Aiseia 40–49

• Laajrak eo an wiik in ilo Itok, Ļoor Eō—N̄an Kajjojo Armej im Baam̧le ko ej elmakote kappukōt ennaan ko an kaenōm̧m̧an im kōjatdikdik ilo Aiseia 40–49 im kōllaajrake jet iaan eoon ko n̄an jino kake. Kwomaron̄ kajjitōk ippān ro uwaan kūlaaj eo n̄an kwaļo̧k jabdewōt ennaan ko raar loe. Kōketak er n̄an kōnonop kōn etke ennaan kein remaron̄ in kar jipan̄ Riju ro ilo kōm̧akoko im ekōjkan aer maron̄ jipan̄ kōj rainin. Kwomaron̄ barāinwōt kwaļo̧k ippāer eoon ko kwar loi ilo ekkatak eo am̧ make. Ta eo Irooj ej kōņaan bwe jen jeļā kōn E? Elmen An kaenōm̧m̧an kōj? Kwomaron̄ kakeememej ro uwaan kūlaaj eo bwe “Irooj eo” ilo Kallim̧ur M̧okta ej kōnono kōn Jeova, ak Jisōs Kraist.

• Al in jar eo “Bedbed Eo E Bin” (Al ko Al in Ajri, nō.5) kōjerbale āinwōt pedped in naan ko an Aiseia Aiseia 41:10; 43:2–5; 46:4. Ālkin riit eoon kein im al eoon ko an al in jar eo rekkar, ro uwaan kūlaaj eo remaron̄ kōnono kōn iien ko raar en̄jake an Irooj kar pād ippāer im ekōjkan an en̄jake ko aer kar jipan̄ er n̄an “jab mijak.”

• Ta meļeļe in n̄an erom “ri kōnnaan ro” an Irooj? Ro uwaan kūlaaj eo remaron̄ kejekļo̧kjeņ kōn kajjitōk in ilo aer riiti juon ak elōn̄ļo̧k eoon kein: Aiseia 40:1–3, 9–11; 48:20–21; 49:1–9. Ennaan eo ilo “Kein Jipan̄ Ko Jet” emaron̄ barāinwōt letok jet uwaak ko. Ta “ naan ko reṃṃan” me jej kwaļo̧ki āinwōt rikam̧ool ro an Irooj? Ta eo ilo eoon kein ejipan̄ kōj “jab mijak” n̄an kwaļo̧k kam̧ool eo ad? (Aiseia 40:9) Ro uwaan kūlaaj eo remaron̄ kōnono kōn iien ko rem̧m̧an raar aikuj in ero rikam̧ool ro an Irooj im ekōjkan an naan in kam̧ool ko aer maron̄ kōjeraam̧m̧an ro jet.

• N̄an jipan̄ ro uwaan kūlaaj eo kōjerbale katak ko ilo Aiseia 43:8–13, kwomaron̄ kajjitōk ippāer n̄an pijaikļo̧k bwe kar kūr er n̄an rikam̧ool ilo juon iien ekajet ilo im̧ōn ekajet eo. Ilo ekajet in, Jisōs Kraist kar ņa ruwōn kōn ennaan eo kar je ilo Aiseia 43:11. Eļan̄n̄e kar kūr kōn āinwōt rikam̧ool ro rej rejtake ennaan eo an Jisōs (lale eoon10), ta naan in kam̧ool eo jemaron̄ kar kwaļo̧k? Ta kein kam̧ool eo jān mour ko ad naaj kar kwaļo̧k?

• Bōlen ro uwaan kūlaaj eo remaron̄ ekōnon kōn ekōjkan an naan kein jān Elder Quentin L. Cook ejipan̄ kōj meļeļe Aiseia 48:10: “Jon̄ak ko an m̧wil im jim̧we eo me rej ejaki ilo upaaj in en̄taan rej kōweppān im karreoik kōj” (“The Songs They Could Not Sing,” Kweilo̧k Eo Eļap, Nob. 2011,106). Remaron̄ barāinwōt kōnono kōn ekōjkan an “upaaj in en̄taan” eo aer make kar jipan̄ kōkāāl er ilo jetōb. Ekōjkan an Aiseia 49:13–16 jipan̄ kōj n̄e jej en̄taan? Lale barāinwōt pija in alooj eo “The Refiner’s Fire” (ChurchofJesusChrist.org).

  

  5:2

Būreejtōn Magaret D. Nadauld ekar kōmeļeļeik ta meļeļe in n̄an “jutak āinwōt rikam̧ool ro an Anij ilo aolep iien ko im ilo aolep men otemjeļo̧k, im ilo aolep jikin ko” (Mosaia 18:9):

“Ilo jutak āinwōt juon rikam̧ool ilo aolep iien ko, jej kallim̧ur n̄an iakwe Irooj, n̄an kautiej E ilo aolep iien ko—raan im bon̄, iien meņeņ im iien m̧ōļo, iien ko rem̧m̧an im iien ko renana—iakwe Irooj im kōm̧m̧an bwe iakwe eo en kwaļo̧k jān wāween ad mouir.…

“Jutak āinwōt juon rikam̧ool ilo aolep men ko ej meļeļe aolep men ko—men ko rekkilep, men ko reddik, ilo aolep bwebwenato ko, ilo kōjak ko, ilo ikkure ko ikkure im bok ko riiti im al ko ron̄jaki, ilo men ko rejtaki, ilo jerbal in jipan̄ kōm̧m̧ane, ilo nuknuk ko kōņaki, ilo jemjerā ko kōm̧m̧ani.…

“Āliktata, jej ba bwe jenaaj jutak āinwōt juon rikam̧ool ilo aolep jikin ko. Ej meļeļe in ejjab wōt ilo jikin ko ilo̧bwilej ak ilo jikin ko rettiņo, ilo jikin ko remarok ak ilo jikin ko remeram; ilo m̧ōn jar eo, jikuuļ, m̧weo, ak waan ettōr ko; ilo jikin ko ilo toļ ko ak jikin ko ilo jikin tutu ko iparijet; ioon iaļ eo ak ilo baak eo.…

“N̄e jej ļōmņak kōn wōj eo an menin letok eo an [Rilo̧mo̧o̧r eo] n̄an kōj, ta men eo edik jemaron̄ kōm̧m̧ane n̄an E im n̄an Jemedwōj Ilan̄ eo ekar jilkintok E? Jemaron̄ jutak āinwōt rikam̧ool ro kōn iakwe eo Aer im katak ko ilo aolep iien ko, ilo alep men ko, im ilo aolep jikin ko” (“Stand as a Witness,” Ensign, Māe 2000, 93,95).