Ezekiel 1–3; 33–34; 36–37; 47

N̄a jipan̄ ro uwaan kūlaaj eo pukōt meļeļe eo an juon make ilo Ezekiel34, kwomaron̄ je ioon boot eo jekjek ko remaron̄ jelm̧ai, ko āinwōt m̧aanjabpopo n̄an jerbale juon mijen, karūttoļo̧k ajri ro ak bōk juon ijjitōn̄ an jerbal in karejar. Ro uwaan kūlaaj eo remaron̄ bōk juon n̄an kejekļo̧kjeņ kake ilo aer ikōn̄ ilo riiti Ezekiel 34: 1–10. Kajjitōk ippāer n̄an kwaļo̧k ta ko̧o̧njeļ eo pedped ioon eoon kein remaron̄ leļo̧k n̄an juon ilo jekjek eo raar kāālete. Ta meļeļe in n̄an najdik kōj make ijello̧kin jiip ko an Irooj? Ekōjkan ad maron̄ erom rilale jiip ro āinwōt Rilo̧mo̧o̧r eo? (lale eoon 11–16).

Kwomaron̄ en̄jake im̧we eo n̄an kajjitōk kajjitōk ko me rejipan̄ ro uwaan kūlaaj eo kejekļo̧kjeņ kōn kakōļļe eo ilo Ezekiel 34: 11–13. N̄an waanjon̄ak, ta eo emaron̄ in “ meḷaaj eṃṃan” im “jikin jokwe eṃṃan” ej jutak kake ilo eoon14? Ta oktak eo ikōtaan juon jiip eo me e “jako” im juon eo me “eṃōj kajeplōklōki”? (eoon16). Ekōjkan an Rilo̧mo̧o̧r eo kar lo̧mo̧o̧ren kain jiip kein ruo? Ro uwaan kūlaaj eo remaron̄ kwaļo̧k kakōļļe ko jet rej loi ilo eoon kein im kōnono kōn ta eo kakōļļe kein rej katakin er kōn Jisōs Kraist.

• Riiti Ezekiel37 im ļōmņak kōn kallim̧ur eo an Irooj n̄an aintok Israel emaron̄ letok n̄an kōj kōļmenļo̧kjeņ ko kōn ta meļeļe in aintok eo im ekōjkan ad bōk koņaad ie. N̄an jipan̄ ro uwaan kūlaaj eo lo kōļmenļo̧kjeņ kein, kwomaron̄ je ioon boot eo kajjitōk ko āinwōt Ta eo Irooj ej kajjieon̄ kōttōprake jān aintok Israel? Ekōjkan An kōttōprake? Innām kwomaron̄ kajjitōk ippān jimettan in kūlaaj eo n̄an riiti Ezekiel 37:1–14 im jimettan eo juon n̄an riiti Ezekiel 37:15–28 ilo aer kappukōt kōļmenļo̧kjeņ kein ruo eoon ko remaron̄ uwaaki kajjitōk ko ioon boot eo. Emaron̄ jipan̄ kōmeļeļeik bwe aļaļ ko an Josep im Juda kar kōnono kake ilo eoon 16–19 ej jutak kōn Bok in Mormon im Baibōļ. Ilo an ro uwaan kūlaaj eo kwaļo̧k uwaak ko aer, kōketak er n̄an kōnono kōn eddo eo aer ilo aintok Israel ilo raan-ko āliktata.

• Pija ko remaron̄ jipan̄ ro uwaan kūlaaj eo meļeļe visōn eo kar kōmeļeļeik ilo Ezekiel 47:1–12. N̄an waanjon̄ak, kwomaron̄ kwaļo̧k juon pija in juon tampeļ, juon reba, juon āne jem̧aden, im Dead Sea (lale pija ko ilo Laajrak eo an wiik in ilo Itok, Ļoor Eō—N̄an Kajjojo Armej im Baam̧le ko im Pija in Baibōļ, no.3, “Judean Wilderness”). Emaron̄ jipan̄ kōmeļeļeik bwe Dead Sea eo ekanooj in jo̧o̧ļ jon̄an ek im menin eddōk ko rejjab maron̄ mour ie. Ro uwaan kūlaaj eo remaron̄ riiti eoon 1–12 im kwaļo̧k ta eo ej kabwilōn̄ er kōn dān ko kar kōmeļeļik ilo visōn eo (lale barāinwōt Revelesōn 22:1 im ennaan eo ilo “Kein Jipan̄ ko Jet”). Remaron̄ barāinwōt jin̄aik pija ko kōn visōn eo an Ezekiel. Ta eo dān ko remaron̄ in kakōļļeik? Ta eo wōjke ko kar kōmeļeļeik ilo eoon12 rej jutak kaki? Bōlen ro uwaan kūlaaj eo remaron̄ kwaļo̧k ekōjkan an tampeļ eo im kōjeraam̧m̧an ko an kar bōktok n̄an er mour ilo jetōb im kemour eo.

Kōnono kōn to̧o̧rļo̧k in dān ko jān tampeļ eo ilo visōn eo an Ezekiel (lale Ezekiel 47: 1–12), Elder Dale G. Renlund ekar lale:

“Ruo kain dān ko rem̧m̧an. Kein kajuon, reba ko reddik ejjeļo̧k aer kōtto̧o̧r, ej eddōkļo̧k im erom juon reba ekilep, debakbak im m̧wilaļ n̄an ijo ettoļo̧k emaron̄ ibebļo̧k n̄ane. Juon men ej waļo̧k āinļo̧k wōt kōjeraam̧m̧an ko me rej ibebtok jān tampeļ eo n̄e kajjojo armej rej liāp āinwōt baam̧le ko. Eddōkļo̧k eo eļap tokjān ej waļo̧k ilo ad wallikļo̧k im wōnm̧aanļo̧k ilo epepen ko āinwōt an kain̄i in liāp ko rej kōddape baam̧le ko ippān doon.

“Kein karuo, reba eo ej kōkāāle jabdewōt men ekar un̄n̄ūri. Kōjeraam̧m̧an ko an tampeļ rej barāinwōt wōr ippāer juon maron̄ eļap im aiboojoj n̄an kōmour. Kōjeraam̧m̧an ko an tampeļ remaron̄ kōmour bōro ko im mour ko im baam̧le ko” (“Menmenbwij im Jerbal an Tampeļ: Liāp im Kōmour,” Liaona, Māe 2018, 47–48; lale barāinwōt pija in alooj “And the River Will Grow,” ChurchofJesusChrist.org).

3:43