Aiseia 13–14; 24–30;35

• Āinwōt Nipai, ro uwaan kūlaaj eo am̧ remaron̄ ļaudin̄din̄ ilo kam̧ool eo an Aiseia kōn Jisōs Kraist (lale 2 Nipai 11:2). Kwomaron̄ kajjitōk ippāer n̄an kwaļo̧k jabdewōt eoon ko raar loi ilo aer riit wiik in me ekar katakin er kōn Rilo̧mo̧o̧r eo. Ak kwomaron̄ kajjitōk ippān ro uwaan kūlaaj eo n̄an kwaļo̧k ta eo rej ekkatak kōn Jisōs Kraist jān Aiesia 24:21–23; 25:6–8; 26:19; 28:16 ak eoon ko jet me kwar loi ilo ekkatak eo am̧. Etke m̧ool kein raorōk n̄an kōj?

  

• Laajrak eo an wiik in ilo Itok, Ļoor Eō—N̄an Kajjojo Armej im Baam̧le ko ej elmakote kejekļo̧kjeņ kōn jet iaan waanjon̄k ko Aiseia ekar kōjerbali n̄an kōmeļeļeik kaje ko an oktakļo̧k jān Irooj im jab bōk rikanaan ro An. Kajjitōk ippān ro uwaan kūlaaj eo n̄an kwaļo̧k ta eo raa ekkatak. Ak kwomaron̄ kajjitōk ippāer n̄an kajjojo etale juon iaan eoon kein: Aiseia 24:1–5; 28:7–8; 29:7–10; 30:8–14. Pedped ioon ta eo kom̧ kar riiti, remaron̄ kadedeļo̧k jāntōj in: “Eļan̄n̄e jej oktakļo̧k jān Irooj, jej āinwōt…” Ta eo jemaron̄ kōm̧m̧ane n̄an pād wōt ilo tiljek n̄an Irooj im joļo̧k maroklep eo? (Lale “Kein Jipan̄ ko Jet” kōn jet elmakot ko.) Ekōjkan an Irooj kōjeraam̧m̧an ro me rej pād wōt ilo tiljek n̄an E?

• N̄an jino juon iien ekōnono kōn m̧wil ko im m̧anti ko me remaron̄ tōlļo̧k kōj n̄an maroklep, kwomaron̄ kajjitōk ippān kajjojo ro uwaan kūlaaj eo n̄an etale Aiseia 24:1–5; 28:1–8; 29:7–10; 30:8–14. Kajjitōk ippāer n̄an pukōt men ko me armej ro ilo iien eo an Aiseia raar ļōmņak kaki im kōm̧m̧ani. Kōm̧m̧ane juon kakkōl ioon boot eo me ej ba Kakkōl: M̧wil kein im M̧anti kein remaron̄ tōlļo̧k n̄an maroklep. Ro uwaan kūlaaj eo remaron̄ kōllaajrak ioon boot eo ta eo rej loe ilo eoon ko. Leļo̧k n̄an er iien em̧m̧an n̄an kwaļo̧k ekōjkan aer kōjparok er make ak baam̧le ko aer jān maroklep.

• En̄in ej kajjitōk eo kwomaron̄ je ioon boot eo me emaron̄ jipan̄ ro uwaan kūlaaj eo kejekļo̧kjeņ kōn Aiseia29: Ekōjkan an jeje ko an Aiseia kōnono kōn Jepļaaktok eo an gospel eo ilo tōre in ad? Kōketak er n̄an ļōmņak kōn kajjitōk in ilo aer ikōn̄ riiti Aiseia 29:13–24. Eļan̄n̄e rej aikuj jipan̄, kwomaron̄ barāinwōt etale eoon ko āinwōt kein: 2Nipai 27:6–26; Josep Smith—Bwebwenato 1:17–19, 63–65. Ālkin aer kōnono kōn kajjitōk eo ioon boot eo, remaron̄ ekōnono kōn etke “kōppaļpaļ” im “kabwilōn̄lōn̄” (Aiseia 29:14) rej naan ko rem̧m̧an n̄an kōmeļeļeik Jepļaaktok eo an gospel eo. Ta eo jej ekkatak kake kōn Jepļaaktok eo jān “The Restoration of the Fulness of the Gospel of Jesus Christ: A Bicentennial Proclamation to the World”? (ChurchofJesusChrist.org).

• jebta 30 im35 in Aiseia epād ie jejjo eoon ko me remaron̄ im̧we eļapļo̧k tōmak ilo kajoor eo an Irooj n̄an kōjeraam̧m̧an ro me rej oktakļo̧k n̄an E. N̄an jipan̄ ro uwaan kūlaaj eo lo eoon kein, kwomaron̄ kajjitōk ippāer n̄an ekkatak Aisia 30:18–26 ak Aiseia35. Kajjitōk ippāer n̄an kwaļo̧k naan ko ak eoon ko rej loi me emaron̄ jipan̄ juon oktakļo̧k n̄an Irooj n̄an pinmuur.

Būreejtōn M. Russell Ballard ekar letok kapilōk in n̄an jipan̄ kōj pād wōt ilo tiljek n̄an Irooj im Kabun̄ eo An:

““Jej aikuj en̄jake juon oktak n̄an kōļapļo̧k tōmak eo ad ilo Jisōs Kraist im ad pokake n̄an ko̧jpeļ eo An ilo aolepen mour ko ad―jab ilo juon wōt iien, ak aolep iien [lale Alma 5:26].…

“…Naan ko an Irooj, loi ilo jeje ko rekwojarjar im katak ko an rijilōk im rikanaan ro Rej letok kapilōk im tōl n̄an kōj bwe, n̄e jej lo̧o̧ri, enaaj jerbal āinwōt juon kein eppepe eo enaaj jipan̄ kōj jeļā kilen jirōk likatōttōt.…

“Ilo kakobaba n̄an ejake juon m̧wil an juon make ilo riiti jeje ko rekwojarjar, jej aikuj in āinwōt ļōm̧aro nejin Mosaia n̄an leļo̧k kōj make ‘n̄an eļap jar, im jitlōk’ [Alma 17:3]” (“Pād wōt ilo Wa in im Jirōk Likatōttōt!” Kweilo̧k eo Eļap, Nob. 2014, 90–91).