar mbi faktin se sa presion ndien për t’u bërë qejfin të tjerëve dhe pse.

Në këtë mësim, do të studiosh mënyrën se si ndjeu presion Profeti Jozef Smith për t’i bërë qejfin Martin Harrisit dhe atë që Shpëtimtari i mësoi atij në atë situatë. Ndërsa studion, kërko udhërrëfimin e Frymës së Shenjtë për të gjetur të vërteta që mund të të ndihmojnë kur ta ndiesh këtë presion.

Martin Harrisi ishte një qytetar i respektuar i Palmirës dhe një fermer i suksesshëm, i cili ishte njëri nga fare pak njerëzit në zonë që i besonte Jozef Smithit. Ndonëse kishte pothuajse dyfishin e moshës së tij, Martini ishte mik me Jozefin dhe i dha atij para në mënyrë që të mund të shpërngulej në Harmoni të Pensilvanisë për ta përkthyer Librin e Mormonit pa e shqetësuar askush. Martini sakrifikoi gjithashtu për të udhëtuar atje vetë dhe për të shërbyer si shkrues.

Bashkëshortja e Martinit, Lusi, nuk e përkrahte përfshirjen e tij te përkthimi i Librit të Mormonit. Martini e pyeti Jozefin a mund t’ia tregonte 116 faqet e para të përkthimit Lusit si provë për punën e tyre. Jozefi u lut rreth kësaj dy herë dhe çdo herë iu tha të mos e lejonte Martinin t’i merrte faqet.

Jozefi u lut për herë të tretë dhe Zoti i dha leje me kushte të prera. Martini i çoi faqet në Palmirë për t’ia treguar bashkëshortes.

• Si mendon, pse Jozefi nuk veproi sipas dy përgjigjeve të para që mori nga Zoti?

Ditën pasi u largua Martini, Ema Smithi solli në jetë fëmijën e parë të saj dhe Jozefit, një djalë. Tragjikisht, foshnja jetoi vetëm pak orë dhe dukej sikur edhe Ema mund të vdiste. Fatmirësisht, shëndeti i Emës filloi të përmirësohej pas dy javësh. Ndonëse Jozefi nuk donte të largohej prej saj, Ema e nxiti të udhëtonte drejt Palmirës dhe të pyeste për dorëshkrimin.

Kur Jozefi arriti në shtëpinë e prindërve, ata e ftuan Martinin t’u bashkohej për të ngrënë mëngjes. Martini nuk erdhi për më shumë se katër orë. Kur më në fund erdhi dhe u ul, ai thirri vajtueshëm: “E kam humbur shpirtin tim!” Ai nuk i kishte zbatuar udhëzimet e prera dhe e kishte humbur dorëshkrimin.

“Oh, Perëndia im, Perëndia im. Gjithçka humbi!” – tha Jozefi. “A duhet të kthehem te gruaja ime me një histori të tillë? Dhe si do t’i dal përpara Zotit?”

Pasi Jozefi u kthye në Harmoni, Moroni u shfaq dhe ia mori fletët. (Shih te Shenjtorët, 1:50–54.)

• Si mendon, pse Jozefi ndjeu se gjithçka humbi?

Pak pas kësaj përvoje, Zoti i foli Jozef Smithit, duke e qortuar dhe duke i thënë fjalë ngushëlluese.

Lexo te Doktrina e Besëlidhje 3:1–10. Përcakto atë që Zoti donte që të mësonte Jozefi nga kjo përvojë.

• Cilat janë disa nga mësimet që gjete?

Plaku D. Tod Kristoferson, i Kuorumit të Dymbëdhjetë Apostujve, shpjegoi se çfarë do të thotë të frikësohesh nga Perëndia:

“Ka shumë vende në shkrimet e shenjta që e këshillojnë njerëzimin për ta pasur frikë Perëndinë. Në kohën tonë ne në përgjithësi e interpretojmë fjalën frikë si ‘respekt’, ose ‘nderim’, ose ‘dashuri’; që është, frika ndaj Perëndisë do të thotë dashuria ndaj Perëndisë ose respekti për Të dhe ligjin e Tij. …

… Ne duhet ta duam e nderojmë Atë në mënyrë të tillë që ne do të kemi frikë të bëjmë diçka të gabuar në sytë e Tij, çfarëdo qofshin mendimet e të tjerëve ose shtytja prej tyre.” (D. Todd Christofferson, “A Sense of the Sacred” [mbledhje rreth vatrës e Sistemit Arsimor të Kishës për të rinjtë e të rejat në moshë madhore, 7 nëntor 2004], f. 6–7, broadcasts.ChurchofJesusChrist.org)

• Me fjalët e tua, si do ta përmblidhje atë që dha mësim Plaku Kristoferson rreth frikës nga Perëndia?

Shkruaje frazën Zoti mund të më përkrahë në kohët e shqetësimit sepse Ai … në ditarin tënd të studimit. Plotësoje këtë pohim duke bërë një ose më shumë nga sa vijon:

1. Bëj një listë me ndihmën dhe përkrahjen që mund të të japë Jezu Krishti, që njerëzit e tjerë nuk munden.

2. Bëj një listë të rasteve në jetën tënde kur zgjodhe të jesh besnik/e ndaj Zotit, edhe kur të tjerët po të bënin presion që të mos i bindeshe Atij, dhe Ai të dha përkrahje. Mund të përdorësh edhe shembuj nga shkrimet e shenjta.

   Nxënësit mund të renditin edhe disa nga përgjigjet e tyre në tabelë. Nxënësit mund të kenë nevojë për ndihmë për të përcaktuar tregime nga shkrimet e shenjta ku Perëndia i përkrah individët që u përballën me kundërshtim, por i qëndruan besnikë Atij. Mund t’u jepni atyre shembujt vijues: Abinadi që merr fuqi nga Perëndia për ta dhënë mesazhin e Tij pavarësisht nga kërcënimet e mbretit Noe dhe priftërinjve të tij (shihni te Mosia 13:1–3); Zoti që shpëton Shadrakun, Meshakun dhe Abed‑negon nga furra e zjarrit (shihni te Daniel 3:23–25).

• Çfarë ke shkruar rreth Shpëtimtarit që ndien se do të ishte më e dobishmja ta mbaje mend kur tundohesh t’u bësh qejfin të tjerëve më shumë sesa Perëndisë?

Si rezultat i këtij qortimi, Jozefi mësoi se Perëndia do ta përkrahte atë ndërsa ai zgjidhte të ishte besnik. Jozefi shkoi përpara në jetë, duke mirëbesuar tek urdhërimet dhe udhërrëfimi i Perëndisë, ndonëse përjetoi dhembje, përndjekje, burgosje dhe madje edhe vdekje (shihni te Doktrina e Besëlidhje 122; 135).

Përsiat dhe shkruaj në ditarin tënd të studimit se si lidhet me ty ajo që mësove në këtë mësim. Mund të përfshish atë që do të doje të mbaje mend ose të bëje kur të përballesh me presionin e të qenit i frikësuar më shumë nga të tjerët sesa nga Perëndia.