Aiseia 53:4

• Ewōr ad aolep iien ko n̄e jej en̄jake m̧ōjņo. N̄an jipan̄ ro uwaan kūlaaj eo pedped ioon kajoor eo an Irooj, kwomaron̄ kappeik kajjojo iaer n̄an riiti eoon ko jān Aiseia 51–52 im kwaļo̧k juon men eo rej kappukōte me enaaj kar kōkajoorļo̧k juon eo ej en̄jake an m̧ōjņo̧ ak ebbwer. Kwomaron̄ barāinwōt kalikkare bwe Rilo̧mo̧o̧r jerkakpeje ekar āliji jet iaan naan ko an Aiseia n̄an armej ro ilo Amedka (lale 3 Nipai 2:32–45). Ta eo naan ko an Rilo̧mo̧o̧r eo ilo 3 Nipai 20:30–34 kobaitok n̄an meļeļe eo ad kōn n̄aan eo kanaan kein renaaj kūrm̧ool?

• Laajrak eo an wiik in ilo Itok, Ļoor Eō—N̄an Kajjojo Armej ro im Baam̧le ej elmakote kōllaajrake aolep men ko ilo Aiseia 50–52 me Irooj ej kajjitōk ippān armej ro An n̄an kōm̧m̧ani. Bōlen ro uwaan kūlaaj eo remaron̄ kwaļo̧k ta eo raar loe im kōnono kōn ta meļeļe in kūr kein n̄an er. Kwomaron̄ kōņaanpedped wōt ioon kūr ko ilo Aisea 51:1–2, 6–8; 52:1–3, 9–11. Ekōjkan ad maron̄ jerbali kūr kein? Kwomaron̄ kalikkare bwe Katak im Bujen Ko 113:7–10 ej letok juon kōmeļeļe eim̧we kōn Aisea 52:1–2. Ta eo naan kein rej kobaitok n̄an meļeļe eo ad?

• N̄an jipan̄ ro uwaan kūlaaj eo pijaikļo̧k naan ko an Aiseia ilo Aiseia 53, kwomaron̄ kwaļo̧k jejjo pija ko kōn m̧akūtkūk ko ipeļaakin Pinmuur eo an Jisōs Kraist (lale Bok in Gospel Pija, nō. 56–60). Innām kwomaron̄ kajjitōk ippān kūlaaj eo n̄an pukōt naan ko ilo Aiseia53 me rej kōmeļeļeik m̧akūtkūt ko ilo pija eo. Ta eo naan ko an Aiseia rej katakin kōn en̄taan eo an Rilo̧mo̧o̧r n̄an kōj? Ta eo rej elmakote kōn etke Ekar en̄taan kōn kōj? Ta eo katak kein rej im̧we kōj n̄an kōm̧m̧ane.

• N̄an karuwaineneiktok Jetōb Kwojarjar eo n̄an kam̧ool kōn m̧ool ko kar katakin ilo Aiseia 52:13–15; 53, kwomaron̄ kajjitōk ippān ro uwaan kūlaaj eo n̄an riiti eoon kein ilo ikōņ ilo am̧ kōjan̄ juon al in jar kar rekoote kōn PInmuur eo an Jisōs Kraist. Kajjitōk ippān ro uwaan kūlaaj eo n̄an pukōt naan ko ak eoon ko ilo jeje ko rekwojarjar me rej en̄jake rej aorōk eļap tata. Innām kōm̧m̧an bwe ren kwaļo̧k ta eo raar loe im ekōjkan aer en̄jake kōn Rilo̧mo̧o̧r eo. Ļōmņak in barāinwōt kajjitōk ippān ro uwaan kūlaaj eo n̄an riiti Mosaia 15:10–12, ijo Abinadai ekar kōmeļeļeik ta kar meļeļe in naan eo “ineen.” Ekōjkan an menin jipan̄ kōj meļeļe Aiseia 53:10?

• Ekkatak Aiseia54 emaron̄ im̧we ro uwaan kūlaaj eo me rej en̄jake ebbwer kōnke kōn jerawiwi ko aer ak nana ko. Kwomaron̄ kajjitōk ippān ro uwaan kūlaaj eo n̄an etale Aiseia54 kōn naan ko ak eoon ko rej kwaļo̧k ekōjkan an Rilo̧mo̧o̧r eo en̄jake kōj kōj. Ekōjkan An kōņaan bwe jen en̄jake kōn jerawiwi ko ad etto im nana ko? Ekōjkan An kōņaan bwe jen en̄jake kōn E? Kōketak ro uwaan kūlaaj eo n̄an kwaļo̧k jabdewōt men ko jet rej ekkatak kōn Jisōs Kraist jān jebta in. Ennaan eo jān Būreejtōn Dieter F. Uchtdorf ilo “Kein Jipan̄ Ko Jet” maron̄ kobaitok n̄an iien ekōnono eo.

Būreejtōn DieterF. Uchtdorf ekar katakin:

“Ejjab aorōk wāween an lukkuun kar jorreen mour ko ad ilo kalimjōke. Ejjab aorōkļo̧k jon̄an nana in bōd ko ad, wāween ad lukkun būromōj, wāween ad ajimakeke, ak an rub būruōd. Barāinwōt ro jet me ejjeļo̧k aer kōjatdikdik, ro rej pere, eo emōj an jako lōke, eo eriab, ak kanijnij ņae Anij remaron̄ bar oktak.…

“Enaan eo ekamōņōņō kōn gospel eo ej: kōnke karōk eo ekamōņōņō kōn mour indeeo kar letok jān Jemedwōj Ilan̄ im kōn Pinmuur eo an Jisōs Kraist me ejjeļo̧k jem̧ļo̧kin, jejjab maron̄ wōt bōk lo̧mo̧o̧r jān ad bun̄ im bar erreo, jemaron̄ barāinwōt wōnm̧aanļo̧k jen jon̄an eo armej remaron̄ lōmņak kake im erom rijolet mour indeeo im ribōk koņaad ilo aiboojoj an Anij eo ejjeļo̧k emaron̄ kōmeļeļeiki” (“Enaaj Likūt Eok Ioon Aeran im Kotak Eok N̄an Kapijuknen,” Kweiļo̧k eo Eļap, Māe 2016,102).